P1
DIAHUEBS 15 OCTOBER 2026
15 OCTOBER 2026 - AFL. 1.50 - WWW.SOLODIPUEBLO.COM - E-MAIL: SOLODIPUEBLO@GMAIL.COM Afl.
1.25
PEATON ALCANSA NA POS CHIKITO TA BIRA E DI 14 MORTO DEN TRAFICO Lamentabelmente Cuerpo Policial Aruba ta informa cu e peaton cu a wordo alcansa riba e caminda di Pos chikito a fayece awe merdia. Ta asina cu dia 5 di oktober 2026 pa mas o menos 19:41 di anochi central di polis ta wordo notifica cu un Van lo mester a alcansa un peaton ( hende homber) riba e caminda principal di Pos Chikito na altura di Rey Hing. Central di polis ta despacha polis como tambe ambulance na e sitio di e sucedido. Na yegada di polis ta bin topa cu un homber ariba caminda y ta
mustra grave. Ambulance ta yega na e sitio y paramediconan ta duna asistencia na e victima, a stabilise prome y despues a transpore cu maximo urgencia pa hospital. Su situacion e momento ey tabata critico y a keda interna den cuido intensivo. E prome informa ta cu un Van, Hyundai Staria color blauw, bayendo direccion pariba lo a alcansa e peaton. Specialista di trafico y polis tecnico a presenta pa haci nan investigacion. Tambe departamento di Slachtofferhulp a
COMUNICADO PA PRENSA ARUBA, LAGA NOS TRAHA CINTA: UN CINTA CHIKITO, UN ISLA UNI PA SALUD DI HENDE
wordo poni na altura. Diaranson 14 di oktober 2026 den oranan di merdia Polis di Trafico ta wordo informa cu e peaton a fayece na hospital. Ta trata di e hende homber Julian Rambalde naci na Republicana Dominicana dia 20 di februari 1963 (63 aña). Cuerpo Policial Aruba ta manda palabra di condolencia na famia di e fayecido. Nos ta haci un apelacion pa ban trankilo den trafico, pone
atencion riba caminda, baha bo velocidad y sigui e reglanan den trafico. Un trafico sigur ta responsabilidad di nos tur.
P2
DIAhuebs 15 october 2026
Accidente cu hende herida pa falta di preferencia na Tanki Leendert
Diamars mainta a drenta informe di un accidente
cu hende herida dilanti Heng Sheng Supermarket,
mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un accidente unda
cu un Hyundai Grandi10 a bay subi caminda pero no a mira e Chevrolet Spark biniendo pabao y a bay dal riba dje. Debi na e
impacto e dama chauffeur di e Spark a resulta herida. Na yegada di e ambulans nan a atende e victima y a transporte pa hospital.
turista masculino di riba 40 aña a guli basta awa panort di Boca Catalina
Diamars merdia a drenta informe di cu un turista lo a guli basta awa na lama panort di Boca Catalina, mesora a dirigi 2 patruya di polis y tambe
2 ambulans na e sitio. Na yegada di e patruya a haya sa cu e ta tras di e casnan pega na beach. Na yegada di e ambulans net nan ta bay cuminsa atende cu e
homber cu tabata drumi ela lanta sinta bisa cu e ta ok y no mester mas di nan asistencia.
P3
DIAhuebs 15 october 2026
Despues di un dia a bin haya homber di 75 aña cu a cay tras di un cas na Madiki!
Diamars atardi a drenta informe di un dama cu ta bisa cu su tata a haya un homber di 75 aña benta tras di cas for di ayera y no
por lanta. Mesora a dirigi un ambulans na e sitio. na yegada di e ambulans a bin compronde cu un homber di 75 aña lo a cay
for di ayera y no por lanta. E famia a yud'e lanta pero e no por cana ya cu e tin
un dolor fuerte na su heup. Ambulans a atende y a pone den ambulans y a
transporte pa hospital.
Presentacion di obra ‘Zwarte Pracht’ di Michiel van Kempen
Diamars awor, 20 di oktober 2026, di 6.30 pa 9.00 p.m. lo tin un anochi cu presentacion di e obra “Zwarte Pracht” na Biblioteca Nacional Aruba. For di Hulanda lo ta presente e autor dr. Michiel van Kempen pa presenta su obra ‘Zwarte Pracht’. Den e obra ‘Zwarte Pracht’, Michiel van Kempen, a traves di Arte, di su coleccion priva di cuadro, pintura y obhetonan di arte ta demostra y resalta cultura y historia di Surnam y di e seis islanan di Caribe Hulandes, Aruba, Boneiro, Corsou, st. Maarten, Saba y St. Eustatius. Dr. Michiel van Kempen a traha como ‘Bijzonder hoogleraar Nederlands-Caraïbische Letteren’
na Universiteit van Amsterdam. Michiel a biba y traha pa algun aña na Surnam. El a studia Literatura di Caribe di forma profundo y a publica obranan dedica na biografia y historia di Surnam y Caribe. Den su obra Zwarte Pracht Michiel ta dedica atencion special na dos cuadro di Wouter van Romondt, pintor di Aruba. Fundacion Museo Aruba cu su programa di “Conscientisacion” a haci posibel pa dr. Michiel van Kempen ta na Aruba. Den cooperacion cu sra. Astrid Britten di Biblioteca Nacional Aruba, Departamento di Cultura Aruba y Gestor Cultural drs. Mirto Laclé a prepara un programa multifacetico pa sigui promove cultura di Aruba.
Lo tin presentacion musical di “Grupo Trinity” bou guia di Maybelline Arends-Croes. Hilyann Croes, Marylou Trimon y Veloushka Krozendijk lo deleita publico cu nan canto.
Drs. Mirto Laclé lo presenta y duna realse na escritornan di Aruba den e obra “Album van de Caraïbische Poëzie” di Michiel van Kempen. Lo duna reconocemento na Frank Booi pa su trabou como autor/ poeta pa engrandece literatura, historia di Papiamento y Aruba. Nos ta adora nos lenga Papiamento y lo sigui salbaguardia Papiamento. Pero alabes nos ta orguyoso cu nos ta un pais multicultural y cu ciudadanonan multilingual. Entrada ta gratis.
Pa mas informacion Mirto Laclé cel: 742 6274.
