P1
DIASABRA 7 NOVEMBER 2026
7 NOVEMBER 2026 - AFL. 1.50 - WWW.SOLODIPUEBLO.COM - E-MAIL: SOLODIPUEBLO@GMAIL.COM Afl.
1.25
INVESTIGACION Y ACCION EXITOSO: RECHERCHE DI SAN NICOLAS A DETENE 5 PERSONA Y A CONFISCA 4 ARMA DI CANDELA
“GOBIERNO TA GASTA SIN PUNTRA Y PUEBLO TA PAGA.” Caso penal ta sigui 18 November 2026
HOF DI CORTE A DECLARA KEHO CONTRA HUES NO FUNDA
P2
DIAsabra 7 november 2026
Endy Croes:
“Gobierno ta gasta sin puntra y pueblo ta paga.”
Den e debate riba e cambio di presupuesto, Parlamentario Endy Croes ta bisa pueblo cla: gobierno AVP-Futuro ta gasta prome, y e ta bin pidi aprobacion despues.
bay?” Endy Croes a puntra.
Gasolin ta caro. Diesel ta caro. Comestibles ta caro. Pueblo a haya un sla duro den su cartera, y gobierno no ta brindando alivio. “Boso ta gasta e placa prome, despues boso ta bin pidi permiso,” Parlamentario Endy Croes a bisa den e debate. “E cambio di presupuesto aki mester a bin na juni, prome cu reces. Awe ta 5 di november, dos luna prome cu aña caba. Parlamento ta wordo pidi pa aproba placa cu a wordo gasta caba.”
MEP a laga Afl. 1,8 miyon den e fondo di inversion di 2024 pa un Farmers Market. Awor gobierno ta uza e placa ey pa duna Arubus un regalo. Raad van Advies mes ta puntra si esaki ta corecto.
Cu aprobacion di ken ta gasta placa? Minister di Enseñansa ta bin awe, na november, pa pidi Afl. 575.000 mas pa conferencianan y un forum internacional. E forum a tuma luga caba na april. Tambe, gobierno ta pidi Afl. 300.000 pa personal di un departamento nobo di Relacionnan di Reino, y Afl. 200.000 extra pa pone e departamento na pia. “E departamento ta existi caba? Ken a duna aprobacion?” Endy Croes a puntra. Placa pa forum, no pa buki Minister di Enseñansa, Gerlien Croes, a bisa cu e gobierno anterior no a laga placa atras pa e Boekenfonds di Colegio Arubano. Endy Croes a presenta un copia como prueba: na 2024, ex-minister Rocco Tjon a firma, y a laga Afl. 2,1 miyon aproba pa e proyecto aki. “E placa tabata tey. Unda el a
Placa di inversion ta bay pa otro cos
Pa FMSA, gobierno ta duna un di dos lening di Afl. 11 miyon. Raad van Advies a adverti gobierno riba e decision aki. “Gobierno a duna tres splicacion diferente pa e mesun placa. Esey no ta transparencia,” Endy Croes a bisa.
San Nicolas merece mas Parlamento a aproba dos mocion pa gobierno busca partner pa e refineria. Aruba tin tanki, tereno y luga pa warda petroleo. Ta un oportunidad pa un di dos pilar economico. “En bes di esey, ministernan a biaha pa Boneiro, Corsou y Hulanda, y a firma un proyecto pa trece sushi di otro isla pa procesa na San Nicolas. Nos pueblo di San Nicolas no ta e luga di sushi di Reino Hulandes.”
Januari ta bay ta duro pa pueblo E acuerdo di WEB pa wanta e prijs di petroleo abou ta caba 31 di december. “Si gobierno no actua, awa y coriente ta subi na januari, esaki riba e hecho cu gasolin y
comestibles ta caro caba,” Endy Croes a adverti. Den bario, tiroteo y atraco ta bek. “Despues di e recorte riba Husticia, nos polis no tin loke nan mester pa proteha bo.” Conclusion “Pa un forum, e placa tey. Pa e buki di bo yiu, e placa no tey. Pa e famia cu no por paga coriente, e placa no tey. Esey ta e gobierno aki: e ta gasta e placa prome, e ta bin pidi permiso despues, y bo famia ta paga e cuenta. Pueblo merece un gobierno cu ta pone nos famianan prome. MEP no ta bay keda keto. MEP si t’ey pa bo.”
P3
DIAsabra 7 november 2026
nvestigacion y accion exitoso: RECHERCHE DI SAN NICOLAS A DETENE 5 PERSONA Y A CONFISCA 4 ARMA DI CANDELA Oranjestad, ARUBA: Den cuadro di casonan serio di tiramento na San Nicolas a tuma lugar un investigacion riguroso, cauteloso y eficaz pero tambe bon coordina dirigi pa Recherchenan di San Nicolas cu sosten di polis uniforma di San Nicolas como tambe K9 Unit. A ehecuta diferente accion pero tambe razzia den San Nicolas cu a duna su resultado positivo.
Relaciona cu e tiramentonan recien, a logra confisca 4 arma di candela. Tambe a haci diferente detencion relacion cu esaki. A haci 3 detencion pa diferente caso di tiramento den e bario di Village. E detencionnan ta trata di hende homber y mucha homber di inicialnan: Z.O.G.J. naci na Aruba di 20 aña, C.A.G. naci na Aruba di 21 aña y J.N.A.V.K. naci na
Aruba di 17 aña. Pa e casonan di tiramento den De Vuyst tabata tin 2 detencion. Ta trata di e hombernan di inicialnan A.A.B. naci na Aruba di 31 aña y M.T.C. naci na Aruba di 27 aña. No ta
descarta cu den e dianan nos dilanti lo tin mas detencion. Recherche di San Nicolas ta trahando incasablemente pa revolve tur caso tambe pa kita arma di candela for di caminda.
Cuerpo Policial Aruba ta haci un apelacion na nos comunidad cu sa of wak algo pa yama e tiplijn di polis cu ta 11141. Bo ta keda 100% anonimo.
OM ta persigui agente policial relaciona cu incidente fatal Ministerio Publico a saca citacion contra un agente policial relaciona cu un incidente fatal cu a tuma lugar riba 27 di januari 2026. Durante e incidente aki, un homber cu tabata wordo considera como un persona den estado di confusion mental, a perde su bida. E agente policial envolvi di inicialnan R.W.A.R. ta wordo sospecha di homicidio.
E regiezitting den e caso ta planea pa 26 di
november venidero. Durante e regiezitting aki, abogado di e sospechoso lo haya oportunidad pa presenta eventual peticionnan adicional di investigacion. Hues lo dicidi si e peticionnan aki ta wordo aproba y lo tambe determina un fecha pa e tratamento mes di e caso.
