GJENNOM ÅRET
NYTTÅRSNATT
Nyttårsnatt!
Frasande eldkuler mot mørk nattehimmel.
Stjernedryss over snødekt jord.
Lysfest … fargeshow!
Strålande vakkert!
Vakkert?
Mot same himmel tøyer seg tynne, beinete fingrar.
Grip bedande ut i mørk natt − strekkjer seg mot svart himmel − ber om brød!
Nyttårsnatt!
Glitrande stjerner blinkar i sekund og sloknar − er brød sprengt til støv i tomt, kaldt rom.
Nyttårsnatt!
Stjernedryss … fargeshow …
Magre hender ber om brød!
KVIT DAG
Frosten pusta kald i natt.
Kledde skog og mark i kvit rimham.
Heldt stivna verd i isgrep.
Ut av bitande natt stig ny dag.
Naturen står omskapt − møter morgonen kvit og rein i kald, harmonisk ro. Morgonlys leikar over glitrande diamant.
Strålar frå bleik sol funklar i sølv på rimdekt kvist.
Frosten
− med kvelande isgrep, let ny dag stiga fram i eventyrleg venleik.
NY DAG I NY SNØ
Rein nysnø, kvit morgon.
Natta har viska ut alle spor.
Lagt mjukt dekke over mo og myr.
Eg ser verda rein og ny
− kjenner sug etter å gli over den blanke, urørde flata.
Vågar eg gå der ingen har gått før?
Vågar eg setja spor over urørd mark?
SPOR I NYSNØ
Blå søkk i kvit snø.
Eit menneske
har gått før meg − sett spor over snødekt flate − lik mine spor
To menneske på einsam veg i ny dag.
Du og eg!
Tanken kjenner trygg ro.
To menneske … mellom ligg stilla, som lauvtynn, skjør is.
Kven er du som går i stilla før meg?
Hjarta bankar uroleg!
To menneske
− to spor langs aude veg i ventande stille.
NY DAG
Tungt mørker
over kald jord.
Nattsvart skog
− skog utan lyd.
Kolsvart vatn
− vatn utan krusning.
Doggvåt natt
− natt utan lys.
HER
i svarte natta
når mørkeret
ikkje blir djupare …
HER
byrjar den nye dag.
NY VÅR
Blank, stålblå istapp
tøyer spissen ned frå takrenna:
Ein vinterskulptur
skapt av frost i kald, mørk natt.
I dag leikar gylne strålar om blank krystall.
Stryk varsamt − lik ømme kjærteikn om ismonument.
Omskapar glasklår, hard is til perlande vatn.
Blanke dropar − grunnsubstansen i alt liv på jord.
Ein skjelvande drope
i spissen av frostkald istapp funklar i lyset − i sekund.
Slepper taket − dryp med von mot kvit jord.
Kvart drypp rører øyra − sender varme bølgjer av nye tonar inn i vinterstemt indre:
Ny vår! Ny vår!
