Skip to main content

Diahuebs november 19 2026

Page 1

P1

DIAHUEBS 19 NOVEMBER 2026

19 NOVEMBER 2026 - AFL. 1.50 - WWW.SOLODIPUEBLO.COM - E-MAIL: SOLODIPUEBLO@GMAIL.COM Afl.

1.25

“UN GOBIERNO SIN LIDERAZGO, SIN VISION Y SIN CAPACIDAD PA GOBERNA; ARUBA MERECE MIHO!” Falta apenas algun siman pa Prome Minister Mike Eman retira, pero te ainda no tin ningun plan ni splicacion cla pa pueblo Nos salud no por warda mas!

DEN E LUNA AKI INVESTIGACION NA HOH TA TERMINA - BAN SPERA BINI ACCION Y DECISION DI GOBIERNO NA INICIO DI DECEMBER CABA!


P2

DIAhuebs 19 november 2026

Werkagenda pa Reino mester conduci na resultadonan concreto pa habitantenan Un werkagenda cu acuerdonan concreto di cooperacion entre e gobiernonan di e cuatro paisnan di Reino, den interes di nan habitantenan. Ademas, e acuerdo pa reuni anualmente den forma di un Kingdom Summit of Koninkrijksconferentie. Esaki ta e resultado di e prome Kingdom Summit cu a tuma luga dia 17 y 18 di november na Sint Maarten. A acorda cu na 2027 lo organisa na Corsou e prome Konink r ijk sconferentie despues di 12 aña. Prome Minister Mike Eman di Aruba, Prome

Minister Gilmar Pisas di Corsou, Prome Minister Luc Mercelina di Sint Maarten y Staatssecretaris Van der Burg di Binnenlandse Zaken en Koninkrijksrelaties a dialoga, entre otro, riba brede welvaart, weerbaarheid y siguridad, sociale zekerheid y retencion di talento pa mercado laboral den e paisnan Caribense. Den e conclusionnan cu a firma na final di e Kingdom Summit, gobierno di Aruba, Corsou, Hulanda y Sint Maarten ta reconoce e importancia y e beneficio mutuo di un cooperacion estrecho. E

gobiernonan kier sigui construi riba e relacionnan di cooperacion existente. P’esey, nan lo sigui explora posibilidadnan pa profundisa e cooperacion aki. Den e werkagenda, cu ta inclui como anexo na e conclusionnan, e paisnan a acorda riba e temanan den cua nan ta mira posibilidad pa profundisa e cooperacion. Stimula brede welvaart, desaroyo economico y retencion di talento E gobiernonan kier pa e entradanan genera pa turismo contribui mas na brede welvaart, esta prosperidad y bienestar general di habitantenan. Tambe lo explora con por realisa e inversionnan necesario den facilidadnan publico, klimaatadaptatie y energietransitie, cu sosten di financiamento externo, incluyendo fondonan Europeo. Cooperacion regional den maneho di desperdicio por contribui na un cadena di maneho di desperdicio mas sostenibel. P’esey, lo haci un inventarisacion

di algun iniciativa cu actualmente ta den ehecucion den e area aki. A base di esaki, lo elabora conhuntamente proposicionnan concreto pa procesamento y transporte di desperdicio, y financiamento di esakinan. Den e proceso aki lo tene cuenta cu e circunstancianan specifico di e Benedenwindse y Bovenwindse Eilanden. Pa stimula e kenniseconomie, Hulanda lo brinda sosten na e paisnan Caribense den nan esfuersonan pa atrae institucionnan di conocemento y empresanan Hulandes. Esaki mester contribui na mas oportunidad di trabou di alto nivel y desaroyo economico. E paisnan y islanan Caribense ta confronta e reto di vergrijzing, esta un poblacion cu ta bira cada biaha mas grandi di edad, mientras cu, di otro banda, hopi studiante Caribense ta keda na Hulanda despues di completa nan estudio. Pa preserva talento pa e paisnan

Caribense, e gobiernonan lo comparti best practices, esta practicanan exitoso, pa stimula regreso di studiantenan. Tambe lo comparti experiencianan cu solucionnan cu a demostra nan efectividad den area di pensioen, seguro di salud y sociale vangnetten, esta sistemanan di proteccion social. Fortalecemento cooperacion

di

Kingdom Summit ta un deliberacion administrativo entre gobiernonan di e paisnan autonomo di Reino. E summit, organisa cu e obhetivo di fortalece cooperacion entre e cuatro paisnan di Reino. Durante e Kingdom Summit, cada pais a presenta su propio “State of the Nation”, den cua a dedica atencion, entre otro, na e logronan y desafionan di su pais, y na e areanan den cua nan ta mira posibilidad pa un cooperacion mas estrecho.


P3

DIAhuebs 19 november 2026

Parlamentario Endy Croes:

“Un Gobierno sin liderazgo, sin vision y sin capacidad pa goberna; Aruba merece miho!” Falta apenas algun siman pa Prome Minister Mike Eman retira, pero te ainda no tin ningun plan ni splicacion cla pa pueblo ORANJESTAD — Durante un conferencia di prensa teni dialuna 16 di november 2026, Parlamentario Endy Croes a vocifera e malcontento y preocupacion creciente cu ta reina den nos comunidad pa cu e maneho actual di Gobierno. Segun e Parlamentario, unda cu bo bira den tur skina di Aruba, bo ta topa cu un pueblo irita, decepciona y sin rumbo, cu ta buscando contesta cla riba kico realmente ta pasando cu nos Pais.

Croes a critica fuertemente e falta di gobernacion y liderazgo di parti di e gabinete actual, señalando cu e ta wordo percibi den pueblo como un gobierno di puro show. "Nos ta mira un gobierno cu tin Aruba stanca; un gobierno cu no ta goberna y cu no ta tuma decision. E percepcion den pueblo ta cu esaki ta un gobierno di puro show, mientras e problemanan real di nos comunidad ta keda sin atencion," Parlamentario Croes a enfatisa.

Prioridadnan robes Den su disertacion, Parlamentario Croes a cuestiona seriamente e prioridadnan di Prome Minister Mike Eman. Segun Croes, e mandatario ta pasa mas tempo na Hulanda cu na Aruba mes, lagando asuntonan urgente riba nos isla

sin e atencion debido. El a remarca cu mientras comunidad ta warda riba solucionnan real, e trabou di e Prome Minister na Aruba ta parce limita na tareanan superficial manera piki sushi y verf cas, loke ta demostra un gobierno sin vision y sin un rumbo cla pa futuro di nos pais.

Falta di claridad pa 1 di januari 2027 Un otro punto di suma importancia cu Parlamentario Endy Croes a trece dilanti ta e falta di transparencia pa cu e transicion gubernamental na comienso di aña nobo. Segun e Parlamentario, falta apenas algun siman pa Prome Minister Mike Eman retira, pero te ainda no tin un plan concreto presenta ni pueblo a ricibi splicacion oficial riba con gobernacion lo continua entrante 1 di januari 2027.

Croes a enfatisa cu e silencio aki ta crea un incertidumbre innecesario na un momento crucial pa nos pais — caminda ya caba tin varios crisis y asuntonan delicado riba mesa, manera e situacion critico den cuido medico y na hospital, e discusionnan rond di HOFA, e retonan financiero y costo di bida halto y e tensionnan den e coalicion mes — lagando tanto Parlamento como comunidad

den scuridad riba ken lo asumi e liderazgo di nos pais y kico lo ta e rumbo di Aruba na inicio di e aña nobo.