Ministerio Publico a pone famia di e fayecido na haltura caba di e decision pa persigui e sospechoso.
P4
DIAsabra 7 november 2026
Noticia di Corte Caso penal ta sigui 18 November 2026
Hof di Corte a declara keho contra Hues no fund-1ORANJESTAD – Awe mainta tres Hues cu ta forma parti di Corte di Husticia di Aruba, a forma Hof pa trata e keho di Chania Chante Fernandes Pedra contra e Hues cu ta tratando e caso penal di Ministerio Publico contra Chania Chante Fernandes Pedra.
SOLO DI PUEBLO por a compronde cu abogado mr. Odor a presenta hopi documento cu puntonan cu e abogado ta haya cu e Hues no a sigui un proceso husto. Hof a dicidi cu e keho no ta funda.
Ta asina cu abogado mr. Odor a representa Chania den e caso di keho contra Hues. Hof a bisa cu e Hues concerni a reacciona riba e keho. Mr. Odor a bisa cu e no a haya e reaccion. Hof a duna mr. Odor un copia y a pospone e caso un rato pa asina e abogado por bay lesa e reaccion di Hues riba e keho. Por a mira e Fiscal cu a presenta e acusacionnan contra Chania presente pero no a sinta na e lugar cu Fiscal ta sinta esta na man drechi di mesa di Corte. E tabata sinta na un di e mesnan di abogado.
KEHO CONTRA HUES Abogado mr. Odor a splica cu Diahuebs nochi e mayornan di Chania a bay serca dje y dun’e un cantidad di documento pa presenta e keho contra Hues. E abogado a bisa cu y ayera mainta el a bay serca Chania na KIA pa papia cun’e y awor ta den Corte.
VIOLA DERECHONAN FUNDAMENTAL E abogado a bisa cu durante e procedura di e caso, e Hues no a honra peticion di Chania
pa lag’e liber. E abogado a mustra cu cada vez Chania no a haya abogado. El a mustra cu dia 4 November 2026, Hues a bisa cu e chensnan pa haya un abogado a caba y a dicidi di trata e caso. E abogado ta haya cu Hues a viola Chania su derechonan fundamental door di no sigui busca manera pa Chania haya un abogado. E keho ta cu Hues tabata sa cu Chania no ta dispone di abogado pa defende su interesnan. E abogado a menciona cu dia 3 Juni 2026, Hues a bisa Chania cu e mes mester busca un abogado for di Curacao y paga esaki. E abogado ta haya cu Hues no a haci esfuerzonan suficiente pa Chania haya un abogado.
TUR HENDE TIN DERECHO DI ABOGADO E abogado a mustra cu a manda documentonan y un jump stick pa Hues relaciona cu e caso y Hues a nenga e jump stick. E abogado a bisa Hof cu tur hende mester tin e derecho pa haya un abogado. E abogado ta haya cu mester scucha combersacionnan cu tabatin cu abogadonan cu a wordo acerca pa haya sa kico realmente a pasa cu nan no ta disponibel pa defende Chania.
PROCESO INHUSTO E abogado a mustra cu dia 20 Augustus 2026, atrobe Chania a presenta sin abogado y a presenta diferente peticionnan cu e ta desea pa keda realiza. Hues a rechaza e peticion pa scucha 2 testigo. Hues a bisa cu door di nan situacion mental, e no ta haya cu por bay scucha nan como testigo. Tambe Hues a rechaza e peticion pa haci reconstruccion di e accidente. Segun abogado, door cu Chania no tabatin abogado, no por a hustifica e peticion di reconstruccion. E mesun dia, atrobe Hues a rechaza e peticion pa laga Chania liber.
E abogado a mustra cu Chania a presenta un cantidad di argumentonan riba papel pero Hues a bisa cu e ta demasiado pa bay evalua tur e documentonan.
E abogado a cuestiona e hecho cu tabatin dos abogado di Curacao disponibel y diripiente nan no tey mas door di mal comprendemento. E ta haya cu Hues mester a haci mas investigacion den esaki pa haya sa kico a pasa cu Chania no por a scoge entre e dos abogadonan y cu a bin un otro abogado cu Chania a rechaza pasobra e no a papia cun’e.
E abogado a mustra cu dia 4 November 2026, Chania a bolbe pidi pa lag’e liber pa asina e por traha y busca un abogado pa prepara pa e caso. Hues a rechaza e peticion. E abogado ta haya cu mester investiga cu e mesun Hues cada vez ta rechaza e peticion di Chania cu ta stroba Chania pa por prepara debidamente pa e caso y haya un abogado. E abogado a bisa cu e ta haya cu tin un proceso di husticia inhusto y pesey ta keha e Hues. El a pidi Hof pa un otro Hues no partidario y independiente pa trata e caso.
Hof a puntra mr. Odor si e ta e abogado di Ch ania den e caso penal tambe. Mr. Odor a bisa cu e ta representa Chania pa e keho so. El a sigui bisa cu e no sa ainda si e lo bay representa Chania den e caso penal. El a bisa Hof cu e mayornan a keda di mande e documentonan di e caso pa e evalua. Hof a pospone e caso pa evalua si por tuma un decision di biaha of si lo mester bay studia e documentonan mas.
Continaucion pag 6
P5
DIAsabra 7 november 2026
Awe abo por gana 600 mil florin cu Lotto 5 Sorteo ta awe anochi ORANJESTAD, Aruba – 7 di november, 2026: Diaranson ultimo Lotto 5 no a conoce ningun ganado cu ta pone e jackpot sigui crece y pa awe diasabra e suma bira 600 mil florin! Pero si tabata tin 2 feliz ganado di e segundo premio di Lotto 5 di diaranson ultimo y e ticketnan ganado a wordo bendi na Lucky Snoopy y Sheba Lottery. Lotto 5 ta costa solamente 4 florin pa ticket y bo por combina bo 5 numbernan for di 01 te cu 35, si bo no sa cua numbernan pa kies, bo ta puntra bo rebendedor pa un loco y asina bo ta den wega
pa gana e jackpot di 600 mil florin cu Lotto 5. Corda busca bo Lotto 5 trempan, pa asina bo no keda afo di e sorteo di awe nochi cu Lotto, e Loteria di Aruba. Tambe Lotto ta ofrecebo e opcion pa por cumpra bo weganan di Lotto Online, kiermen si bo no tin chens pa sali cumpra bo weganan preferi di Lotto, bo por cumpre for di bo smart phone, tablet of bo computer! Sorteo di Lotto 5 ta hunga awe diasabra pa 7.45PM y por cumpra bo ticket na bo rebendedor faborito te cu
7.30PM. Lotto, E Loteria di Aruba tin diferente wega, Catochi, Big 4, 1-OFF, Zodiac, Wega di Number di Korsou di Lotto, Lucky 3, Multi-X, Lotto di Dia, Lotto 5, Mini Mega y cu su Mega Plus, y e diferente weganan di Instacash. Tambe lo por hunga Lotto Online door di bishita: play.lottoaruba.com pa por registra. Cumprando Lotto bo ta contribui na deporte
riba nos isla. E meta ta pa organisa loteria, cambia bida di su hungadonan y na mes momento inverti den
deporte local pa medio di donacionnan na e comision di subsidio.
