Eystrahorn Fimmtudagur 27. september 2012
33. tbl. 30. árgangur
www.eystrahorn.is www.eystrahorn.is
Ungmennasambandið Úlfljótur heldur upp á 80 ára afmæli sambandsins um þessar mundir. Það er tímanna tákn að sjá þessa stóru byggingu sem auka á möguleika fólks á öllum aldri að stunda heilbrigt tómstundastarf. Þegar hugsað er til baka þá eru ekki svo mörg ár síðan enginn „boðlegur“ íþróttavöllur eða íþróttahús var í héraðinu en samt fóru drengir og stúlkur út að hlaupa, stökkva, kasta og sparka bolta við frumstæð skilyrði. Þess vegna er það mikið fagnaðarefni hvað íþróttaaðstaðan er orðin góð og fjölbreytt á seinni árum. Það á að vera áhuga- og hugsjónafólki hvatning að vinna enn frekar að eflingu þess mikla og góða starfs sem nú þegar er unnið á vegum ungmennafélaganna og annarra félagasamtaka.
Ungmennasambandið Úlfljótur – USÚ 80 ára Ungmennasambandið Úlfljótur var stofnað árið 1932 og fagnar því 80 ára afmæli á þessu ári. Þorsteinn Geirsson frá Reyðará lýsti stofnun þess á eftirfarandi hátt í 50 ára afmælisriti USÚ: „Það andaði köldu af norðri fyrstu sumardagana 1932. En smátt og smátt dró úr kuldanum og hvítasunnudaginn 15. maí streymdi milt vorregnið til jarðar og vökvaði vannærðan gróður svo að túnkragarnir kringum bæina urðu brátt gulflekkóttir af sóleyjum og fíflum. Það var því verulegt vor í lofti er stofnfundur Ums. Úlfljóts var haldinn á Höfn í Hornafirði laugardaginn 28.maí 1932. En það var einnig vor í hugum þeirra manna, sem sóttu umræddan stofnfund. Þeir, sem lengst voru að komnir höfðu lagt um 40 km vegalengd að baki og hluti leiðarinnar vegleysur og jökulfljót. Þá voru aðeins tvær ár í sýslunni brúaðar, ennfremur afar lítið búið að byggja upp af vegum og bílakost sýslubúa mátti telja á fingrum annarrar handar. Eigi var heldur í skyndi náð saman til fundarhalda í gegnum síma því aðeins voru landssímastöðvar á nokkrum bæjum í sýslunni en sveitasími enginn.“ Á fundinum var farið nokkrum orðum um stofnun og tilgang sambandsins. Var kveðið á um að vaka fyrir að sameina dreifða krafta áhugasamra æskumanna í ungmennafélögunum, efla menn til sameiginlegra átaka á sem flestum sviðum héraðinu til heilla.
Ungmennasambandið helgaði sér strax við stofnun nafn fyrsta leiðsögumanns þjóðar vorrar Úlfljóts, sem bjó að Bæ í Lóni. Að stofnun USÚ komu: Umf.Öræfa, Öræfum, Umf Vísir í Suðursveit, Umf. Valur á Mýrum, Umf. Máni í Nesjum, Umf. Hvöt í Lóni Í dag eru virk aðildarfélög USÚ: Umf. Öræfa, Umf. Máni, Umf. Sindri, Golfklúbbur Hornafjarðar, Hestamannafélagið Hornfirðingur og Mótocrossfélag Hornafjarðar. Markmið ungmennafélaga eru líklega ekki svo frábrugðið þeim sem menn lögðu upp með í byrjun. Gaman er að grípa niður í lög Umf. Mána frá 1979 en þar segir í 2. grein. Tilgangur félagsins er: • Að vernda og efla stjórnarfarslegt, menningarlegt og fjárhagslegt sjálfstæði Íslendinga. Vekja virðingu þeirra fyrir þjóðlegum verðmætum sínum og annarra. • Að hjálpa félagsmönnum og öðrum til aukins menningarþroska með fræðslu og líkamsþjálfun. • Að vinna að landgræðslu • Að vernda æskulýð gegn neyslu áfengra drykkja og ýmissa skaðlegra nautnalyfja. • Að skapa heilbrigðan hugsunarhátt meðal æskulýðsins, fegra og hreinsa móðurmálið. • Kjörorðið er: Íslandi allt.
Hér má sjá að margt af því sem menn lögðu áherslu á 1979 stenst að fullu tímans tönn. Í dag snýst þó stærstur hluti starfsins hjá USÚ um íþróttastarf. Það er þó ekki þannig hjá öllum aðildarfélögum t.a.m. er stór hluti starfsins í Öræfum félags- og menningartengdur. Einnig stóð Umf. Máni lengi fyrir uppsetningu á leiksýningum og muna flestir eftir uppsetningunni á „Fiðlaranum á þakinu“ á afmælisári þeirra. Helstu málefni sem við hjá USÚ erum að vinna að á þessu ári er undirbúningur að unglingalandsmóti UMFÍ sem verður haldið hér um verslunarmannahelgina næsta sumar. Við héldum einnig stórt mót núna í byrjun ágúst Meistaramót Íslands 15-22 ára. Við erum að vinna að gerð nýrrar heimasíðu USÚ. Í samvinnu við Ferðafélagið hér erum við að vinna að merkingu leiðarinnar „Fyrir Horn“ og uppsetningu á upplýsingaskilti við Almannaskarð. Ungmennasambandið heldur einnig utan um Lottó greiðslur og úthlutar til aðildarfélaga okkar. Hér er svona tæpt á nokkrum atriðum en listinn er aldrei tæmandi. Stjórn USÚ Matthildur Ásmundardóttir, formaður Sigurður Óskar Jónsson, gjaldkeri Þórhalla Magnúsdóttir, ritari
Ungmennasambandið USÚ 80 ára
Við bjóðum íbúum Sveitarfélagsins Hornafjarðar til afmælisfagnaðar í Mánagarði sunnudaginn 30. september kl. 14:00 - 17:00. Byrjað verður á skemmtilegri keppni í ýmsum óhefðbundnum greinum á Mánavöllum og síðan boðið í kaffiveitingar í Mánagarði. Stjórn USÚ