NO ANDA CU HENDE ROBES DEN PIKA.

Boso wowonan no a habri ainda? Bosonan no ta mira e berdad ainda? Esnan cu ta complice di maldad y di ganjamento di un persona, nan tambe ta wordo condena pa motibo di complicidad, Bijbel Proverbionan 29: 24. Ganjamento y falsedad ta un pika grandi. Bosonan no sa, cu divorcio, infieldad y adulterio ta un pika grandi pa fierno, Bijbel 1 Corinthionan 6:9 y 10. Bosonan no sa, cu esnan cu ta consulta na e bruhanan, na e mediumnan, den tarot etc., ta un pika grandi pa fierno e ta, Bijbel 1 Corinthionan 6 : 9 y 10. E mal influensianan diabolico ta keda rond di nan, pasobra nan mes a yamanan. Bosonan no sa, e persona cu no ta tende di autoridad, e ta comete un pika di desobedensia. Na esnan cu ta duna mal ehempel di pika na nan yiunan, nan ta comete un pika grandi den bista di Dios. Boso wowonan no a mira e berdad ainda?

No laga boso tambe ta ciego, pasobra ganjamento y mal influensia ta pone boso bira ciego. Ta con un hende por ta cu Cristo-Hesus y na mes tempo e ta anda riba caminda robes di ignorancia. Ta con un hende por ta den lus di Dios y na mes tempo e ta biba den adulterio y den consulta cu bruhanan? Bijbel 2 Corinthionan 6 : 14 –16: “No uni boso cu hende cu no ta kere. Kiko husticia tin di haci cu maldad? Kiko lus tin di haci cu scuridad? No por tin harmonia entre Cristo cu satanas. Kiko un creyente tin di haber cu un incredulo?” Bijbel Efesionan 5: 11: “No participa na e actonan inutil di hende cu ta biba den scuridad, pero expone nan actonan.” Bosonan cu sa e berdad masha bon, pakiko bosonan ta keda den ignorancia?