P6
DIAsabra 7 november 2026
Caso penal ta sigui 18 November 2026
Hof di Corte a declara keho contra Hues no funda -2NO TIN PUNTONAN VALIDO PA HACI KEHO Hof a dura un tempo promer cu a bolbe den sala di Corte y a bisa cu ta tuma decision di biaha. Hof a bisa cu e peticionnan pa haci mas investigacionnan cu abogado ta referi na dje, esakinan ta cay for di e cualificacion di Hues. Hof ta considera nan no admisibel.
Hof a bisa cu a base di ley, ora di keho contra di Hues, mester para e caso di biaha. Si tin keho, mester haci’e di biaha y no warda cu ta laga acumula puntonan.
Na opinion di Hof, si tabatin cosnan manera e abogado ta menciona, mester a haci keho for di e momento ey y no warda te awor pa haci esaki. Hof ta haya cu no tabatin motibonan pa haci keho promer cu 4 November 2026. Pa loke ta e keho di 4 November 2026, Hof ta haya cu abogado no ta menciona nada di loke a sosode riba 4 November 2026 den e keho cu a haci.
KEHO CONTRA HUES NO TA FUNDA Hof a mustra cu mester menciona tur e puntonan for di momento cu ta haci e keho. No por presenta esakinan durante tratamento di e caso pasobra e Hues concerni no tey pa defende
su mes. Pa loke ta e keho riba nengamento di peticion pa mas investigacion, Hof ta haya cu no por papia cu ta keha Hues. Hof ta haya cu no tabatin motibo. Hof ta haya e keho contra Hues no funda. Hof a mustra cu e decision di Hues cu ta trata e caso sin abogado, no ta motibo pa keha Hues. Hof a dicidi cu e mesun Hues ta sigui trata e caso y cu dia 18 November 2026, e Hues ta sigui cu e caso caminda a lag’e. Manera ta conoci, Fiscal ta acusa Chania cu riba 4 Januari 2025 a dal mata e dama Josely Paulina Vasquez (65) y e homber Carlos David Vialez Valerio (54) y sigui core bay.
Minister Herdé a reuni cu stakeholders pa busca co-existencia entre uzo di ATV/UTV y proteccion di nos naturalesa Como parti di e esfuersonan pa mehora e situacion relaciona cu e uzo di vehiculonan ATV y UTV na Aruba, Minister di Infrastructura, drs. Rene Herdé a sinta na mesa pa prome biaha cu tur stakeholders hunto, entre nan, representantenan di touroperators, Aruba Birdlife Conservation (ABC), Dienst Natuur en Milieu (DNM) y Aruba Conservation Foundation (ACF) pa purba yega na un solucion. E encuentro tabata enfoca
riba dialogo y intercambio di opinion, cu e meta pa sondea posibilidadnan di co-existencia entre e actividadnan turistico y recreativo y e necesidad pa proteha nos naturalesa. E reunion a bay den un ambiente positivo y constructivo. E partidonan a tuma e oportunidad aki pa comparti nan perspectivanan y a reconoce e importancia di busca un balansa entre e actividad economico y e conservacion di Aruba su medio ambiente.
Minister Herdé a indica cu dialogo lo sigui den proximo reunionnan,
cu e meta pa sigui intercambia idea y busca un entendimento comun
prome cu yega na un decision.
P7
DIAsabra 7 november 2026
Dangui Oduber:
“E capitan ta baha for di barco, laga su pasaheronan atras!” Den e debate riba e prome cambio di presupuesto 2026, Dangui Oduber ta bisa pueblo kico e caos den gobierno AVP-Futuro ta nifica pa nan cartera.
Gasolin y diesel ta mas caro cu nunca. Supermercado ta costa mas cada luna y pa e famia cu ta paga huur, coriente y awa, e cartera no ta yega na fin di luna. Mientrastanto, e gobierno ta ocupa cu pleito den nan propio coalicion.
“Pueblo ta pidi yudansa, y gobierno ta pidi tempo,” Parlamentario Dangui Oduber a bisa den Parlamento.
E yudansa cu no a yega Gobierno mes a priminti cu e lo bin cu e cambio di presupuesto “in het voorjaar”. E cambio a yega na augustus, y Parlamento ta trat’e awe, cu menos di dos luna pa aña caba. Y den e cambio aki no tin huurtoeslag pa yuda cu huur, ni energietoeslag pa yuda cu coriente y awa.
“Nan ta gasta e placa prome, despues nan ta bin pidi permiso y e yudansa cu pueblo mester, no ta ni aparece den e presupuesto.”
nan ta mucho ocupa ta pleita cu otro.”
Riba aumento di salario minimo, coalicion ta papia cu dos stem. Minister-President Mike Eman a yama esnan contra e aumento “inmoral”. Futuro a contesta cu un aumento sin estudio y sin plan ta “iresponsabel”.
“Un ta yama otro inmoral, e otro ta contesta iresponsabel, y tur dos ta den e mesun gobierno,” Oduber a bisa. “Minister Wever, si bo tabata sa di e plan aki for di un aña pasa, pakico den un aña bo no a haci ningun estudio serio?”
Ministernan cu no ta papia cu otro Den un e-mail, Futuro ta bisa cu nan no tabata na altura di e decisionnan y cu tin hopi contradiccion. Futuro a pidi un reunion urgente di coalicion, y AVP no a presenta. Segun Oduber, desde juli no tin dialogo den coalicion.
“Con bo kier soluciona costo di bida, enseñansa, criminalidad y e problemanan social di pais, si e ministernan mes no por sinta y papia cu otro? Sin comunicacion, no tin solucion.”
