Autentico ArubA culinAry
FestivAl A hAbri AplicAcion pA
pArticipA den e tercer
edicion
Aruba Tourism Authority (A.T.A.) ta anuncia cu aplicacion pa participa den e tercer edicion di Autentico Aruba Culinary Festival ta oficialmente habri. Despues di dos edicion exitoso, Autentico ta bolbe pa celebra e rikesa di nos herencia culinario y e diversidad cultural cu ta haci Aruba unico. E festival lo inicia oficialmente 3 di october, cu su evento principal, ‘The Pavilion’, tumando luga 10 y 11 di october, 2026.
Influencia pa mas di 100 nacionalidad, cushina
di Aruba ta representa tradicion, creatividad y comunidad, y Autentico ta reuni tur esaki den un experiencia culinario comparti. Participacion di ‘vendors’ ta un elemento esencial di Autentico, aportando sabor, creatividad y autenticidad na cada plato. Pa es motibo, Autentico ta invita vendors di cuminda, bebida y dessert pa aplica y asina haya e oportunidad pa forma parti di e festival.
Vendors interesa ta wordo invita pa yena e formulario di aplicacion
cu ta disponibel online riba e website oficial di Autentico, cual ta autenticofestival.com. Aki por haya tur informacion y rekisitonan necesario.
Pa mas informacion sigui @autenticoaruba riba medionan social.
POLIS A DETENE 7 PERSONA Y CONFISCA BULTONAN DI DROGA NA RODGERBEACH
Diabierna 29 mei 2026 den oranan di atardi Departamento di Crimen Organisa (UGC) a dal baho mundo duro un bez mas. Na altura di Rodgers Beach a haci detecion y a confisca hopi bultonan di droga. A detene den total di 6 persona: 5 ta hende homber naci na Aruba y 1 hende muher naci na Colombia. Un accion bon coordina pa personal di UGC cu despues di un investigacion relampago a dal baho mundo un golpi hopi duro. A confisca basta bultonan di droga tambe a confisca un auto y dos jetski.
Investigacion no a para keto y a sigui. Den oranan di anochi a haci dos entrada hudicial simultaneamente. Un na un cas na Seroe Colorado y e otro na un cas na Appelsinastraat. Na e cas na Appelsinastraat a detene un homber pero pa posesion y
bendemento di droga. Diasabra mainta a sigi cu e investigacion na costa y a bin topa cu mas bulto di droga.
Den e accion aki Kustwacht a yuda riba lama como tambe na tera. E investigacion ta den pleno desaroyo y no ta descarta cu lo tin mas detencion. Cuerpo Policial
Aruba ta haci un apelacion na esun cu sa algo of a wak algo pa yama e tiplijn di polis cu ta 11141.
ta keda anonimo.
BANCO CENTRAL DI ARUBA A mANTENE E RESERvA
Banco Central di Aruba (BCA) a dicidi durante e reunion di MPC di 27 di maart 2026 pa mantene e tasa di reserva obligatorio pa banconan comercial na 12,5% entrante 1 di april 2026.
Puntonan principal:
1. Reservanan adecua
Te cu 27 di februari 2026, reservanan di divisa a surpasa substancialmente e normanan cu BCA ta monitoria. Ademas, BCA ta anticipa cu e reservanan di divisa lo keda adecua.
2. Un inflacion abou
Ambos inflacion midi na final di luna contra e mesun luna di e aña anterior y e promedio anual di inflacion a permanece na nivelnan relativamente abou di 0,5% y 0,1% respectivamente.
3. Incertidumbre mundial economico
E incertidumbre mundial na e momentonan aki, incluyendo e tensionnan geopolitico persistente, por impacta e reservanan di divisa y inflacion, cu por causa desviacionnan for di
e proyeccionnan actual cu ta fungi como e punto di salida (“baseline”).
BCA ta monitor indicadornan monetario y economico di cerca y lo ahusta su posicion di maneho monetario ora ta necesario pa mantene e tasa fiho di e florin na e dollar Mericano.
Pa mas informacion por comunica cu nos via email na: communications@cbaruba.org.
Banco Central di Aruba 29 di mei 2026
Bo
Bario MaB on y Fundacion Luna a uni Forsa pa atende pro BL e M atica di cacho den co M unidad
Comision di Desaroyo y Bienestar di Bario Mabon, hunto cu Fundacion Luna, a realisa un recorido den Bario di Mabon pa observa y atende e problematica di cacho den comunidad. E iniciativa aki a nace despues cu e Comision a nota con, durante diferente Accion di Bario cu Prome Minister Mike Eman, den colaboracion cu organisacionnan manera Fundacion Luna a yuda atende problema relaciona cu bienestar di bestianan den diferente bario. Inspira pa e ehempel positivo aki, Comision di Bario Mabon a tuma e iniciativa pa traha hunto cu Fundacion Luna pa atende e situacion di cacho den e bario.
E Comision ta di opinion cu hopi biaha tin e percepcion cu solamente durante bishitanan di Prome Minister Mike Eman un fundacion manera Fundacion Luna por yega den un bario. Sin embargo, esaki no ta asina. Cada bario por tuma su propio iniciativa y sigui e ehempelnan positivo promovi pa crea miho condicion pa nan habitantenan.
Durante e Conferencia
di Bon Comun organisa pa Prome Minister
Mike Eman, presidente di Comision di Bario Mabon, Astrid Vries, a firma un Memorandum of Understanding (MoU) hunto cu e miembronan di e comision. Cu esaki, e comision a compromete su mes pa no solamente organisa actividadnan den e bario, pero tambe pa traha riba desaroyo di comunidad y atende diferente reto cu e bario ta confronta diariamente. Comision di Bario Mabon a informa Zoey Konijn di Fundacion Luna tocante diferente area den e bario unda cachonan ta stroba habitantenan ora di pasa riba caminda y ta crea preocupacion pa siguridad y bienestar di e habitantenan.