Pa finalisa, Parlamentario Endy Croes a haci un apelacion serio na gobierno pa asumi su

responsabilidad, duna cuenta na Parlamento y brinda pueblo di Aruba e claridad, stabilidad y trankilidad necesario. Segun e Parlamentario, despues di tanto incertidumbre y falta di maneho, comunidad ta exigi transparencia y gobernacion real, cerando su mensahe cu: "Aruba merece miho!


P4

DIAHUEBS 19 NOVEMBER 2026

MEP TA EXIGI PRESIDENTE DI PARLAMENTO: YAMA E 22 REUNION PUBLICO PENDIENTE Den un carta di 20 di april 2026 MEP a señala e presidente riba su obligacion caba. E carta ey nunca a haya contesta. Awor MEP ta exigi formalmente cu e cumpli

Parlamentario pidi pa un reunion publico por escrito, e presidente mester yama e reunion den 30 dia. Pa tur 22 peticion e plaso aki a pasa caba. E peticion mas bieu di Fraccion di MEP ta warda casi un aña y mey caba.

E reunionnan ta trata entre otro di e Ley di Reino HOFA, integridad den gobierno, remedi, cuido di mucha, e situacion financiero di HOH y costo di bida di nos pueblo.

Awe fraccion di MEP a exigi Presidente di Parlamento, sr. Sneek, formalmente pa dentro di 3 x 24 ora fiha fecha concreto pa tur e 22 reunionnan publico cu te awe e no a yama.

E Reglament van Orde ta papia cla. Ora tres

Awo mas cu nunca e Ley di Reino HOFA ta urgente. Durante e tratamento di e presupuesto supletorio, Minister Geoffrey Wever a bisa cu e negociacionnan cu Hulanda ta caba e luna aki. Ta un falta di respet cu te awe Parlamento no a haya oportunidad di papia publicamente riba un ley cu ta afecta e autonomia financiero di Aruba asina fuerte.

cu e Reglament van Orde, y a manda un copia di e carta di awe pa Gobernador di Aruba. Si e presidente no reacciona den e plaso di 72 ora, Fraccion di MEP lo hay'e obliga di tuma

pasonan huridico.

"E Reglament van Orde ta conta pa tur hende, tambe pa e presidente. Parlamento ta di pueblo, no di coalicion so," Evelyn Wever-Croes a bisa.

Surplus fiscal sosteni pa un economia creciente Comunicado di Prensa 17 di november 2026

Awe, Banco Central di Aruba (BCA) a publica e “Economic Outlook” di mas recien pa e sector fiscal. E publicacion aki ta contene pronosticonan di finansas di gobierno riba termino corto (2026-2027) y termino mediano (2028-2030).

Pa 2026, BCA ta proyecta un surplus fiscal di Afl. 115,6 miyon (1,4% di GDP) pa Gobierno di Aruba (GoA). Entradanan lo aumenta principalmente door di crecemento den ingreso for di impuesto (7,2%), sosteni pa turismo y consumo domestico, particularmente via impuestonan riba consumo, ingreso y ganashi. E reduccion temporal di e accijns riba gasolin desde april 2026 ta mitiga e aumento aki. Gastonan di gobierno tambe ta proyecta pa subi den 2026. Esaki ta principalmente pa motibo di transferencianan mas halto relata na e aumento den e reparatietoeslag mensual pa pensionadonan (+Afl. 150) na januari 2026, y gastonan di personal mas halto door di ahustenan di salario y cambionan structural. E porcion di e surplus riba e norma di 1% di GDP di e Landsverordening Aruba Tijdelijk Financieel Toezicht (LAFT) cu ta bay pa e Algemeen Investerings- en Ontwikkelingsfonds (AIOF) tambe ta registra como gasto (transferencia di capital). Pa 2027–2030, BCA ta proyecta cu crecemento economico lo continua y lo sostene surplusnan fiscal di Afl. 129 miyon (1,5% di GDP) den 2027 te Afl. 217,7 miyon (2,2% di GDP) na 2030. E surplus riba e minimo di 1% di GDP rekeri pa e LAFT ta wordo reparti igualmente entre reduccion di debe y inversion di capital via e AIOF. A consecuencia di e pagonan di debe, e ratio di debe/GDP ta premira di baha di 60,4% (2026) pa 44,4% (2030). E proyeccion aki ta refleha un scenario di referencia y consecuentemente ta suheto na riesgonan domestico y internacional. Entre otro, crecemento economico mas abou cu proyecta, shocknan externo, cambionan den condicionnan financiero, of gastonan di seguro social of inversion mas halto cu anticipa por afecta e proyeccion fiscal. E publicacion completo ta disponibel riba e website di BCA: https://www.cbaruba.org/document/economic-outlook.


P5

DIAhuebs 19 november 2026

Shailiny Tromp-Lee

Crecemento den turismo, mientras cu entrada di Gobierno ta baha y poder di compra di nos hendenan ta sigui bay atras. E cifranan di economia di Aruba merece atencion! Un otro cifra cu merece atencion ta e entrada di Gobierno. Durante september 2026, entrada total di Gobierno tabata Afl. 131.7 miyon. Esaki ta Afl. 34.6 miyon menos compara cu september 2025.

Naturalmente, un comparacion mensual no ta suficiente pa determina e situacion financiero total di Gobierno. Sinembargo, e diferencia ta un indicador cu merece analisis, principalmente pa compronde cua factornan a contribui na e reduccion y cua ta e implicacionnan pa e maneho financiero publico.

E cifranan mas reciente publica pa Banco Central di Aruba (BCA) tocante e desaroyo economico di september 2026 ta presenta un panorama cu tin señal positivo, pero tambe algun punto cu merece atencion.

Segun e cifranan, Aruba a ricibi 114.517 turista durante september 2026, un aumento di 17.1% compara cu e mesun luna di 2025. Esaki ta un desaroyo positivo pa nos sector turistico y e

actividad economico cu ta depende di dje.

Sinembargo, e crecemento aki mester wordo mira hunto cu otro indicador economico. Inflacion a yega na 3.0% compara cu september di aña pasa. Esaki ta indica cu e nivel general di prijsnan ta sigui subi, cu por tin impacto riba e poder di compra di famianan y e costo di operacion di empresanan.

Crecemento economico mester traduci den bienestar pa nos pueblo E pregunta importante no ta solamente cuanto turista ta bishita Aruba of cuanto entrada e economia ta genera. Nos mester puntra tambe cuanto di e crecemento aki ta contribui na un mihor calidad di bida, mas poder di compra, oportunidad pa nos empresanan local y e stabilidad financiero pa nos pais.

Un economia cu ta crece mester por genera beneficio mas amplio pa e comunidad. E desaroyo economico mester wordo acompaña di un maneho financiero responsabel, planificacion y atencion na e necesidadnan di nos pueblo.

Como parlamentario, mi ta considera importante pa sigui analisa e cifranan aki y pidi claridad riba e desaroyo di entrada publico, e impacto di inflacion y e manera con

crecemento den turismo ta traduci den beneficio concreto pa Aruba.

Nos no por evalua e estado di nos economia mirando solamente e cifranan positivo. Un analisis serio ta exigi nos pa mira e panorama completo.