Un gobierno sin rumbo Segun Oduber, ni comerciante, ni sindicato, ni trahado no sa Aruba ta bay. “Ki plan tin pa baha costo di bida? Ningun hende sa, pasobra gobierno no tin un vision cla paso
E capitan ta baha for di barco Minister-President Eman ta laga su funcion 1 di januari 2027, den 57 dia. Pa Oduber, e imagen ta cla:
“Ta manera e capitan ta baha for di e barco, mientras e barco ta sink. E pasaheronan ta keda: e pueblo.” Oduber ta puntra tambe pakico e tema di salario minimo ta bin awor, tres luna prome cu e MinisterPresident ta bay. “Ora un tema ta bin net prome cu eleccion, pueblo tin derecho di puntra si e ta pa e trahado, of pa e voto.”Hechonan, no palabra Ora MEP tabata den gobierno di
2001 te 2009, salario minimo a subi di Afl. 1.111,80 pa Afl. 1.542,90: casi 40% mas. Den e ocho añanan di AVP cu a sigui, e aumento no a yega ni 11%. Ora MEP a bolbe den gobierno, di 2017 te 2025, salario minimo a subi di Afl. 1.711,15 pa Afl. 2.007,05: casi 17% mas, y esey cu dos aña di pandemia. Esaki ta hecho verificabel. Pueblo no por paga su cuentanan cu promesa bashi di un gobierno cu no por sali afo. Pueblo mester un gobierno cu ta papia y dicidi.
P8
DIAsabra 7 november 2026
Prome Minister Mike Eman:
Boy Ecury a para pa humanidad
Durante e conmemoracion nacional di e luchadornan pa libertad na Parke Boy Ecury, Prome Minister Mike Eman a rindi homenahe na e heroe Arubiano Boy Ecury, cu a sacrifica su bida den lucha pa libertad y dignidad humano. E ceremonia a inclui un ofrenda floral di Parlamento, Gobierno, VNO y famia Ecury como tambe presencia di Minister Gerlien Croes, Arthur Dowers, Rene Herdé, Secretaria di Conseho di Minister Indra Hassell-Duarte, Presidente di Parlamento Marlon Sneek y diferente miembro di Parlamento. Den su discurso, Eman a destaca e importancia di su legado como un inspiracion pa generacionnan actual y futuro. Prome Minister a expresa su orguyo cu un hoben cu su raisnan na Rancho, Aruba, a mustra un curashi asina grandi na un momento den historia caminda mundo tabata enfrenta un di su periodonan mas dificil. “Boy Ecury a para pa humanidad”,
Prome Minister a destaca, remarcando cu e heroe Arubiano a lucha pa hende cu e mes no tabata conoce, sin haci distincion di color, religion of descendencia. Boy Ecury, kende su nomber completo ta Segundo Jorge Adelberto Ecury, a nace dia 23 di april 1922 na Oranjestad. Na 1937 el a bay Hulanda pa sigui su estudio. Durante Segundo Guera Mundial el a uni su mes na e resistencia contra ocupacion Nazi, participando den varios actividad pa sabota e ocupantenan y yuda hende cu tabata busca refugio, incluyendo e pilotonan di e forsanan aliado. Dia 5 di november 1944, Boy Ecury a ser deteni na Rotterdam. Un dia despues, dia 6 di november, el a ser fusila door di e ocupantenan Nazi na Waalsdorpervlakte na Hulanda, na edad di solamente 22 aña. Despues di guera, na 1947, su restonan a ser treci bek Aruba, caminda el a haya un entiero cu honor militar. Na 1949 a coloca un busto di Boy Ecury den un parke riba e crusada
di L.G. Smith Boulevard cu George Madurostraat na Oranjestad. E monumento y e parke cu ta carga su nomber ta un reconocimento permanente di su curashi y sacrificio den lucha pa libertad. Durante e ceremonia, Eman a haci un comparacion cu e sociedad di awe, caminda ta bira cada bes mas dificil pa hende pone interes general prome cu nan
propio interes. E sacrificio di Boy Ecury ta un recordatorio importante di e responsabilidad cu cada persona tin pa defende dignidad humano y trata otro hende cu e respeto cu nan merece. Prome Minister a enfatisa cu den bida tin momento crucial caminda, a pesar di e dificultadnan, presion y hasta peligro, hende mester tin curashi pa para firme pa loke ta corecto y defende esnan cu tin
necesidad di proteccion. Segun Eman, e legado di Boy Ecury lo keda bibo pa semper, pasobra den cada periodo di historia humanidad ta enfrenta decisionnan importante tocante e valornan cu nos ta dispuesto pa defende. Na final di su discurso, Prome Minister a expresa su gratitud na famia Ecury pa e heroe cu nan a duna Aruba y a haci un yamada pa nunca lubida su curashi, sacrificio y amor pa humanidad.
P9
DIASABRA 7 DI NOVEMBER 2026
14 agente policial nobo di klas N2 2026 a huramenta y ta cla pa sirbi comunidad
Diahuebs a tuma luga e ceremonia oficial di huramentacion di 14 agente policial nobo di klas N2 2026 di Cuerpo Policial Aruba (KPA). E ceremonia a conta cu presencia di Minister di Husticia, Integracion, Transporte Publico y Energia Arthur Dowers, Hefe di Polis Ramon Arnhem, Procurador General di Aruba, Amalin Flanegin, como tambe famianan y amistadnan di e agentenan nobo. Durante e ceremonia, e 14 agentenan a huramenta, oficialmente marcando un momento importante den nan carera profesional y nan compromiso pa sirbi y proteha comunidad di Aruba. E huramentacion ta representa e responsabilidad cu cada agente ta asumi pa eherce su funcion cu integridad, disciplina, profesionalismo y respet pa ley. Minister Dowers ta considera incorporacion di e 14 agente policial nobo un paso positivo den e esfuersonan continuo pa fortalece Cuerpo Policial
Aruba. E minister ta enfatisa cu inversion den formacion y desaroyo di personal policial ta esencial pa garantisa cu KPA tin e capacidad necesario pa atende e desafionan den area di husticia y siguridad publico. E profesion policial ta exigi dedicacion, responsabilidad y un compromiso firme cu comunidad. Cada agente tin un rol importante den mantencion di orden publico, proteccion di ciudadanonan y cumplimento di ley. Confiansa di comunidad den Cuerpo Policial ta depende tambe di e manera cu cada agente ta eherce su responsabilidad diariamente. Cu e incorporacion di klas N2 2026, Cuerpo Policial Aruba ta sigui fortalece su capacidad operacional y su presencia den comunidad, como parti di e esfuersonan pa contribui na un ambiente mas sigur pa tur habitante di Aruba. Minister Dowers a felicita e 14 agente policial nobo pa e logro alcansa y ta desea nan
hopi exito den e siguiente etapa di nan carera,
cu e responsabilidad importante di sirbi pueblo
di Aruba cu integridad, respet y dedicacion.
