Cesa de Jan n°20 2022

CESA DE JAN

DEZEMBER 2022 | NUMER 20

SARÉ ITE L 2022... PENSAN AL 2023!

EDITORIAL DEL DIRETOR DENNI DORIGO

Da no crei ci mprescia che passa l temp: nte la vita de na istituzion coche l Istitut Cultural Ladin Cesa de Jan, ulache vignidì fossa diesc robe da pié a mán, zispa l temp sciámpa sotfora. Mposcibile nte puoce righe scrive dut chël che l é sté fat nten ann: segur le doi publicazion "Ballando Bella Bimba" e "Cugniscion noste Vijinánze" n'à dé tropa sodisfazion Po i projec liei a la leje 482/99: avei podù giourì na picola senta a La Plié, l teater e l projet de ladin nte le scole (ence n Ampëz!), la publicazion de chëst folgio e souraldut rué a le 99 edizion del Almanach Ladin Senza desmentié dute le ativité fate ntel Ciastel d'Andrac, n Ampëz coi Mercui de ra Cultura Ladina, etz... e po la mascia de ncontade, che porta a crësce nte le relazion co la jent e che deventa tres momenc de confront: l di de l'Unitè Ladina a Reba, metù a jì deberiada co la Generela, l é sté n gran e bel moment ulache s'à sentù la voia de jì nnavánt e ulache s'à capì che ence per i jovegn nosta comunité ladina à segur n davignì L 2023 l sarà caraterisé da dute le scomenciadive che vignarà nvié via per recordé i 100 agn da la tripartizion dei ladins nte trei provinzie voluda dal fascism: na ocajion no demè per recordé chël che l é suzedù, ma souraldut per cialé al davignì e ciapé le soluzion acioche chëla tacia grija che zachei davánt cënt agn volëva crazé via, la devente tres plu da colour

BALLANDO BELLA BIMBA SARA AGOSTINI

VIII LIBER DE LA COLANA DE STUDI E NRESSIDE “LADINS DA SOURAMONT”

Doivizendeumanepeadeviantedoi contestisozio-culturaicotantdesvalif(la LadiniaelaSlesia),maliadeaunadalfilde lastoriaeche,nbeldi,leseciataràtacade foraeforantenaverastoriad’amor Da chestscritvenalalumncuadrodenoste comunità–nparticolardecheladeCol–convalgugnaspecchenefaspensàsora nodemàaltemppassà,machenedàla cefperliejeinciacheld’aldidancuoi La “grandastoria”lanovencontadacochen tratatscientifich,malasautaforasoraldut daognistoriapersonala,metudaiteda l’autrizeconscrupoleatenzion.

Dapodèciapànteognisenta delIstitutLadinCesadeJan

DI DE L'UNITÉ LADINA

MPRESCION E SPETADIVE

Na bandiera, senza vent, la resta cufada ju e la no rua a se fè cugnësce Demè l vent, n vent d’aisciuda, frësch e vif, l pò la descedé ndavò fora Chël vent l é propio chël porté dai jovegn, che i s'à biné a Reba, ai 7 de mei del 2022, n ocajion del prum scecol de vita de nosta bandiera, ntel ormei tradizional "Di de l'Unité Ladina" L é -poester- l prum viade che na delegazion de jovegn de vigni una de h le cinch val ladine à podù se senté pro taula, deberiada, per se confronté vis a vis su desvalis argomenc che à da ci fè co la realté ulache i vif Le mprescion regoiáste ntel dadomán e analisade dal avocat Andy Rossi, i é po ruade pro na taola torona dalvierta al publich, ulache plu personalité de valuta per l mond ladin à podù se pronunzié e respone ence a le dománde del publich. I jovegn à auzé fora l dejiderio che via per l ann vegne metù a jì plu scomenciadive per mëte n contat le comunité de vigni val: mascima ntel ciámp cultural, volëssa che la jent abe plu oportunité per se ncontè e spo per se cugnësce Per le nuove generazion fossa debujen che, almánco ntei ciámp ulache fossa plu saurì fè, vegne metù su lie ladine, che vade soura i confins fora: le mujiche, i cors, i nsegnánc, dute le sociazion de volontariat... Fè pert de la medema lia assa da ester na ocajoin de confront che dà l muot de crësce, siebelo a livel personal che coletif Ence dal pont de veduda istituzional volëssa che le istituzion ladine abe l muot de programé e de laoré deberiada: a scomencé dai Istituc Ladins, ma ence la scola, la politega, i comuns la Lia dei Comuns Ladins, podëssa dé na bela sburla a dut chëst L é sté auzé fora ence l debujen de avei n lengaz ufizial ugnol, nánter le cinch val ladine: na cuestion dalvierta da troc agn. Chësta ocajion l à mpermetù mprumadedut ai jovegn, ma po ence ai raprejentánc de le istituzion de se nconté, de se descore, de se sentì na comunánza che l'é viva, che no se bregla ados, che ciala al davignì e spo che à n davignì Bel fossa se chësta ocajion la no restássa ugnola, ma se ntei meisc e ntei agn che ven chël vent joven e gaiert l sceguitássa a soflé sul sentiment e la pascion che ten vif l popol ladin