Crecemento ta importante. Pero bienestar, poder di compra y sostenibilidad financiero mester sigui forma parti di e mesun met


P6

DIAhuebs 19 november 2026

Minister Geoffrey Wever:

Aruba ta ricibi asistencia tecnico di IMF–CARTAC pa fortalece planificacion financiero Oranjestad, 13 november 2026 – Den cuadro di bishita di IMFCARTAC pa fortalece planificacion financiero di Aruba, Minister di Finansa, Asunto Economico y Sector Primario mr. Geoffrey Wever riba 12 di november a ricibi un presentacion di sra. Nordia Campbell y sr. John Grinyer riba e resultado preliminario di e bishita aki. Meta di e asistencia tecnico di IMF-CARTAC den e periodo di 4 pa 13 di november 2026 ta pa hunto cu departamentonan relevante evalua y mehora e calculonan di entrada, gasto y debe publico, y tambe pa evalua y mehora proyeccion economico y su impacto riba finansa publico. CARTAC ta un di IMF su centro regional pa asistencia tecnico pa hunto cu paisnan yuda fortalece e capacidad di un pais pa diseña y implementa un maneho macroeconomico saludabel pa stimula crecemento y reduci pobreza. E asistencia tecnico tabata dirigi na mehoracion di e marco fiscal di mediano plazo existente. E instrumento aki ta conecta e proyeccion economico cu e planificacion di presupuesto multianual (meerjarenkader), pa brinda tur gobierno un base mas solido pa determina prioridadnan, planifica inversionnan y anticipa riesgonan financiero- economico. Durante e periodo di 4 te 13 november 2026, CARTAC a reuni cu Minister di Finansa, Asunto Economico y Sector Primario, mr. Geoffrey Wever, y Directie Financiën, incluyendo divisionnan di presupuesto, tesoreria y maneho financiero-economico. Tambe

CARTAC a reuni cu Directie Economische Zaken, Handel en Industrie, Departamento di Impuesto, Departamento di Aduana y Banco Central di Aruba. Ademas, a tuma lugar un encuentro virtual cu Colegio Aruba di Supervision Financiero, enfoca riba e calidad di e proyeccionnan y e posibel riesgonan pa e maneho presupuestario. Sesionnan di trabou tambe a forma parti di e programa. Durante e sesionnan aki, CARTAC y e departamentonan participante a concentra riba e calculonan di entrada di impuesto, entre otro BBO, winstbelasting y loonbelasting. Tambe a trata e proyeccionnan di gasto, inversionnan publico y obligacionnan financiero relaciona cu proyectonan cu ta den ehecucion. Un otro componente importante tabata e analisis di diferente scenario economico, pa evalua con un crecemento economico mas halto of mas abou cu ta spera por afecta e entrada, gasto y debe

publico. Ademas, e programa a inclui un metodo pa proyecta e debe publico como porcentahe di e Producto Interno Bruto (PIB) te na aña 2040 E asistencia tecnico ta enfoca riba mehoracion di e instrumento di calculo cu Directie Financiën ta uza pa prepara proyeccionnan financiero, y ta inclui recomendacionnan practico y pasonan concreto. Cu esaki, Aruba ta fortalece e base tecnico pa tuma decisionnan presupuestario y contribui na un maneho responsabel y sostenibel di finansa publico. Como parti final di e asistencia tecnico, CARTAC lo entrega un rapport cu conclusionnan y recomendacionnan concreto pa mehora y fortalece e planificacion financiero di Pais Aruba. Durante e presentacion di e resultadonan preliminario a resalta e necesidad pa sigui brinda e aparato gubernamental e instrumentonan y conocimento necesario pa mehora e procesonan di trabou y fortalece e comunicacion y coordinacion

entre departamentonan. Minister Geoffrey Wever ta enfatisa cu cada departamento tin un rol clave den e planificacion financiero di Pais Aruba. P’esey, ta importante sigui inverti den e capacidad di e departamentonan y den e desaroyo profesional di nan personal, pa fortalece e calidad di e analisisnan y e base pa decisionnan financiero di Gobierno. Esaki ta esencial pa mehora e calculonan di entrada, gasto y debe publico, y tambe pa evalua y mehora e proyeccionnan economico y nan impacto riba finansa publico. Minister Geoffrey Wever ta expresa su gradicimento na IMF– CARTAC pa e asistencia tecnico brinda na Aruba, y na Directie Financiën, Directie Economische Zaken, Handel en Industrie, Departamento di Impuesto, Departamento di Aduana y Banco Central di Aruba y Colegio Aruba di Supervision Financiero pa nan participacion y contribucion durante e bishita di IMF–CARTAC


P7

DIAhuebs 19 november 2026

Parlamentario Shailiny Tromp-Lee:

Nos salud no por warda mas!

Den e luna aki investigacion na HOH ta termina - ban spera bini accion y decision di gobierno na inicio di december caba! E situacion entre Gobierno y AZV

HOH,

Na mi opinion, pueblo a warda basta caba. Segun HOH, desde februari 2026 nan a alerta riba nan situacion financiero delicado, y na maart nan a inicia combersacionnan cu directiva di UOAZV y e Minister. Dia 9 di juni nan a bolbe bati alarma y a haci un presentacion na Ministerraad tocante nan situacion financiero y e consecuencianan cu esaki ta trece cune. Sinembargo, Minister Wyatt-Ras ta indica cu ta te na mei el a haya informacion di e situacion via AZV. Ken tin rason of ken ta papia berdad nos no sa, pero e crisis na HOH si ta real y su impacto ta wordo sinti diariamente den nos comunidad.

Despues di e presentacion di dia 9 di juni a bin e proceso pa inicia y ehecuta un investigacion: di juli te fin di augustus a traha riba e onderzoeksopdracht, y fin di augustus a firma e acuerdo di trabou. Pa fin di september e investigacion a start, cual lo tin un duracion di 7 siman, y esaki ta termina e luna aki, november 2026.

Consecuencia di tardansa Nos mester a acepta e proceso ey, pasobra Gobierno a bisa cu mester tin informacion obhetivo y verificabel prome cu e por tuma decision. Pero e realidad ta cu mientras nos ta warda, cuido ta sufri: pa dia un OK ta

cera. Endoscopie no ta traha riba diasabra. Tin remedi y material cu no por keda cumpra. Lista di espera pa operacion ta sigui crece. Cu otro palabra, e situacion aki a crea limitacionnan den cuido y a afecta e calidad, cu yen di posibel consecuencia negativo."

Ainda no tin solucion duradero y sostenibel Hopi hende ta bisa cu den prensa ta keda indica cu HOH a haya placa y toch e situacion no ta mehora. Y e informacion contradictorio den prensa sigur no ta yuda. Segun AZV, HOH a ricibi un total di 31 miyon na adelanto den 2026, y cu e ultimo 15 miyon nan a ricibi dia 3 di november ultimo. AZV ta informa cu nan a cuminsa duna e adelantonan aki desde februari pa HOH por sigui opera.

Di otro banda, HOH ta bisa cu e ultimo 15 miyon ey NO ta un adelanto, sino un pago parcial pa cuido cu HOH a brinda caba na 2025. Ta trata di placa cu nan mester a haya caba pa trabou haci aña pasa, y ainda no tin un acuerdo definitivo pa 2025. Ademas, HOH ta aclaria cu e adelantonan no ta placa adicional, sino cu nan ta forma parti di e presupuesto actual. Sea cual sea e definicion, e punto ta mesun cos: HOH no a haya placa extra. Nan a haya parti di nan propio placa mas trempan, y parti di loke nan mester haya pa trabou haci caba. Mientrastanto,

e problema di fondo, esta cu e presupuesto no ta cubri e costo real di cuido teniendo cuenta cu inflacion, subida di prijs y aumento di volumen, ainda no a wordo soluciona. Pa colmo, segun HOH, AZV tin intencion di cuminsa desconta e adelantonan aki entrante december proximo. Si esey sosode sin cu tin un solucion, HOH lo keda atrobe sin placa pa cubri su gastonan.