Zoey Konijn di Fundacion Luna a comparti cu e recorido tabata un bon oportunidad pa cana den Bario Mabon hunto cu representantenan di e comunidad. Segun Konijn, loke mas a resalta tabata cu tin un necesidad real di sosten ora ta trata di cachonan cu ta biba riba caya. Hopi di e cachonan aki un tempo tabatin un doño, pero awor ta biba
sin cuido, siguridad ni cas adecuado.
Fundacion Luna tambe a tuma nota cu hopi cacho ta biba na cadena. Pa medio di educacion, compasion y sosten, e fundacion ta kere cu poco poco por yuda cambia e mentalidad aki. Algun famia tambe mester di un espacio mas apropia pa nan bestianan, y caminda ta posibel, Fundacion Luna kier yuda mehora e situacionnan ey. Loke mas a conmove Fundacion Luna tabata e forma cordial cu hopi habitante di Mabon a ricibi e iniciativa pa traha hunto riba bienestar di tanto hende como bestia. Fundacion Luna su siguiente campaña di sterilisacion y castracion den luna di juni lo ta specialmente dirigi na famianan “pariba di brug” cu mester di asistencia den cuido di nan bestianan di cas. Fundacion Luna ta kere firmemente cu esaki mester ta un esfuerso
di comunidad, pasobra ora hende haya sosten y bienestar, nan bestianan tambe ta beneficia.
Pa Comision di Desaroyo y Bienestar di Bario Mabon, e presencia di Fundacion Luna tambe a sirbi como un experiencia educativo unda nan a haya
mas conocemento riba problematica di cacho y solucionnan cu por yuda e comunidad.
Comision di Desaroyo y Bienestar di Bario Mabon ta sigui traha pa un bario mas sigur, limpi y miho convivencia pa tur habitante.
No warda uN delito sosode, pero crea uN efecto preveNtivo
Un hoben di 17 aña a perde su bida riba un parkeerplaats. Dos siman despues, nos ta recuri na control di prevencion pa arma di candela.
Preventief fouilleren ta un instrumento legitimo den lucha contra crimen organisa, trafico di droga y arma. E logica ta cla: no warda un delito sosode, pero crea un efecto preventivo cu ta frena hendenan cu intencion criminal. E resultadonan recien ta confirma cu e instrumento ta funciona ora e wordo aplica.
Pero un instrumento ta solamente mesun fuerte cu e sistema den cual e ta opera
Prevencion real no ta cuminsa despues di un homicidio. E ta cuminsa cu inversion continuo , den KPA, den KIA, den inteligencia,
den programanan. Hendenan cu diariamente ta traha den sector di husticia merece un sistema cu tin e fundeshi cu nan ta exigi pa haci
nan trabou.
E standard ta cla: siguridad publico ta un responsabilidad
continuo di gobierno. Esun cu no ta inverti structuralmente, ta esun cu mester carga responsabilidad di e consecuencianan.
ultimo simaN pa eNtrega formulario: gobierNo
di aruba cu recordatorio riba e “opeN call” pa coNmemoracioN di dia di emaNcipacioN 2026
Gobierno di Aruba algun tempo pasa a anuncia oficialmente un “Open Call” den cuadro di conmemoracion di Dia di Emancipacion 2026, cu lo ta celebra riba 1 di juli. E iniciativa ta invita organisacionnan social, grupo cultural, fundacionnan y movimento grassroots pa presenta proyecto y actividadnan cu ta contribui na un conmemoracion digno, consciente y conecta cu historia di abolicion di sclavitud.
Segun Prome Minister Mike Eman, Aruba ta den un fase importante unda e historia di sclavitud ta haya mas reconocemento y espacio den nos sociedad. E “Open Call” aki ta
busca stimula dialogo, reflexion y conexion den comunidad Arubiano.
“Nos kier crea espacio pa mas consciencia y participacion den e manera cu Aruba ta conmemora e historia aki. Esey ta importante pa nos compronde nos pasado, pero tambe pa mira con nos por sigui construi un sociedad cu mas conexion y entendemento mutuo,” asina Prome Minister Eman a expresa. Gobierno ta reconoce cu e historia di sclavitud na Aruba y den region di Caribe tin diferente dimension, incluyendo e historia transatlantico, relacionnan regional entre islanan y tambe diferente forma di
sclavitud cu a afecta comunidadnan den pasado. Segun Gobierno, e complehidad historico aki ta haci aun mas importante pa brinda espacio na diferente bos y iniciativa den sociedad.
Pa sostene e iniciativa, Herdenkingscomite a pone disponibel un presupuesto total di USD 30.000, cu lo ta reparti entre diferente proyecto y actividad selecciona. E enfoke principal ta riba iniciativa cu:
• crea espacio pa recuerdo y reconocemento;
• contribui na consciencia y dialogo;
• y fortalece conexion den sociedad Arubiano.
Pa e motibo aki Gobierno ta manda un recordatorio riba e ‘Open Call” cual entrega di aplicacionnan ta exclusivamente door di persona huridico, manera fundacionnan y asociacionnan. Gobierno ta enfatisa cu e iniciativa, cu pa algun tempo caba ta trahando riba dje, ta busca specialmente proyectonan cu trata e tema cu cuidou, respet y relevancia social.Entre e tipo di actividadnan cu por presenta tin ceremonia, storytelling, arte, dialogo, expresion cultural y otro forma creativo di participacion comunitario.
Minister Wyatt-ras a habri oficialMente conferencia DucaPhen 2026 na aruba
Oranjestad, 1 di juni 2026. Awemainta Minister di Salubridad, Asunto Social, Cuido di Adulto Mayor y Maneho di Adiccion, Sra. drs. Melvin Wyatt-Ras, a habri oficialmente e conferencia DuCaPHEN 2026 na Aruba.
Durante su discurso, e Minister a enfatisa e importancia di cooperacion regional, intercambio di conocemento y preparacion comparti pa fortalece salud publico den Caribe Hulandes.
DuCaPHEN, e Dutch Caribbean Public Health Expertise Network, ta un red regional cu ta promove cooperacion, intercambio di conocemento y
coordinacion den salud publico entre e paisnan y islanan di Caribe Hulandes y Reino Hulandes.