P4
DIAhuebs 15 october 2026
Memey pueblo di pariba di brug
Prome Minister Mike Eman ta anuncia MFA pa San Nicolas y renobacion di nos barionan di financiamento. Den su discurso, Prome Minister Mike Eman a anuncia e MFA (Multifuncional Accommodatie) di San Nicolas y renovacion pa e barionan De Vuyst y Bushiri. El a reafirma cu e prioridad ta mehora calidad di bida, cu atencion special pa pensionadonan, famianan di menos recurso y esnan mas vulnerabel. Despues di e presentacionnan di su coleganan, Prome Minister Mike Eman a conecta e agenda di inversion cu un compromiso social cla: percura pa e desaroyo di pais trece un diferencia concreto den bida di hende. Den su discurso, el a anuncia cu e MFA di San Nicolas lo ta un di e siguiente proyectonan pa realisa den centro di e ciudad. Tambe el a presenta plannan pa renovacion di barionan y a reafirma su compromiso cu pensionadonan, famianan di menos recurso y esnan mas vulnerabel. Un MFA pa San Nicolas
Durante un evento nacional dilanti di Hulp Bestuurskantoor na San Nicolas, tur minister di Gabinete AVP-FUTURO a presenta e proyectonan di inversion pa e proximo añanan. E presentacion a sigui e aprobacion di e presupuesto di AIOF pa 2026 y 2027 y a inclui tambe inversionnan cu otro fuente
Eman a recorda cu Noord, Paradera, Santa Cruz y Savaneta a ricibi nan edificio di MFA, y cu San Nicolas tambe ta merece e facilidad aki. El a señala cu e plannan pa San Nicolas no por wordo laga atras y a reafirma su compromiso pa haci e proyecto un realidad. E anuncio ta forma parti di un vision mas amplio pa e ciudad y e barionan pariba di brug. Eman a enfatisa cu inversion den infrastructura mester contribui na un miho bida pa hende, cu atencion pa e facilidadnan cu comunidad tin mester pa su desaroyo. Renobacion di De Vuyst y Bushiri Prome Minister a anuncia un proyecto di renobacion pa e bario
De Vuyst. El a destaca e necesidad di facilidad deportivo, espacio di recreacion y un ambiente cu ta ofrece e habitantenan e calidad di bida cu nan ta merece. El a menciona trabou di mantencion cu ta andando of a finalisa caba den Village y Mabon y a expresa e deseo pa e esfuerso di renobacion continua durante e periodo di gobernacion cu tin ainda pa dilanti. Bushiri lo ta e siguiente bario cu tambe lo conoce un renobacion y mehora den su areanan reacreativo. Segun Eman, tin hopi trabou pa haci den e barionan cu ta den deterioro. E meta ta pa cada bario ricibi e atencion necesario, tanto pa su casnan como pa e facilidadnan y espacionan cu e habitantenan ta haci uzo den conhunto. Desaroyo cu atencion pa mantencion Eman a reflexiona riba inversionnan anterior den infrastructura, incluyendo e conexion entre Playa y San Nicolas pues e Green Corridor y e ringweg entre aeropuerto y e area di hotel pues E.J. Watty Vos Boulevard. Tambe a destaca e importancia di e conexionnan aki pa e desaroyo economico di Aruba y pa crea oportunidad nobo pariba di brug. Prome Minister Eman tin preocupacion pa e deterioro di e
edificionan, facilidad deportivo y scol cu anteriormente a renoba durante su prome dos gabinetenan. Su mensahe tabata cu, ademas di realisa proyecto nobo, ta necesario mantene y cuida locual ya ta construi pa nos comunidad. Comunidad ta un parti esencial di e cambio Eman a destaca cu e progreso di un pais ta depende tambe di locual su ciudadanonan por haci hunto. Como ehempel, el a reconoce e trabou di varios boluntario na San Nicolas cu ta dedica nan tempo pa drecha y pinta cas den Bernhardstraat. E esfuerso aki ta contribui na un ambiente nobo y un sentido di speransa den e bario. El a gradici e ekipo di boluntario cu ta traha sin haya un cen, motiva solamente pa e satisfaccion di contribui na nan comunidad. Eman a conecta e esfuerso aki cu e fe y perseverancia cu a yuda San Nicolas enfrenta varios tempo dificil, incluyendo e impacto di ceramento di refineria cu a causa hopi desempleo y pobresa. Cu e anuncio di e MFA, e plannan di renobacion di nos barionan y e enfasis riba proteccion social, Eman a reafirma su compromiso pa un Aruba den cual desaroyo y bienestar ta cana hunto, cu e necesidadnan di nos hendenan como punto di salida.
P5
DIAhuebs 15 october 2026
COMUNICADO PA PRENSA ARUBA, LAGA NOS TRAHA CINTA: UN CINTA CHIKITO, UN ISLA UNI PA SALUD DI HENDE MUHE
Oranjestad, Aruba, October 2026. Na Aruba, tin algo special cu ta tuma luga. Negoshinan, scolnan, organisacionnan comunitario, mucha, adulto, hende grandi y hobennan ta sinta hunto, traha cintanan ros cu man y den e proceso ta yuda pa habri un combersacion mucho mas grandi tocante salud di pecho. Como parti di campaña Haci Aruba Ros di Fundacion ABO,
e iniciativa Aruba, ‘Let’s Make Ribbons’ ta reuni e sector priva y comunidad pa traha miles di sinta ros cu lo wordo reparti rond di e isla durante e Luna di Conscientisacion di Cancer di Pecho. Pero e meta ta bay mucho mas leu cu solamente traha cinta. Fundacion ABO kier hende muhenan sinti mas comodo pa papia tocante nan pecho, compronde salud di pecho, cuida nan mes, y mas importante, haci uzo di e programa di screening di mamografia cu ta disponibel pa hende muhenan cu ta apto via BOB y sin costo adicional na bo persona. Pa hopi hende muhe, e miedo, e incertidumbre of simplemente sinti nan mes saludabel por ta suficiente pa pospone e screening. E campaña Haci Aruba Ros ta trahando pa trece cambio den esaki. Sinti bo mes bon ta husto e momento caminda screening ta importante. Hende muhenan cu tin 45 te 75 aña cu ta eligibel pa BOB, tin cobertura AZV valido, no tabatin sintomanan of cambio recien, y ta pendiente pa screening rutinario por haya un mamografia via e screening rutinario di BOB cada dos aña. Hende muhenan cu tin sintomanan of cu ta nota un cambio nobo mester tuma contacto cu nan dokter pa evaluacion medico na luga di warda pa screening rutinario. Pa medio di e iniciativa di cinta, Fundacion ABO tambe ta duna material educativo cu ta yuda hendenan mas hoben compronde kico e cinta ros ta representa y pakico ta importante pa tuma nos salud na serio. E cinta cu nan ta traha despues ta yega bek na
