Dialuna augustuts 17 2026

P1

DIALUNA 17 AUGUSTUS 2026

17 AUGUSTUS 2026 - AFL. 1.50 - WWW.SOLODIPUEBLO.COM - E-MAIL: SOLODIPUEBLO@GMAIL.COM Afl.

1.25

HOPI PROBLEMA:

CONTRASTISTANAN TA TUMA PLACA Y NO TA BOLBE MAS

CUERPO POLICIAL ARUBA DEN CELEBRACION DI 40 ANIVERSARIO

P2

DIAluna 17 augustus 2026

Eduard Pieters:

“Awe tur ta felicita Mike de Meza, pero unda nan tabata ora e tabatin mester di nan?”

Lider di fraccion di PPA felicita De Meza, pero ta cuestiona lealtad politico y proteccion legal di parlamentario Parlamentario Eduard Pieters, lider di fraccion di PPA, a felicita publicamente su colega parlamentario Mike de Meza despues cu el sali liber di tur acusacion. Pero Pieters no a laga e momento pasa solamente como un felicitacion. El a transforma e desenlace den un mensahe politico directo: Ken realmente a para banda di Mike de Meza durante e momento mas dificil?

“Un pabien di curason pa Mike, pa su esposa, su mama y henter su famia. Despues di tanto incertidumbre, awe tin alivio,” Pieters a expresa. Pero segun e lider di fraccion di PPA, e caso mester bira tambe un momento di enseñansa pa politica Arubano.

Proposicion pa cambio den cuadro legal Pieters a recorda, cu anteriormente Parlamento a trata un proposicion pa haci cambio di ley den e ley di LIM cu ta similar cu loke tin na Hulanda pa hopi aña caba caminda ta limita un politico wordo persigui zomaar y keda durante

añanan bou di investigacion of acusacion, sin cu su situacion haya un desenlace. Segun Pieters, esey no ta encera cu ta trata di proteha e politiconan cu haci algo malo.

Sino ta laga e investigacion riba e politico den man di e PG nombra pa bida den Reino, pa e por inicia e persecusion cu base fuerte. “Si un politico haci malo, e mester carga consecuencia. Pero tampoco nos por acepta cu cualkier acusacion, destrui un persona politicamente, mientras aña(nan) despues ta resulta cu e acusacion no tin base.”

Unda su propio partido tabata?

E parti mas politico di Pieters su mensahe tabata dirigi na e partido AVP. Segun Pieters, durante e periodo di incertidumbre, de Meza no a haya e sosten politico cu normalmente lo spera di liderazgo di su propio partido.

Pieters a cuestiona specialmente e posicion di lider di AVP y actual minister-president, sr.

Mike Eman cu no a tuma decision ora e mester a haci esaki. El a permiti pa den Ministerraad continua e instruccion pa persigui de Meza.

Ademas, ainda por corda cu na momento cu de Meza tabata na Corte, gobierno aki tabata ocupa cu actividad den Caya Grandi cu ta un caya pazuid di Corte, sin por a sikiera bin Corte pa duna nan sosten moral y politico na un colega. “Ora bo number dos riba lista ta den un momento dificil, liderazgo ta wordo midi si bo ta para banda di dje of si bo ta bira lomba.”

Segun Pieters, awor cu e caso a haya un desenlace favorabel pa de Meza, ta facil pa e politiconan

acerca, felicita y celebra.

Hipocrecia total y dobel moral politico a luci completamente den e partido. Paso unda nan tabata durante henter e periodo di incertidumbre? “Awe bo ta wak tur hende bin brasa y felicita. Pero politica no por funciona asina. Ora bo ta para pa algo, bo mester para firme tambe, ora e situacion ta dificil.”

Pieters ta cuestiona voto di coalicion El a indica cu durante votacion di e cambio di ley di e LIM cu de Meza a propone, mayoria di coalicion AVP-FUTURO no a sostene e cambio proponi, mientras cu algun parlamentario individual si a adopta un posicion diferente. Dus, aki pueblo por mira cu hasta mayoria di su coleganan den su propio fraccion di AVP a laga Mike de Meza na caya. Pa Pieters, e desenlace actual ta obliga Parlamento pa reconsidera e discusion. “Awor pueblo por mira pakico de Meza y PPA a bay di acuerdo cu e cambio di ley. Netamente pa evita e situacion desagradabel aki” Segun Pieters, Estado di Derecho tin dos obligacion simultaneamente: investiga y castiga ora tin delito, pero tambe proteha ciudadano contra un proceso cu por prolonga indefinidamente y causa daño ireparabel na reputacion, famia y carera profesional.

Diferencia politico no mester elimina respet A pesar di su critica fuerte na AVP, Pieters a dedica palabra di respet na colega de Meza. “ E respet cu

de Meza y mi persona tin pa otro ta di ambos banda.” El a describi de Meza como un parlamentario cu experiencia y cu cual e por mantene e combersacionnan profesional. “Aunke awe nos por ta di diferente partido, ainda nos por siña di otro.” Ademas Pieters a confirma tambe cu e ta ripara cu sostenedornan di Mike de Meza kier pa e bay bek PPA y Pieters ta bisa cu esaki ta un decision personal di de Meza. “Tin varios otro politico di otro partidonan existente cu kier subi riba lista di PPA, esey ta un decision personal y nos ta respeta e proceso.”

