2 UN
EDITORIAL
Djabièrnè 24 Mei 2013
Editorial Konspirashon pa korupshon!
E
gobièrnu aktual i su mandatarionan i esnan ku ta keda nombrá pa asistí den diferente puestonan na NV’s nan i Fundashonnan di gobièrnu, parse ku ta esnan ku mas ta metí den korupshon ku kualke otro hende. Hinter e kadena gubernamental ta keda korumpí pa aktonan di favoritismo, nepotismo, i rasonnan polítiko partidista. Si un mandatario òf polítiko mester di logra algu, e no ta kana e kaminda nan normal segun regla i lei, pero ta pasa di un via apnormal i keda kla mas lihé ku tur hende. E trahadó ku ta biba bou di un kultura di miedu no ta protestá i ta sukumbí pa aktonan leal, basta ku un mandatario pidi pa esaki. Aparentemente e gabinete aktual i e koalishon ku ta sostené a proklamá un guera kontra di korupshon, djis pa nan mes bini ku nan propio sistema di korupshon.”Estilo quitate tu pa ponerme yo”.Kon por ta ku e mesun persona nan, i asta lidernan polítiko ku a kore kampaña pa mustra ku e otro polítikonan ta korupto i ladron, awor ku nan ta sinta ta demostrá ku ta nan ta e ladron i korupto nan? Wak bon ta ken ta keda nombra e mesun tipo nan ku tabata den NV’s nan di gobièrnu i ku a malversá plaka di pueblo na nan antoho. Ku biahenan di plaser i hasi negoshi ku plaka di pueblo pa nan propio benefisio. Kier men e gobièrnu aktual ta aprobá e tipo di konosementu nan aki, ya ku nan sa kaba ta kon tin ku malversá pa benefisiá e polítikonan aktual. Si bèrdat Kòrsou kier kombatí korupshon, anto nos mester marka un sirkulo rondó di nos mes, anto kuminsá ku tur hende ku tin den e sirkulo ei. KU hende por orkestá i konspirá korupshon di un
manera sutil i diabóliko, manera ta pasando den Refineria d Kòrsou, anto nos mester komprondé ku e hendenan aki no tin kunes ku Kòrsou mes. Kiko ta pone ku e kandidatonan kapas, ku tur konosementu pa manehá e Refineria no por haña e puesto aki? E tipo di kosnan asina aki mester pone ku defuntu Wiels ta bòltu den su graf.