CUCION PA AÑA 2023 NA MINISTER DI CULTURA MADURO

Ta reintroduci proyecto chikito, ta hiba les di musica den bario, ta brinda sosten pa crea material cultural educativo pa scol, ta facilita bishita escolar cultural educativo, ta sostene celebracionnan nacional y ta presenta iniciativa cu ta cubri necesidad cultural

E siman aki Minister di Cultura Maduro a reuni cu e directiva di UNOCA pa asina haya un presentacion di e Plan di Ehecucion pa aña 2023. Directora sra. Ray-anne Hernandez a duna un splicacion di e proyectonan cu lo conta cu e sosten di UNOCA den aña 2023.

UNOCA ta dispone di 917 mil florin pa aporta na e dominionan cultural manera stipula pa UNESCO den proyectonan cu tin di haber cu, patrimonio cultural y natural, actuacion y celebracion, arte visual y artesania, publicacion y media, audiovisual y medio interactivo, y diseño y servicio creativo.

Banda di esaki den aña 2023

UNOCA ta reintroduci proyecto chikito, ta hiba les di musica y creatividad pa tur edad den bario, ta brinda sosten pa crea material educativo pa scol y ta facilita bishita escolar cultural educativo na museo y sitionan historico. UNOCA ta keda sostene nos celebracionnan nacional y lo presenta iniciativa basa riba necesidad den comunidad.

UNOCA ta reintroduci ‘Proyecto Chikito’

Den luna di juli, UNOCA lo reintroduci e concepto di “Proyecto Chikito’ pa asina por aproba proyectonan di menos di 5 mil florin na un manera mas lihe. Denter di poco UNOCA lo haci e procedura pa aplica pa fondo pa proyecto chikito conoci na publico.

UNOCA ta hiba les di musica y creatividad pa tur edad den bario

Den cooperacion cu Scol di Musica Rufo Wever y CEDE Aruba, UNOCA kier hiba les di musica y creatividad pa tur edad mas cerca posibel di e ciudadano den su bario. E necesidad pa e tipo di lesnan aki ta existi y UNOCA lo kier aporta na e proyectonan aki cu un tempo a wordo realisa den proyectonan manera Desaroyo Comunitario y FDEC.

UNOCA ta brinda sosten pa crea material educativo cultural pa scol

UNOCA lo traha den cooperacion cu Bibloteca Nacional di Aruba, Archivo Nacional Aruba, Museo Arkeologico Nacional di Aruba y Departamento di Cultura, riba material educativo riba diferente aspectonan cultural cu por wordo presenta na scol mes of den forma di tayer, curso, evento of presentacionnan. Den aña 2022, UNOCA a percura pa

20 profesional den e ramo di educacion cultural por a sigui e curso ‘Educacion Cultural Digital’. Den aña 2023, UNOCA lo kier sigui traha cu e expertonan aki pa asina provee nos comunidad, specialmente nos muchanan di scol cu enseñansa riba e cultura di nos Pais Aruba.

UNOCA ta brinda sosten pa bishita escolar cultural educativo na museo y sitio historico UNOCA lo brinda oportunidad na scolnan/klasnan pa haci bishitanan cultural educativo na luganan manera: Archivo Nacional, Museo Arkeologico, Parke Arikok, Ayo Rock Formation, Museo Industrial….etc. Pa e bishitanan aki UNOCA lo percura pa cubri gastonan di transporte pa asina por facilita e bishitanan y duna nos hobennan e oportunidad di biba nos cultura mas di cerca.

UNOCA ta keda sostene nos celebracionnan nacional

Den aña 2023 UNOCA lo sigui traha hunto cu Ministerio di Cultura y Comision Celebra- cion Dianan Nacional, CCDN pa asina por fortifica e actividadnan di conmemoracion y celebracion di Aruba su dianan y fiestanan nacional. Por ehempel, UNOCA ta preparando un programa special na television pa Dia di San Juan y CCDN lo percura pa ‘Kibra Coco’ edicion San Juan pa asina Pueblo en general y nos hobennan en particular por ta bon informa di e celebracion di Dia di San Juan como un tradicion di nos Pais.

UNOCA ta presenta iniciativa basa riba necesidad den comunidad

Por ultimo por informa cu UNOCA lo haci algun encuesta pa midi e necesidad y lo traha pa brinda solucion pa nan. Un ehempel ta ‘www.coleccion.aw’ cu ta un proyecto haci hunto cu Archivo Nacional y Biblioteca Nacional cu a nace for di e necesidad pa Pueblo por tin aceso mas facil na informacion historico di nos Pais. Na september 2023 lo lansa e proyecto aki oficialmente.