Pieters a bisa cu e ta combersa cu parlamentario di diferente fraccion tocante mocion, amienda y iniciativa cu por fortalece Parlamento y beneficia Aruba.

Pa Pieters esey mester ta e esencia di politica: interes nacional prome cu interes partidario.

“Mike, you did it” Pieters a finalisa su mensahe cu un felicitacion personal, pero tambe cu un advertencia pa mundo politico. “Mike, you did it. Pabien y exito.”

Pero e mensahe tras di e felicitacion tabata hopi mas grandi. Pa Pieters, politica Arubano mester siña diferencia entre culpabilidad y acusacion, entre lealtad y conveniencia, y entre para banda di un colega ora e ta fuerte y para banda di dje ora e futuro politico ta den duda.

Pasobra, segun e lider di fraccion di PPA, ta precisamente den e momentonan dificil ey, pueblo por mira ken realmente ta un lider.

DIAluna 17 augustus 2026

Hopi problema: Contrastistanan ta tuma placa y no ta bolbe mas

ORANJESTAD – E reclamonan di pueblo no ta stop. Awendia, e sector di construccion a bira un peliger pa hopi cas di famia pa motibo di hendenan cu ta busca placa facil y rapido. E patronchi ta ripiti su mes casi tur dia: contratistanan o trahadonan ta tuma un trabou, ta duna cara pa dos o tres dia pa haci como si nan ta traha, y despues ta desaparece laga trabao y laga cliente cu e man na cabes.

Mientrastanto, e pober clientenan ta keda cu e daño financiero y emocional.

CON PA PROTEHE BO MES: Pa no cay den e trampa di e abusadornan aki, tene e siguiente advertencianan na cuenta:

Exigi responsabilidad: No confia riba palabra di boca. Laga tur cos bon stipula por escrito pa bo no perde bo inversion.

NUNCA paga nada por adelanta: Ni 50%, ni 20%, ni un cent prome cu bo mira material o trabou haci.

Exigi copia di identificacion di e contratista.

No laga ningun hende hasi wega cu bo trabou y bo placa!

Pago strictamente pa avance: Si bo ta firma un contrato, hacie hopi cla cu ta bay pagando poco a poco segun cu e trabou ta keda cla y verifica pa bo mes.

E contratista cu pidibo 50% por adelanta, ya bo sa caba cu e no ta cumplido. Ya bo sa caba cu ta placa e kier.

Un contratista corecto,

lo pidi

avanse segun e trabao cana.

P3

P4

DIAluna 17 augustus 2026

A introduci un programa nobo pa mercancia oficial di e marcanan Balashi y Chill

ORANJESTAD, 17 di juli 2026: Tropische Bottelmaatschappij van Aruba N.V. (“Tropical”) y Brouwerij Nacional Balashi N.V. (“Balashi”), subsidiarionan orguyoso di MetaCorp N.V., ta anuncia lansamento di un programa nobo pa fortalece y proteha autenticidad di mercancia oficial cu marca Balashi y Chill.

Como dos di e marcanan mas reconoci y aprecia di Aruba, Balashi y Chill a bira simbolonan di herencia, hospitalidad y estilo di bida di nos isla.

Pa preserva e calidad, consistencia y integridad cu consumidor ta spera, tur mercancia cu ta carga e marcanan registra Balashi of Chill lo wordo distribui exclusivamente pa medio di partnernan oficialmente

autorisa.

Pa facilita e transicion aki, comerciantenan, m a y o r i s t a n a n , distribuidornan, bendedonan y otro partnernan comercial por sigui bende nan inventario existente di mercancia cu marca Balashi y Chill te cu 30 di september 2026.

Desde dia 1 di october 2026, fabricacion, importacion, distribucion, publicidad y benta comercial di mercancia cu ta presenta e marcanan registra Balashi of Chill lo ta limita na partidonan cu a ricibi autorisacion por escrito di Tropical y/of Balashi.

E iniciativa aki tin como meta di garantisa cu tur mercancia oficialmente marca ta cumpli cu e

normanan di calidad asocia cu e marcanan Balashi y Chill, mientras cu e ta brinda e consumido productonan autentico cu ta refleha e balornan y reputacion di e marcanan iconico aki di Aruba.

Ta aprecia e sosten cooperacion continuo di e partnernan comercial y di publico durante implementacion di e paso importante aki pa fortalece e marcanan Balashi y Chill pa futuro.

Tene cuenta cu cualkier uzo comercial no autorisa di e marcanan registra Balashi of Chill despues di dia 1 di october 2026 por constitui un violacion di derechonan di propiedad intelectual di e companianan y por resulta den accion legal.

P5

DIAluna 17 augustus 2026

Tres Negoshi Local Selecciona como Ganadornan di Aruba Signature Experience 2026

necesario pa converti nan concepto innovativo den negoshinan sostenibel, cu ta pone enfasis riba cultura, bienestar, naturalesa of sostenibilidad. Di e manera aki, A.T.A. ta contribui na un oferta turistico mas varia y autentico, mientras cu ta crea oportunidadnan pa talento y emprendemento local florece.

Aruba Tourism Authority (A.T.A.) conhuntamente cu Qredits Aruba ta anuncia e ganadornan di e di cinco edicion di Aruba Signature Experience: Cura di Mama, Moorebida y Piskechi Experience.