comunidad, den luganan di trabou, scol, famia y luganan publico. Loke a haci e iniciativa aki specialmente significante ta wak e campaña largo cu Haci Aruba Ros ta uni Arubianonan. Organicacionnan cu normalmente por ta operando den mundonan totalmente diferente ta contribui na e mesun meta: yuda hende muhe sinti nan mes informa, apoya y stimula pa tuma accion pa nan salud. Gradicimento grandi ta bay pa Banco di Caribe, Sagicor y Visser Trading, cu nan hendenan cu ta yuda pa logra cu e materialnan pa e proyecto di cinta ta posibel. Actualmente, esnan cu ta traha e cintanan ta inclui SKOA – Stichting Katholiek Onderwijs Aruba cu St. Annaschool, Colegio Frère Bonifacius, Colegio Santa Filomina, Colegio Sagrado Curason, Colegio Bon Bini, Colegio Ora Ubao, OLV van Fatima College, Colegio Santa Theresita, Maria Goretti College, Maria School y St. Franciscus College; asina tambe Trampolin pa Trabao, SVGA – Stichting Voor Verstandelijk Gehandicapten Aruba, De Schakel, Love Elderly Daycare Center, Beth
Israel Synagogue, SVB y Gruponan Scout, incluyendo Grupo Maria Auxiliadora, Imelda Groep y Jeanne D’Arc Groep. Un danki special ta bay pa Richenella Wever, cu ta coordina entre e tantisimo negoshinan cu ta participa y e trahadonan di cinta, cu ta yuda pa sigura cu e material ta yega den mannan corecto y cu e cintanan ta yega bek den comunidad. Diferente man. Diferente generacion. Un proposito comparti. Esaki ta e magia di Haci Aruba Ros: wak un comunidad completo brasa un mensahe cu eventualmente por yuda salba bida. Ros ta e recordatorio. Screening ta e accion. Bo ta eligibel pa BOB? Haci e quiz pa wak con hopi bo sa di mamografia y pa mira si bo ta cualifica: fundacionABO.org/ BOBquiz Yama: +297 588 1212 WhatsApp: +297 594 5020 cita@fundacionabo.org Bo kier traha cinta of colecta cinta pa bo organisacion of team? Contact ABO Marketing via WhatsApp: +297 560 5560 Traha un cinta. Haci Aruba Ros.
P6
DIAhuebs 15 october 2026
Audiencia di lider di fraccion AVP cu Gobernador di Aruba ORANJESTAD (14 di oktober 2026) — Parlamentario y lider di Fraccion AVP, Jennifer Arends-Reyes, a bishita Su Excelencia Gobernador di Aruba, Alfonso Boekhoudt na su gabinete pa un audiencia rutinario. E encuentro a tuma lugar den e marco di e contacto institucional cu ta forma parti di su funcion como representante di pueblo. Arends-Reyes ta duna importancia na un relacion basa riba respet
y dialogo entre e diferente institucionnan di Aruba. E contacto aki ta contribui na un miho comprondemento di e realidad di pais y di e responsabilidad cu cada institucion tin den su propio ambito. Como parlamentario, su labor ta dirigi na representa e interesnan di comunidad, scucha e preocupacionnan di ciudadanonan y contribui na solucionnan concreto. E intercambio institucional ta forma parti di un manera
di traha cu ta pone enfasis riba responsabilidad y disposicion pa dialoga. E audiencia rutinario cu gobernador ta refleha e atencion cu ArendsReyes ta duna na e relacionnan institucional den e ehercicio di su funcion parlamentario. Cu e bienestar di Aruba y su pueblo como punto di salida, e lider di Fraccion AVP ta continua su labor riba e asuntonan cu ta afecta nos comunidad.
Miembronan di AAC presente na e IV Panam Sports Athletes’ Forum
Presidente di e “Aruba Athletes’ Commission” (AAC) Monica Pimentel OLY hunto cu miembro di AAC Kamilah Dammers ta na Costa Rica unda ta atende e “IV Panam
Sports Athletes’ Forum”. E organizacional contintental di deporte ta organisa e encuentro aki pa asina tur comision di atleta di e 41 pais miembro di PanamSports
por comparti, intercambia y participa den diferente tayer y charla interesante e importante pa tur comision di atleta.
P7
DIAhuebs 15 october 2026
Minister Geoffrey Wever:
259 permiso pa negoshi nobo den tercer kwartaal di 2026, 9% mas cu mesun periodo di 2025 Oranjestad, 13 october 2026 - Minister di Finansa, Asunto Economico y Sector Primario, mr. Geoffrey Wever, ta informa cu durante e tercer kwartaal di 2026, 259 permiso a wordo otorga pa establecimento di negoshi nobo na Aruba. E resultado aki ta 22 permiso mas cu e 237 permiso pa negoshi nobo otorga den tercer kwartaal di 2025, representando un crecemento di aproximadamente 9 porciento compara cu e mesun periodo di aña pasa.
E cifra di 259 permiso nobo den juli, augustus y september ta tambe e cantidad mas halto registra den un kwartaal compara cu tur cuatro kwartaal di 2025. Esaki ta confirma cu iniciativa empresarial y interes pa establece actividad comercial na Aruba ta sigui presente den nos economia. Pa habri un negoshi of haci cambio den un permiso pa negoshi segun ley, mester haci un peticion bou di Vestigingsverordening Bedrijven. Durante e tercer kwartaal di 2026, Departamento di Asunto Economico a ricibi un total di 579 peticion di diferente tipo. Di esakinan, 156 a wordo trata, 275 tabata ainda den proceso y 148 no por a wordo procesa pa falta di documento necesario of comprobante di pago. Na mes momento, un total di 494 beschikking ministerial relaciona cu permiso di establecimento a wordo firma durante e kwartaal.