E conferencia di e siman aki ta reuni profesionalnan, expertonan, epidemiologonan y partnernan den salud publico for di Aruba, Bonaire, Curaçao, Saba, Sint Maarten y Sint Eustatius, hunto cu representantenan di Reino Hulandes, incluyendo Rijksinstituut voor Volksgezondheid en Milieu (RIVM).
Den su mensahe, e Minister a indica cu retonan den salud publico no ta para na frontera. Enfermedadnan infeccioso, enfermedadnan cronico, preparacion pa
emergencia y otro retonan relaciona cu salud ta afecta nos tur. Pa e motibo ey, cooperacion regional y intercambio di informacion ta esencial pa proteha y promove bienestar di nos comunidadnan.
Como pais anfitrion, Aruba a duna bon bini na tur participante y a reafirma su compromiso cu cooperacion, preparacion y resiliencia den salud publico. Como un isla chikito, Aruba ta reconoce cu colaboracion y intercambio di experiencia
ta fundamental pa responde na retonan actual y futuro den salud publico.
E conferencia di e siman aki lo enfoca riba diferente tema importante, incluyendo prevencion di enfermedadnan infeccioso, vigilancia epidemiologico, control di vector, preparacion pa emergencia y fortalecemento di colaboracion regional.
Organisa den colaboracion entre Rijksinstituut voor Volksgezondheid en Milieu (RIVM) y Dienst
Volksgezondheid Aruba (DVG), e conferencia ta brinda un plataforma pa comparti conocemento, fortalece relacionnan existente y crea oportunidadnan nobo pa cooperacion entre e islanan.
DuCaPHEN ta sigui hunga un rol importante den fortalece coordinacion y preparacion regional, cu e meta comun di logra comunidadnan mas saludabel y resiliente den henter Caribe Hulandes.
Na caminda pa Mundial
Prome biaha den historia cu seleccion di sPaña no tin ningun hungado di real madrid Pa un mundial
Luis de la Fuente, seleccionado nacional di Spaña, a duna di conoce e lista oficial di e hungadonan convoca p'e Copa de Mundo cu lo tuma luga e zomer aki na Merca, Mexico y Canada. E noticia a causa un gran sorpresa den mundo deportivo, ya cu pa prome biaha den historia di e torneo aki, no tin ningun hungado di Real Madrid inclui den 'La Roja'.
E hoben defensa Dean Huijsen, banda di Fran Garcia y Gonzalo Garcia, tabata forma parti di e prelista inicial di 55 futbolista, pero ningun di nan a logra drenta den e seleccion final presenta p'e tecnico dialuna ultimo. For di e tres nombernan aki, Huijsen tabata esun cu mas oportunidad tabatin di biaha, mirando cu el a bini ta ricibi convocacionnan continuo desde su debut cu e seleccion absoluto na maart 2025. Sinembargo, su falta di regularidad den e alineacion di Real Madrid den e ultimo lunanan a cost'e su luga p'e cita mundialista.
Durante un conferencia di prensa, Luis de la Fuente a splica su decision structural y a enfatisa su postura profesional. El a declara cu e no ta enfoca riba e club di procedencia di e deportistanan, sino puramente riba e capacidad y
e posibilidad cu un hungado tin pa aporta na e seleccion, sin importa pa cua team e ta hunga.
E bishita anterior mas abao di representacion di Real Madrid den un Mundial cu Spaña a registra na aña 1950, ora Luis Molowny tabata e unico hungado di e club blanco. Mas recientemente, den e Mundial di Qatar 2022, e ex-tecnico Luis Enrique Martinez a convoca dos futbolista, Dani Carvajal y Marco Asensio, maske Carvajal a perde e
torneo pa via di un lesion.
E unico antecedente den un gran torneo internacional sin presencia Madridista tabata den e Eurocopa di 2021, caminda decisionnan tactico y lesionnan a laga Carvajal y Sergio Ramos afo. Consecuentemente, e excepcion aki ta marca un hito historico p'e seleccion Spañó, ya cu ta prome biaha cu esaki ta sosode sin cu tin lesionnan envolvi dentro di e constelacion.
Minister Geoffrey Wever: ArubA tA AfirmA su compromiso regionAl pA seguridAd
AlimentArio nA sint mAArten
Oranjestad, 1 juni 2026 – Minister di Minister di Finansa, Asunto Economico y Sector Primario, Geoffrey Wever hunto cu Santa Rosa a participa na e Conferencia Anual di Dutch Caribbean Agriculture, Livestock and Fisheries Alliance (DCALFA) na Sint Maarten. E conferencia DCALFA den e periodo di 25 pa 29 di mei 2026 a conta cu participacion di mandatarionan y expertonan tur seis isla, Aruba, Korsou, Bonaire, Sint Maarten, Saba y Sint Eustatius. Meta di DCALFA ta fortalece cooperacion regional den sector primario y pusha ehecucion di iniciativanan practivo cu ta contribui na siguridad alimenticio, produccion sostenibel y resiliencia economico den nos islanan.
Dependencia di importa nos cuminda ta forma un reto. Cifranan di importacion ta papia nan mes. Actualmente, 99% di tur producto alimenticio cu Aruba ta consumi ta wordo importa. Cada dia, Aruba mester alimenta mas cu 100.000 persona — incluyendo residente y turista. Banda di identifica y ta consciente di riesgonan manera un crisis global, un perturbacion di cadena di suministro, un desaster natural, esaki ta crea oportunidadnan. Cu solamente 74 productor local ta opera na nivel comercial, esaki ta prueba cu nos comerciantenan den secor primario tin e experiencia y conocimento pa hunto cu gobierno di Aruba haci di e sector primario, un sector economico fuerte.
Maneho pa fortalece e sector primario di minister Geoffrey Wever ta den ehecucion. Como parti e
maneho aki Agri Business Academy a wordo crea. Den colaboracion cu Qredits Aruba, e programa a forma ya 60 emprendedor agricola desde 2023. Hende nobo cu e soño y ambicion pa traha nan mesun negoshi den agricultura, a haña e conocemento y e hermentanan pa logra esaki.