Aruba Signature Experience ta un di e iniciativanan strategico

di A.T.A. hunto cu Qredits Aruba pa fortalece y diversifica Aruba su producto turistico. E programa ta enfoca riba desaroyo di experiencianan niche cu ta refleha e autenticidad y caracter di nos isla, mientras cu ta brinda empresarionan local e hermentnan, guia y sosten

Durante e ultimo añanan, e programa a yuda diferente negoshinan local drenta exitosamente den e industria turistico di Aruba. Como ganadornan di Aruba Signature Experience 2026, e tres negoshinan lo ricibi un pakete completo di sosten cu ta inclui coaching strategico, apoyo den marketing y branding, y otro recurso pa yuda fortalece nan concepto y aumenta nan visibilidad den e panorama turistico di Aruba.

Tocante e ganadornan di Aruba Signature Experience 2026 Entre 20 participante, e tres negoshinan local aki a sobresali pa medio di nan creatividad y autenticidad, ofreciendo un experiencia unico na bishitantenan.

Cura di Mama ta brinda un experiencia cultural y artesanal den un ambiente trankilo y cerca di naturalesa, unda bishitantenan por disfruta di un paseo educativo sigui pa un actividad creativo.

E concepto ta uni arte y naturalesa, creando un experiencia personal y autentico pa tur esnan cu ta busca manera creativo pa siña y conecta cu Aruba.

Moorebida ta ofrece un programa unico den forma di un residencia di 14 dia enfoca riba transformacion, bienestar personal, descanso y reflexion. Un experiencia unico cu a nace despues di a mira e gran interes

di bishitantenan pa experiencianan di bienestar cu ta yuda cu relahacion, recarga energia, conexion cu naturalesa y experiencia Aruba di un otro manera.

Piskechi Experience ta pone enfasis riba ecoturismo y aprecio pa naturalesa, ofreciendo eco-diving tours, caminatanan educativo y instruccion di diving. A traves di experiencianan interactivo den y rond di lama, bishitantenan por conoce Aruba su rikesa natural. Bou guia y supervision, bishitantenan lo siña tocante importancia di proteha nos medio ambiente y bida marino, pero tambe con pa cuida y preserva nan mientras ta aplica practicanan responsabel den y rond di lama.A.T.A. y Qredits Aruba ta felicita Cura di Mama, Moorebida y Piskechi Experience y ta desea nan tur clase di exito.

PP 69

DIAluna 17DI augustus 2026 DIALUNA 17 AUGUSTUS 2026

Ateliers'89 tin e grAn honor di presentA

AperturA di nos exposicion grAndi pA verAno titulA For sAle cu ta tuma lugar diadomingo 23 di Augustus 7pm FOR SALE a wordo treci hunto specialmente pa duna tur e artistanan di Ateliers y esnan invita e oportunidad pa nan por exhibi y mas importante ofrece nan trabounan di arte na benta, p'esey e titulo "FOR SALE". E oportunidad precioso aki lo engrandece nos arte y cultura organisa pa Ateliers'89, patrocina pa Fondo Cultural Region Caribense y CEDE Aruba.

CEDE su programa LET'S ACT a sa di crea e espacio pa sostene nos artistanan maestronan local kende ta engandece nos arte pa medio di nan aporte educativo den e diferente disciplinanan di arte.

Nos kier haci uzo di e oportunidad pa gradici CEDE pa por a sa di sostene y haci tur esaki posibel.

FOR SALE cu obranan di arte contemporaneo cu gran participacion di artistanan invita manera Glenda Heyliger cu su dibuhonan y obranan tres dimensional y instalacion, Maestro King Lie Kwie cu su pintura uniconan, artista y maestra di e tecnica di mosaic picassiette e conocido Enrita Werleman y Juffrouw Miriam De L'Isle cu su mundo magico di pintura. Na banda di tur esaki lo tin exposicion HARDIN BOTANICO pa artista maestra Romelinda Maldonado cu e artistanan hoben di su programa di arte pa mucha THE BEEHIVE: Fae Werleman, Sophia Luidens, Zoë Jennylee Kelly, Alexa Sepulveda, Darsheleen Wever, Frangely Kock, Celine Tromp, Kyomi Stamper, Hila Toppenberg y Kaylee Wever.

Diadomingo 23 di augustus den nos salanan mayor lo tin apertura di exposicion

Grupo Monarca di adulto mayor cu sosten di CEDE su programa Let's Act:

Beatrix Ridderstap, Silvia Flemming, Rosita Rasmijn, Reina Ruiz, Ina Thiel, Swinda Koolman, Everona Ras, Irene Ras, Evia Roga, Imelda Kelly, Richard Geerman, Epifania v/d Linde, Jorga Kransen, Gladys de Kort, Urbano Figaroa, Maria Lelia Hernandez, Thelma Paskel, Kenrick Boezem, Elita de Cuba, Nichi Arends, Francisca Winterdal, Vilma Engelhardt y Lucia Winterdal.

Grupo Mainta Creativo 60+ cu Agnes Wilson, Jenny Diaz, Raquel Leon, Gabriëlle Vis, Emiliana Tromp, Sica Simileer, Jenny Ras, Maria Tromp, Enrica Kock-Kelly, Gemma Simileer, Anna Rosa Tromp, Dynia AbathMuller.