E cantidad aki ta inclui tanto peticionnan ricibi entre juli y september como peticionnan entrega anteriormente cu a yega na final di nan proceso. Di e 259 permiso pa negoshi nobo, 192 a wordo otorga pa VBA, 53 pa filiaal, 13 pa eenmanszaak y 1 pa NV. Den juli a otorga 106 permiso nobo, den augustus 64 y den september 89. VVB E actividadnan comercial mas representa entre e negoshinan nobo ta inclui real estate, houdstermaatschappij, construccion y instalacion tecnico manera electricidad y loodgieterswerk, comercio di alimento, paña, accesorio y material di construccion, incluyendo e-commerce, y servicio di beyesa, masahe y kapsalon. E composicion aki ta mustra cu actividad empresarial ta sigui desaroya den diferente segmento di economia Arubano. E resultado di tercer kwartaal ta particularmente significante tambe compara cu e kwartaal anterior. Den segundo kwartaal di 2026 a otorga 104 permiso pa negoshi nobo, mientras cu den tercer kwartaal e cantidad a subi pa 259. Esaki ta representa un aumento di 155 permiso, of aproximadamente 149 porciento, entre un kwartaal y e otro. “Comercio ta e motor di nos economia. Cada permiso nobo ta representa iniciativa, inversion y confianza den Aruba como luga pa haci negoshi. E resultado di tercer
kwartaal ta mustra cu empresario ta sigui mira oportunidad pa inverti, establece y amplia actividad economico na nos pais. Gobierno su responsabilidad ta pa crea e condicionnan necesario pa e iniciativa priva por sigui crece,” Minister Geoffrey Wever a declara. Desde october 2022, Minister Wever a introduci un vestigingsbeleid nobo cu a modernisa e proceso pa permiso di negoshi mediante eliminacion di diferente rekisito, digitalisacion di e proceso y un enfoke mas fuerte riba facilitacion di actividad economico. E meta ta pa reduci barrera administrativo y crea un proceso mas accesibel, transparente y eficiente pa empresario. Minister Wever ta enfatisa cu maneho economico no ta solamente trata di atrae inversion grandi. Fortalecimento di economia ta depende igualmente di e comerciante, profesional y empresario cu ta tuma e decision pa inicia un negoshi, crea actividad y eventualmente genera
oportunidad di trabou. “Nos kier un economia den cual iniciativa ta haya espacio pa crece. Gobierno mester facilita, estructura y crea claridad. Ora empresario tin confianza pa inverti, nos ta fortalece e base economico di Aruba y crea mas oportunidad pa nos comunidad,” Minister Wever a expresa. Durante e prome seis lunanan di 2026, 242 permiso pa negoshi nobo a wordo otorga. Cu e 259 permiso adicional den tercer kwartaal, e cantidad total pa e prome nuebe lunanan di 2026 ta yega na 501 permiso pa negoshi nobo. Minister Wever ta gradici e team di Departamento di Asunto Economico pa nan trabou continuo den ehecucion di Vestigingsverordening Bedrijven y pa procesa e peticionnan na un forma profesional y confiabel. Gobierno lo sigui traha pa mehora e proceso, kita obstaculonan innecesario y mantene un clima economico cu ta stimula comercio, inversion y iniciativa empresarial.
P8
DIAhuebs 15 october 2026
Prome Minister Mike Eman ta destaca importancia di restauracion di John G. Eman Bank pa revitalisa centro di Oranjestad
Prome Minister Mike Eman, hunto cu Minister di Finansa, Asuntonan Economico y Sector Primario, Geoffrey Wever, y director di Stichting Monumentenfonds Aruba, Petra Davis, a marca e inicio oficial di e prome fase di trabou di restauracion di e edificio historico John G. Eman Bank, situa na Caya Grandi den centro di Oranjestad. Durante e acto, Prome Minister Mike Eman a destaca cu e restauracion di e edificio aki ta representa mucho mas cu solamente restauracion di un monumento historico. E proyecto ta forma parti di un vision mas amplio pa revitalisa centro di Oranjestad, conserva e identidad di Aruba y bolbe trece actividad economico den centro di ciudad. Prome Minister Eman a enfatisa cu e edificionan historico di Caya Grandi tin un balor special pa Aruba, pasobra nan ta conta e historia di nos desaroyo como pais. Segun Eman, centro di Oranjestad tin un identidad propio cu ta distingui di otro areanan comercial moderno. Mientras cu tin centro comercial ta ofrece facilidad moderno, e edificionan historico di Oranjestad ta representa nos herencia, nos cultura y e historia di varios generacion cu a contribui na desaroyo di Aruba. Den e contexto aki, Prome Minister Eman a recorda un y tur presente e importancia historico di John G. Eman, un pionero den sector financiero y economico di Aruba. Na 1925, den un periodo cu economia di Aruba tabata cambiando cu establecimento di e refineria riba nos isla, John G. Eman a funda e prome banco di Aruba. E iniciativa aki a contribui na desaroyo di actividad economico y financiero di nos pais. E edificio cu pa hopi aña tabata sede principal di Aruba Bank ta representa un parti importante di e historia aki. Cu su restauracion, e monumento lo haya
un funcion nobo, mientras cu su caracter historico lo keda conserva. Prome Minister Eman a dedica palabranan di reconocimento na Minister Geoffrey Wever, kende durante añanan a sigui impulsa proyectonan pa revitalisa centro di Oranjestad, combinando restauracion di monumentonan cu desaroyo economico. Eman a destaca e continuidad di e esfuersonan aki, cu ta permiti pa proyectonan prepara anteriormente awor yega na nan fase di ehecucion. Eman a expresa tambe su aprecio pa e trabou di Stichting Monumentenfonds Aruba, Monumentenbureau, e arquitectonan y tur e instancianan cu ta contribui na conservacion di e patrimonio historico di Aruba. Un edificio historico cu un funcion nobo Minister Geoffrey Wever a remarca cu restauracion di edificio John G. Eman Bank ta parti di un programa mas amplio pa revitalisa centro di Oranjestad. El a menciona cu tin diferente edificio grandi abandona den centro di ciudad, cu anteriormente tabatin un funcion importante den economia di Aruba. Pa Minister Wever, no ta suficiente pa solamente restaura un edificio historico. Ta importante tambe pa duna e edificio un funcion sostenibel, cu ta garantisa uzo y actividad den futuro. Den caso di John G. Eman Bank, Centraal Bureau voor de Statistiek (CBS) y Sociaal-Economische Raad (SER) lo establece nan oficinanan den e edificio despues di su restauracion. Ademas, e proyecto ta inclui un espacio pa un cafe of resutraunt y algun apartamento. E combinacion di oficina, actividad comercial y vivienda ta forma parti di e concepto cu Minister Wever ta promove pa centro di Oranjestad. E meta ta pa trece mas hende bek den centro di ciudad, stimula actividad economico