E programa di prestamo Agri Loan ta facilita financiamento atractivo pa productornan local den e sector primario. Agri Loan ta encera un prestamo cu solo 2% di interes, diseña specialmente pa stimula produccion local. Desde 2023, a otorga 16 prestamo — AWG 2.43 miyon na total. Esakinan a financia 6 chicken farms y 10 productor di berdura, principalmente lechuga.
Hisa produccion local di webo tambe ta prioridad di maneho. Aruba ta riba caminda pa aumenta e produccion local di webo di 15.4% pa 93.8%. Tereno a wordo asigna pa dos chicken farms nobo y grandi. Ley pa regulacion di importacion y prijs ta wordo desaroya. Esey ta un cambio drastico y historico pa nos isla.
Como parti di Agripreurial Development Program, construccion di e prome AgriInnovation Park (AIP) ta pilar di e vision pa e sector primario. AIP ta un facilidad moderno di 9.000 m² di area di cultivo y lo enfoca riba produccion di tomati di calidad halto, cu potencial di produci entre 513.000 y 552.600 kg di tomati pa aña. Actualmente Aruba ta importa 1.2 miyon kg di tomate pa aña. E AIP lo contribui pa baha e dependencia
aki significativamente.
Den Fase A, den e proximo 0 te 5 aña, Aruba lo logra 42 te 46% autosuficiencia den tomati. E AIP lo conta tambe cu un Centro di Excelencia — un centro di investigacion, training y demostracion di tecnologia agricola. Aki, agricultornan nobo y existente lo haña apoyo, coaching y capacitacion di nivel internacional.
Cooperacion regional tambe ta forma un pilar esencial pa ehecucion di maneho pa sector primario. DCALFA como instrumento di maneho ta fortalece cooperacion regional den sector primario y pusha ehecucion di iniciativanan practivo cu ta contribui na siguridad alimenticio, produccion sostenibel y resiliencia economico den nos islanan.
Pa fortalece e cooperacion regional durante DCALFA a renoba e compromiso collectivo entre Aruba, Korsou, Bonaire, Sint Maarten, Saba y Sint Eustatius. Minister Wever, hunto cu coleganan minister di Korsou, Bonaire, Sint Maarten, Saba y Sint Eustatius, a firma pa renoba e MoU y asina reafirma y fortalece e cooperacion regional y e compromiso conhunto di tur partido den e cuadro
di DCALFA. Pero e significancia di e documento aki ta bay mas lew cu un firma simbolico. E MoU renoba lo sirbi como e fundeshi strategico y organisacional pa colaboracion regional, alinea cu e DCALFA Roadmap 2025–2035. Esey ta nifica implementacion structura, progreso cu por midi y impacto a largo plaso. No ta solamente un intencion, pero un plan di accion cu accountability real.
Na e conferencia di 2025 na Boneiro, Aruba ya a firma un roadmap historico cu e islanan ruman. E renobacion di e MoU durante DCALFA ta intensiva e colaboracion regional na un nivel ainda mas halto — mas fuerte, mas concreto y mas comprometi cu resultadonan real. Den e DCALFA, Aruba a participa activamente hunto cu e otro cinco islanan Hulandes. Desde 2022, e aliansa aki ta comparti data, strategia y capacidad pa fortalece tur nos islanan hunto.
Partipacion na DCALFA ta duna Aruba e oportunidad pa riba nivel ministerial y den dialogo cu Korsou, Bonaire, Sint Maarten, Saba y Sint Eustatius presenta Aruba su vision y implementacion di maneho pa un sector primario moderno, innovativo y resiliente segun Minister Geoffrey Wever.
ArubA bAnk WAlk & run
2026, celebrAndo 20 AñA di movimiento y evolucion
Oranjestad, 1 di juni 2026
– Aruba Bank Walk & Run 2026 a culmina cu exito su di 20 edicion, marcando dos decada di promocion di un estilo di bida activo y fortaleciendo e conexion den nos comunidad.
Bou di e tema “Evolving Together”, miles di participante a reuni durante cuatro anochi consecutivo pa cana, core y comparti den un ambiente di energia, motivacion y entusiasmo.
Locual a cuminsa na 2005 como un evento deportivo local, a crece durante 20 aña bira un tradicion aprecia bou nos comunidad. E edicion di e aña aki a reuni participante di tur edad y nivel deportivo, tur compartiendo un mesun meta: move, supera nan mes y evoluciona hunto. Un aspecto especial di e edicion aniversario tabata e introduccion di e categoria Corporate Teams, permitiendo coleganan forma team
y motiva otro durante e cuatro dianan.
E iniciativa a refleha perfectamente e mensahe di e campaña: cu progreso y exito ta logra mihor ora nos haci e hunto. Participantenan cu a completa mas cu 20 kilometro durante e cuatro dianan a ricibi e exclusivo Finisher’s Coin, un reconocimiento na nan perseverancia y compromiso.
Aruba Bank kier expresa su sincero agradecimiento na e mas cu 100 boluntario cu a contribui na exito di e evento.
Entre nan tabatin empleado di Aruba Bank, representante di diferente organizacion comunitario, personal di emergencia y otro colaboradornan cu a traha incansablemente pa garantisa un experiencia sigur, agradable y memorable pa tur participante.
Un agradecimiento special ta bay na nos partnernan principal Subway y
IBISA, y tambe na Cuerpo Policial Aruba, Rode Kruis Aruba, Volunteer Motor Unit, Patrishi Sports, Excelencia Catering, Elite entertainment, MC Glennon, DJ 101, DJ Ulrich 297Sports, Sunny Side Photography , Michael Salazar Photography, Signs 365, Believe in yourself foundation, Smart systems, Total Services y tur otro colaborador cu a brinda nan apoyo durante e evento.
Na nivel competitivo, e rumanan Christiaan Jansen y Rebecca Jansen a domina e clasificacion general, y a keda nombra gran ganadornan masculino y femenino di Aruba Bank Walk & Run 2026 despues di cuatro dia di competencia intenso.