Tambe nos ta presenta e pinturanan unico di e artistanan di e workshop titula Club di Artista, bou guia di nos artista, maestro, curador y director

di Ateliers'89, señor Elvis Lopez cu su artistanan Dinant Esschendal, Suzanne van Spall, Noemi Ruiz y Nuris Lampe.

Ta bay tin hopi obra y hopi expression sin igual pa mira y goza, pues no perde e oportunidad aki.

Bin engrandece anochi aki cu bo presencia, nos artistanan, nos publico amante di arte cu un ambiente unico cu DJ Tech.

P7

DIAluna 17 augustus 2026

E Campamentonan durante vakantie 2026 na Fundacion Centro Famia Piedra Plat yen di actividadnan entreteni y educativo

E 3 simanan di Camp tawata exitoso den participacion y programacion, e prome Camp tawata pa muchanan di 4 pa 7 aña, di dos pa muchanan di 8 pa 11 y di tres tawata un youth Camp di 12 pa 16 aña. Un averahe di 70 mucha total y 15 lider den cada Camp.

FCFPP ta gradici tur cu a hasi e Camp aki posibel, specialmente pa e ondersteuning ricibi

di CEDE Aruba y cu e Europese Vrijwilligers (4) cu a yuda hopi bon.

Tambe na ATHA y sigur na tur e boluntarionan pa e tremendo trabou.

Awor FCFPP ta cla pa cuminsa su programa pa e aña escolar nobo 2026 / 2027.

Inscripcion ta habri pa huiswerkbegeleiding pa muchanan di scol basico y

pa muchanan di voortgezet onderwijs. Club Oansa, lesnan di musica, canto, baile, pintura, ect tur lo start bek asina cu scol habri. Tambe Fundacion ta sigui cu su uitbreiding pa pasa dia 60 plus.

Pa cualke informacion whatsapp: 6995545 of E-mail: fcfpp50@gmail. com Durante orario di oficina: 9am pa 5pm.

Piedra Plat # 50

P8

DIAluna 17 augustus 2026

Cuerpo Policial Aruba den celebracion di 40 aniversario: Minister Dowers ta reafirma compromiso pa fortalece e cuerpo cu mas polis -1Cuerpo Policial Aruba (KPA) a conmemora su 40 aniversario cu un Santo Sacrificio di Misa na Misa Pro Cathedral San Francisco na Playa, den presencia di Su excelencia Gobernador, autoridadnan, invitadonan special y un cantidad grandi di miembro di comunidad. E celebracion a forma un momento di reflexion, gratitud y oracion pa tur miembro di Cuerpo Policial Aruba y pa pidi proteccion continuo den nan importante labor na servicio di pais.

Presente na e misa tabata, entre otro, Gobernador di Aruba Alfonso Boekhoudt, Minister di Husticia mr. drs.

Arthur Dowers, Korpschef di KPA Ramon Arnhem, Vicepresidente di Parlamento Muzaninn Wever, miembronan di Parlamento, alto funcionarionan di sector di husticia, diferente hoofden van dienst, pensionadonan di Cuerpo Policial y delegacionnan invita for di diferente pais.

Na final di e celebracion religioso, Minister Dowers a dirigi palabra na esnan presente y a felicita Cuerpo Policial Aruba cu e logro importante di 40 aña.

Minister a indica cu durante cuatro decada hopi cos a cambia.

Uniform, manera di traha, liderazgo y e propio realidad di criminalidad a evoluciona. Criminalidad ta bira mas compleho y ta busca continuamente forma nobo pa opera, loke ta exigi cu Cuerpo Policial tambe sigui modernisa y adapta su capacidad.

Sin embargo, segun Minister Dowers, tin un principio fundamental cu no por cambia: integridad.

El a enfatisa cu un cuerpo policial integro ta esencial pa funcionamiento di un estado democratico y pa conserva confiansa di comunidad.

Ora fayo presenta dentro di un organisacion, e responsabilidad ta pa atende cu esaki na un manera transparente, siña for di dje y sigui fortalece e institucion.

Minister Dowers a dedica atencion tambe na un di e retonan mas grandi cu Cuerpo Policial Aruba ta enfrenta actualmente: falta di personal. El a indica cu Aruba actualmente tin menos polis compara cu aproximadamente 10 aña pasa, mientras cu e demanda y complehidad di trabou policial a aumenta.

E situacion aki ta pone un peso adicional riba e miembronan actual di KPA, incluyendo polisnan cu ya ta den e ultimo

fase di nan trayectoria profesional.

Den e cuadro aki, Minister Dowers a expresa un compromiso di parti di Gobierno pa sigui inverti den capacidad humano di Cuerpo Policial.

“Di e luga aki mi ta

compromete mi mes, hunto cu Gobierno, pa nos percura pa recluta mas grupo di polis,” Minister Dowers a expresa. E meta ta pa incorpora mas hende hoben, prepara nan debidamente y crea un generacion nobo cu gradualmente por carga responsabilidad dentro di

e cuerpo.

Minister a indica cu Gobierno ta consciente di e presion cu actualmente ta existi dentro di KPA y cu fortalecemento di e cuerpo mester inclui tanto reclutamento como formacion adecuado di futuro polisnan.