P 10
DIASABRA 7 DI NOVEMBER 2026
Aruba Dolphins Invitational 2026 un exito cu 233 landado di cuater pais Savaneta, Aruba — E di 24 edicion di Aruba Dolphins International Swimming Invitational (ADI) a reuni 233 landado di 11 club di Aruba, Corsou, Boneiro y Surinam. Di 29 di october te cu 1 di november 2026, Pisina Olimpico Roly Bisslik a bira punto di encuentro pa cuater dia di competencia, cu recordnan nobo y prestacionnan sobresaliente di varios club. E clubnan participante tabata Aruba Dolphins, Giants Aquatics Aruba, Sportsz4u y Stingray Swimming di Aruba. For di Corsou a participa Orca Swim Club, Sithoc Swim Club, Swim Club Bulado y Typhoon Swim Club. Bonaire Barracudas y Delfins Swimming Club a representa Boneiro, mientras De Dolfijn a representa Surinam. E categorianan di edad a bay di 6 aña y menos te cu 18 aña y mayor. Pa e landadonan, e encuentro tabata un oportunidad pa gana experiencia internacional y forma amistad cu atletanan di otro club. Na banda di piscina y den tribuna, coachnan, mayornan y sostenedornan a anima e landadonan durante henter e competencia. Resultadonan di ekipo y prestacionnan individual Aruba Dolphins a conkista e prome lugar den e clasificacion general cu
1.938 punto, sigui pa Giants Aquatics Aruba cu 1.237 punto y De Dolfijn cu 1.059 punto. Den e clasificacion individual, Evan Tjon A Pauw di De Dolfijn a lidera e categoria masculino di 9–10 aña cu 72 punto, mientras Luis-Mario Arends di Giants Aquatics Aruba a gana e categoria masculino di 15–17 aña cu 70 punto. Den e categoria femenino di 7–8 aña, Sia Thielman di Typhoon Swim Club a termina na prome lugar cu 63 punto. Den algun categoria, un solo punto a haci e diferencia. Chelsy Gorreé di De Dolfijn a gana e categoria femenino di 11–12 aña cu 62 punto, un punto dilanti di Vitali Inocencia di Stingray
Swimming y Eva Noter di De Dolfijn, cu a comparti segundo lugar. Den e categoria femenino di 13– 14 aña, Laura Bonnevalle di Aruba Dolphins a gana
cu 59 punto, sigui pa Jayla Stuut di Aruba Dolphins cu 58 y D-Leylah Gerrel di Stingray Swimming cu 57. Reconocemento pa dedicacion na e club
Durante e evento, Aruba Dolphins a honra Aldrick Farro, Chantalle Pas, Sharissa de Cuba y Carolina Arends cu un Appreciation Award pa
P 11
DIASABRA 7 DI NOVEMBER 2026
Aruba Dolphins Invitational 2026 Jerry Schwengle a ricibi e premio na nomber di Chantalle Pas. E delegacionnan a bolbe reuni pa e ceremonia di clausura, unda musica di brassband a acompaña e celebracion y a wordo entrega e premionan individual y di ekipo. Aruba Dolphins ta gradici tur club participante, landado, coach, mayor y sostenedor. Un danki especial ta bay na e voluntarionan di Aruba Dolphins, Aruba Volunteers, University of Aruba y Believe In Yourself (BIY), y na e timers, oficialnan, announcers, MC y Meet Director Marc Ponson pa nan trabou durante e evento.
e tempo y dedicacion cu nan a brinda na e club y su landadonan. Jennifer
Nicolaas, presidente di Aruba Dolphins, a presenta e reconocementonan.
E club ta gradici su patrocinadonan y colaboradornan pa nan sosten na e di 24 edicion di e Invitational. 434 Media, Albatros Logistics, Aruba Airport Authority, Anker Fish Co. (Biltmore Group), Boat & Fishing Paradise, Bon Bini Cargo, Cas di Max, Domino’s Pizza, ELMAR Aruba, Fundacion Lotto pa Deporte, Minister di Relacionnan den Reino, Enseñansa, Hubentud, Innovacion y Deporte Gerlien L. Croes, Grant Thornton, Metacorp, Paradera Party Center, Printshop, SETAR, Subway, TBS Brassband, Tri-Bike, Tropical y Zeerovers a contribui na realisacion di e evento. Aruba Dolphins ta gradici tambe e medionan di comunicacion pa nan cobertura y pa comparti e logronan di e landadonan cu comunidad.
E di 25 edicion di Aruba Dolphins Invitational ta
planifica pa 28 te cu 31 di october 2027.
P 12
DIASABRA 7 DI NOVEMBER 2026
Diadomingo Dia 8 di November e conocido locutor Sr.Marcos Bislip Jr. ta cumpli 45 Anja den radio difucion di Aruba
Diadomingo Dia 8 di November 2026 Sr.Marcos Bislip Jr. ta cumpli 45 Anja den radio difucion di pais Aruba.Sr,Marcos Bislip Jr. a cuminsa su carera den radio Dia 8 di November 1981 cu apenas 14 Anja di edad na Radio Antilliana 1270 AM.Sr. Tuyo Prins director di Radio Antilliana 1270 AM hunto cu Sra.Morgan Arrindell a percura pa sinja Sr.Marcos Bislip Jr. pa cu e trabou di radio. Marcos a bira operador, locutor, productor y presentador di programa na radio. Marcos tabata e locutor hoben di Antiyanan Hulandes cu apenas 14 Anja y na 1987 ta wordo reconoci pa Aruba Toastmaster como un di e mihor locutornan hubenil na Aruba. Na Anja 1983 Marcos ta hanja un preparacion mas avansa y profecional den radio y television for di BBC Radio & TV tambe e era di noticia via satelite a inicia pa cu television y despues radio. Marcos a sigi su carera di AM pasa pa FM y ta cuminsa un reto nobo na 1988 na
Radio Carina FM 98.9 te cu na 1989 y na 1990 ta bai cu Radio Canal 90 FM y sigi pa Radio Voz di Aruba AM 1320 AM Marcos a traha cu Roberto Geerman na Radio Antilliana 1270 AM y despues na Canal 90 FM hunto cu Ruben Scorpio Garcia Marcos tabata duna noticia di ora na Canal 90 FM y Voz di Aruba 1320 AM. Marcos a traha marduga pa mainta na Radio Carina FM 98.9 y Canal 90 FM y ta e record holder di presenta programa marduga na radio y despues Marcos a sigi na 1999 y 2000 na TOP 95.1 FM Marcos a bai dirigi Noticia principal di TOP 95.1 FM como hefe di departamento di noticia hunto cu Harry Croes y Ans Henriquez.Marcos a bai despues na Galactica GFM 99.9 y a traha cu Roberto Geerman, Joe Hernandez, Tico Bee, Nichi Williams, Vicro y otronan.Na Radio Carina FM Marcos a traha cu Joe Hernandez, Ivan Kelly Jr. Marcel Carrion, Lenny Denz y otronan e scol di radio. Na Anja 1990 Marcos a drenta e tereno di astronomia y a