y crea un ambiente cu ta bibo durante diferente momento di dia. Minister Wever a destaca cu e adkisicion di e edificio y e preparacionnan pa su restauracion a bira posible danki na cooperacion entre Aruba Bank, Stichting Monumentenfonds Aruba, Nationaal Restauratiefonds di Hulanda y Gobierno di Aruba. Aruba Bank a coopera den e transaccion pa traspasa e propiedad, mientras cu Nationaal Restauratiefonds a contribui cu e facilidadnan di financiamento. Gobierno di Aruba, cu sosten di Conseho di Minister y aprobacion di Parlamento, a pone fondo disponibel pa haci e adkisicion posibel Minister Wever a expresa su agradecimento na tur e organisacionnan envolvi, specialmente Stichting Monumentenfonds Aruba y su director Petra Davis, pa e trabou di preparacion y coordinacion cu a permiti pa e proyecto yega na e fase actual. Petra Davis: Inicio di trabou fisico despues di un proceso largo di preparacion Director di Stichting Monumentenfonds Aruba, Petra Davis, a explica cu e inicio di e trabounan fisico ta resultado di hopi aña di preparacion, negociacion y cooperacion entre diferente partner. For di decembe aña pasa Stichting Monumentenfonds Aruba a bira propietario oficial di e edificio John G. Eman Bank. Desde e momento ey, e organisacion a sigui cu e preparacionnan tecnico y administrativo pa por cuminsa cu su restauracion. Dia 22 di juli 2026 a finalisa e proceso di seleccion di arkitecto, cu Bert Kamsteeg di BK Consult como arkitecto di e proyecto. Dia 2 di october, a tene e destaho pa e prome fase di trabou, cu D&C Partners selecciona como contratista. Davis a explica cu e prome fase ta consisti di desmantelacion cuidadoso
di e partinan cu no tin un balor monumental. E trabou aki mester wordo realisa cu precision y respet pa conserva e elementonan historico cu ta duna e edificio su identidad y balor cultural. Davis a anuncia tambe cu Monumentenfonds ta den fase final di negociacion pa cera un contracto cu un huurdo pa e cafe/ restaurant y algun apartament cu lo forma parti di e edificio. Conserva historia y trece bida bek na Caya Grandi Cu restauracion di John G. Eman Bank, un edificio cu durante hopi aña a keda sin uzo lo haya un destino nobo den centro di Oranjestad. E proyecto ta combina conservacion di patrimonio historico cu actividad economico, facilidad di oficina y vivienda. Asina e edificio no solamente lo recupera su balor arkitectonico, pero tambe lo bolbe forma parti activo di bida cotidiano di e ciudad. Pa Prome Minister Mike Eman, e tipo di proyecto aki ta esencial pa conserva e identidad di Oranjestad y pa crea un centro di ciudad cu ta atractivo tanto pa nos comunidad como pa nos bishitantenan. E inicio di e trabounan na John G. Eman Bank ta marca un siguiente paso concreto den e esfuersonan pa revitalisa Caya Grandi, proteha e historia di Aruba y duna su edificionan historico un funcion nobo pa e futuro generacionnan.
P9
DIaHUEBS 15 DI OCTOBER 2026
Minister Wyatt-Ras:
Nos trabou ta toca e curason di Aruba: salud, alma y curpa di nos pueblo
Oranjestad, 13 di oktober 2026 – Durante un encuentro na Plaza Lolita, San Nicolas, dia 12 di oktober, Minister di Salubridad, Asunto Social, Cuido di Adulto Mayor y Maneho di Adiccion, drs. Melvin G. Wyatt-Ras, conhuntamente cu e demas Ministernan di Gabinete AVP-FUTURO, a presenta diferente proyecto enfoca riba cuido di salud, sosten social, bienestar di adulto mayor y tratamento di adiccion. E proyectonan aki tin como meta fortalece e cuido y sosten pa pueblo di Aruba y contribui na un miho calidad di bida. Minister Wyatt-Ras a enfatisa cu hopi trabou a wordo haci, pero cu ainda tin hopi pa haci. E Minister a reconoce cu costo di bida ainda ta pone presion riba hopi famia. Den e contexto aki, el a menciona entre otro e aumentonan di bijstand, schooltoeslag, reparatietoeslag y AOV, sosten pa material escolar
y medidanan relaciona cu AZV. Expansion di Pasadianan y vivienda pa adulto mayor Ministerio ta sigui traha riba expansion di Pasadianan y desaroyo di vivienda adapta na necesidadnan di adulto mayor, cu e meta di yuda nan keda activo, mantene contacto social y conserva nan independencia. Apertura di The Sunshine House na San Nicolas, e tercer Pasadia di Fundacion Centro Famia Piedra Plat, ta un paso concreto den e direccion aki. Cuido multidisciplinario pa diabetes na ImSan E programa di cuido multidisciplinario na ImSan ta reuni dokter di cas, specialistanan y otro profesionalnan di salud pa brinda personanan cu diabetes tratamento mas coordina y personalisa. E enfoke ta inclui atencion pa alimentacion y estilo di bida, cu e meta di mehora
control di diabetes, preveni complicacionnan y promove un miho calidad di bida. Digitalisacion di Departamento di Asunto Social Ministerio ta prepara e prome fase di digitalisacion di Departamento di Asunto Social, cu ta inclui un sistema nobo pa registra informacion y sigui peticionnan di Bijstandverlening, Guia Social, Kostenloze Bijstand y Bida y Famia. E meta ta simplifica procesonan, mehora seguimiento y brinda ciudadanonan un servicio mas eficiente. Institucion specialisa pa cuido di adiccion Den colaboracion cu Ministerio di Husticia y partnernan den sector di salud, Ministerio ta preparando e desaroyo di un institucion specialisa pa personanan cu problemanan compleho di adiccion, incluyendo esnan cu tambe ta
enfrenta problema di salud mental. E plan ta inclui un facilidad di cuido sera, cu e meta di brinda tratamento y guia specialisa, enfoca riba recuperacion y reintegracion den comunidad. Otro prioridadnan di Ministerio Den Salubridad, Ministerio ta traha riba e Plan Nacional di Salud Mental y Prevencion di Suicidio, cu ta den desaroyo, y iniciativanan pa prevencion di obesidad. Den Asunto Social, Ministerio ta pone enfasis riba prevencion di violencia domestico y sosten pa personanan cu limitacion. Den Cuido di Adulto Mayor, Ministerio ta traha riba desaroyo di un Helpdesk pa brinda informacion y guia na adultonan mayor y nan famianan, y un Meldpunt pa reporta caso sospechoso di maltrato of negligencia. Den Maneho di Adiccion, Ministerio ta fortalece bemoeizorg pa acerca ayudo na personanan cu ta dificil pa alcansa, mientras preparacion
ta sigui pa facilidadnan di detoxificacion y observacion. Pa Minister Wyatt-Ras, e proyectonan aki no ta trata solamente di edificio, sistema of inversion, sino di hende: nos adultonan mayor cu merece un bida activo, personanan cu diabetes cu mester cuido coordina, famianan cu ta busca sosten y personanan cu ta lucha cu adiccion y mester un oportunidad pa recupera. Cu e proyectonan y iniciativanan aki, Ministerio ta sigui traha pa fortalece cuido y bienestar den nos comunidad, cu e meta di contribui na un Aruba mas fuerte pa nos tur.