P9

DIAluna 17 augustus 2026

Cuerpo Policial Aruba den celebracion di 40 aniversario: Minister Dowers ta reafirma compromiso pa fortalece e cuerpo cu mas polis -2-

compromiso comparti pa combati criminalidad tanto local, dentro di Reino, como internacionalmente.

y actividadnan, den un ambiente di camaraderia hunto cu e delegacionnan bishitante.

Despues di e misa, e diferente cuerponan a participa den un desfile oficial cu a pasa dilanti Bestuurskantoor.

E delegacion oficial, incluyendo Minister Dowers, a ricibi e desfile y saluda e diferente cuerponan participante.

Cu 40 aña di historia tras di lomba, e celebracion ta marca no solamente un momento pa mira bek riba

E programa a continua despues cu un lunch na Renaissance Ballroom, como parti di e actividadnan conmemorativo di e 40 aniversario.

E celebracion di 40 aniversario a conta tambe cu presencia di delegacionnan policial di Hulanda, Corsou, Boneiro, Saba, St. Eustatius, Sint

Maarten y Suriname.

Minister Dowers a duna nan un bonbini special y a destaca cu nan presencia ta simbolisa no solamente sosten, sino tambe e

Na final di su discurso, Minister Dowers a felicita Korpschef, liderazgo, miembronan activo, pensionadonan y henter Cuerpo Policial Aruba pa nan aporte durante e ultimo 40 aña. El a desea nan un bon siman di celebracion

e trayectoria di Cuerpo Policial Aruba, sino tambe pa mira dilanti: fortalece integridad, inverti den un generacion nobo di polis y prepara KPA pa e retonan di siguridad di futuro.

P 10

DIALUNA 17 DI AUGUSTUS 2026

Minister Arthur Dowers: Gobierno ta sigui reestablece ordo den maneho di e-step na Aruba

Minister di Husticia mr. drs. Arthur Dowers a reafirma cu Gobierno di Aruba ta sigui comprometi cu restablece ordo den e maneho di e-step na Aruba y cu e posicion oficial no a cambia: e-step no ta permiti den trafico / via publico conforme cu e legislacion vigente.

Segun minister Dowers, e situacion actual ta resultado di añanan den cual, segun su criterio, no tabatin suficiente control ni accion pa laga cumpli cu e ley. El a indica cu e Gobierno actual a hereda un situacion unda actividad cu no tabatin e autorisacionnan legal necesario a sigui opera, creando incertidumbre tanto pa empresario como pa usuario.

"E responsabilidad di un gobierno ta pa haci cumpli cu ley y restablece ordo, aunke esaki por nifica cu mester tuma decisionnan dificil," el a expresa.

Segun e minister, nunca a otorga un permiso/precario, concesion of autorisacion pa opera un servicio comercial di e-stepnan riba camindanan publico. El a enfatisa cu e hecho cu un actividad a tuma

luga durante un periodo, no ta crea automaticamente un derecho pa sigui opera contra e disposicionnan legal vigente.

Minister Dowers a reconoce cu e proceso pa restablece e situacion conforme ley no semper ta facil y cu diferente procedura hudicial ta actualmente andando. No obstante, el a expresa confiansa cu e trayecto legal lo brinda e claridad necesario y permiti Gobierno sigui cu su responsabilidad di haci cumpli cu ley.

E minister a reafirma cu e decision original pa prohibi e-stepnan tabata basa riba recomendacion di Comision Siguridad den Trafico, riba preocupacionnan serio di siguridad vial y riba e realidad cu Aruba su infrastructura no ta adapta pa e tipo di vehiculonan aki.

"Nos no por warda te ora cu tin mas accidente grave pa actua.

Nos responsabilidad ta proteha bida humano, reestablece ordo den trafico y haci respeta e ley," minister Dowers a conclui.

P 11

DIALUNA 17 DI AUGUSTUS 2026

Centr’i Bario Noord cu exitoso nochi di E Bruha, Bruhá

E sala principal di Centro di Bario Noord tawata testigo di un exitoso nochi di pelicula, den cua Desiree Croes a presenta e dos peliculanan “E Bruha, Bruhá 1” y E Bruha, Bruhá 2”. A recauda fondo pa e filmacion di e “E Bruha, Bruhá 3” cual filmacion ta start aki 3 siman.

Un grupo grandi di miembro di CB Noord a presenta yenando e sala completo y a disfruta e actuacion di actornan local manera Desiree Croes, Yvonne Tromp, Addonsito Croes, Mirto Tromp, Saraquita Offringa, Yolanda Croes, Lelicia

Tromp, Egmond Molina, Shajir Croes, Edwin Duineveld y Ruben Croes eo.

Berea Productions ta gradici sra. Ligia di CB Noord p’e inticiativa bunita pa permiti e elenco y productor di comparti nan pelicula cu un grupo grandi asina.

Danki na Prensa local y tambe e publico anima cu a brinda tur dos pelicula aplausonan inolvidabel.

P 12

DIALUNA 17 DI AUGUSTUS 2026

CURSO TOCANTE CRIMINALIDAD BOU NOS HOBENNAN:

CRIMINOLOGO DR. HENK FERWERDA A DUNA POLISNAN CURSO BASA RIBA SU ESTUDIO

“DE SCHADUWKANT VAN ARUBA” Oranjestad, ARUBA: Altocomisario Ramon Arnhem ta sigui fortalese e lasonan di cooperacion pa asina e personal di Cuerpo Policial Aruba (KPA) por sigui ricibi training- y cursonan riba un nivel profesional halto.

