Arteria koronario rondó di kurason

marka original. E no ta hasi niun diferensia pa efekto. Por ehèmpel, un remedi pa baha kolesteròl ku ta hopi preskribí ta Crestor. Esaki ta e marka komersial. E supstansia aktivo ta rosuvastatina. Sinembargo, riba merkado tin remedi genériko ku e supstansia aktivo rosuvastatina ku e mesun efekto. Riba e kahita, bo ta mira e nòmber Rosuvastatine e ora ei. E materia di reyeno i supstansia pa mara den remedi genériko por ta otro si for di esnan den remedi komersial i esakinan por kondusí tin biaha na alergia òf emishon diferente di e supstansia aktivo.

Tipo di remedi

Pa malesa kardiako i vaskular ta preskribí diferente tipo di remedi: • medikashon antikuahalante (diluyente di sanger); • bètablòkiadó; • bahadó di kolesteròl; • medikashon ku ta baha preshon di sanger; • remedi pa hancha vaso.

Algun ehèmpel di supstansianan funshonal kontra kuahamentu di sanger ta ásido asetilsalisíliko (marka komersial Aspirin òf ASA), tisagrelor (marka komersial Brilinta), klopidogrel (marka komersial Plavix), warfarina i supstansia antikuahalante oral nobo (NOAC’s). Dependiendo di bo situashon i malesa, dòkter por preskribí diferente tipo di remedi kontra kuahamentu di sanger. Tin biaha diferente pareu. Hopi biaha ta preskribí Aspirin i Brilinta dirèkt despues di un infarto di kurason kaminda a dòter òf kateterisá. Den mi kaso tambe esei a sosodé, ke men a preskribí mi tur dos. Asido asetilsalisíliko òf aspirina ta sòru pa bo sanger no mara huntu fásilmente. Dor di esaki, bo tin ménos chèns riba un stòlmente di sanger (trombosis). Dor di bebe ásido asetilsalisíliko tur dia, bo ta redusí e chèns pa un infarto di kurason ripití su mes. Ke men, mayoria biaha lo bo mester keda bebe esaki pa restu di bo bida. Hopi biaha ta preskribí e otro supstansia aktivo, ticagrelor (Brilinta), ora ku bo ta idòter òf ikateterisá. E ta prevení ku e stènt ta sera ku plak. Mayoria biaha bo ta haña e remedi akí pa un máksimo di un aña. Seis luna largu mi mester a uza Brilinta, pasó mi ta ikateterisá pero no idòter. Tin diferente bètablòkiadó riba merkado. E remedinan akí ta sòru pa bo kurason bati mas trankil i pa e múskulo di kurason kontraé ménos fuerte. Dor di esaki bo kurason ta bira ménos kargá i ta uza ménos oksígeno. Esaki por ta un stimulante pa e rekuperashon despues di un infarto di kurason. Un retraso di e sla di kurason ta prevení defisiensia di ritmo kardiako i ta baha preshon di sanger. P’esei bètablòkiadó parsialmente tambe ta kai bou di remedi pa baha preshon di sanger. A preskribí mi un bètablòkiadó ku e supstansia aktivo metoprolol. Markanan komersial di esaki ta Betaloc Zok i Selokeen. Remedi pa baha kolesteròl (inkluso statina) ta baha e kantidat di vèt den sanger, manera kolesteròl, i ta redusí kalsifikashon di ardu. Nan ta redusí strès riba e murayanan di vaso di sanger, redusí infekshon i stabilisá plak. Dor di esaki nan ta traha di forma preventivo tambe. Nan ta baha e rísiko riba ripitishon di un atake di kurason. A preskribí mi un remedi pa baha kolesteròl ku e supstansia aktivo rosuvastatina (marka komersial Crestor). Pa baha bo preshon di sanger, ta uza entre otro frenadónanACE, kalsio antagonista, frenadónan-AT2 (angiotensina II-antagonista di reseptor òf AIIRA), diuretika (tablèt di uriná) i ARNi (spesial pa atake kardiako). Tin biaha bo ta haña un kombinashon di bahadónan di preshon di sanger. E remedinan akí ta baha preshon di sanger i ta mehorá kondishon di e múskulo di kurason loke ta pone ku e forsa di pòmp di bo kurason ta mehorá. Estudionan a demostrá ku hende ku, despues di un infarto di kurason, a kuminsá uza remedi pa baha preshon di sanger, tin ménos chèns pa haña un atake di kurason òf pa fayesé di un malesa di kurason. Mayoria biaha, bo ta haña e remedi akí pa hinter