bira astronomo y a inicia cu e conteo di fin di Anja y a combina e tereno di astronomia cu radio y na 1992 Marcos ta combina e tereno di medio ambiente cu radio tambe tempo y climatologia y na 1999 sismologia.Marcos ta e unico locutor y miembro di prensa cu tin preparacion ariba e diferente terenonan cientifico tambe ufologia y paraphysicologia y a usa esakinan pa bin cu seccionnan informativo y educativo na radio Earth News, Astro News, Nos Insolito Mundo y Universo y ultimo Guinness News Aruba.Marcos y Roberto Geerman semper for di Anja 1985 ta e promenan cu a transmiti Carnaval via un telefon cu Marcos a modifica y despues 5 Anja via e sistema digital awendia Marcos ta transmiti via remote via e sistema mas modernao den radio y media via un server cu no tin delay den seconde transmitiendo den e tecnologia di m/s milliseconde cu ta perfecciona e signal y calidad di zonido digital stereo HD y mas liher cu seconde den milliseconde tempo real.Diadomingo Dia 8 di November 2026 Marcos ta cumpli 45 Anja den radio difucion, media, prensa y farandula alaves.Aruba ta keda cordialmente invita pa scucha e programa special Dia 8 di November 2026 atraves di TOP FM 95.1 pa 8’or di anochi te cu 12’or di mei anochi. Despues di e
45 Anja nos ta bai 5 Anja mas pa cumpli 50 Anja den radio cu poder di Dios. Un danki ta bai special na Papa Dios cu a duna mi e talento pa radio y na mi tata en felis memoria y na mi mama y na Tuyo Prins y Morgan Arrindell
mi maestra y na colega ruman den radio Roberto Geerman en felis memoria y na tur radionan cu a permiti mi pa yega na mi 45 Anniversario den radio aki na Aruba.E ta algo grandi pa experiencia e momento historico aki na bida.
P 13
DIASABRA 7 DI NOVEMBER 2026
Den tratamento di presupuesto supletorio
Parlamentario Clifford Heyliger ta pidi claridad riba vivienda social, siguridad na refineria y futuro di Arubus
ORANJESTAD (5 di november 2026) — Parlamentario di AVP, Clifford Heyliger, ta pidi contestanan concreto tocante construccion di cas social, eliminacion di riesgonan di siguridad na e refineria y continuidad di transporte publico. Den su disertacion pa e tratamento di e presupuesto suplementario 2026, Heyliger ta pone enfasis riba e manera cu decisionnan presupuestario mester responde na necesidadnan diario di comunidad. Pa Heyliger, e discusion presupuestario mester duna claridad tocante e prioridadnan di gobierno, e plazonan pa ehecucion y e resultado cu ciudadano por spera. Cas social pa diferente generacion Dirigi na Minister René
Herdé, Heyliger ta pidi detaye tocante e plan di FCCA pa construccion di 140 cas social pa personanan di 55 aña pa riba. Alabes, e ta cuestiona si tin plan pa amplia construccion di cas social pa personanan di tur edad y dentro di ki plazo esaki por sosede. E parlamentario ta pone atencion riba e necesidad di ofrece perspectiva na diferente grupo cu ta busca un vivienda cu nan por paga. E kier claridad tocante con e plan pa 55plus ta forma parti di un aanpak mas amplio pa atende e necesidad di vivienda social. Siguridad na tereno di refineria Heyliger ta recorda cu durante un bishita di Comision di Energia na Refineria di Aruba, e
miembronan a haya un recorido riba e tereno. Den e contexto di e bishita, a trece na atencion e necesidad di desmantela un schoorsteen, conoci como un smoke stack, pa motibo di siguridad. Segun e parlamentario, e riesgo ainda no a wordo elimina. P’esey, e ta pidi Minister Arthur Dowers splica pakico e desmantelacion no a tuma luga y ki medidanan lo wordo tuma pa atende e situacion. Pa Heyliger, ora identifica un riesgo di siguridad, mester tin claridad tocante ken ta responsabel pa atende esaki y ki tempo e trabou lo wordo ehecuta. Garantisa Servicio di Arubus Tocante Arubus, Heyliger ta referi na e reunion di comision cu e bestuur di e compania y na e preocupacionnan tocante su situacion financiero. E ta pidi Minister Dowers presenta e plan pa garantiza cu Arubus por sigui cumpli cu su rol social. Den e sentido aki, e ta trece dilanti e problemanan cu busnan cu ta daña y e falta di suficiente parada di bus. E preguntanan ta dirigi riba tanto e sostenibilidad financiero di e compania como e calidad y disponibilidad di e servicio pa e personanan cu ta depende di transporte publico.
Costo di bida y salario minimo Heyliger ta señala cu gobierno a absorba parti di e subida di prijs di combustibel pa mitiga e impacto riba comunidad. E ta cuestiona e postura di oposicion cu, segun e, a acusa e gabinete AVP/Futuro di no haci suficiente pa atende costo di bida, mientras awor ta cuestiona e intencion pa subi salario minimo den fase te acerca esaki na bestaansminimum. Pa e parlamentario, e discusion mester mantene e realidad di e trahado central. E presion di costo di bida ta exigi medidanan cu ta yuda famianan cubri nan necesidadnan basico y mehora nan posicion financiero. Responsabilidad social ta comparti Heyliger ta observa cu
hopi organisacion cu a bishita parlamento durante e ultimo aña a pidi mas recurso pa por sigui funciona. Segun dje, esaki ta refleha e cantidad di necesidad social cu tin den comunidad y e expectativa cu gobierno lo atende nan. Den e contexto aki, e ta plantea tambe e rol di comercio. E ta pidi si gobierno tin un bista di cuanto e sector comercial ta contribui anualmente na iniciativanan comunitario y social, y cuanto e contribucion ey ta representa como percentahe di nan omzet. Cu e preguntanan aki, Heyliger ta pone enfasis riba e necesidad di un esfuerzo comparti entre gobierno, comercio y organisacionnan social pa atende e retonan di Aruba y fortalece bienestar di comunidad.