Situacion di trahadonan di HOH Nan ta traha cada dia cu menos recurso, cu mas presion, y cu incertidumbre grandi. Nan no sa si nan trabou ta sigur, si nan bonus lo wordo paga, y si december lo trece mas problema. Y toch, nan ta sigui. Nan ta sigui cuida nos mama, nos tata, nos yiu, nos ruman. Cu profesionalismo, cu pasenshi, cu curason. Nan merece claridad. Nan merece respet. Nan merece un ambiente di trabou stabiel, caminda nan por

haci nan trabou manera nan sa hacie: cu dedicacion y cu dignidad. Nos no por pidi tur cos di nan, mientras nos no ta duna nan e siguridad cu nan merece. Nan merece mas cu palabranan. Nan merece decision y accion!

Ta spera decision y accion di Gobierno Den e comunicado aki mi no ta bay bisa kico e decision mester ta. Esey ta trabou di Gobierno, AZV y HOH pa haci a base di e resultadonan di e investigacion.

Loke SI mi ta pidi, cu determinacion, ta: Tuma accion! Tuma decision! Anto pronto. Ta inaceptabel pa habri aña 2027 sin claridad ni decision, mientras cu AZV tin intencion di cuminsa desconta adelantonan entrante december caba. Ban spera cu na inicio di december e problema aki por keda resolvi, pasobra e tempo di warda a caba.


P8

DIAhuebs 19 november 2026

A.T.A. a honra nuebe colega durante YOU Anniversary 2026

“The Legends of A.T.A.”: un anochi dedica na añanan di servicio, contribucion y e historia cu cada colega a yuda construi Diahuebs 12 di november 2026, Aruba Tourism Authority (A.T.A.) a reuni su coleganan y famianan pa un edicion special di YOU Anniversary 2026, un celebracion organisa pa e ekipo di Recurso Humano di A.T.A. Durante e anochi, a honra nuebe colega cu hunto ta representa 160 aña di servicio, bou di e tema “Legends”, celebrando cada uno como un leyenda.

Cada trayectoria legendario ta ser construi pa medio di añanan, cu dedicacion, crecemento, retonan supera y contribucionnan cu ta laga nan marca. Tras di cada aniversario tin un historia unico cu a yuda forma A.T.A. den e organisacion cu nos conoce awe.

Durante e celebracion, A.T.A. a honra Josette Croes, Shadey Figaroa y Patrick Melchiors pa 10 aña di servicio. Cada uno tin su propio manera di aporta na e organisacion, pero tur tres ta comparti e mesun dedicacion y curason pa nan trabou, nan coleganan y A.T.A.

Ademas, A.T.A. a honra Ronella Croes, Sanju Luidens y Marouska Heyliger pa 15 aña di servicio. Nan a forma parti

di e organisacion desde su transicion pa un entidad Sui Generis, y durante e añanan nan a sigui aporta cu compromiso y pasion, cu un meta semper presente: traha pa beneficio di Aruba y su comunidad.

Finalmente, A.T.A. a honra Jonathan Boekhoudt pa 20 aña, Maureen Werleman pa 30 aña y Jerusha Rasmijn pa 35 aña di servicio. Durante e añanan, nan a presencia diferente cambio den e organisacion y a sa di adapta y evoluciona hunto cu A.T.A. Cu trabou duro y dedicacion, nan a sigui aporta y ta forma parti importante di e historia di e organisacion.

E concepto di e anochi a reuni dos tema: A.T.A. Legends y Aruba Legends. Diferente personalidad cu a construi nan propio historia den musica, arte, moda, deporte y media na Aruba a forma parti di e ocasion. Entre nan tabata musico Rodrick “Rocco” Franken, artista Armando Goedgedrag, diseñador di moda y creador Ronchi de Cuba, beisbolista profesional Chadwick Tromp, personalidad di media Erin Croes y musico Janiro “Ataniro” Eisden.

Musica tambe a hunga un papel special durante e

programa. E anochi a bolbe bek den tempo pa recorda algun di e cancionnan cu tabata popular den diferente epoca, conectando e diferente aniversarionan cu musica y recuerdonan di cada periodo. Presentacionnan di Rocco Franken y Ataniro a agrega un toke special na e experiencia.

Rondona pa coleganan y famia, e anochi tabata yena di reconocimento, aprecio y gratitud. Mas cu marca cantidad di aña, YOU Anniversary ta un oportunidad pa para keto y reconoce e hende tras di cada aña di servicio, e contribucion cu nan a haci, tur loke nan a yuda construi durante nan trayectoria dentro di A.T.A. y tur loke nan ta nifica pa famia di A.T.A.

E nuebe coleganan honra tur ta legendarionan. Cada uno cu su propio historia, su propio caminda y su propio manera di aporta, pero tur compartiendo e mesun dedicacion y compromiso cu nan trabou. Cu curiosidad,

curashi, compasion y curason, nan a contribui y ta sigui contribui na A.T.A. y nos pais. A.T.A. ta felicita e nuebe coleganan y ta gradici nan pa nan trabou incansabel. Masha danki!


P9

DIAHUEBS 19 NOVEMBER 2026

Parlamentario Eduard Pieters (PPA) na Parlamento Latinoamericano y di Caribe:

“Nos mester pasa di un scol cu ta siña obedece y ripiti, pa un scol cu ta siña pensa, crea y transforma” Un sistema educativo cu ta siña mucha solamente pa obedece, memorisa y pasa examen, ta prepara nan realmente pa enfrenta e retonan di futuro? Of nos ta limita nan capacidad pa pensa independientemente, cuestiona, crea y transforma nan propio realidad? Cu e cuestionamento fundamental aki, parlamentario Eduard Pieters di Partido Patriotico di Aruba (PPA) a presenta un vision di transformacion educativo durante su intervencion den Comision di Educacion di Parlamento Latinoamericano y Caribe. Pieters a pone e Maneho Strategico Nacional pa Enseñansa Primario 2024 di Aruba como un contribucion importante na formulacion di un Ley Modelo tocante Derecho na un Scol Creativo. Segun Pieters, creatividad no ta un luho ni un actividad adicional den enseñansa. E mester ta reconoci como un derecho fundamental di cada mucha, for di cuater aña di edad. Un sistema cu ta paga curiosidad di mucha mester cambia Pieters a señala cu e diagnostico educativo di Aruba pa e.o.