Aruba Bank ta gradici tur participante, boluntario, y tur fanaticonan banda di caminda cu a bai apoya y a haci e evento aki uno historico.
Danki y pabien FunDacion Lanta papiamento e ta un lucha di añanan y cu keto bay ta continua
E siman cu a pasa, FLP a tene un celebracion unico y amplio na Arubiana-Caribiana den Bachstraat titula “ Papiamento den Hofi”.
E anochi unico aki tawata yena cu varios artista di poesia, baile y lectura. Tambe bukinan nobo y nan autor, fotografia, historia y tur loke ta na bentaha di nos idioma su celebracion oficial. E mc nan tawata miembronan
Aruba.
E anochi tawata parti den 2. Mi a scohe pa esun di den sala unda Doctor Joyce Pereira a presenta un lectura di kita sombre. E tawata tin historia y origen di Papiamento, pregunta y discusion di e publico compaña pa fragmentonan di video cu FLP a crea den pasado. Entre otro por a mira Ramon Todd Dandare y Joyce Pereira den AlCaso, Elliënne Riatiga, Evelyn Ruiz-Croes y Lyonel Dirksz den e fragmentonan.
A pesar cu nos colonisadornan a purba di tur forma pa obliga nos hendenan di antes pa papia Hulandes n’e islanan, tog Papiamento a logra sobrevivi. Danki FLP p’e invitacion pa a celebra e fecha importante aki y pabien cu e resultado. Continua cu e trabou importante aki cu sigur tin impacto grandi riba nos isla. Algun dia e
soño di tin Papiamento oficialmente 100% den nos educacion lo ta realidad. E ta asina unico cu e merece ta defendi.
Danki na ArubianaCaribiana p’e invitacion y
DCA cu Jhon-Freddy Montoya pa algun potret y e flyer cu e frasenan di cariño pa nos idioma. Pa mas informacion por bishita e pagina di Facebook di Fundacion Lanta Papiamento.
di FLP Shahayra- y Carlos Croes. Por a nota presencia tambe di Rubia Bernabela di fundacion Corector di Papiamento.
Tawata na 2003 cu Papiamento a bira idioma oficial via Parlamento di
Remses Rafaela ta lansa un single nobo ‘ u n b es’ i ta fo R talesé
inf R ast R uktu R a kultu R al pa talento k a R ibense
WILLEMSTAD/ ROTTERDAM – Despues di un ousensia di sinku aña, kantante i artista
Remses Rafaela, mihó konosí komo MuisjeMuis, ta dal un biaha mas un paso signifikante den su mishon artístiko i sosial ku e lansamentu di su single nobo ‘Un Bes.’ E artista Kurasoleño ta konosí komo presentadó, direktor, entrenadó kultural, koreógrafo, i músiko, i ta konektá influensianan AfroKaribense, Afrikano, Afro-Merikano, i Oksidental den su obra. Remses ta aktivo komo bailarin i koreógrafo profeshonal for di 1996. Pa medio di su proyektonan artístiko i inisiativanan kultural, e ta komprometé na konekshon, desaroyo di talento i visibilidat kultural.
UN BES: MUSIKA, EMOSHON, I KONEKSHON
‘Un Bes’ ta un kolaborashon entre Remses Rafaela i produktor Mayday, un talento yòn prometedor ku e ta mentor. E kansion ta inspirá pa tradishonnan di kontamentu di historia Afro-Karibense i ta drai rònt di e poder di palabra, inteligensia emoshonal i konekshon humano. Den un tempu kaminda komunikashon hopi bia ta rápido i superfisial, ‘Un Bes’ ta opta pa sutilesa, ambiente i nifikashon. E kansion ta eksplorá kon atrakshon, konfiansa i intimidat ta surgi
ku tempu, empatia i presensia.
Sedukshon no ta keda mira aki komo un wega, pero komo un forma di komunikashon den kua atenshon, rèspèt i komprondementu mutuo ta tuma e sentro di atenshon. “Sea ta músika, teater, un kòmbersashon, òf un festival, finalmente, e ta tokante konekshon i kreashon di espasio kaminda hende por topa, inspirá i empoderá otro,” Remses ta splika. Pa Remses, músika no ta separá di su mishon kultural mas amplio.
Pa medio di Fundashon Passion & Skillz, e ta traha riba desaroyo di talento i visibilidat di kreadónan Afro-Karibense. Den e ultimo sinku añanan, Remses a dediká su mes aktivamente na yuda fortifiká e falta di infrastruktura i sosten pa artistanan Antiano i Rubiano den e diaspora Hulandes. Pa medio di kolaborashonnan, entrenamentu i proyektonan kultural, e ta krea oportunidatnan nobo pa e siguiente generashon di artista.
PROYEKTONAN NOBO
DI MÚSIKA
E lansamentu di ‘Un Bes’ ta marka e punto di salida di un periodo musikal nobo. ‘Legumai’ tambe lo keda lansa ofisialmente e zomer aki. Mas lat e aña aki, e álbum ‘Riba un Trip 2’ lo sali, ku ta konta ku
diestres kansion nobo. Mas o ménos setenta porshentu di e álbum a keda produsí pa Remses mes, den kolaborashon ku e produktor Zurich Music. Adishonalmente, e single nobo ‘E Banki’ lo keda lansa, un kolaborashon ku e kantante Ivanhoe Willems. Ademas di su aktividatnan musikal, Remses ta organisá i sostené vários programa kultural. Dia 20 di yüni próksimo, Remses i su banda lo presentá na Festival di Keti Koti na Almere. Sigui pa 26 di yüli pa ‘No Waste Festival’ na Rotterdam-Zuid, un evento ku ta enfoká riba sostenibilidat, desaroyo di talento, i konsientisashon pa resiklahe. Dia 8 di ougùstùs próksimo e presentashon di baile infantil ANOCHI lo estrená durante Festival Boulevard na Den Bosch. Dia 12 di sèptèmber i 6 di desèmber próksimo, Caribbean Day Theatre Festival lo tuma lugá na Theatre Zuidplein Rotterdam, kual ta un plataforma multidisiplinario pa desaroyo artístiko, visibilidat, i interkambio kultural pa e komunidat Afro-Karibense. Remses ke invita tur artista i organisashon ku ke kolabora, por tuma kontakto ku Stichting Passion & Skillz riba nan wèpsait www.passion-and-skillz. com, Pidi pa ‘Un Bes’ na tur radio emisora popular
i sigui
Remses Rafaela riba diferente plataforma di
medionan sosial, manera Facebook.com/remses. rafaela i Instagram.com/ muisjemuis.
medaya di OrO pa Hug O T H emen
Hugo Themen ta gana Medaya di Oro den Campeonato Pan Americano Master-Sur
Centroamericano y del Caribe cu ta wordo teni den e ciudad di San Salvador, El Savador. Fecha di 27 pa 31 mei 2026.