P 14
ORANJESTAD (5 di november 2026) — Parlamentario di AVP, John Hart, ta enfatisa cu e aumento di salario minimo pa acerca esaki na bestaansminimum ta un decision cu ta toca e bienestar di famianan y e tipo di sociedad cu Aruba kier construi. Pa Hart, e discusion mester wordo guia pa e dignidad di e trahado, hunto cu responsabilidad pa e sostenibilidad di empresanan y e economia. “E pregunta fundamental ta kico ta nos responsabilidad como sociedad pa garantisa cu un hende cu ta traha fulltime por mantene su mes y su famia na un manera digno. Un hende cu ta cumpli cu su obligacionnan y contribui diariamente na nos economia mester tin e posibilidad pa cubri su necesidadnan basico,” Hart a expresa. E parlamentario ta identifica cuater principio cu, segun dje, mester guia e proceso: husticia publico, responsabilidad comparti, solidaridad y rentmeesterschap, esta bon maneho y responsabilidad pa futuro.
DIASABRA 7 DI NOVEMBER 2026
Husticia pa e trahado Pa Hart, husticia publico ta inclui e responsabilidad pa trata hende husto, ofrece oportunidad y evita cu ciudadano ta keda atras. Den e sentido aki, e ta cuestiona con un trahado cu ta dedica un siman completo na su trabou ainda por keda sin suficiente entrada pa cubri e gastonan esencial di su hogar. “Un salario minimo mester proteha e trahado contra explotacion y ofrece un base di dignidad. Trabou mester duna hende perspectiva pa construi un bida cu stabilidad. Husticia social ta nifica cu un hende cu ta traha mester por sali dilanti,” Hart a declara. Responsabilidad comparti cu sector priva Hart ta señala cu gobierno, empresanan, trahadonan, famia y comunidad tin un papel den e construccion di un sociedad mas husto. Gobierno mester establece e marco legal, proteha trahadonan y crea condicionnan pa un economia saludabel. Sector priva tambe tin responsabilidad pa e bienestar di e hendenan cu ta contribui na su actividadnan. Segun e parlamentario, salario ta un inversion den hende, productividad y futuro economico. Alabes, e ta reconoce cu empresanan tin diferente capacidad financiero. P’esey, e ta boga pa dialogo, planificacion y medidanan di sosten, specialmente pa empresanan chikito, como parti di e implementacion. E ta pone enfasis particular riba sector hotelero y e necesidad pa evalua cuanto di e ganashi genera cu e producto “Aruba” ta regresa na sociedad, tanto
Parlamentario di AVP John Hart ta impulsa un reflexion conhunto riba nos responsabilidad comparti “Trabou full time mester duna un hende e posibilidad pa biba dignamente” den salario y condicionnan di trabou como den contribucionnan concreto na bienestar di comunidad. Progreso mester yega na famianan Den su apelacion pa solidaridad, Hart ta pidi atencion pa e mama of tata cu, apesar di tin un trabou, na final di luna mester scoge entre paga huur, cumpra cuminda of cubri otro necesidad esencial. E ta enfatisa cu e dificultad pa yega na fin di luna por refleha e distancia entre entrada y costo real di bida, apesar di e esfuerzo diario di e trahado. “Nos mester midi progreso tambe na e calidad di bida di nos pueblo. Crecemento economico mester traduci den mas siguridad,
oportunidad y bienestar den e casnan di nos famianan,” Hart a expresa. Cambio responsabel cu perspectiva pa futuro Hart ta splica cu rentmeesterschap ta aplica tambe na e maneho di economia, finansa publico y capital humano. Pa dje, un economia sostenibel mester ofrece trahadonan e posibilidad pa cubri nan necesidadnan basico. E ta reconoce e importancia di atende e posibel efectonan riba gastonan di empresa, prijs y oportunidad di trabou. P’esey, e ta propone cu e aumento forma parti di un vision mas amplio cu ta inclui productividad, formacion profesional y fortalecemento di
empresanan local. Hart ta sostene cu acerca salario minimo na bestaansminimum mester ta un meta social y economico, cu un proceso basa riba dato, dialogo y un plan di implementacion realista. E ekilibrio entre proteccion di trahado, sostenibilidad di empresa y stabilidad economico mester distribui responsabilidad hustamente entre e sectornan. “Nos tin un responsabilidad cu e generacion di awe y cu nos yiunan y nietonan. E meta ta cu trabou duna hende un bida digno, cu esfuerzo tin balor y cu progreso bira un realidad pa tur hende di Aruba,” Hart a conclui.
P 15
DIASABRA 7 DI NOVEMBER 2026
FORTALESA PA FAMIA Scirbi pa Pastor Marcel Balootje.
DIOS TA NOS TATA, RESPETA DIOS, BALORA HENDE For di principio di mundo Genesis 1:26-27 Dios ta identifica Su mes como nos creador, nos ta crea den Su imagen y Su semehansa. Den Testament nobo Hesus ta sinja nos e Oracion di Nos Tata cu ta na cielo, kiermen cu mesun Dios cu ta Tata di Hesus, E ta nos Tata tambe.
duna oportunidad, Dios tin compasion, pero na e momento cu Dios bin busca su pueblo, lo tin separacion, pasobra e palabra ta bisa cu un lo bay y e otro lo keda. ( Mateo 24:40-41) pero e separacion ey ta algo cu Dios so por haci.
Nos identidad como yiu di Dios ta para scirbi den Juan 1:12-13.
Pasobra e bon y e malo lo crece hunto, pero na final Senjor lo separa nan mescos cu carne for di cabrito.( Mateo 25:31-33).
No tin ningun hende independiente di Dios riba e mundo aki, hende pa su mes a crea yen di forma di separacion, pa asina evita cu nan por wordo supuestament domina door di otro persona.
Respet pa Dios ta algo masha importante, pasobra un hende cu no ta respeta Dios, no ta respeta hende tampoco, den un palabra bisa e no tin temor di Dios, ni tampoco respet pa hende.
Mundo a yega asina leu, cu aunke cu un hende ta bay completamente contra Dios Su Palabra y Dios su naturalesa , toch e persona mester wordo respeta como hende y nos mester comunica cune como ser humano.
Anto hopi biaha nos ta mira esaki den nos bida diario, y pa falta di conocemento di e palabra di Dios, nos no por discerni cu ki sorto di hende nos ta trata.