Unicef ta identifica e debilidadnan profundo den e modelo tradicional di enseñansa: un sistema rigido, autoritario y demasiado concentra riba memorisacion y resultado di examen. Segun Pieters, e modelo aki por desanima e muchanan pa haci pregunta, limita nan curiosidad y debilita motivacion di alumno y maestro. Pa Pieters, reforma educativo no por limita su mes na cambia metodo of material didactico. E mester transforma e manera cu nos ta compronde enseñansa y e rol di mucha den su propio proceso di siñamento. Cuater pilar pa transforma enseñansa Pieters a presenta cuater di e direccion fundamental pa e transformacion educativo. Prome: autonomia y desaroyo integral. Mucha mester ocupa e posicion central den enseñansa, cu mas oportunidad pa explora, cuestiona y participa activamente. E curiculo mester integra desaroyo intelectual, socio-emocional, motorico, artistico y moral den integracion di e areanan di formacion cu ta aproba pa pais Aruba. Di dos: identidad cultural y idioma materno. Pieters

a enfatisa importancia di Papiamento den enseñansa multilingual, cu materialnan conecta cu historia, cultura y realidad di Aruba. Aruba ta propone tambe siñamento pafor di klas, den museo, parke nacional y espacio tecnologico, caminda inteligencia artificial ta sirbi pa crea y no solamente consumi informacion. Di tres: inclusion y fortalecemento di docente. E parlamentario ta aboga pa menos dependencia di toetsnan standarisa y mas evaluacion formativo. Tambe el a enfatisa necesidad di ekiponan multidisciplinario pa atende neurodiversidad y inversion den preparacion y bienestar di nos maestronan. Di cuater: ley y financiamento. Pieters a adverti cu un derecho sin recurso y structura ta keda solamente riba

papel. Pesey el a propone un cuadro legal flexibel, participacion formal di alumno, famia y docente, y presupuesto plurianual y traduci den cada aña pa sostene e transformacion. Di vision educativo pa responsabilidad politico E intervencion di Pieters ta pone un reto concreto dilanti di Gobierno y Parlamento: transforma aspiracion educativo den legislacion, financiamento y practica den klas. Pa e parlamentario,

Aruba tin oportunidad di contribui na un modelo regional, cu ta pone creatividad, identidad y desarrollo integral di mucha central. E mensahe final di Pieters ta contundente: Latinoamerica y Caribe mester pasa di un scol cu ta siña obedece y ripiti, pa un scol cu ta siña imagina, crea y transforma. Esey, segun Pieters, mester ta e legado educativo cu nos laga pa nos futuro generacionnan.


P 10

DIAHUEBS 19 NOVEMBER 2026

Breaking the Silence a reuni 300 estudiante na Gloria Movies pa papia di vaping y siguridad online Aruba, 13 di november 2026 — “Kiko ta e prome cos cu ta bin den bo mente ora bo pensa riba un vape?” Cu e pregunta aki, Keanu Maduro y CJ Erasmus di Stichting Hunto a invita e hobenan na Gloria Movies pa comparti nan opinion. Den e contestanan cu a aparece riba pantaya, algun studiante a menciona e sabor, mientras cu otro a pensa riba e daño cu vaping por haci na nan salud. Stichting Hunto y Directie Volksgezondheid (DVG) a organisa e mainta informativo como parti di Breaking the Silence. Un total di 300 estudiante di EPB Hato, EPB San Nicolas y Mon Plaisir College a asisti hunto cu nan maestronan. Despues di e forum pa educadornan di 11 di november, e programa na Gloria Movies a duna e hobennan mes espacio pa haci pregunta y comparti nan punto di bista. Vaping y siguridad online Keanu Maduro y CJ Erasmus a splica kiko ta un vape, cua substancianan e por contene, manera nicotina, y con vaping por afecta e curpa. Nan a cera nan presentacion cu un mensahe pa e studiantenan reflexiona riba nan decisionnan. “Every choice you make today shapes who you’ll be tomorrow.” Angela Persad di Pronad a papia di loke por pasa cu un potret, video of mensahe despues cu bo comparti esaki online. Ela

a splica tambe con online grooming ta funciona, ora un persona ta gana e confiansa di un menor via internet cu e intencion di probecha di dje. Na final, ela a anima e hobenan pa papia cu nan mayornan, un docente of un hende cu nan ta confia si algo cu pasa online ta preocupa nan. Dos storia personal di cambio Ishon Boekhoudt a conta di su bida den un gang y con el a logra sali for di e ambiente ey. Michael Scott a conta di ora e tabata un mucha, dicon el a laga scol na un edad hoben y di su experiencia cu uzo di substancia. El a comparti tambe con el a supera e etapa ey y con awe e ta biba sin uza substancia. Cu e dos testimonionan, Stichting Hunto a trece storia real cerca

di e hobenan pa nan por compronde con e situacionnan aki por afecta bida di un persona y con cambio ta posibel. Durante e mainta, e studiantenan a haci pregunta y a comparti nan opinion riba e temanan presenta. Stichting Hunto ta gradici Directie Volksgezondheid (DVG) pa su colaboracion den organisacion di e mainta informativo. Masha danki tambe na e scolnan, maestronan y studiantenan pa nan participacion, na e presentadornan y esnan cu a comparti nan testimonio, y na Michelle Lont, Marylaine Maduro y Joswe Jansen pa guia e programa como MC. Pa mas informacion, por tuma contacto cu Stichting Hunto na 281-3344, info@ hunto.aw of bishita www. hunto.aw


P 11

DIAHUEBS 19 NOVEMBER 2026

Filomena College MAVO orguyoso di Prins PAKI y Pancho PAYA Centenares tawata e alumno, amigo y famia cu a bay CB Dakota for di pariba di brug pa apoya masalmente nan candidatonan preferi pa Prins cu Pancho hubenil 2027. Zayron Geerman – Prins Paki y Jaydrick Panneflek – Pancho Paya, a representa Filomena College MAVO y Dushi Carnaval group na gran forma contra e TOB/ Kiwanis y Empire/Maria College. Na final dje anochi, e hurado a saca como ganador, Prins PAKI y Pancho PAYA pa’e di 62 edicion di Prins cu Pancho di Aruba su carnaval. E unico di esaki ta, cu ta pa

prome biaha den historia cu Filomena College MAVO ta uni na Dushi Group y ta trece e corona San Nicolas.

Directorado y cada alumno di FCM ta gradici cada mayor, trainer Endrick Panneflek, Dushi Carnival

Group y cada compañero di scol cu a acudi masalmente apoyando y yudando PAKI y PAYA conkista e premio

maximo y unico aki. Potret pa cortesia di Bryson Media, Rex Aruba, Zoom Aruba y Click it Carnaval.


P 12

DIAHUEBS 19 NOVEMBER 2026

Parlamentario di AVP, John Hart:

CONFIANZA TA BON, PERO CONTROL TA MIHO. TA SOSTENE INVESTIGACION HOH PARLAMENTO MERECE CLARIDAD

ORANJESTAD (18 di november 2026) — Parlamentario John Hart di Fraccion AVP ta pidi claridad tocante e investigacionnan pendiente di Hospital Dr. Horacio E. Oduber (HOH). Hart ta apoya e posicion di e Minister di Salud Publico pa investiga e finansa di HOH di forma profundo, independiente y transparente prome cu considera financiamento adicional. “Pero tin un punto cu mi kier enfatisa: e investigacion aki no por dura demasiado largo y tampoco por wordo obstaculisa.” Sr. Hart a enfatisa. E ta pidi pa conclui e investigacion cuanto antes y pa parlamento

discuti e asunto cu e minister. Den e cuadro aki sr. Hart a dirigi diferente pregunta na minister tocante e investigacion. Vertrouwen is goed, maar controle is beter Den e discusion di hospital y gobierno, pa mi, e meta mas importante mester ta proteha e hospital como institucion y, mas importante ainda, garantisa cu e pueblo di Aruba por sigui ricibi e cuido di salud cu e merece. Y precisamente p’esey, fundamentalmente e investigacionnan aki ta di sumo importancia. Nos mester sa con nos a yega na e situacion actual, cual tabata e desicionan cu a wordo tuma, cua tabata e