bo bida. Ami ta uza un frenadó ACE ku e supstansia aktivo lisinopril (marka komersial Zestril). Pa hancha e vasonan di sanger, spesialmente serka hende muhé ku tin molèster di biramentu smal di e vasonan chikí di sanger rondó di kurason, ta preskribí nitrato hopi biaha. Un ehèmpel di esaki ta mononitrato di isosorbida. Ta bende esaki bou di diferente marka komersial. Finalmente, hopi biaha tambe, banda di (un kombinashon di) e remedinan ariba menshoná, bo ta haña un frenadó di ásido di stoma pa evitá ku kehonan di stoma por surgi ora bo ta uza remedi ku por okashoná daño na stoma. Serka mi, sinembargo, esaki no tabata nesesario i mi tabatin mag di stòp di uz’é despues di un par di luna di e kardiólogo.

Efekto sekundario

Tur remedi tin efekto sekundario. Esakinan por ta mas òf ménos serio òf molestioso i ta indiká tur esakinan den e papel di instrukshon. No ta tur hende ta eksperensiá e mesun efektonan sekundario òf ku e mesun intensidat. For di investigashon a sali na kla sí ku 60 porshentu di hende muhé ta eksperensiá efektonan sekundario di remedi ku mas frekuensia ku hende hòmber. Ta bon pa bo realisá ku bo ta bebe e remedi pa e efekto (di kua lo bo no ripará nada direktamente) i no pa e efekto sekundario (ku hopi biaha bo tin molèster direkto di dje sí). Meta di e remedinan ta pa evitá futuro komplikashonnan. E efekto sekundario di keda sin uza e remedinan ta un siguiente insidente kardiako manera un infarto di kurason òf fayo di kurason! Un efekto sekundario konosí di medikashon antikuahalante ta ku e ta okashoná sangramentu (bou di kueru) i ku bo por haña plèki blou di dje si bo stot bo kurpa kontra algu. Si bo ta kateterisá òf dòter via bo pòls tambe bo por haña un man blou-püs. Inyekshon den bo barika, ku bo por risibí den hospital riba e promé dia despues di un infarto di kurason, tambe ta kousa plèki blou mesora. Esaki no ta kousa daño, pero e ta mustra fastioso. Semper mi tabata haña plèki blou hopi lihé, pero awor mi ta haña plèki püs mes grandi ku un kasuela ora mi kai. I ta dura simannan largu promé ku nan kita. Ke men si bo ta uza diluyente di sanger, bo mester wak bon unda bo ta kana, pa bo no kai òf stot bo kurpa. Purba di evitá aktividatnan di hopi impakto òf aktividatnan kaminda e chèns riba kaimentu ta grandi, manera deportenan di kontakto, paintball òf korementu riba un tereno desigual. Si e plèkinan blou bira realmente di mas, bo por pidi e dòkter ku ta atendé ku bo, pa preskribí un krema hidrófilo. Por ehèmpel Hirudoid (marka komersial) ku e supstansia aktivo mukopolisakaridopolisulfato. Aspirina tambe por tin efekto sekundario fèrfelu. Banda di e echo ku, spesialmente na edat mas avansá, e por kousa hopi sangramentu, kasi 50 porshentu di hende ku ta bebe aspirina diariamente, ta haña keho di stoma. P’esei semper bo mester bebe aspirina huntu ku kuminda i no gewon asina riba stoma bashí. Hopi biaha, frenadónan ACE tin komo efekto sekundario fèrfelu, problema ku tosamentu, spesialmente serka hende muhé. Efektonan sekundario di remedi pa baha kolesteròl manera statina ta hopi komun (den mas ku 25 porshentu di kaso). E efektonan sekundario di mas komun ta doló muskular den pia i kansansio. Hende muhé tin mas molèster di esaki ku hende hòmber. Por tin interakshon tambe ku otro remedi, loke ta pone e efektonan sekundario bira mas pió. Sinembargo, no ta prudente pa stòp di bebe e statinanan. For di investigashon a sali na kla ku stòpmentu trempan ta resultá den un oumento di infarto di kurason. E statina di mas efektivo ku ménos efekto sekundario pa hende muhé ta rosuvastatina. Nan a preskribí rosuvastatina pa mi mes tambe (1 biaha pa dia) i mi no tin niun tiki molèster di e efektonan sekundario menshoná. Si bo eksperensiá efektonan sekundario tòg, e ora ei bo dòkter lo por baha e dosifikashon na kada pasa un dia òf te hasta dos biaha pa siman. Semper mèldu efektonan sekundario di remedi mesora serka e dòkter ku ta tratabo! No stòp di bebe remedi riba bo mes