De Euregio n ’ejiste plu de un, ma chël che à da ci fè con nos l é l “Euregio Tirol-Südtirol-Trentino”: l é na euro-region, spo n teritor de l’Europa, che fesc pert de desferente nazion Nte nost cajo, l tol ite Tirol, Südtirol e Trentin. Nte valgugn orghegn istituzionai l é sté dé lerch ence ai trei Comuns de Fodom, Col e Ampëz, ajache i à tres fat pert del vegle Tirol fin a la despartizion, voluda dal fascism. L Euregio l é spo n projet de colaborazion e de cooperazion nánter n teritor che à sue reisc nte storia, tradizion e cultura del popol tiroleje, ma che ciala al davignì nten contest europeich e co na vijion dalvierta, che và soura i confins fora L Istitut Ladin Cesa de Jan à n raport de colaborazion, souraldut ntei aspec storico-culturai, col Euregio: chëst ence percieche ades l raprejentánt dei trei Comuns de Souramont ntel Euregio l é propio l diretor Denni Dorigo "del Moro". L raport politich-istituzional nánter Euregio e Souramont à porté, ai 12 de setember 2022, a nen fat dassën simbolich: ntel self del capitán del Ciastel d'Andrac s'à biné l Ufize de Prescidenza del “Dreier-Landtag”, per l prum viade fora confin euro-regional L Capocomun da Fodom Leandro Grones “Moler” à damané che vegne fat varesc nnavánt acioche l raport istituzional nánter i trei Comuns e l Euregio l pobe crësce ntel temp L é vegnù damané che l "stato di osservatore" l devente efetif, spo che Souramont abe l dërt de voto coche i autri L à po damanè de pensé a co fè per rué a avei i trei Comuns ntel GECT del Euregio, che volëssa dì fè pert, ence dal pont de veduda teritorial, de chësta EuroRegion N ultima, i Comuns à palesé l dejiderio che, ence nte le sentade del Dreier-Landtag, vegne dé, de derit, na senta al member raprejentánt de Souramont. Dorigo, nte suo ntervent, à recordé che la mendránza ladina, ence davò cënt agn da la tripartizion, la se sent ncora trop liada a chësta realté: «Fodom, Col e Ampëz no vol plu ester consciderei tiera de confin, ma n usc dalviert del viers del Europa»

L EUREGIO

NA ISTITUZION CHE À DA CI FÈ CON NOSTE COMUNITÉ

Noste vijinánze: mujei senza mur e senza tët, scrins de storia, de cultura e de ert; testimoni del adatament e de la volonté de la jent ladina de vive n teritor difizile, ma ence bel da no dì L é propio a chisc luoc, debota desmentiei e lascei demez dal nteresc de fodomi e foresti, che l Istitut, auna a n grop de laour e al Mujeo Ladin Fodom, à dediché n projet de revalutazion L é sté fat n gran laour de nrescida, siebelo nte le vijinánze, descoran co la jent che ilò vif, che nte le sentade, ulache s'à metù auna dut l material regoiëst. Ncuoi, l projet "Cugniscion noste vijinánze" à beleche doi agn de vita e podon scomencé a regoie n puo' de fruc Chël del 2021, ma souraldut chël del 2022, l é sté n isté rich de vijite ite per dute le 18 vijinánze Duc i vijitadous, compagnei da noste guide, à podù cugnësce dadamprò ci che se scon davò chële gran majon, chi vegli molins, chi terioi o chële sieie che ncora fesc suo mestier Scouté le storie de dut chël che suzedëva ilò, ciarcé chelche spezialité e fè doi ciacole co la jent che ncora vif ilò, à lascé na bona mprescion ai vijitadous: na maniera e na ocajion per se sentì pert del paisc, de la comunité e no demè passé mprescia coi schi o co la roda Per daidé fora souraldut chi che ven da foravia, l é sté publiché n pico sciatul saurì da porté nte ruchsoch, con laite 12 picole publicazion che mpermët de jì davò a percos con desferenc ponc de nteresc per vigni paisc, ulache se pò vedei foto e lieje chelche nformazion storica n riferiment a chël luoch. Chisc pichi paisc dal gran potenzial, dalonc dal zenter de La Plié e de Reba, sconus via dal gran turism dai schi, ntei agn i é vegnus tres lascei da na pert Chëst projet l é n tentatif de fè n vare nnavánt: l é rué l moment de fè ndavò florì chël che on. Fodom no l é demè lifc o stradons per le rode: l é na cultura, na storia, na tradizion, na comunité! Trop l é ncora da cugnësce, da fè cugnësce siebelo ai fodomi, che ai foresć

UFIZE LADIN FODOM

L ISTITUT... SE FESC N TREI!