Den e campeonato aki tabata tin participacion di mas cu 240 atleta for di 22 pais di continente Panamericano y SurCentroamericano y del Caribe.
Hugo cu a competi cu 13 otro atletanan den diferente categoria y grupo di edad 65 pa 69 aña di edad.
Hugo ta logra den Su hisadanan den snatch 40kg y den clean & jerk 52kg pa un total di 92kg.
Cu e total aki Hugo ta gana medaya di Oro pa Aruba den e Campeonato Sur-Centroamericano y del
Caribe Master.
Na final di e Campeonato Master
Hugo Themen a ricibi un Plakaat di reconocimento pa su destacada trayectorio como deportista master di Aruba y dirigente riba nivel nacional y internacional for di Sr. Dr. Pedro Ruales Presidente di Federacion Master de Levantamiento Olimpico de Pesas Sur- Centroamericana y del
Caribe Master.
Aruba Amateur Weightlifting Association kier a manda palabra di felicitacion pa Sr. Hugo Themen cu su Medaya di Oro y tambe eimage1.jpegimage0.jpegimage11. jpegPa no lubida kier a gradici Fundacion Lotto pa Deporte cu a cubri e gastonan di biahe y estadia pa Sr. Hugo Themen su particpacion.
Oracion di dia
MA E FARISEONAN A SALI BAY TRAHA PLAN PA WAK CON POR CABA CU HESUS. ( MATEO
12, 14)
Rumannan, awe den e Palabra di Dios nos por lesa con e Fariseonan ta bay traha plan pa por purba caba cu nos Señor Hesus. Nan kier caba cu un hende cu tabata haci milagernan grandi, cu a duna miles di hende di come, cu a lanta hende for di morto, cu a sana lepra, cu a duna ciego su bista bek y cu a hasta a saca demonionan.
Loke cu nos mester realisa ta cu no ta importa cuanto cos bon bo haci, semper lo bay tin Fariseonan para cla pa purba caba cu bo, semper cla para pa bay contra bo. Paso si nan a hacie cu nos Señor anto nan lo hacie cu nos tambe.
Hende pa envidia y yalusi no ta import’e cuanto cos bon bo haci, pero nos tin cu confia Dios paso E semper tin e ultimo palabra.
Oracion: Tata nos ta pidi Bo pa yuda nos pa nos
No bira manera e Fariseonan buscando hende pa destrui pero yena nos cu Bo amor, tur esaki nos ta pidi Bo den nomber di Hesus. Amen.
Laga tur loke ta spera mi ta bunita
Laga tur locual cu mi encontra na caminda ta bunita Laga tur locual cu mi laga atras keda bunita y Laga esakinan termina den tur buniteza.
Cu profundo tristeza na nos curazon, pero gradicido na Dios pa tur locual el a significa pa nos, ta anuncia fayecimento di:
Yui di †Ignacio & Juanita Lopez- Wever
Viuda di Sr.Teofilo Tromp Na nomber di su:
Yuinan:
Luis y Sandra Tromp- Garcia Restrepo Tito y Mila
Tromp- Thijzen
Roberto y Antonia Tromp- Geerman
Nieto(a)nan:
Jonathan y Maria Monica Tromp- van den Bosch
Ludwig Tromp Y Evelyn Peterson
Luis Tromp y Vanessa Geerman Ruzischka Tromp y
Richnell Rozenberg Rashida Tromp
Maikel Rasmijn
Bisanieto(a)nan:
Nathan, Niamh, Adam, Noah, Nixelyn, Neylani, Isabelle, Theo y Christiaan.
Rumannan:
† Francisco Lopez y famia
† Carlino Lopez y famia
† Agrepina Koolman- Lopez y famia
† Catharina Lopez
† Damasco Lopez y famia
† Cleta Wever – Lopez y famia
† Helena Lopez
Pascuala Abello- Lopez y famia
Swa y cuñanan:
† Edna Johnson Tromp y famia
† Ruben Tromp y famia
† Margo Sark- Tromp y famia
† Olga Wong- Tromp y famia
† Marco Tromp y famia
† Leo Tromp y famia
† Bill Tromp y famia
Amiganon di cas:
Elio y Carmen Carolina- Rasmijn y famia
Mihor conoci como Lina * 26 april 1937 †31 mei 2026
Subrino y subrinanan, primo y primanan, ihanan, bisiñanan, personal di Cas di Machi, Brazilian Flash
Racing Foundation, demas famia y conocirnan.
Ta invita tur bisiña, amigo y conocir pa asisiti na e acto di despedida cual lo tuma lugar diabierna 05 juni 2026.
E curpa di nos Lina stima lo ta reposa for di 9or di mainta pa 10.30 na Pray funeral home na San Nicolaas sigi pa un response. Acto di cremacion lo tuma lugar den seno familiar.
Si en caso den nos tristeza nos por a lubida algun persona of famia, nos ta pidi nos mas sincero disculpa.
Sra. Mercelina Tromp- Lopez
Un feliz dia y cu Dios bendiciona boso ricamente
”P’esey obedece y sigui tur cos cu nan bisa, ma no haci manera nan ta haci si! Pasobra nan mes no ta haci loke nan ta bisa. Mateo 23,1
Rumannan e Palabra di Dios ta siña nos cu nos mester ta atento, hopi hende ta papia bunita pero nan bida ta mustra e contrario.Nos mester purba sigui e bida di Hesus.
