ANDAM NA ANG AGUSAN DEL NORTE ALANG SA PAG-ARANGKADA SA PROCESS! PROCESS! PROCESS

By Karen Kei V. Decamotan

Gipirmahan ni Gobernador Dale B. Corvera karon sa probinsya sa Agusan del Norte ang siyam ka Memorandum of Understanding (MOU) alang sa hiniusang paglihuk pagpahiluna og mga Core Processing Projects sa mga lungsod sa Agusan del Norte ug niini andam na ang probinsya sa pag-arangkada sa Process! Process! Process! Project, ang kaluhang proyekto sa Plant! Plant! Plant! Project ubos sa AGUSAN UP! Ang AGUSAN UP! mao ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kongresista Angel Amante-Matba. Ang Core Processing Projects mao ang mahimong dugokang ekonomikanhong kalihukan sa pagproseso ug mahimong merkado sa abot sa mga kalihukan sa Plant! Plant! Plant! o sa mga hilaw nga materyales nga abunda ang usa ka lugar, sumala pa kang Gob. Corvera. Pinaagi sa maong mga processing projects gilantaw sa probinsya nga makab-ot ang panglantaw niini nga mahimong agri-processing center sa rehiyon sa Caraga, mahimong mas produktibo pa ang resources niini, makamugna og libuang trabaho ug mahaw-as ang daghan sa pamilya niini gikan sa kawad-on. Kasabot sa probinsya sa maong mga MOU ang mga Local Chief Executive o Mayor sa matag lungsod o syudad ug mga nagunang industry players, ang buhatan ni Kongresista Amante-Matba ug mga nasudnong ahensya. Ang Core Processing Projects nga sumala pa sa MOU pangunahan sa probinsya ang pagpahiluna mao ang mosunod: Nasipit Agusan del Norte Industrial Estate o NANIE ug Chocolate Procsessing City sa lungsod sa Nasipit; Orchard Stopover o pagproseso ug prutas sa Carmen; Beyond Rice sa RTR o ang pagproseso sa bugas ngadto sa kakanin, bino ug uban pang produkto; Waste to Energy Power Plant sa Magallanes; Abaca Handicraft Village sa Syudad sa Cabadbaran; Mineral Processing sa Tubay; Integrated Coconut Processing Center sa Jabonga, ug; Food Basket o ang pagtanum ug pagproseso og pagkaon sa Kitcharao. Kasamtangang gi-proseso usab ang mahimong kasabutan alang sa Feed Mill sa Las Nieves, sa Sardine Processing sa Buenavista ug sa Banana Processing sa Santiago. Gitakda nga himoan ang nahisgutang mga proyekto og feasibility studies, hulmahon ang mga corporate entities niini, pangitaan sa gikinahanglang investments unya dayon na sa pagpatuman niini. (Agusan Up, LGU Agusan del Norte/PIA Agusan del Norte)