Sant Jòrdi 2023

Ei ua des hèstes mès polides e estimades en Catalonha: era Diada de Sant Jòrdi. Eth 23 d’en abriu, es catalanes e es catalans aumplim es carrèrs e es places de tot eth país de ròses, libres e senhères. Era Diada de Sant Jòrdi ei ua jornada festiua e populara dificila de compréner entà qui non l’a viscuda jamès. E ei que quina tradicion mès polida qu'auem en Catalonha! Era celebracion non pòt èster mès simpla: eth rituau consistís en tot passejar, crompar ròses e libres entà regalar as èssers estimadi. Ath delà, ei ua meravelhosa oportunitat entà poder interactuar damb es nòstes escrivanes e escrivans predilèctes.

Era Diada de Sant Jòrdi ei eth nòste particular dia dera literatura e era cultura. Ei considerat un dia de promocion e defensa dera cultura e era lengua catalana. Ei abituau trapar libres en totes es lengües que se parlen en Catalonha, mès ei sustot ua excellenta oportunitat entà mostrar era vitalitat, fortalesa e capacitat de coesion dera lengua catalana en Catalonha, e dera lengua occitana en Aran. Dempús des sòns inicis, a supausat un impuls ara produccion e ara lectura deth libre en catalan.

Era Diada de Sant Jòrdi tanben ei eth nòste particular dia der amor e era estima. Encara qu'era tradicion ditz qu'eth li regale ua ròsa ara hèmna estimada e era un libre ar òme estimat, erosaments aué ei ua hestivitat cada còp mès liura d’estereotips sexistes. E ei qu'es hemnes tanben liegen e es òmes tanben les agraden es ròses. Per açò, regalam libres e ròses as persones que mos estimam en tot abraçar era lectura.

Era cultura ei sense dobte un potent estrument de transformacion sociau. Mejançant es libres viuem infinitat de vides, liéger mos hè a èster persones mès liures e qüestionar-mos era realitat que mos entornege. Pr'amor que ne es dragons son tan herotges, ne es princesses tan delicades, ne es cavalièrs tan valents. Bona Diada de Sant Jòrdi!