rol di gerencia y di Raad van Toezicht y sobretodo, cua pasonan structual lo tuma pa garantisa cu hospital por sigui duna un bon calidad di cuido na nos pueblo. “Placa di pueblo no ta placa sin doño,” Hart a enfatisa. Segun e parlamentario, cualkier decision tocante financiamento adicional mester ta basa riba informacion concreto tocante gastonan, obligacionnan pendiente y e medidanan structural necesario pa atende e causa di e problema financiero. Parlamento mester ehece su rol di control Hart ta subraya cu parlamento tin e responsabilidad di controla maneho di gobierno y vigila con ta uza placa publico. P’esey, Parlamento di Aruba mester por cuestiona e minister tocante e situacion actual, e informacion cu ya ta disponibel y e progreso di e investigacion. E

resultadonan mester sirbi como base pa evalua si tin necesidad di financiamento adicional y bou di ki condicionnan por otorga esaki. Wie betaalt, bepaalt Pa Hart, e prioridad ta garantiza cuido medico di calidad y accesibel pa e comunidad. E parlamentario ta señala cu un maneho financiero sano ta esencial pa sigura continuidad di cuido. “Cualkier decision riba fondo adicional mester indica con lo uza e placa, ken lo duna cuenta di su uzo y ki medidanan lo atende e causa di e problema.

riba, por ehempel, salida di specialista medico, condicionnan laboral di personal, disponibilidad di servicio medico y confianza di comunidad Arubano den nos institucion di cuido di salud.” Den e contexto aki, e papel y responsabilidad di e Conseho di Supervision (Raad van Toezicht) merece atencion special. E conseho tin un responsabilidad importante pa supervisa e directiva, vigila bon gobernacion y controla si e organisacion ta dirigi di un manera cu ta proteha e continuidad di servicio y e interes di e pashent.

E dicho ta bisa: ‘Wie betaalt, bepaalt.’ Si e problema di finansas mester wordo resolvi door di gobierno, so be it. Pero den e mesun rosea tambe mi ta bisa cu ta importante cu e debate tocante futuro di nos hospital no solamente ta concentra riba e deficit financiero, pero tambe

Hart ta pidi pa gobierno presenta e resultadonan di e investigacion na parlamento asina cu e ta cla, pa parlamento por evalua e situacion financiero di HOH y e medidanan proponi pa sostene e hospital y e sistema di salud na largo plaso.

PUEBLO A H HAÑA SU PEN BEK

Pa kualkier informacion solodipueblo@gmail.com of

☎ 585-9500


P 13

DIAHUEBS 19 NOVEMBER 2026

PROME MINISTER DI SINT MAARTEN TA RECONOCE VISION DI PROME MINISTER DI ARUBA:

COMBATI POBRESA MESTER TA PRIORIDAD DEN REINO HULANDES Prome Minister di Sint Maarten, Dr. Luc Mercelina, a destaca e importancia di combati pobresa y mehora calidad di bida di nos ciudadanonan den Reino Hulandes. Den un entrevista despues di e prome dia di Kingdom Summit, Mercelina a reconoce tambe e iniciativa Common Good di Prome Minister Mike Eman, cu ta pone bienestar di pueblo y interes general di comunidad den centro di desaroyo economico y social. E prome dia di Kingdom Summit a resulta den un dialogo positivo entre e delegacionnan di Aruba, Corsou, Sint Maarten y Hulanda. El a califica e encuentro como historico, mirando cu ta despues di 11 aña cu e lidernan di e cuatro paisnan ta bolbe reuni den un conferencia di e tipo aki. E Prome Minister a destaca cu e retonan cu e paisnan ta enfrenta no ta limita na e islanan Caribense, pero ta afecta tambe e poblacion di Hulanda. Pesei, e ta considera importante pa e cuatro gobiernonan busca solucionnan hunto. “Nos tin un problema grandi, specialmente den Caribe, tocante pobresa. Esaki ta un di mi preocupacionnan pa Sint Maarten. Nos a discuti diferente posibilidad pa combati pobresa di un

manera coordina, hunto cu e otro paisnan di Reino”, Mercelina a declara. Mercelina a enfatisa cu pobresa no ta un problema di Sint Maarten solamente, pero un reto cu Aruba, Corsou y Hulanda tambe ta enfrenta. Segun dje, e momento a yega pa e lidernan di Reino uni nan esfuersonan pa busca solucionnan cu por mehora e calidad di bida di nan ciudadanonan. Mercelina ta reconoce iniciativa Common Good di Eman Un momento importante den e entrevista tabata ora cu Mercelina a haci referencia na e conferencia Common Good cu Prome Minister Mike Eman a organisa anteriormente, y

na cual e mes a participa. Segun Mercelina, e pensamento di bienestar colectivo ta conecta directamente cu e obhetivo di Kingdom Summit, cu ta busca mehora e prosperidad y calidad di bida di tur ciudadano den Reino. E vision aki ta den linea cu e mensahe cu Prome Minister Eman a presenta durante su discurso State of the Nation. Eman a destaca cu, a pesar di e crecemento economico y turistico significativo na Aruba, ainda tin alrededor di 18.000 empleado cu nan salario ta bou di e bestaansminimum. Pa Eman, e reto principal ta pa logra cu e prosperidad economico traduci den

bienestar real pa pueblo, specialmente pa e empleadonan y e famianan vulnerabel. Mientras cu Eman ta pone enfasis riba e necesidad pa conecta crecemento economico cu bienestar social, Mercelina ta destaca e importancia di cooperacion entre e cuatro paisnan pa combati pobresa. Un Reino cu ta traha pa bienestar di tur ciudadano Mercelina tin un mensahe tocante e responsabilidad comparti di e cuatro paisnan. “No ta trata di e Arubianonan, ni di habitantenan di Corsou of Hulanda. Ta trata di e ciudadanonan di Reino Hulandes, pa kende nos

lo traha duro pa mehora nan prosperidad”, e Prome Minister di Sint Maarten a expresa. E declaracionnan di Mercelina y Eman ta mustra un punto den comun entre ambos lider: e necesidad pa cooperacion den Reino ta bay mas leu cu e relacionnan gubernamental y traduci den varios solucion concreto pa combati pobresa y mehora e bienestar di tur pueblo. E Kingdom Summit ta continua diaranson 18 di november, cu deliberacionnan entre e delegacionnan y e intencion di presenta un declaracion final tocante e cooperacion futuro den Reino Hulandes.