P 10
DIAHUEBS 15 DI OCTOBER 2026
Ateliers '89 Punto Di Beyas Arte Aruba un bes mas ta representa Aruba na Fuze Art Fair Nassau Bahamas 2026
Participacion di Aruba na ‘FUZE’
Pinturanan Nuris Lampe 2026 Ateliers ’89 Punto Di Beyas Arte Aruba ta orguyoso di anuncia cu pa di dos aña consecutivo el a haya un invitacion pa participa na e feria di arte Caribense ‘FUZE’ cu ta tuma luga desde dia 21 te cu dia 25 di october 2026 na Bahamas. E evento aki ta e único actualmente den área di caribe cu ta uni e artistanan den e region riba un plataforma di nivel halto y duna nan e oportunidad di expone nan Arte Caribense Di parti di Ateliers ’89 Punto Di Beyas Arte Aruba, dos artista, esta Nuris
L a mp e y Suzanne van Spall lo presenta nan obranan contemporaneo na FUZE. Dentro di e tema di FUZE, esta ‘Coming home’, Nuris Lampe ta expone 6 di su obranan riba canvas Nuris a haya su inspiracion for di e idea di rais y takinan bieu cu ta trece bo cas buscando comodidad entre loke ta conoci y loke e futuro ta bay ta. E ta sculptura su trabou cu pinsel chikito pasando delicadamente riba e canvas logrando perspectiva y sentimento profundo den dimensión. Suzanne van Spall a haya su inspiracion for di e palo local, e palo di Kwihi. P’e e Kwihi ta simbolisa no solamente e tera firme riba cual nos ta biba, pero tambe e conexion cu nos antecesornan. Suzanne van Spall ta bay presenta un instalacion cu mascarada di bonchi di
Caranan forma cu bonchi Kwiih, Suzanne Van Spall Kwihi. E bonchi a wordo traha un pa un, cu diferente material artificial. Tambe e lo uza cuadranan chikito cu imagen di bonchi cu a keda traha cu acrylic y potlood. Ateliers ’89 Punto Di
Beyas Arte Aruba ta gradici Het Cultuurfonds Caribisch Gebied (CCG) enormemente pa na ayudo, sin cual participacion, Ateliers ’89 Punto di Beyas Arte Aruba na e feria FUZE aki, lo no ta posibel. FUZE
ta un evento sumamente reconoci y importante den e mundo di arte dentro di nos region Caribense. Pa Ateliers ’89 Punto di Beyas Arte Aruba ta un honor pa su artistanan expone nan na dicho feria aki.
P 11
DIAHUEBS 15 DI OCTOBER 2026
Dia Mundial di Agricultura y Alimentacion Centro di Bario Noord ta invita comunidad
Bin discubri, cumpra y disfruta di productonan fresco, natural y, naturalmente, LOCAL! NOORD – Den cuadro di Dia Mundial di Agricultura y Alimentacion 2026, Centro di Bario Noord ta invita tur habitantenan di Aruba pa bin bishita e Mercado di Agricultura y Alimentacion, un oportunidad pa discubri, cumpra y disfruta di productonan fresco, natural y, naturalmente, LOCAL! E actividad lo tuma luga riba diabierna, 16 di october 2026, di 10:00 di mainta pa 2:00 di merdia, na Centro di Bario Noord. Durante e mercado, bishitantenan lo tin oportunidad pa cumpra mata pa solamente Afl. 5,00, hunto cu fruta, berdura y hopi otro producto fresco, cu atencion special pa loke nos cunuceronan
y productor local tin pa ofrece. E mercado ta un invitacion pa pueblo di Aruba pa reconoce y aprecia e trabou di e hendenan cu ta cultiva nos tera y ta contribui na produccion di alimento fresco pa nos comunidad. Tras di cada mata, fruta y berdura tin dedicacion, trabou y esfuerso di hende cu ta sigui cultiva y produci, no obstante e desafionan cu agricultura local por trece. Pa medio di e iniciativa aki, Centro di Bario Noord kier duna productor local un plataforma pa presenta nan productonan directamente na publico. Asina, e comunidad por conoce mihor loke ta wordo cultiva localmente, mientras cu e cunuceronan mes ta haya mas visibilidad pa nan trabou y nan oferta. Un oportunidad pa cumpra
LOCAL Cumpra producto local no ta solamente un manera pa yena bo cas cu alimento fresco; ta un manera pa mustra sosten y aprecio na nos tera y pa nos propio productor. Ora nos scoge fruta, berdura y otro producto cultiva of produci aki na Aruba, nos ta contribui na un cultura di consumo mas consciente y na e continuacion di actividadnan agricola local. Ademas, e mercado ta ofrece un oportunidad pa famianan, habitantenan y otro interesadonan pasa un momento agradabel, descubri productonan fresco y conoce mas di loke Aruba tin pa ofrece den area di agricultura y alimentacion. E celebracion di “Dia Mundial di Agricultura y Alimentacion” ta brinda
un momento special pa reflexiona riba e importancia di agricultura, siguridad alimentario y e papel cu cada un di nos por hunga den sosten di produccion local. Apoya nos cunuceronan y productor ta un paso importante pa fortalece e conexion entre productor y consumidor. Centro di Bario Noord ta extende un invitacion cordial na henter pueblo di Aruba pa participa den e mercado y duna nos productor local e atencion cu nan merece. Anota e fecha:
Fecha: Diabierna, 16 di october 2026 Ora: 10:00 di mainta – 2:00 di merdia Lugar: Centro di Bario Noord Oferta special: Mata pa Afl. 5,00, fruta, berdura y hopi mas producto fresco y LOCAL! Bin pasa un dushi bishita na nos Mercado di Agricultura y Alimentacion. Cumpra LOCAL, apoya nos cunuceronan y celebra hunto cu nos e rikesa di agricultura y alimentacion di nos dushi Aruba! —Noord Creciendo Hunto!
P 12
DIAHUEBS 15 DI OCTOBER 2026
Aruba den Mini World 2026 Actualmente ta tumando lugar na Punta Cana, Republica Dominicana e certamen edicion 11 di Mini World 2026. Aruba ta dignamente representa pa dos reina di Cas Princesa Aruba cu ta Baby World Aruba, Zahvia Croes y Pre teen World Aruba, Thaheeli Geerman. E final ta tuma lugar e fin di siman aki den e ballroom di Nick Resort, Punta Cana. Algun otro pais compitiendo e aña aki ta Brazil, Venezuela, Colombia, Republica Dominicana. Cada un cu nan representante den nan categoria. Na e organisacion Cas Princesa Aruba, tur familiar, cada guia y amigo cu ta presente na Punta Cana, sea sigur cu boso presencia ta di gran balor y sosten pa nos reinanan. Hopi exito pa Aruba su representantenan y sea sigur cu Aruba ta orguyoso di boso.