Riba invitacion di Altocomisario Arnhem, e criminologo renombra Dr. Henk Ferwerda a bishita Aruba caminda el a duna un curso intensivo di dos dia na e agentenan policial.

E training aki tabata enfoca centralmente riba con pa reconoce, compronde, signala y actua eficientemente dilanti di e problematica di criminalidad bou di hobennan.

E conclusion mas importante di e sesionnan aki ta cu criminalidad bou di hubentud na Aruba no ta un problema

di polis so, sino un cuestion social mas amplio (maatschappelijk vraagstuk) caminda vulnerabilidad, falta di oportunidad, contexto social y criminalidad ta topa otro. Un asercamento puramente represivo no ta suficiente, pero di otro banda, prevencion sin stipula normanan cla tampoco no ta funciona.

Cuerpo Policial Aruba ta expresa su gratitud na Dr. Henk Ferwerda pa su tempo, su experticio y pa comparti e resultadonan balioso di su estudio cu nos cuerpo

P 13

DIALUNA 17 DI AUGUSTUS 2026

Minister Geoffrey Wever:

Aruba ta fortalece control financiero cu auditoria independiente di Jaarrekening 2026 y 2027 Oranjestad, 14 augustus 2026 - Despues di hopi aña di atraso den entregamento di cuentanan anual di Gobierno, Aruba a logra pone un fin na e atraso historico y ta actualmente al dia cu su cuentanan anual.

Cu entrega di Jaarrekening 2025 algun siman atras, Gobierno a completa un proceso importante pa restablece orden, disciplina y transparencia den maneho financiero di Pais.

Como siguiente paso den e proceso di fortalecimento di maneho financiero publico, recientemente a firma un convenio cu SOAB, un compania di controlaria financiero, pa ehecuta auditoria riba e cuentanan anual di Gobierno correspondiente cu 2026 y 2027.

Minister di Finansa, Asunto Economico y Sector Primario, Geoffrey Wever, ta indica cu e paso aki ta importante pa consolida e progreso cu a wordo logra y pa evita cu Aruba bolbe cay den e situacion di atraso cu tabata caracterisa e administracion financiero durante hopi aña.

“Nos no kier a solamente elimina e atraso.

Nos kier construi un sistema financiero cu ta funciona structuralmente, cu control, transparencia y responsabilidad. Aruba mester por presenta su cuentanan anual na tempo y e cuentanan mester por pasa door di un auditoria profesional. Esaki ta parti di pone e situacion financiero di Pais na ordo y manten’e na ordo,” Minister Wever a declara.

E convenio cu SOAB tin dos obhetivo importante. Di un banda, e ta sigura cu auditoria di Jaarrekening 2026 y 2027 por wordo ehecuta door di accountantnan profesional, creando e base necesario pa e cuentanan anual di Gobierno por wordo certifica. Di otro banda, e periodo aki lo wordo uza pa fortalece capacidad di CAD, e instancia cu normalmente ta encarga

cu auditoria di e cuentanan anual di Gobierno.

E intencion ta pa CAD uza e periodo 20262027 pa sigui desaroya su capacidad, conocemento y organisacion interno, pa despues por tuma e responsabilidad di e auditorianan di nobo. Asina Gobierno no ta solamente busca un solucion pa awe, pero ta inverti simultaneamente den un solucion duradero pa futuro.

E financiamento pa e trayecto ta bini for di Landspakket y ta forma parti di “Thema A – Financieel Beheer”, cual ta wordo ehecuta den cooperacion cu Hulanda. E programa aki ta enfoca riba fortalecemento structural di administracion y control financiero di Pais.

Segun Minister Wever, e combinacion di pone e jaarrekeningnan al dia, introduci auditoria profesional y simultaneamente fortalece CAD ta representa un siguiente fase den modernisacion di maneho financiero publico.

“Credibilidad financiero no ta algo cu bo logra cu un solo decision. Bo ta construi esaki paso pa paso, a base di disciplina, institucionnan fuerte y procedimentonan cu ta funciona. Nos a elimina un atraso di hopi aña. Awor nos ta concentra pa sigura cu e situacion aki ta bira e norma y no un excepcion,” Minister Wever a finalisa.

P 14

DIALUNA 17 DI AUGUSTUS 2026

MINISTER GEOFFREY WEVER TA HONRA PISCADONAN DURANTE CELEBRACION DI DIA DI PISCADO Oranjestad, 14 augustus 2026 - En conexion cu celebracion di Dia Internacional di Piscado, Minister di Finansa, Asunto Economico y Sector Primario, Geoffrey Wever, a bishita un grupo di piscadonan durante e torneo di pesca di Hadicurari. Cu su presencia, Minister Wever a honra e dedicacion, conocemento y perseverancia di piscadonan Arubiano y a reafirma su compromiso pa sigui fortalece pesca como parti importante di Sector Primario.

