PUMANGALAWA SA NAT 12

Pinatunayan ng Las Piñas City National Senior High School - Talon Dos Campus ang kanilang kahusayan sa akademya matapos nilang makuha ang pangalawang ranggo sa National Achievement Test for Grade 12 learners o NAT12 para sa School Year 2023-2024, na isinagawa sa ilalim ng City Schools Division of Las Piñas.

Base sa resulta, nakamit ng paaralan ang kamangha-manghang Mean Performance Score (MPS) na 65.05% na kinuha ng 74 na mag-aaral kabilang sa NAT Takers ay ang parehong pampubliko at pribadong paaralan ng lungsod. Ang tagumpay na ito ay isang patunay ng mahusay na sistema ng edukasyon sa Talon Dos Campus. Ipinapakita ng mataas na MPS ng paaralan ang matibay na pundasyon ng literasiya at numerasiya na ipinasa-pasa sa pamamagitan ng masisipag na guro, pamunuan, at mag-aaral na patuloy na nagsusumikap upang mapabuti ang kalidad ng kanilang pagkatuto.

Tinutukoy ng tagumpay na ito ang pagtutok ng mga guro sa pagpapalakas ng kanilang mga pamamaraan sa pagtuturo, at ang suporta ng pamunuan na nagiging daan upang matulungan ang bawat mag-aaral na maabot ang kanilang potensyal.

Hindi ito ang unang pagkakataon na nagkaroon ng ganitong uri ng pagkilala ang Talon Dos Campus. Sa nakaraang taon ng NAT12, napanatili ng paaralan ang mataas na ranggo, na nagsisilbing patunay sa patuloy na dedikasyon at kasigasigan ng mga guro na naglalayon na matutukan ang mga pangangailangan ng bawat mag-aaral at tiyakin ang kanilang kahandaan para sa kanilang mga susunod na hakbang sa buhay, maging sa kolehiyo o sa mga propesyonal na larangan.

Ang pagkilalang ito ay isang malaking hakbang para sa buong paaralan, hindi lamang bilang isang tagumpay na nagbigay ng karangalan, kundi bilang isang inspirasyon sa mga mag-aaral at guro. Ipinapaalala nito na ang lahat ng sakripisyo at pagsusumikap ay may kaakibat na tagumpay, at ang bawat hakbang na ginagawa nila patungo sa kanilang mga layunin ay nagbubunga ng positibong resulta.

:Marianne Lhevie Siscon

Sa kauna-unahang pagsabak, matagumpay na kinatawan ng Las Piñas City National Senior High School - Talon Dos Campus (LPCNSHS-TDC) ang kanilang paaralan sa 29th Annual Biosciences Quiz Bee na ginanap noong Nobyembre 23, 2024 sa Unibersidad ng PilipinasDiliman. Ang patimpalak ay inorganisa ng Molecular Biology and Biotechnology Society at dinaluhan ng mga mag-aaral mula sa iba’t ibang paaralan ng bansa. Ang siyam na kalahok na sina Robert Inigo Estrellado, Zanjo Diwatin,Gian Gabriel Borromeo, Blesslie Balerite, Annie Grace Alindogan, Joey Marie Lopez, Aldrin Magpatoc, Marc Alwyn Firme, at Karyn Beadine Villapando, pawang mga nasa ika-12 baitang, ay sumailalim sa masusing pagsasanay sa ilalim ng gabay nina G. Reian Glenn Batidio at Gng. Louise Ferrer. Kasama sa kanilang paghahanda ang review sessions, mock quizzes, at talakayan sa Molecular Biology at Biotechnology. Bagama’t hindi nagwagi, naipamalas ng mga kalahok ang dedikasyon at husay sa agham. Ang kanilang partisipasyon ay nagsilbing inspirasyon sa kanilang paaralan at komunidad.

Ang patimpalak ay naglalayong itaguyod ang pagpapahalaga sa agham sa kabataan sa pamamagitan ng pagtuturo ng kritikal na pag-iisip at kaalaman sa biosciences.

Talonians, nagpasiklab ng husay sa UP Balangay 2024

Wagi ang apat na mag-aaral mula sa Las Piñas City National Senior High School - Talon Dos Campus sa Balangay 2024: PH’s Inside Out na isinagawa noong Nobyembre 23, 2024, sa University of the Philippines - Diliman na inorganisa ng UP Association of Political Science Majors. Inuwi ni Sandra Nicolette Manimbao, ang ikatlong gantimpala sa kategoryang Argumentative Essay Competition. Samantala, nakuha ng grupo nina Heart Majesty Emata, Ryan Vher Lacson, at Chaunzy Jae Galang, ang ikatlong gantimpala sa kategoryang Political Science Research Proposal & Defense. Kasama rin ng mga kalahok ang grupo nina Chris Lorenz Sace, Paul Jhon Ting, at Jilian Kyle Dela Cruz na siyang kalahok sa Quiz Bowl Competition at Alliyah Margaret Alquicer sa Extemporaneous Speech Competition. Layunin ng organisasyon, na itaguyod ang aktibong pakikilahok sa pulitika at sama-samang pagkilos sa pamamagitan ng pagbibigay ng impormasyon sa mga kabataan tungkol sa pambansang at internasyonal na mga banta sa seguridad ng Pilipinas. Sa pamamagitan ng pagsali sa ganitong mga kompetisyon, namumulat ang kabataan sa larangan ng agham pampolitika. Bukod dito, naipapamalas ang husay sa pagsusulat at pananaliksik na ipinagmamalaki ng paaralan, habang patuloy na pinagyayaman ang kaalaman tungo sa pagsusulong ng pambansang kapakanan.

Kampus Ekspress

FEU Alabang, ipinagkaloob ang kahon-kahong libro sa TDC

Sa pangunguna ng Library at Community Extension and Services Unit (CESU) ng FEU Alabang, matagumpay na naipagkaloob ang mga kahon ng aklat sa Las Piñas City National Senior High School - Talon Dos Campus.