Dios tin misericordia, Dios ta pordona, Dios ta
Tene bon cuenta cu e diabel su plan ta pa hinca hende asina tanto den scuridad pa nan ta totalmente bao di
influencia diabolico, e ta usa: Hende amarga, Hende herida, Hende egoista, Hende jaloers, Hende inmoral, Hende Rebelde, Hende cu no kier pordona,ta herment facil pa e diabel usa. Notabel ta ora un hende caba di haci malo, e ta bin realisa cu ta malo e haci. Cuanto hende cu no ta cana cu arma, ta despues cu nan caba di tira, nan ta realisa, nan a mira hende robes, nan kier arepenti, of nan kier sconde, pasobra despues di e hecho, nan a bini na nan sano huicio, prome cu esey nan tabata bao di dominio di mal influencia diabolico,
Oracion Di Dia
y hasta combina cu uso di droga of alcohol. Y lo mi ta un Tata pa boso,y boso lo ta e yiu hombernan y yiu muhernan pa Mi, Senjor Todopoderoso ta bisa.( 2 Corintionan 6:18). Ma awor O Senjor abo ta nos Tata,nos ta e klei y Abo ta nos alfarero, y nos tur ta obra di Bo man.( Isaias 64:8). Si boso ta invoca como Tata,Esun cu imparcialmente ta husga di acuerdo cu cada ken su obra,comporta boso mes cu temor,durante di e tempo cu boso ta pasa riba mundo.( 1 Pedro 1:17). Balora otro ta nifica asina
aki: No haci nada, cu un actitud di egoismo of orguyo,ma cu humildad,laga cada un di boso, considera e otro mas importante cu e mes,No busca boso interes personal so,ma busca tambe interes di otronan.( Filipensenan 2:3-4). Hobennan balora boso mayornan; Respeta tur hende, honra bo tata y bo mama, trata nan bon, pa tur cos bay bo bon y lo bo tin bida largo.( Efesionan 6:1-4). Balora bida di hende, no haci nada cu hende, locual bo no kier nan haci cu bo.( Mateo 7:12). Drecha cuenta cu Dios. Awe! Sinceramente, Pastor Marcel Balootje.
Laga cu Dios ta e caminda cu e ta laga nos sigui riba dje ”Pa hende, esey ta imposibel, ma pa Dios tur cos ta posibel” Mateo 19,26 E reaccion entre e hendenan cu a scucha e combersacion entre e hoben rico y Hesus a pone hopi duda paso e palabranan tabata duro y cla. Hopi biaha Hesus a adverti contra obstaculonan manera rikesanan cu ta stroba nos drenta den e Reino di Dios. Hesus ta stima hendenan rico ya cu rikesa mes no ta malo, sino si el a wordo gana inhustamente of si ta uze abundantemente sin tene cuenta cu otronan den necesidad, of si cera e curason pa e balornan spiritual. Ta ken anto por haya salbacion? Hesus a responde ”Pa hende, esey ta imposibel, ma pa Dios tur cos ta posibel” Señor conoce e hendenan bon, con nan ta interpreta y suavisa e Palabra di Dios. Laga nos pidi Hesus pa yuda nos y converti nos curason. E hoben rico a bay tristo paso e ta pega na su rikesa. Ta momentonan asina den nos bida nos tin cu pidi Hesus pa capacita nos pa por laga cosnan di mundo atras y sigui Señor. Su promesanan ta cu nos lo sinta cu E Yiu di Hende den e Reino.Oracion:Oh Señor, duna nos e capacidad pa laga nos ”rikesanan” di mundo atras y sigui Bo. Duna nos un futuro feliz, abundancia di bida y e plenitud divino. Conduci nos na e dia aki! Amen.
P 16
SUDOKU
DIASABRA 7 DI NOVEMBER 2026
FORTALEZA PA FAMIA Scirbi pa Pastor Marcel Balootje.
UN DIA CRISTO HESUS LO BINI E dia y e ora ningun hende no sa, pero mescos cu e cunukero ta ripara ta tempo di cosecha , asina tur esnan cu ta kere den Cristo ta nota den e senjalnan, den acontesimento mundial, den movecion di naturalesa y den tur locual cu Cristo Hesus a bisa y ta para scirbi den Mateo 24, cu e tempo ta asercando.
Kico ta nifica e furia di Dios lo keda riba hende?
Tin hopi hende tin miedo di tur locual ta pasando, pasobra ningun caminda ta safe di locual Dios su palabra ta bisa , pasobra locual ta para scirbi lo bini riba mundo completo manera ta para scirbi den Lucas 21:34-36.
Den Romanonan 2:5 e palabra ta bolbe splica con hende pa motibo di nan capricho y nan curason cu no kier arepenti, ta montona furia di Dios pa nan mes, den e dia di furia y huicio di Dios.
Te ainda e harido no kier stop di hari, ni e cherchado no kier stop di chercha, tampoco esnan cu ta rechasa Cristo Hesus , nan curason no kier cambia, y nan curason y pensamento cada dia ta aleha mas for di su palabra, buscando y sirbiendo diosnan falso cu no ta existi ni tampoco por duna salbacion. Manera ta para scirbi cu esnan cu ta kere den Cristo Hesus lo wordo persigi, pasobra nan kier biba un bida cu ta agrada Dios, den santidad, y den pas, y asina cumpli cu e propostito di Dios den nan bida. Laga nos habri nos wowo bon cla, y sigi perservera, pasobra ta cosnan grandi ta na caminda, laga nos pidi Dios pa habri porta, pa e evangelio di Dios por alcansa tur caminda, manera e gran comision ta manda nos. Laga tur hende samina nan mes, ya cu nos no por husga otro, pero nos mester anuncia na tur hende , aunke pa hopi e zona duro e palabranan cu ta para scirbi den Juan 3:36 bisando: Esun cu ta kere den e Yiu tin bida eterno, ma esun cu no obedece e Yiu lo no mira bida, ma e furia di Dios lo keda riba dje.
Awel den Juan 3:16-18 e ta splica nos cu esun cu no kere lo ta condena, pasobra e no a kere den e Yiu unigenito di Dios. Caminda tin condenacion eynan e furia di Dios lo ta.
Y splicando mas cla ainda , nos tur por comprende , cu Dios a stima mundo asina tanto cu e kier duna tur hende un chens pa drenta cielo, cu ta solamento door di kere y biba pa su Yiu Cristo Hesus. E tempo ta birando cortico , nos no sa cuanto tempo mas nos tin, e mundo ta birando cayente, esey ta un di e senjalnan cu ta demostra mas cla locual ta para scirbi den 2 Pedro 3:7. E promesa den Juan 14:1-4 ta pa nos no tin miedo, pa nos kere den Dios, y kere den Cristo Hesus manera ta para scirbi, cu E lo bay , y drecha lugar pa nos y despues bin bek bin busca nos pa caminda E ta nos tambe por ta. Tene bon cuenta cu locual ta para scirbi de 1 Thesalonisensenan 4:16-18. Tempo trabahoso, caminda ciencia y technologia ta aumentando, y mas y mas hende ta desvia , poniendo nan atencion y dedicacion na loke ta terenal y keda sin su busca locual ta eterno, cual ta e salbacion cu Cristo Hesus so por ofrece. E ladron ta bini solamente pa horta, pa mata y pa destrui. Cristo Hesus ta duna bida eterna.Sinceramente , Pastor Marcel Balootje.