P 13
DIaHUEBS 15 DI OCTOBER 2026
Parlamentario Eduard Pieters:
“Subi salario mínimo no ta progreso si pueblo lo termina ta paga mas pa tur cos” Un salario mas halto ta zona bon y bunita. Pero si despues supermercado subi, servicio subi y costo di haci negoshi subi, cuanto di e aumento realmente ta keda den saco di e trahador? Esey ta e pregunta cu parlamentario di PPA, Eduard Pieters ta trece dilanti na Gobierno relaciona cu un posibel aumento considerabel di e salario minimo. Pieters ta cla riba un punto: e gap entre salario minimo y ‘bestaansminimum’ mester cera. Pero e no ta di acuerdo pa haci e aumento aki acelera y sin analisa su efecto completo riba nos economia. “Claro cu nos mester cera e gap. Pero si gobierno hacie den e forma aki, sin calcula y prepara p’e consecuencianan, no
tin sentido.” E problema no ta solamente salario; ta costo di bida Pieters su argumento ta, cu Aruba no por discuti salario minimo separa for di realidad economico. Costo di bida ya ta halto. Aruba ta depende fuertemente di producto importa, particularmente for di Merca y aumento di prijs internacional eventualmente y logicamente ta sintie localmente. Relaciona cu esaki, Pieters ta señala e efecto di sistema di nos BBO, cu segun Pieters ta aumenta e presion riba prijs, segun cu e producto ta pasa den cadena comercial debi cu BBO ta acumulativo P’esey e ta alerta: agrega un aumento fuerte di costo
laboral na e scenario aki y Gobierno lo crea un Warwaru, un “perfect storm” cu lo rebenta e isla aki for di otro. Ken ta paga e aumento na final? Pieters ta cuestiona e idea cu empresa simplemente lo absorba costo adicional. Un comerciante cu mester paga mas salario tin cu busca unda e lo recupera e gasto. Segun Pieters, den hopi caso esaki lo termina incorpora den prijs di producto of servicio. “Comerciante no ta bay sali perdi. E ta calcula esaki den su prijs. Y na final, nos como pueblo tin cu paga. Pues aunke bo ta haya mas placa, bo no lo tin mas placa den bo cartera, paso e lo bay bek den comercio di un manera of otro. Sino
comercio no lo sobrebibi.” E riesgo, pues, ta un circulo: salario ta subi, costo di empresa ta subi, prijs ta subi y parti di e aumento salarial ta perde totalmente su balor. E efecto domino den empresa Y e impacto, segun Pieters, no ta stop cu empleado cu ta cobra salario minimo. Si salario minimo di trahador subi, e diferencia entre e pago na e supervisor y manager ta bira mas chikito. Pues supervisor lo pidi ahuste y manager tambe lo haci e mesun cos. Asina un cambio a base di escala salarial por crea presion riba henter structura salarial di un empresa. Pieters ta cuestiona si Gobierno a calcula e efecto domino aki prome cu presenta aumento como solucion. Aumento no ta igual na poder di compra Pieters a uza situacion di
e pensionadonan tambe pa ilustra su punto: un beneficio adicional ta positivo, pero si costo di alimento y otro necesidad basico sigui subi, calidad di bida no necesariamente ta mehora den e mesun proporcion. Pues practicamente gobierno lo core campaña bisa cu a subi salario minimo, pero costo di bida y poder di compra tambe a aumenta. P’esey, segun PPA, e discusion no mester bira un competencia politico riba ken por anuncia e cifra mas grandi. E resultado mester ta midi na mesa di cas: hende realmente por cumpra mas, paga nan cuenta y biba cu mas dignidad? Pieters su advertencia ta simpel: “Gobierno por aumenta e cifra riba slip di pago. Pero si e mesun decision ta pusha p’e prijsnan bira mas halto, pueblo por termina cu mas salario, pero sin tin mas poder di compra.
P 14
DIAHUEBS 15 DI OCTOBER 2026
Parlamentario Eduard Pieters:
“PPA no ta djis bisa solamente ‘no’; semper nos ta presenta un alternativa.”
Si PPA ta bisa cu nos ta di acuerdo cu subi salario minimo di golpi por tin como efecto, aumento di e prijsnan y costo di bida, e siguiente pregunta logico ta: Anto kico PPA lo haci diferente? Pa parlamentario Eduard Pieters, critica solamente no ta suficiente: “Nos ta critica fuerte, pero nos tin e solucionnan tambe.” Durante e mesun conferencia di prensa, Pieters a pone dilanti dos propuesta cu PPA ya a presenta durante campaña 2024 den Plan Nos Aruba 2050: den 10 aña cera gradualmente e gap entre salario minimo y ‘bestaansminimum’ y introduci un ley di Beneficio Economico Laboral (BEL). No cera e gap den dos luna PPA ta di acuerdo cu
salario minimo mester yega mas cerca di ‘ b e s t a a n s m i n i m u m ’, pero e forma con lo hacie, ta e diferencia. Pieters ta propone pa bin cu un trayecto di aproximadamente dies aña, basa riba investigacion, inflacion y dialogo cu gremio comercial y sindical. Su argumento ta simpel: si bo aumenta costo salarial demasiado rapido, empresa lo calcula e gasto adicional den su prijs. Na final, e aumento cu e trahador haya, ta bay bek pa inflacion. BEL: si compania gana, empleado tambe ta gana Pero e propuesta cu Pieters ta pone central ta e ley di BEL. Segun su splicacion, un compania cu logra ganashi por comparti un parti di e ganashi cu
su empleadonan bou di cierto acuerdo. A cambio, e compania por beneficia di un deduccion fiscal. E idea ta crea beneficio pa ambos partido. Empleado haya ingreso adicional. Empresa haya incentivo fiscal. Dicho practica ta conoci na paisnan den Europa y te hasta tin informacion cu tin sindicatonan y empresa na Aruba cu ta haci uzo di e sistema aki caba. Y, segun Pieters, e ingreso adicional no ta crea automaticamente e mesun cadena di aumento structural di salario (riba diferente nivel) y e primanan, cu un aumento general di salario minimo por provoca. Mester corda cu tin tambe un efecto riba productividad. “Ora empleado sinti cu e ta parti di progreso di compania, e ta produci mas. E sa cu si compania progresa, e tambe ta beneficia.” Pa Pieters, esey ta e diferencia fundamental: no obliga empresa solamente pa paga mas, pero crea un sistema caminda progreso di empresa ta comparti cu e hende, cu ta yuda crea e progreso pa ambos, tanto pa e empleado y empresa. Pero costo di bida tin otro culpabel: BBO Pieters no a keda solamente na salario. El a cuestiona con Gobierno por bisa cu kier combati costo di bida, mientras Aruba ta sigui cu un sistema di BBO cumulativo cu netamente ta contribui na e prijsnan halto.
