Eystrahorn 10. tbl. 34. árgangur
www.eystrahorn.is www.eystrahorn.is
Fimmtudagur 10. mars 2016
Bókmenntahátíð í Þórbergssetri 13. mars Hin árlega bókmenntahátíð verður í Þórbergssetri sunnu– daginn 13. mars næstkomandi kl. 14:00. Dagskráin er að mótast, en ljóst er að þetta verður kvennahátíð þar sem konur í rithöfunda- og fræðimannastétt verða gestir hátíðarinnar að þessu sinni, auk Kvennakórs Hornafjarðar Iðunn Steinsdóttir, sem í föðurlegginn er ættuð frá Kálfafelli í Suðursveit kemur og les úr nýútkominni bók sinni, Hrólfs sögu. Þar rekur Iðunn sögu langafa síns í móðurætt sem háði harða lífsbaráttu sem sveitarómagi og síðar vinnumaður í lok 19. aldar. Halldóra K. Thoroddsen fékk á dögunum fjöruverðlaunin í flokki fagurbókmennta fyrir bókina Tvöfalt gler. Hún ætlar að heimsækja okkur Skaftfellinga þennan dag og kynna bókina, en bókin hefur vakið mikla athygli. Í umsögn um bókina sem skrifuð er um konu á áttræðisaldri segir svo,, Tvöfalt gler er þétt, skrifuð af einstöku næmi og hún er „stór“ þótt hún sé stutt. Höfundur dregur upp eftirminnilega mynd af lífsþorsta
Halldóra Thoroddsen
og ástarþrá manneskju sem dafnar og vex þegar dauðinn er allt í kringum hana. Í föruneyti Halldóru verður Guðrún Pétursdóttir vinkona hennar, en þær stöllur dvöldu á Hala hluta úr sumri á sjöunda áratug síðustu aldar. Þá varð uppi fótur og fit í Suðursveit sérstaklega hjá ungum og ógiftum piltum og mikið fjör á Halabæjunum. Ef til vill rifja þær stöllur upp eitthvað frá dvöl sinni í Suðursveit fyrir hart nær hálfri öld. Í þriðja lagi kynnir Soffía Auður Birgisdóttir bók sína um Þórberg ,,Ég skapa, þess vegna er ég,”. Soffía hlaut menningarverðlaun Hornafjarðar fyrir þetta einstaka bókmenntaverk og einnig hefur
Guðrún Pétursdóttir
bókin verið tilnefnd til verðlauna Hagþenkis. Bókin er fræðileg umfjöllun um verk Þórbergs Þórðarsonar, að baki liggur geysimikil rannsóknarvinna, sem varpar ljósi á hversu víðlesinn og hámenntaður Þórbergur var. Soffía rekur tengingar Þórbergs við heimsbókmenntir og þekktar bókmenntastefnur, og sýnir á óyggjandi hátt fram á hvernig hann með skrifum sínum og skáldskap skapaði meðvitað nýtt bókmenntagervi í íslenskum bókmenntum, skáldævisöguna. Kvennakór Hornafjarðar kemur á staðinn og byrjar dagskrána með því að syngja fáein lög.
Soffía Auður Birgisdóttir
Iðunn Steinsdóttir
Allir eru velkomnir á meðan húsrúm leyfir. Bókmenntahátíð hefur oft verið fjölmenn og því vonum við sannarlega að Hornfirðingar og Skaftfellingar sjái sér fært að koma í heimsókn í Þórbergssetur þennan dag og njóta þeirrar menningardagskrár sem í boði er.
Í lok dagskrár eru kaffiveitingar.
Ríkar af karlmönnum á Lönguhólum
Síðustu mánuði hafa verið 2-3 karlmenn starfandi í leikskólanum Lönguhólum og hefur það aldrei gerst í sögu leikskólanna á Höfn að fleiri en tveir karlmenn starfi í leikskólanum í einu. Í þessari
viku fjölgaði þeim í fjóra sem er heimsmet á Höfn. Kvenfólkið sem starfar í leikskólanum er afar sátt við að hafa karlmenn í vinnu í leikskólanum og leyfi ég mér að halda að börnin séu það einnig. Ég tel nauðsynlegt
að í menntastofnunum landsins sé jafnvægi á hlutföllum kynja. Karlmenn eiga vel heima í vinnu með börnum. Þessa dagana er átak í gangi á vegum Félags leikskólakennara að fjölga karlkyns leikskólakennurum.
Þið strákar sem eruð að íhuga framhaldsnám endilega kynnið ykkur leikskólakennaranámið.
Þorvaldur Viktorsson
Jóhann Bergur Kisel
Ragnar Magnús Þorsteinsson
Róbert Marvin Gunnarsson
Margrét Ingólfsdóttir leikskólastjóri Lönguhólum
Samfélagsvefurinn www.hornafjordur.is