Durante e torneo aki 42 boto a registra cual ta demostra e interes grandi cu tin entre e piscadonan pa e celebracion di Dia di Piscado. Pesca ta un actividad cu durante generacionnan ta forma parti di nos tradicion y economia local. Pa

Minister Wever, e reto awor ta pa crea e condicionnan necesario pa e actividad aki por sigui desaroya den un forma mas fuerte, moderno y sostenibel, mientras cu ta conserva e conocemento y experiencia cu piscadonan a pasa di generacion pa generacion.

E vision di Minister Wever pa Sector Primario ta pa fortalece su capacidad productivo y crea mas oportunidad pa esnan cu diariamente ta activo den agricultura, cria di bestia y pesca. Den e cuadro di esaki, Gobierno ta sigui traha pa modernisa Santa Rosa y fortalece e servicionan cu e institucion ta brinda na e sector. Recientemente Minister Wever como minister di Agricultura, Cria y Pesca a inicia un programa bou e nomber di Piskechi cu e meta pa siña nos muchanan pisca y

tur aspecto di piscamento.

Den corto tempo a entrega certificado na decenas di mucha cu e finalisa e programa y a siña pisca na baranca.

“Nos piscadonan ta carga un tradicion importante di Aruba. Nos responsabilidad ta pa no

solamente honra e trabou cu nan ta haci awe, sino tambe crea e condicionnan pa un generacion nobo por mira un futuro den pesca.

Un Sector Primario fuerte mester inclui un sector di pesca cu ta sostenibel, productivo y prepara pa futuro,” Minister Geoffrey

Wever a expresa.

Minister Wever a felicita tur piscado na ocasion di Dia di Piscado y a gradicinan pa nan contribucion continuo na produccion local y na preservacion di un tradicion cu ta parti di identidad di Aruba.

P 15

DIALUNA 17 DI AUGUSTUS 2026

E BON NOTICIA

BO TA PAPIA DI DIOS, PERO BO NO TA PAPIA DI MARIA, MAMA DI HESUS Y MAMA DI IGLESIA

Bijbel Genesis 3: 14-16, Dios Tata ta bisa na e colebra satanas: “Lo Mi trece enemistad entre abo y e muher, entre bo descendiente y e descendiente di e muher. E muher cu su descendiente lo trapa riba bo cabes y lo bo lastra bao di su pia.” E muher ta Maria, cu a acepta Dios Su plan di salbacion y a acepta di bira e mama di E Salbador. Maria Su descendiente, ta CristoHesus y tur e sigidornan den Cristo-Hesus Su Iglesia. E descendiente di e colebra, ta esnan den sectanan, den religionnan y den iglesianan falso, cu no ta acepta Maria y ta persigi Hesus Su Iglesia.

Maria hunto cu e Iglesia di Su Yiu Hesus a trapa riba e cabes di e colebra, pa medio di Su Yiu Hesus. Bijbel Revelacion 12: 17: “Awor e dragon a rabia contra e muher y el a bay haci guera na e demas yiunan di e

muher.” Akinan e diabel tin rabia riba Maria y e diabel ta persigi e yiunan di Maria den Iglesia.

Bijbel Lukas 1: 41-43, Maria a bishita Su prima Elisabeth y Elisabeth a keda jena cu Spirito Santo y a bisa: “Di unda mi ta merece, cu mama di Mi Senjor ta bishita mi?”

Maria ta Mama di Dios, pasobra Hesus ta E di dos Persona di E Santisima Trinidad. Bijbel Huan 20: 28, akinan Apostel Tomas a bisa Hesus: “Mi Senjor y Mi Dios.” P’esey Maria ta wordo jama, Mama di Dios. Bijbel Huan 19: 25 – 27, aki Hesus na Crus claba, a mira Su Mama y Su Apostel Huan y E’l a bisa: “Muher, ata bo yiu eynan y despues E’l a bisa Huan: Ata bo mama eynan.”

Akinan Hesus ta ofrece Su Mama, pa nos acepta Maria como nos Mama, pa nos honrel’E, pa nos venerel’E y pa nos stimel’E

manera cu Hesus ta stima Su Mama. Tambe e Apostel Huan cu ta representa e Iglesia di Hesus, a acepta Maria como mama. E palabra muher cu Hesus a expresa, no ta un ofensa, pasobra ta Dios Tata mes a expresa esaki pa medio di Hesus, cu ta e muher den Genesis 3: 14-16, cu lo trapa riba e cabes di e colebra.

Hesus ta Rey di Universo den e Aliansa Nobo, cu ta e descendientenan di Israel nobo di Dios Tata, cu ta e Iglesia Universal. Bijbel Revelacion 12: 1, ta bisa: “Un senjal grandi a aparece na Cielo: Un muher bisti cu solo, cu luna bao di su pianan y riba su cabes un corona di diesdos strea.”

Maria tin e Corona di

Oracion Di Dia

diesdos Strea bisti y esaki ta simbolisa e oficio Real den Reino di Cielo. Bijbel Genesis 37: 9-11, aki Jozef ta sonja di mira con solo, luna y streanan ta buig su dilanti y esaki ta simbolisa, reinado of autoridad. Bijbel 1 Reinan 2: 19-20: Akinan ora cu Batsheba mama di Rey Salomon, a drenta den e cuarto di e Rey, Rey Salomon a laga pone un stoel di trono pa su mama y e mama a sinta na man drechi di su yiu Rey Salomon. Rey Salomon a bisa su mama: Mi mama, pidi mi loke bo kier, lo mi no nenga bo. Maria como Reina y Mama, ta sinta na man drechi di Su Yiu Hesus, Maria ta abogada y intercesora pa tur Su

yiunan den Iglesia di Su Yiu Hesus. Hesus como Rey di Universo, lo no nenga Su Mama Maria fabornan.