i no adaptá e dosifikashon tampoko independientemente. Mayoria biaha, dòkter por preskribí un remedi alternativo òf adaptá e dosifikashon. Tin biaha e efekto sekundario ta kita di mes òf esaki ta keda okashoná dor di un kombinashon di nutrishon òf alkohòl. Hopi biaha ta dura un tiki, promé ku bo haña un bon kombinashon di (tipo di) remedi ku ta bai mihó ku bo. Pero bo tin derechi riba esei, ke men keda insistí serka bo dòkter.

Jacqueline, Profeshonal Sertifiká di Rehabilitashon Kardiako: “Un di e hende muhénan ku ta hasi cardiofitness serka mi a haña un atake di kurason un par di aña pasá. E kardiólogo a preskribí un statina ku e mester a sigui bebe. Su kasá tambe tabatin molèster di un nivel di kolesteròl haltu, pues huntu nan a disidí di hasi uzo di un sistema natural pa kambia esaki. Mainta, nan tur dos tabata bebe un glas di djus konsistiendo di kònkòmber, sèldu i sopropó. I enbèrdat nan tur dos su nivel di kolesteròl a baha. Pero ora el a bisami ku pa e motibu akí e por a stòp ku bebementu di e statina, mi a bolbe splik’é ku e statina no ta solamente pa baha e nivel di kolesteròl. E tin hustamente un funshon preventivo tambe. E ta protehá e parti paden di bo vasonan di sanger kontra infekshon, loke ta presedé kalsifikashon di ardu. Dor di esaki bo ta redusí e rísiko pa haña un siguiente infarto. Un djus realmente no por remplasá tur esaki!”

Medikashon i grapefruit

Líkido di grapefruit ta kontené supstansianan ku ta sòru pa e deskomposishon di hopi remedi den bo kurpa keda sin funshoná korektamente. E ora ei e remedi lo por akumulá di mas den bo kurpa i e chèns pa efekto sekundario ta mas grandi. Esaki no ta konta pa tur otro fruta sítriko. Ke men, preferiblemente no uza (líkido di) grapefruit si bo ta bebe remedi.

Suplemento

Si bo ta kome bon i variá, bo no tin mester di suplemento. Nunka suplemento lo no por remplasá bo remedinan regular! Uzo króniko di sierto vitamina por ta te hasta dañoso. I por tin interakshon entre e remedinan ku bo mester bebe i sierto suplemento. P’esei ta bon semper pa bo konsultá ku bo kardiólogo òf dòkter ku ta tratabo promé ku bo kuminsá bebe suplemento. Pa hende muhé riba 50 aña ta rekomendá solamente uzo di vitamina D, spesialmente pa wesu.