Lidewijde Ongering ta presidente nobo di Colegionan di Supervision Financiero (Cft)

E Conseho di Minister di Reino hunto cu Conseho di Minister a base di proposicion di Minister Presidente a bay di acuerdo cu e nombracion di drs. L.M.C. (Lidewijde) Ongering como presidente nobo di Colegionan di Supervision Financiero. E ta sigui prof. Dr. Raymond Gradus, cu desde 1 di juli 2017 tabata presidente di e Colegionan.

Cu e nombracion di Conseho di Minister (di Reino) señora Ongering ta bira e presidente nobo entrante 1 di februari pa Cft Corsow, Sint Maarten y Aruba banda di Cft Boneiro, Sint Eustatius y Saba. Señora Ongering tin un trayectoria largo den servicio di departamentonan grandi na Den Haag, bou cual Asuntonan Interior y Relacionnan di Reino, Infrastructura y Maneho di Awa, y Asuntonan Economia y Clima. Na e ultimo dos departamentonan ela eherce e funcion di secretario-general. Na ministerio di Salubridad, Bienestar y Deporte ela eherce e funcion di Director pa Asuntonan Financiero-Economico.

E Colegionan pa Supervision Financiero ta independiente y ta supervisa e calidad di gobernacion di finanzas publico di e paisnan Corsow, Sint Maarten y Aruba y di Hulanda Caribense: Boneiro, Sint Eustatius y Saba. E colegionan tin un funcion di señala y conseha.

Alexandra van Huffelen, Secretario di Estado pa Asuntonan Interior y Relacionnan di Reino: ‘Mi ta contento cu nos a logra encontra un persona den un posicion di servicio solido pa e funcion importante aki. E ta un sucesor digno pa señor Gradus cu na oktober 2022 a anuncia su retiro entrante 1 di februari 2023. Nos no por enfatisa e importancia di un finansas publico saludabel suficiente. Finansas publico saludabel por cierto ta forma e base pa por haci invercionnan cu ta contribui na resistencia y desaroyo sostenibel pa e paisnan. Cu meta principal: Mas bienestar pa tur ciudadano.’

Lidewijde Ongering: “Mi ta entusiasma pa traha riba e retonan, cu por cierto pa un gran parti mi ta reconoce, hunto cu un perspectiva conhunto. Cft ta mantene supervision riba e presupuestonan. Despues di algun aña financiero dificil, e enfoke lo ta riba un recuperacion y realisacion di un crecimento economico hustificabel y sostenibel. Esaki den mi funcion como presidente di Cft ta algo cu mi lo supervisa seriamente.”

Lidewijde Ongering ta sigui Raymond Gradus cu despues di mas cu cinco aña y mei tabata presidente di e Colegionan di Supervision Financiero. Conseho di Minister di Reino ta gradici señor Gradus pa su envolvimento y aporte pa e paisnan. Secretario di Estado pa Asuntonan Interior y Relacionnan di Reino ta percura den nomber di Conseho di Minister (di Reino) pa un confirmacion di e nombracion den un ‘Koninklijk Besluit’.

Nota pa redaccion, pa mas informacion por acudi na Communicatie SSO-CN, Lucia Beck 7819050.