E no ta facil pero e recompensa ta Bida Eterno. Awo cu ta tempo di Cuaresma ban pidi Hesus laga nos cana hunto cu nE.
Si nos conoce su Palabra ban bibe. Ban cana cu Hesus, ora nos trompeca pidi’E lanta nos bek. Bunita ta cay y lanta bek y reconoce cu nos a comete un eror y pidi pordon. Sea humilde.
Oracion: Dushi Hesus nos kier ta humilde, cana den Bo pasonan. Guia nos y mustra nos cua ta e obra cu Bo kier nos haci den e Cuaresma aki. Laga nos papia y ta un ehempel di Bo den obra y nos bida diario. Amen.
WA rdAC os TA TA bus CA posibel hende homber perdi
rib A l A m A
Den ora nan di diasabra atardi 30 di mei 2026, Centro Operacional Maritimo di Wardacosta a ricibi un melding relaciona cu un persona posiblemente perdi riba lama. Ta trata di un hende homber Venezolano di 23 aña di edad cu posiblemente a sali for di Venezuela riba un boto cu destinacion Aruba.
A base di e informacion cu nos a ricibi, a notifica mes ora nos personal na Savaneta pa cuminsa cu e buskeda. Durante di e ultimo dos dia
nan, diferente unidad a busca riba lama y tera. Tambe a busca cu e helicopter di Wardacosta na diferente parti di Aruba.
Te cu awor no a logra di haya nada.
Na e momento nan aki lo pasa pa un buskeda pasivo. Wardacosta lo sigui tira un bista skerpi durante di patruya nan.
Nos lo informa debidamente na momento cu nos tin mas informacion.
Señor, Bo conoce mi y Bo ta comprende mi, Y Bo sabi tur cos cu mi ta haci, di leu Bo ta comprende mi pensamento, Bo sabi pakiko mi ta traha o sosega, Bo conoce tur mi obranan. -Salmo 139- A bula bay tempran cerca Señor
ing. Albertina “Tina” Croes-Albertsz conoci tambe como “juf Albertsz di scol nan di EPB” docente N&T, unit manager Service y Techniek, docent coach 31 augustus 1966 - 26 mei 2026
na nomber di su: su esposo stima: Michael Croes su mayornan stima: †Marciano y Ursula Albertsz-Koolman su suegro y suegra stima: †Nicasio “Pachi” y Elsa Croes-Boekhoudt su yiunan stima: Mitchell y Nina Croes su ruman stima: Maria Dolores y Hubert Gomez
Maria Lourdes y Deonisio Henriquez su subrino nan stima: Renomar Henriquez y Paul Vermeer
Joshua Gomez y Jo-Anne Alberts, yiunan Ja-Vion y Jo-Hailey
Isaiah Gomez y Kaylene Makaai, yiu Kayziah Marylaїne Henriquez y Jaap Martens, yuinan Emily y Aiden manera yiu stima: Amy Vrolijk manera un omo stima: †Teofilo Boekhoudt
Tanta- y Omo nan: Alberto “Betty”, Ana Cecilia Albertsz y famia
Mario “Marin”, Laya Vrolijk y famia
Agrepino “Chopin”, Ludewica Vrolijk y famia
†Beatrix Vrolijk, Maiky Wever y famia
Leoncia “Sitah”, Mathieu Pirlo y famia
Clemente “Lucio”, Wini Vrolijk y famia
Martina “Tina”, Emichi Maduro y famia
Silvia “Sisi”, Jacinto Kelly y famia
†Ignacio “Nacho”, Tele Koolman y famia
Fransico “Chico”, Miriam Koolman y famia
†Otilia “Oti”, +Mario Maduro y famia
†Pablo “Palu” Koolman y famia †Reineta “Nene”, +Eulogio Coffy y famia
Lucia “Ucha”, +Marcolino Croes y famia
Sua y cuña: Haime Croes, †Fransisca Koolman y yiu Ru Koolman, Melissa Ras y yuinan
Mayra, Ronny Croes y yuinan Marielle y Alexia
Su primo y primanan
Su bon amiganan: Ingrid v/d Linden, Carolina Soto.
Su Soul Sisters: Stephanie Wernet y yiu Mckenzie, Jorella Croes y famia, Gisella Trimon y famia.
Su dushinan di rabo: Diva, Cushi, Puki, Kali y Bobby.
Tur su coleganan di e famia grandi di EPB Oranjestad y San Nicolas, docentenan pensionado, tur su amistad den mundo di enseñansa y tur su conocirnan. Tur alumnonan cu a haya su guia y lesnan durante su aña nan den educacion.
Demas Famianan: Albertsz, Koolman, Croes, Gomez, Henriquez, Vrolijk, Peña, Boekhoudt, Wever, Pirlo, Maduro, Kelly, Coffy, Geerman, Willems, Angela, Krozendijk, Dabian, Kock, Bikker, Fuentes, Hoevertsz, Vries, Wernet, Dirksz, Molina, Flanegin, Rasmijn.
Gradecimento special na dr Kordes y su team, dr Wieringa, dr Berkeley di SVB, verpleegkundig nan Analyn Croes y Onaya Tromp.
Ta wordo invita pa “celebra e bida di Tina, tende e tambornan ta zona e momento pa mi fiesta den cunucu a yega”, cu e tema di y persona cu e a admira, Frida Kahlo. Tina su deseo ta si tur hende por bin despedi na color roos of e colornan di Frida Kahlo.
Oportunidad pa tuma condolencia ta diamars, 2 di juni 2026, di 7:00pm pa 9:00pm, na Aurora Funeral Home & Cremetarory.
Acto di despedida lo tuma lugar diaranson, 3 di juni 2026, di 1:00pm pa 3:30pm, sigui cu acto di respons di 3:30pm pa 4:00pm na Aurora Funeral Home & Cremetarory. Despues lo sigui cu acto di cremacion den seno familiar.
Despues di cremacion no ta recibi condolencia na cas.
Lo por sigui e despedida via live stream.
