PAPIAMENTU
7 DI MEI 2022
GANA PROMOVIDEO PROFESHONAL
Writers Festival Curaçao ta bai organisá un festival kandente i inovativo bou dje tema: ‘Writers meet Singers’. Esaki ta bai tuma lugá di 7 di mei próksimo. Meta ta pa djòin eskritornan di obranan original manera p.e. poesia i kuenta (kòrtiku) huntu ku talento musikal i asina uni forsa. Tur esaki for di e pensamentu ku idioma i muzik ta semènt di un komunidat. Kiko ta mas bunita ku un teksto atraktivo i impaktante, kombiná ku bunita muzik? Kiko ta meta dje festival? Meta ta pa uni talento riba e tereno di muzik i di skibi teksto. Asina nos ke brinda boso un oportunidat pa ta den kontakto ku otro, sera konosí ku otro i pone man na obra. Ken sa kuantu esaki por resultá den un obra nobo? I nos festival tá ofresé bo un podio pa esaki. Pa ken e festival akí ta? E festival ta pa tur esnan ku tin pashon pa skibi i/òf pa muzik, sea ku bo ta debutante òf un hende ku hopi eksperensia. E ta pa hóben te ku hende ‘di edat’. Bo partisipashon por ta na papiamentu, spañó, ingles òf ulandes. Ta posibel partisipá komo indivudual, pero sí ku e intenshon pa bai en buska di un partner ku ta sea skibi òf sea komponé muzik. Pero tambe bo por inskribí komo un grupo ku ya ta kompomé muzik òf ta skibiendo huntu. Kon un k’e otro ta bai tuma lugá? Nos ta ranka sali ku dos enkuentro di ret ‘Writers meet Singers’. E dos enkuentronan akí lo tuma lugá riba dia 12 di mart i dia 30 di mart. Por inskribí pa ún dje anochinan. Kantidat di partisipantenan ta limitá, asina perkurá pa bo inskirbí na tempu! Durante e enkuentronan akí nos ta bai splika bo e intenshon na plaka chikí. Tambe lo invitá bo pa presentá un ‘pitch’ kòrtiku. Ku e e pitch akí bo ta presentá bo mes, indikando ken bo ta buskando komo partner komplementario, sea pa skibi òf pa komponé muzik. Durashon di e pitch ta máksimalmente 5 minüt. Banda di esei tin un tremendo PubQuiz pa laga tur esnan presente konosé otro mihó. Den e di dos parti di e anochi tur hende lo haña oportunidat pa sosialisá ku otro i kompartí idea. Ta un manera pa trese dos mundu huntu i lenk nan, pa yega na obranan nobo den kooperashon. E dos mundunan akí sa topa otro kaba, pero aworakí ku nèt un toke diferente. Intenshon ta pa e obranan nobo akí finalmente ta bai kompetí ku otro riba dia 7 di mei den e Festival Writers meet Singers.
E tempu entre e dos enkuentronan di ret i e festival riba 7 di mei ta netamente e periodo pa konhuntamente pone man na obra. Trabou huntu lo tin ku yega na un komposishon nobo i spesial, kaminda teksto i muzik ta topa otro den harmonia. Ki reto pa demostrá tal inisiativa! Dia 7 di mei kada akto lo bria riba esenario den e festival. Tin premio? E akto ganadó dje festival di 7 di mei lo haña oportunidat pa graba un vidioclip profeshonal. Durante produkshon di e vidioclip bo(so) ta haña guia profeshonal. I di mes organisashon di Writers Festival Curaçao lo sostené bo(so) ku promoshon di e vidioclip, hasiendo uso di su retnan di kontakto amplio. Kon registrá pa un di e retnan di kontakto? Simpel! Djis yena e siguiente datonan i manda un imeil na: writersfestival@wieneschrijft.nl: • Nòmber, edat i nashonalidat • Datonan trasfondo (Skibi/Muzik/Kombinashon?) • Idioma di preferensia • Bo ta bini bo so òf ku mas hende? Den e último kaso, sea asina bon di yena dato di e otro personanan tambe • WhatsApp i number di telefòn i/ òf direkshon di imeil • Socials (Facebook, Instagram, YouTube) E gastunan? Partisipashon na henter e proyekto ta grátis. Writers Festival Curaçao ta un inisiativa karitativo sin ophetio komersia Who is behind this organization? E organisashon Writers Festival Curaçao a yega di organisá mas festival lúdiko tantu online komo offline, manera ‘Konekshon Skondí’ i ‘E Festival di bo Soño’. Fundadónan ta Mishane Arrendell di AllBookedUp Curaçao i outor di buki di suspenso WIENE. Pa mas informashon por tuma kontakto via WhatsApp +599 9 511 6991 òf imeil: writersfestival@wieneschrijft.nl òf via nos páginanan riba Facebook @WritersFestivalCuracao i Instagram @curacaowritersfestival Nos ta respetá tur medida di COVID. Esaki ta nifiká ku lugá i fecha ta kondishonal. Den nos eskoho di nos lokalidatnan pa e retnan di enkuentro i e festival lo apliká e reglanan vigente.
Un resúmen kòrtiku •
Hasi bon uso di bo don pa skibi òf bo talento musikal
•
Laga otro kreadónan inspirá bo
•
Kombiná bo talento ku talento di un otro hende
•
Tur hende por participa, partisipashon ta grátis
•
Bo por participa na papiamentu, spañó, ingles òf ulandes
•
Inskribí bo pa un dje enkuentronan di ret di Writers meet Singers
•
Gara e oportunidat pa bo graba un videoclip profeshonal
•
Pa mas informashon, djis lesa e flyer ku atenshon.
•
Inskribí awor via nos emeil: writersfestival@wieneschrijft.nl
brickx.nl
WRITERS MEET SINGERS FESTIVAL TA UN INISIATIVA DI WRITERS FESTIVAL CURAÇAO