El a enfatisa cu no ta di awor Minister Geoffrey Wever sa di e asunto aki, ya for di e gobierno anterior, unda el a sinta casi 4 aña y formando parti di e gobierno actual, cu tin como 2 aña, ta suma un total di 6 aña cu e minister no ta of kier atende e problema fiscal aki. Pa Pieters, esaki ta e contradiccion: bo no por purba aumenta poder di compra, solamente via salario, mientras bo ta laga intacto e factornan cu ta pusha costo di bida ariba. “Nos mester sinta den driver seat” Ley di BEL ainda no ta un proposicion di ley presenta na Parlamento. Pieters a bisa cu PPA kier comberti e idea den realidad den un
proximo gobernacion. Segun Pieters, PPA a presenta mocion y amiendanan durante e ultimo añanan, pero cada biaha ta keda rechasa. P’esey e ta conclui cu pa implementa algun di e cambionan aki, partido mester haya responsabilidad di gobernacion. Finalmente e contraste politico cu Pieters ta pone enfasis ta simpel: “No ta solamente cuanto Gobierno por obliga un empresa pa paga. Ta con Gobierno por crea condicionnan, pa e empresa crece, e empleadonan beneficia y pa pueblo no perde e ganashi atrobe, door di e subimento di costo di bida”.
P 15
DIAHUEBS 15 DI OCTOBER 2026
San Nicolas ta cla pa cende e prome luznan di Pasco na Bernhardstraat
Gobierno di Aruba ta invita pueblo di Aruba y
specialmente e comunidad di San Nicolas, pa participa
mañan, diaranson 14 di october, na e cendemento oficial di e luznan di Pasco na Bernhardstraat. E actividad lo cuminsa pa alrededor di 6 or di atardi, dilanti di Chocolate City Bar Restaurant, caminda Prome Minister Mike Eman lo ta presente pa cende e luznan di Pasco hunto cu comunidad. Den cuadro di e proyecto di revitalisacion di San Nicolas, Bernhardstraat lo bira e prome caya di San Nicolas cu ta wordo ilumina cu decoracionnan di Pasco e aña aki. E momento special aki ta marca un paso mas den e esfuersonan pa trece bida, alegria y ambiente festivo bek den e bario. Durante e ultimo tempo, varios boluntario, hunto cu Gobierno y comercio a pone
Oracion Di Dia
man na obra pa drecha y haci Bernhardstraat bunita bek. E iniciativa pa ilumina e caya cu luznan di Pasco a conta cu sosten di Departamento di Obra Publico (DOW) y N.V. ELMAR, cu a contribui na e preparacionnan necesario pa realisa e iluminacion di
e caya cu luz di Pasco. Cu e iniciativa aki, San Nicolas ta duna e prome paso pa ricibi e temporada di Pasco, mientras cu e trabounan di revitalisacion di e bario ta sigui avansa cu participacion di nos comunidad.
Laga cu Dios ta e caminda cu e ta laga nos sigui riba dje ”Pa hende, esey ta imposibel, ma pa Dios tur cos ta posibel” Mateo 19,26 E reaccion entre e hendenan cu a scucha e combersacion entre e hoben rico y Hesus a pone hopi duda paso e palabranan tabata duro y cla. Hopi biaha Hesus a adverti contra obstaculonan manera rikesanan cu ta stroba nos drenta den e Reino di Dios. Hesus ta stima hendenan rico ya cu rikesa mes no ta malo, sino si el a wordo gana inhustamente of si ta uze abundantemente sin tene cuenta cu otronan den necesidad, of si cera e curason pa e balornan spiritual. Ta ken anto por haya salbacion? Hesus a responde ”Pa hende, esey ta imposibel, ma pa Dios tur cos ta posibel” Señor conoce e hendenan bon, con nan ta interpreta y suavisa e Palabra di Dios. Laga nos pidi Hesus pa yuda nos y converti nos curason. E hoben rico a bay tristo paso e ta pega na su rikesa. Ta momentonan asina den nos bida nos tin cu pidi Hesus pa capacita nos pa por laga cosnan di mundo atras y sigui Señor. Su promesanan ta cu nos lo sinta cu E Yiu di Hende den e Reino.Oracion:Oh Señor, duna nos e capacidad pa laga nos ”rikesanan” di mundo atras y sigui Bo. Duna nos un futuro feliz, abundancia di bida y e plenitud divino. Conduci nos na e dia aki! Amen.
P 16
SUDOKU
DIAHUEBS 15 DI OCTOBER 2026
MINISTER GERLIEN CROES:
DEN CUADRO DI LEARNING CITIES, FUNDACION AUTISMO ARUBA Y COMISION NACIONAL DI AUTISMO TA ORGANISA CONGRESO PA EDUCADOR ORANJESTAD, 13 di october 2026 – Fundacion Autismo Aruba (FAA) conhuntamente cu e Comision Nacional di Autismo ta organisa e Congreso pa Educador, cu lo tuma luga diaranson 14 di otober 2026, di 9:00 am pa 4:00 pm den ballroom di Aruba Marriott Resort & Stellaris Casino. E evento importante aki lo conta cu presencia di Minister di Educacion, kende lo efectua e apertura oficial cu un discurso di inspiracion pa e educadornan presente. E congreso ta specialmente enfoca riba maestronan y profesionalnan cu ta traha cu muchanan di 0 te cu 6 aña. Durante e dia, lo percura pa un programa amplio unda lo trata temanan crucial manera señalamento trempan di autismo, e importancia di stimulacion y intervencion na tempo, participacion di mayornan, e proceso di diagnostico, regulacion emocional, bienestar di e docente (Teacher Care), e relacion entre e trastorno di desaroyo di idioma (TOS) y autismo, y hermentnan practico pa brinda apoyo den e ambiente escolar. E iniciativa aki ta wordo realisa den colaboracion estrecho cu varios organisacion relevante den e sector di salud y cuido social, entre nan MDC, Wit Gele Kruis (WGK), Departamento di Salud Publico (DVG), Respaldo, FEPOH, Departamento di Asunto Social y
Fundacion Pa Nos Muchanan. Durante e evento, e organisacionnan aki lo ta presente tambe cu standnan di informacion pa orienta y guia e participantenan. E presencia y participacion di e Minister di Educacion ta subraya e compromiso y e balor cu e ministerio ta otorga na un educacion inclusivo, apoyo na un edad trempan y fortalecemento di nos profesionalnan den enseñansa. Minister Gerlien Croes ta expresa su mas sincero gradecimento na tur e instancianan cu ta haci e evento aki posibel y pa organisa e congreso aki den un ambiente profesional pa nos educadornan.
PUEBLO A HAÑA SU PEN BEK
Pa kualkier informacion solodipueblo@gmail.com of
☎ 585-9500