P 14

DIAHUEBS 19 NOVEMBER 2026

Descubri alimentonan imprescindibel cu no por falta den bo dieta Nos lo mustrabao algun alimento imprescindibel di cual propiedadnan nutricional ta haci nan necesario pa un dieta sano y balansa. Pa suerte, nan ta alimentonan habitualmente facil pa haya y pa inclui den cualkier plato. Tomati Un dieta balansa mester contene un poco di tur cos, pero nunca mester falta tomati. E tin antioxidante, cu ta yuda na e rehubenecimento celular, y vitaminanan A, C y E. E tomati aprecia antes tabata wordo como un mata decorativo, te cu den siglo XVIII, a cuminsa consumi'e como alimento. Ademas, tomati ta di puro awa, loke e ta bira ideal pa mantene e peso. E ta posee tambe un substancia fantastico pa e organismo, Licopeno, cu ta preveni e aparicion di cierto cancernan, manera di pulmon y di prostaat. Awacati E dushi awacati tin un espectro di beneficio cu ta yuda for di un muhe na estado, pa un homber adulto. E ta posee acido folico, necesario pa preveni malformacion den e fetus y su vetnan ta impedi e desaroyo di colesterol. Knoflok E alimento imprescindible, aromatico y fresco aki, ta un protector natural di e organismo. Ta miho consumi'e fresco, ya cu ta e forma cu e ta mantene tur su propiedadnan. Ademas, e ta un excelente regulador di presion arterial y ta yuda e digestion. Di un otro banda, hopi chef ta recomenda saca su parti interior berde, pasobra e por resulta pisa pa e digestion. E resto di e djente di knoflok por wordo consumi completo. Ade-

mas, como curiosidad, knoflok por tin cierto efectonan afrodisiaco. Selder Selder ta famoso pa stimula e potencia sexual. Ademas, su consumo ta yuda mehora e problemanan chikito di memoria vincula cu edad. Selder tambe ta posee un porcentahe halto di hero, pesey e ta un aliimento imprescindible contra anemia. Por ultimo, como curiosidad, e juice di selder ta yuda supera e trastornonan di soño. ta posee un balans casi perfecto di cinco importante mineral: calcium, magnesium, fosforus, hero y potasium. Alimentonan imprescindibel: Salmao Salmao, specialmente esun silvestre of salvahe, ta posee cantidadnan grandi di Omega-3, un substancia cu ta preveni malestarnan cardiaco. Lo mas recomendabel ta incorpora e pisca aki den e dieta infantil pa su fantastico aporte nutricional.

Chuculati Aunke ta acus'e di faborece e ganamento di peso, chuculati tin mas virtud cu defecto. E ta energetico, ya cu consumiendo un cntidad chikito ta gana hopi den energia. Ademas, solamente 100 gram di chuculati scur, ta posee 375 miligram di fosforus. Di un otro banda, e polifenolnan cu e chuculati ta posee, ta convirti'e den un protector cardiaco y un agente preventivo di cancer. Spinazie Spinazie no solamente ta duna forza, sino cu ta yuda na mantene un bon bista. Ademas di ta un fuente basico di hero, spinazie ta asina bon of miho pa e bista cu un wor-

tel, ya cu e ta concentra un bon cantidad di luteina, un substancia cu ta fortalece e retina. Appel Appel ta e fruta pa excelencia. E alimentonan imprescindibel aki ta reduci e cantidad di proteina y lipido y ta posee un porcentahe halto di vitamina, awa y salo. Ademas, tambe ta actua contra e daño di celnan celebral. Rasenchi Ta berdad, rasenchi tin bastante concentracion di sucu, pero net esey ta hustamente loke ta convirti'e den un maraviyoso motor di energia pa mucha, adultonan mayor y deportista. Ademas, den su espacio reduci, e

Yoghurt Un yoghurt pa dia ta yuda cualkier adulto pa fortalece e calcium den e organismo y na mucha pa preveni infeccion. Ademas, e ta un producto hopi recomendabel pa dietanan abao den caloria. Vol of sin vet, yoghurt ta un producto perfecto pa bo alimentacion. Brocoli Brocoli ta un bon fuente di vitamina A (principalmente den forma di beta-karonteen), di vitamina C y di acido folico. Esaki ta asina te na e punto cu un racion di 200 gram, ta aporta mas di tres biaha mas di e recomendacionnan diario di vitamina C y e mita di e ingesta recomenda di


P 15

DIAHUEBS 19 NOVEMBER 2026

Prome Minister Mike Eman na de Volkskrant:

“Prosperidad economico mester traduci den bienestar pa tur Arubiano” Den un entrevista amplio cu e diario hulandes de Volkskrant, Prome Minister Mike Eman a reflexiona riba e desaroyo economico di Aruba, e lucha historico pa Status Aparte, e relacion cu Hulanda y e importancia di prepara espacio pa un generacion nobo di liderazgo politico. E entrevista, publica diamars 17 di november, ta pone enfasis riba un di e misionnan principal di Eman: procura cu e prosperidad economico di Aruba traduci den un miho calidad di bida pa tur habitante. Crecemento economico mester beneficia henter pueblo Durante e entrevista, Prome Minister Eman a destaca e progreso economico cu Aruba a conoce durante e ultimo decadanan. Como ehempel, e la indica cu e tarifa promedio di un camber di hotel a aumenta di 130 dollar na 2010 te aproximadamente 400 dollar. Den e mesun periodo, sector turistico a crece cu 70 porciento, mientras cu producto bruto nacional a dobla. Sinembargo, Eman a enfatisa cu cifra economico positivo no ta automaticamente nifica cu tur habitante ta beneficia igualmente di e prosperidad. E a ilustra e reto aki haciendo referencia na e diferencia entre salario minimo, cu segun e entrevista ta aproximadamente Afl. 2.100, y e nivel minimo di subsistencia, cu ta Afl. 2.600. E a menciona e sistema di compensacion social y pensioen general como alivio cu ta

contribui na proteccion di e poblacion. “Nos ta logra progreso, pero transforma prosperidad den bienestar pa tur habitante ta sigui ta un mision”, Prome Minister Eman a expresa den e entrevista. E mensahe aki ta refleha su conviccion cu desaroyo economico mester bay man den man cu progreso social, reduccion di desigualdad y un miho calidad di bida pa nos famianan. Renovacion politico y espacio pa generacion nobo Un otro tema importante den e entrevista ta e decision di Prome Minister Eman pa termina su funcion como prome minister dia 1 di januari 2027. Eman a splica cu su decision ta relaciona cu e necesidad di crea espacio pa renovacion politico y pa un generacion nobo asumi responsabilidad den direccion di Aruba. Segun Eman, durante e aña e a yega na e conclusion cu e renovacion politico cu e ta visualisa no lo por desaroya suficientemente si e mes continua como prome minister pa dos aña mas. Den e contexto aki, e entrevista tambe ta menciona e transferencia di liderazgo di partido AVP na Wendrick Cicilia, cu a tuma e responsabilidad aki dia 4 di oktober 2026. E lucha historico pa autonomia di Aruba Den e entrevista, Prome Minister Eman a dedica atencion na e lucha historico di Aruba pa su Status Aparte y e papel cu diferente generacion di su famia a hunga den e proceso aki. E a referi na su bisabuelo Cornelis Hendrik Eman,

un di e promotorenan di progreso social y politico di Aruba, y na su buki Voorvechter, cu ta describi e lucha pa mas oportunidad, educacion y desaroyo pa pueblo Arubiano. Tambe e a recorda e contribucion di su ruman mayor, ex-Prome Minister Henny Eman, y e importancia cu e lucha pa autonomia a tene pa desaroyo di Aruba. Eman a splica cu e deseo di Aruba pa un posicion autonomo a nace for di e necesidad pa por determina su propio direccion, despues di un periodo largo den cual decisionnan importante tabata concentra na Corsou. Aruba su relacion cu Hulanda y e Reino Prome Minister Eman a enfatisa cu, pa Aruba, autonomia nunca a nifica un deseo pa aleha for di Reino Hulandes. Al contrario, Aruba semper a considera e Reino como un garantia importante di stabilidad y siguridad. Den e contexto aki, e a reflexiona tambe riba e diferencia di opinion cu a surgi cu Hulanda na 2014 tocante e autonomia financiero di Aruba. Eman a splica cu e posicion di Aruba tabata basa riba e principio cu cada pais autonomo den Reino tin su propio responsabilidad financiero, conforme e Statuut. Unda hasta Raad van State despues a duna Aruba rason den e discusion aki. E pandemia di COVID-19, Eman a reconoce e importancia di e sosten financiero di Hulanda durante un periodo excepcional, specialmente considerando e dependencia economico