Enbez di flor of krans y como aprecio na e instancia cu semper Tina a yuda, lo bay tin un box disponibel pa pone un contribucion pa ‘Fundacion salba nos burico’.
“Pies para que los quiero, si tengo alas para volar” – Frida Kahlo
Parlamentario di AVP, Stephany Sevinger:
Buru B undu ta mas cu cas, ta un comunidad no B o pa a ru B a
ORANJESTAD (1 di juni 2026) – Vivienda ta sigui ta un di e retonan mas grandi cu Aruba ta enfrenta awendia. Durante añanan, hopi famia a comparti cu Parlamentario Stephany Sevinger e mesun preocupacion: e dificultad pa haya un cas pagabel, lista di spera largo, acceso limita na tereno, costo di construccion cu ta sigui subi y e sentimento creciente cu e soño di tin un cas propio ta bira cada bes mas dificil pa hopi Arubiano trahado. Precisamente pa e motibo e ta sigui defende un politica di vivienda mas amplio y integral. E realidad ta cu e problema di vivienda no por solucion’e cu un solo proyecto, un solo institucion of un solo medida. Aruba tin mester di varios solucion cu ta traha hunto. Pa e motibo ey fraccion di AVP ta sigui pone atencion riba e presion cu actualmente ta cay riba FCCA. Vivienda social ta y lo sigui ta esencial, pero FCCA so no por carga cu henter e necesidad di vivienda di Aruba.
“Nos ta boga pa
introduccion di un sistema di huurtoeslag, of subsidio di huur, cu por brinda apoyo adicional na famianan y na mesun momento baha e presion riba lista di spera pa vivienda social. Esaki ta sigui ta un obhetivo importante y mi ta mira cu tin interes pa continua e dialogo cu e minister concerni tocante su implementacion,” asina e parlamentario a expresa.
Alabes a introduci un mocion cu ta enfoca riba crea mas flexibilidad y husticia pa personanan cu anteriormente no por a cualifica bou di e criterianan existente.
Hopi famianan trahado a haya nan mes exclui di oportunidadnan, a pesar di nan esfuerzo pa traha un futuro miho pa nan mes y nan famia. E implementacion di e mocion aki tambe ta un asunto cu lo sigui monitor atentamente den Parlamento.
Mientras cu e discusion di politica aki ta continua, tin momento cu por señala progreso concreto.
Diahuebs pasa Aruba a logra un di e momentonan ey. E proyecto Burubundu
Residence oficialmente a drenta su fase di revision publico y actualmente ta disponibel pa inspeccion na DIP. Despues di añanan di preparacion y planificacion, un di e desaroyonan residencial mas grandi cu Aruba a mira den decenia finalmente ta tumando su prome stapnan concreto pa bira realidad.
Sevinger:
“Lamentablemente, e proyecto aki ya tabata practicamente cla na final di 2017, pero un iniciativa cu por a brinda tanto alivio na e problema di vivienda di Aruba a keda para den un lachi pa casi ocho aña.”
Loke ta haci Burubundu realmente special ta cu no ta trata simplemente di un proyecto di casnan. Manera Minister Herde recientemente a indica, no ta papia solamente di casnan, sino di un comunidad completamente nobo.
E proyecto ta contempla aproximadamente entre 850 y 1.000 cas, creando oportunidad pa famianan Arubiano establece nan mes y inverti den nan futuro. Pero mas leu di e casnan mes, e vision ta inclui areanan berde, facilidadnan recreativo, infrastructura deportivo, oportunidadnan comercial, vivienda pa personanan di edad y un diseño enfoca riba comunidad. Precisamente esaki ta e tipo di desaroyo cu Aruba tin mester.
Durante añanan AVP a argumenta cu nos pais mester pasa di simplemente construi casnan pa cuminsa construi comunidadnan.
Comunidadnan caminda muchanan tin espacio pa hunga, caminda personanan di edad por keda activo y conecta cu nan entorno, caminda famianan tin acceso na recreacion, caminda emprendedornan por haya oportunidadnan y caminda calidad di bida ta forma parti di e diseño for di e principio.
Parlamentario Sevinger ta di pensamento cu un bario exitoso no ta wordo midi solamente pa e cantidad di cas cu e tin; e ta wordo midi pa e oportunidadnan cu e ta crea, e conexionnan humano cu e ta fomenta y e calidad di bida cu e ta ofrece na su residentenan. Burubundu ta representa un stap importante den e direccion ey.
E ta demostra cu Aruba por pensa mas grandi cu solamente lotnan individual y casnan individual. E ta demostra cu politica di vivienda por ta integra cu recreacion, oportunidad economico, espacio publico y desaroyo comunitario. Mas importante ainda, e ta demostra cu nos por crea bario caminda hende no solamente ta biba, pero caminda nan por florece di berdad.
Pa hopi Arubiano, e proyecto aki tin un significado adicional pasobra e ta existi como vision pa hopi aña. Manera hopi otro proyecto nacional importante, e ta rekeri pasenshi, planificacion, coordinacion y perseverancia pa yega te e punto aki. Awe, sin embargo, nos por finalmente bisa cu e ta avanzando.
Ainda tin trabou pa haci. Consulta publico ta importante. Opinion di comunidad tin balor. Reforma adicional den politica di vivienda ta sigui ta necesario. Vivienda pagabel ta sigui merece atencion. Implementacion di subsidio di huur y reformanan den asignacion di tereno mester sigui wordo impulsa. Pero progreso merece reconocemento. Despues di añanan di discusion, Aruba finalmente ta tumando un stap significativo no solamente pa crea mas vivienda, pero pa crea un miho manera di biba. Pasobra politica di vivienda no mester limita su mes na entrega di casnan. E mester crea comunidadnan caminda famianan por crece, personanan di edad por embehece cu dignidad, hobennan por haya oportunidadnan y bisiñanan por construi conexionnan duradero. Finalmente, e parlamentario a sigura cu: “Si Burubundu logra haci esaki, e lo bira hopi mas cu un proyecto di vivienda. E lo bira un modelo pa e futuro desaroyo di Aruba.”