Conclusion: Na ora di morto, lo bo mira Hesus Rey di Universo sinta riba Su Trono y tambe lo bo mira sinta riba Su Trono na man drechi di Su Yiu Hesus, Mama Maria Reina di Cielo y di tera y bisti cu Solo, cu luna bao di Su pianan y riba Su Cabes un Corona di diesdos Strea.

Kiko Hesus lo bisa: Bo a stima y a acepta Mi Mama?

Lesa Bijbel Huan 19: 25-27.

Scirbi pa Seferino Tromp Un mensahero di Dios.

Un feliz dia y cu Dios bendiciona boso ricamente

”P’esey obedece y sigui tur cos cu nan bisa, ma no haci manera nan ta haci si! Pasobra nan mes no ta haci loke nan ta bisa. Mateo 23,1 Rumannan e Palabra di Dios ta siña nos cu nos mester ta atento, hopi hende ta papia bunita pero nan bida ta mustra e contrario.Nos mester purba sigui e bida di Hesus.

E no ta facil pero e recompensa ta Bida Eterno. Awo cu ta tempo di Cuaresma ban pidi Hesus laga nos cana hunto cu nE. Si nos conoce su Palabra ban bibe. Ban cana cu Hesus, ora nos trompeca pidi’E lanta nos bek. Bunita ta cay y lanta bek y reconoce cu nos a comete un eror y pidi pordon. Sea humilde.

Oracion: Dushi Hesus nos kier ta humilde, cana den Bo pasonan. Guia nos y mustra nos cua ta e obra cu Bo kier nos haci den e Cuaresma aki. Laga nos papia y ta un ehempel di Bo den obra y nos bida diario.

Amen.

P 16

DIALUNA 17 DI AUGUSTUS 2026

MINISTER GEOFFREY WEVER: TA ANUNCIA DESTAHO PUBLICO PA DESAROYO DI EDIFICIO DI EX-ESSO LAGOEN COMO BOUTIQUE RESTAURANT

Oranjestad, Aruba – Minister di Finansa, Asunto Economico y Sector Primario mr. Geoffrey Wever ta anuncia destaho publico pa desaroyo di e edificio di exEsso Lagoen como boutique restaurant Gobierno di Aruba ta sigui duna forma na su vision pa revitalisa centro di Oranjestad cu e anuncio di un proceso di destaho publico pa e desaroyo di e edificio di ex-Esso Lagoen como un boutique restaurant.

Durante un conferencia di prensa na e localidad, Minister di Finansa, Asuntonan Economico y Sector Primario, mr.

Geoffrey Wever, a enfatisa cu e proyecto ta forma parti di un vision integral pa fortalece centro di Oranjestad como un destino atractivo pa bishitantenan, empresarionan y inversionistanan.

“Nos kier un centro urbano unda historia y desaroyo ta bai man den man. Un ciudad unda nos ta conserva nos patrimonio cultural cu orguyo, mientras cu nos ta crea espacio pa inversion, innovacion y actividad economico,” segun Minister Wever.

E propiedad, anteriormente conoci como e stacion di Esso Lagoen, ta representa un oportunidad importante pa duna un destino nobo na un sitio cu pa hopi aña a keda sin un funcion activo. Cu e destaho publico, Gobierno ta busca un partner strategico cu tin e experiencia, vision y compromiso pa transforma e localidad den un proyecto cu ta agrega balor na centro di Oranjestad y na economia di Aruba den forma di un boutique restaurant.

E iniciativa ta sigui otro proyecto di

revitalisacion den centro di ciudad, manera e embeyecemento di Plaza Comercio na Columbusstraat y e restauracion di monumento historico Cas Veneranda.

Gobierno ta busca pa duna luganan cu anteriormente tabata subutilisa un proposito nobo, contribuyendo na un Oranjestad mas bibo, atractivo y economicamente fuerte.

Den e proceso di destaho, Gobierno lo enfoca riba varios criterio importante, incluyendo e integracion cu e desaroyonan existente den centro di Oranjestad, e calidad di e espacio urbano, e impacto economico y sostenibilidat. Entre otro, e principio di ‘Build with Nature’, lo ta un criteria importante durante e evaluacion.

E principio tin como meta pa stimula un desaroyo cu ta logra un balans entre crecemiento economico y proteccion di medio ambiente.

Segun Minister Wever, un centro urbano activo ta crea oportunidad pa inversion.

Diversifica acion di nos economia y empleo pa empresarionan local, fortaleciendo e posicion di Oranjestad como e curason comercial di Aruba.

Minister Wever a expresa su gradicimento na Minister-President Mike Eman y Minister Rene Herde pa e cooperacion entre ministerionan cu a haci posibel e siguiente paso den e vision y strategia pa revitalisa centro di ciudad.

Gobierno di Aruba ta invita tur partidonan interesa cu cumpli cu e criterianan di participa den e proceso di destaho publico, cu lo wordo conduci conforme cu principio di transparencia, competencia husto y igualdad di oportunidad.

SUDOKU