Davò Col e Ampëz, ades l é l viade dei fodomi, che da puoch i à na senta del Istitut ence nte suo Comun L Ufize Ladin l é sté giourì n lunesc ai 14 de november del 2022 ntel local del vegle tabachin, pro boteiga, nta La Plié. Avei n ufize nte paisc, da podei consulté cánche s’à debujen, senza mossei rué nte la senta prinzipala via Col, l eva deventé da n pez na priorité da ndarzé fora Chëst servisc l é n aiut per l’Aministrazion de Comun col “Sportello Linguistico”, ma souraldut l vol deventé n luoch de coordinament de dute le ativité culturale. La prejenza de n tèl ufize la dà, ntel medemo temp, la dignité de podei douré deplù l ladin nte dute le ocajion, ence ntei ufizi publizi – tánt che l talián – e spo de “uficialisé” o “legitimé” la situazion storica de bilinguism che on nte le val ladine de Souramont che no l é puoch! Ci podaralo ve porté a storje pro l ufize ladin? Le situazion i é desvalive:

CUGNISCION NOSTE VIJINÁNZE

ENCE L PLU PICO PAISC

À VELCH DA CONTÉ

per traduje o ence mefo comedé n test che volei mëte fora scrit per ladin, per ciarì dubi su la gramatica ladina, per damané nformazion n riferiment a storia e cultura fodoma, per tò adimprëst liber de la biblioteca de la Cesa de Jan, ma ence per compré ju velch publicazion Per porté voste proposte -che scounton su chero gënn- o per damané aiut per realisé velch che abe nte chelche modo a ci fè con nost lengaz, nosta cultura e nosta val: n projet, na teji de laurea, na scomenciadiva nsoma: l é n pont de riferiment per duc chi che à a cuor nosta cultura e nosta comunité fodoma! Son ilò dal lunesc al vender, da le 9:00 a le 12:00.

Stimolà la manualità, la creatività e la fantajia; stà auna, duorà l lengaz ladin e po se gode: chis i obietif che à ispirà nost nuof projet per l an da scola 2022/2023 Da n marcui ai 23 de novembre, l é pée via na rica sajon de atività per duc i tosac e le tosate, i jovegn e le jovene da Col da la prima elementare fin a la terza mesana Nten moment malsigur coche chest, ulache someava che n valgune atività del daremesdì le sarave vegnude a mancé gauja l aument dei cosc, l eva na priorità che i pi jovegn abe a dispojizion n luoch ulà se ciatà per stà duc auna, a fà valch de bel. Ben zinch l é i modui prejentai, che i jirà navant fin a la fin de mai: mparà a duorà gusele e fereti; duorà l legn per svilupà la manualità e la creatività; leture creative; ntroduzion al mond del teater; ntroduzion al mond de la mujica Dut chest l é stà possibile demà col prezios aiut de set personeda Col e da le vai apede - che con gaist à azetà de vignì a trasmete ai tosac suo savè e suo entusiasm E po, sessaben, incia co la fiduzia da banda dei genitori, che à delongo credù nte la potenzialità de chest projet e che po à nconsentì che l numer de partezipanc l siebe pi aut de chel che s'avesse podù se spetà. Donca, jon navant con chest esperiment e vardon incia a co l fà cresse ntel davignì!

LADIN INZE SCORA

SCOMENZA DANOO RA ATIVITAS

PAR I PIZE D'ANPEZO

Trope i no capisce el valor de podé śì a scora co ra parlada de minoranza, ma dute sà che, par tegnì su 'na parlada e ra fei ruà a ra noa jenerazios no basta pì solo ra families, soralduto aldidancuoi, co 'na sozietà senpre pì sciora e agnó che, de spes, inze 'na familia, almanco 'na parsona ra no n'é ladina Saon ben che inze i tre Comune de Souramont no n'on 'na scora ladina, perceche ra no n'ea inze i projete de ra Provinzia de Belun e gnanche de ra Rejon Veneto Ma, chesto no vó dì che ra comunitas no s'ebe dà da fei L Istitut Cesa de Jan, inze chiste ultime anes s'à tanto inpegnà, soralduto in Anpezo, agnó che l é duto pì difizile Chesta ota on ciapà ra disponibilità del dirijente e de ra so colaboradores, soralduto de ra maestra Monica Dalus, che ra m'à dià a bete su el projeto. Dapò on abù ra grazia de aé ra disponibilità de tre maestres in pension e che no n'à mai pardù l amor par i pize: Flora Menardi “Diornista”, Elisabetta Menardi “Diornista” e Tiziana Ghedini Eres 'ś'à azetà el conpito da parte del Istitut e, come "esperte esterne", 'ś'à podù śì inze scora par bete su un laboratorio de teatro co ra tre clases cuintes L é un pizo pas inaante, ma dute aduna vardaron de fei duto el poscibile par dà ra poscibilità a ra nostra noa jenerazion de tegnì su ra nostra parlada e ra nostra cultura ladina