di Aruba riba turismo y e limitacionnan cu nos pais tin pa accede financiamento internacional. Tambe e a comenta riba e relacion historico cu Cas Real Hulandes y e respet cu Aruba semper a mantene pa e institucion aki. Diversificacion economico y cooperacion den Reino Mirando pa futuro, Prome Minister Eman a expresa su sosten pa e idea di organisa un conferencia anual di Reino, caminda e paisnan por evalua con nan por crea mas beneficio mutuo. E a destaca e importancia di diversifica economia di Aruba pa reduci e dependencia riba turismo, entre otro door di atrae institucionnan internacional, manera Universidad di Wageningen, y probecha e posicion strategico di Aruba den region. Segun Eman, e cooperacion aki no solamente ta importante pa Aruba, sino tambe por crea oportunidadnan valioso pa Hulanda y e otro paisnan den Reino. E entrevista a bay tambe riba e situacion geopolitico den region, particularmente e tensionnan entre Merca y Venezuela. Prome Minister Eman a enfatisa cu e conexion di Aruba cu Reino ta un elemento importante pa siguridad y stabilidad di nos pais. Mas oportunidadnan internacional pa Aruba Finalmente, Prome Minister Eman a expresa su deseo pa Aruba logra un conexion mas estrecho cu Union Europeo, particularmente door di explora e posibilidadnan relaciona cu espacio Schengen. E a menciona

e sistema di preclearance cu Aruba tin cu Merca como un ehempel con cooperacion internacional por facilita transporte aereo, comercio y turismo. Segun Eman, un sistema similar cu Europa lo por fortalece e posicion internacional di Aruba y amplia e oportunidadnan economico pa nos isla. Un mision cu ta continua E entrevista di de Volkskrant ta presenta un reflexion riba e trayectoria politico di Mike Eman, e progreso cu Aruba a logra y e retonan cu ainda ta dilanti. E mensahe central di Prome Minister Eman ta cu e exito di un pais no por wordo midi solamente den crecemento economico, cifra di turismo of prosperidad financiero, sino principalmente den e bienestar y calidad di bida di su pueblo. E aspiracion pa cu cada Arubiano por participa den e progreso di nos pais ta keda un mision fundamental pa futuro di Aruba.


P 16

SUDOKU

DIAHUEBS 19 NOVEMBER 2026

ACTIVIDADNAN DI CARNAVAL TA UN TRADICION PAGANO Y DI LOKE BIJBEL TA BISA Carnaval a origina na Europa, Italia, Roma durante “Middle Age” den anja 500 pa anja 1500, como parti di un ritual. E Lupercalia tabata un festival pagano den e tempo ey na Roma y nan tabata dedica e festival na honor di e dios falso, Lupercus, cu tabata e “Roman god of fertility”, tambe jama, “She-wolf, who nured the twins Romulus and Rumus”. Den e festival aki, e Romanonan tabata bisti, mascara, bistimento di trahenan, nan ta baila den cayanan, nan tabata come y bebe binja y den nan deseonan di curpa den sexualidad etc. Lupercalia ta e festival di fertilidad y tabata wordo celebra den Februari na Roma y Europa y e paranda ta dura 40 dia. Den e anjanan 1800, ora cu e Francesnan y e Spanjonan a bin colonisa e Islanan di Caribe, nan a trece tambe e tradicion pagano aki den e Islanan den Caribe. Den Caribe, e tradicion di festival di Europa, a mescla cu e tradicion cultural musica di Caribe. Nan a cambia e ritmo di tocamento cu diferente instrumentonan. Tambe e bailamento riba caya, e mascaradanan y e kostuumnan y bistimento inmoral a bin na moda etc. Den hopi temponan pasa, Iglesia a cambia e dianan di e festival mundano aki mas cortico. Y Iglesia a bin cu e temporadanan di Cuaresma pa stop cu e actividadnan aki y pa tur hende por arepenti di tur nan actonan cu no ta bon den bista di Dios. Pesey den Caribe, nan a bin cu e nomber, Carnaval, cu ta significa, “Farewell to the flesh”. Den Latin, Carnisvale, cu ta sigmifica, “Flesh-Farewell”. Na Merca New Orleans, nan ta celebra e Carnaval, cu jama, Mardi-Gras. Na unda nan ta baila den cayanan, bebemento di alcohol, usamento di droga, bistimento inmoral, comemento, libertinahe sexual, abuso sexual, crimen, inmoralidad etc. Na Brasil tambe tin Carnaval, cu tur su actividadnan den libertinahe sexual, crimen, droga, alcohol, inmoral y deshonesto den Samba etc. y cuanto baby di Carnaval no ta nace despues di 9 luna? Compronde bon, cu tur e actividadnan di Carnaval aki, ta bini di e raisnan antiguo, di festivalnan pagano na e dios falso di fertilidad. Awor, kiko Bijbel ta bisa tocante e tradicion paganonan aki? Bijbel Yeremias 10: 1-2 : “Scucha loke Senjor ta bisa na e pueblo di Israel. No sigi

e custumbernan di e paganonan y no tene miedo di e senjalnan di Cielo, cu nan ta spanta boso.” Bijbel Mateo 15: 3: “Y bosonan Hesus ta bisa: Pakiko boso ta kibra un Mandamento di Dios, den nomber di boso tradicionnan?” Bijbel Mateo 15: 8-9: “E pueblo aki ta honra Mi cu nan boca, pero nan curason ta lew di Mi. E adoracion cu nan ta haci pa Mi, no ta sirbi pa nada. Y nan ensenjansa no ta nada mas cu tradicion di hende.” Bijbel Hacobo 4: 4-5: “Hendenan infiel! Boso no sa cu amistad cu mundo ta significa, enemigo cu Dios? Esun cu kier bira amigo di mundo, ta bira enemigo di Dios! Boso ta kere cu ta pornada Scritura ta bisa: Dios kier e spirito cu E’l a pone den boso, p’E so.” Bijbel Hebreonan 10: 26-27: “Si nos a haci pikanan boluntariamente despues di a conoce e berdad di Dios, anto no tin ningun sacrificio mas pa kita nos pikanan. Sino solamente un teribel huicio y un candela ardiente cu lo devora esnan rebelde.” Bijbel 2 Corinthionan 6: 14-18: “No sera amistad cu hende cu no ta creyente. Kiko santidad tin di haci cu maldad? Kiko lus tin di haci cu scuridad? No por tin harmonia entre Cristo y satanas. Kiko un creyente tin di comun cu un incredulo? E tempel di Dios no tin nada di haci cu diosnan falso y anos ta e Tempel di Dios bibo. Escritura ta bisa: Lo Mi biba den nan y lo Mi anda mei mei di nan. Lo Mi ta nan Dios y nan lo ta Mi pueblo. Pesey, sali for di mei mei di nan y tene boso lew for di nan, Senjor ta bisa”. Seferino Tromp Mensahero di Dios. Koyari 13-D tel. 5931157 / 5870048 ID. 57.11.22.40

PUEBLO A H HAÑA SU PEN BEK

Pa kualkier informacion solodipueblo@gmail.com of

☎ 585-9500


Turn static files into dynamic content formats.

Create a flipbook