Ag Teacht Ar Ais Níos Láidre

Ag Teacht Ar Ais Níos Láidre

Ó thús na paindéime Covid-19, rinne an tUachtarán Ó hUigínn iarracht díospóireacht phoiblí níos mó a chur chun cinn ar na leochaileachtaí inár gcórais náisiúnta agus idirnáisiúnta a mhéadaigh tionchar scaipeadh an víris.

I mí Aibreáin, d’fhoilsigh an tUachtarán roinnt alt inar áitigh sé go raibh an freagra ar phaindéim Covid-19 ag brath go mór ar ghníomh Stáit, agus gur cheart go gcuirfeadh an meas athnuaite seo ar ról an Stáit bonn eolais faoi ní hamháin freagairtí gearrthéarmacha ar an bpaindéim ach freisin faoi na straitéisí fadtéarmacha lenár sochaí a athchruthú, agus lenár leochaileachtaí a laghdú don todhchaí.

Dúirt an tUachtarán “mar a fuaireamar amach, nach ráthaíocht d’athchóiriú buan é bainistíocht rathúil géarchéime. Mar sin, ní mór dúinn an eagna saothraithe go maith ó ghéarchéim Covid-19 a leabú in obair láidir scolártha, i mbeartas agus i gcreataí institiúideacha.”

D’áitigh an tUachtarán gur léirigh paindéim Covid-19 an chaoi a bhfuil an córas eacnamaíochta domhanda go bunúsach faoi réir géarchéimeanna agus teipeanna cascáideacha, agus go bhfuil gá le cuir chuige chórasacha nua agus smaointeoireacht eacnamaíoch chun aghaidh a thabhairt ar na fadhbanna seo.

Ag príomhóráid chuig an OECD, dúirt an tUachtarán “go intuigthe, go ndíríonn a lán tráchtaireachta eacnamaíochta reatha ar chostas na paindéime. Ach ní mór dúinn machnamh a dhéanamh freisin ar na laigí córasacha atá nochtaithe aici maidir leis an gcaoi a n-eagraímid ár sochaí agus ár ngeilleagar.”

Ba cheart do shaoránaigh agus do rialtais ceachtanna ón ngéarchéim Covid-19 a úsáid mar dheis chun dul i ngleic leis an neamhionannas atá ag fás agus le damáiste don chomhshaol, agus bogadh ar shiúl ó fhócas neamhchabhrach ar fhás eacnamaíoch mar chroí-mhéadracht de rath eacnamaíoch. Mar thoradh ar fhócas cúng ar fhás OTI tá tomhaltas, infheistíocht, caiteachas rialtais agus cothromaíocht na trádála “calabraithe ionas go n-uasmhéadaítear an fás eacnamaíoch ar cibé costas ar chomhtháthú sóisialta agus gan aird chuí a thabhairt ar neamhionannas nó ar éifeachtaí éiceolaíocha dochracha.”

“Cé chomh haiféalach is atá sé gur paindéim inar cailleadh na mílte beatha i mórán tíortha a bhí ina cúis le meas forleathan a bhunú, nó a athmhúscailt, in obair sa réimse poiblí, ar an earnáil phoiblí agus ar an tábhacht le leas an phobail sa gheilleagar - agus, maidir lenár dtodhchaí roinnte, cumas neamhurchóideach agus claochlaitheach an stáit.”

I mí Dheireadh Fómhair 2020, thug an tUachtarán Ó hUigínn aitheasc chuig comhdháil an OECD ‘Confronting Planetary Emergencies’

I mí Dheireadh Fómhair, labhair an tUachtarán Ó hUigínn faoin ngá le léargas eolaíoch a úsáid chun leasa na daonnachta iomláine.

Ag príomhóráid chuig comhdháil bhliantúil Innealtóirí Éireann ar líne, d’iarr an tUachtarán ar innealtóirí, ceannairí gnó agus lucht déanta beartas gníomhú go práinneach maidir le hathrú aeráide agus oibriú le pobail chun aistriú go sochaí atá níos athléimní. Leag an tUachtarán béim ar a thábhachtaí atá sé na buntáistí a bhaineann le fionnachtain eolaíoch a roinnt, lena n-áirítear na vacsaíní Covid-19, go cothrom i measc náisiún agus laistigh de náisiúin.

D’iarr an tUachtarán ar Stát na hÉireann “ceannaireacht a thabhairt le dea-shampla” sa chath in aghaidh athrú aeráide, agus ról ceannasach a imirt “má tá creidiúnacht ar bith le bheith aige, nó aon dóchas réalaíoch a shaoránaigh a thabhairt leis ar an turas deacair chuig a todhchaí dícharbónaithe.” D’áitigh an tUachtarán go bhfuil gá le “athrú radacach paraidíme”, ag déanamh naisc níos mó idir éiceolaíocht, eacnamaíocht agus an tsochaí.

D’áitigh an tUachtarán Ó hUigínn i rith na bliana, in ainneoin thromchúis na géarchéime Covid-19, go bhfuil síolta dóchais ann don todhchaí. Eascraíonn an dóchas seo go mór as an dlúthpháirtíocht agus as an gcineáltas a bhí le feiceáil i bhfreagraí daoine ar an staid nár tharla riamh roimhe, ach freisin ón gclisteacht a bhí le feiceáil, de réir mar a fuair daoine bealaí nua chun oibriú, sóisialú agus cúram a thabhairt dá chéile.

Tá ár ndóchas don todhchaí inár gcumas agus inár dtoilteanas an mothú dlúthpháirtíochta seo a spreagadh, agus ceachtanna a bhaint as ár n-eispéireas, ar an gcaoi ar thugamar aghaidh ar an víreas agus ar an gcaoi ar tháinig ár sochaithe chomh leochaileach dá thionchair. I bhfianaise na paindéime is léir go bhfuil práinn leis an ngá aghaidh a thabhairt ar na lochtanna atá ann inár múnla eacnamaíoch reatha, agus glacadh le paraidím nua, bunaithe ar uilíocht, inbhuanaitheacht agus comhionannas.

Mar a dúirt an tUachtarán i mí na Nollag 2020: “As géarchéim den sórt sin, tugtar deis uair amháin sa ghlúin dúinn, b’fhéidir, rudaí a dhéanamh ar bhealach níos fearr, glacadh le paraidím nua bheatha lena chéile, maidir le hobair agus maireachtáil, agus leis an domhan féin, agus í a thabhairt i gcrích; nasc athnuaite agus níos sláintiúla den tsochaí, den gheilleagar inbhuanaithe agus den éiceolaíocht.”

An tUachtarán Ó hUigínn ag labhairt ag comhdháil fhíorúil