Xixón avanza de manera improvisada y poco consciente hacia la década qu’entra. Los años de Gobiernu de la derecha, alloñaos de proyectar un modelu de futuru pa la ciudá, que nos próximos diez años tien quien a reinventase, actuaron pente medies d’impulsos, munches veces fuxíos del análisis y la reflexón,que los sos resultados, ensin conexón ente sí, nun consiguieron dar rempuesta a los retos que los nuevos años venti nos planteen. Retos que son económicos, con una parte significativa de la nuestra estructura básica amenaza poles polítiques de descarbonización esprés. Retos que son físicos, con unes infraestructures indispensables pal nuestru desarrollu económicu que los sos retrasos, cuando non paralizaciones, caltienen a la ciudá desconectada. Retos que son sociales y demográficos, con una pirámide poblacional particularmente avieyada y unos servicios públicos que nun supieron adaptase no sectorial y que recularon na so implantación territorial demientres la desigualdá ente barrios del Este y del Oeste se consolída na ciudá. Retos que son medioambientales, con contaminación marítima y atmosférica qu’incide na salú de les persones. Y retos que son xeneracionales, acusaos pol desemplegu, la precariedá y les migraciones, con una pérdida de población mozo nos últimos quince años qu’amenacen la reproducción social, la solidaridá interxeneracional y l’equilibriu territorial de la nuestra ciudá. Pero al empar, Xixón tien una identidá y una conciencia colectives, non exentes de contradicciones, construyíes a partir de les lluches del so movimientu obreru demientres l’últimu sieglu y mediu, que, coles sos organizaciones polítiques, sindicales, sociales y vecinales como ferramientes, permitieron conformar una ciudá construyida sobre los principios y valores de progresu, igualdá y xusticia social. El Xixón nel que vivimos anguaño foi pensáu, peleáu y conquistáu nós años 80 y 90 pola izquierda política y social. Daquelles décades y los años que vinieren darréu ye’l modelu de concentración social que contribuyó a la creación d’emplegu con derechos; les planificaciones urbanístiques que reorientaron la ciudá hacia la mar, recuperando espacios verdes pa les y los xixoneses y diversificando’l so texíu productivu; les empreses públiques que garantizaron la prestación de servicios de calidá dende’l respetu a los derechos llaborales de les y los trabayadores; les polítiques sociales qu’apostaron pola inclusión y la equidá como prioridaes nel nuestru modelu colectivu de comunidá; los proyectos qu’universalizaron l’accesu a la educación y la cultura, col asturianismu en munchos casos como exa vertebradora; o les polítiques d’igualdá coles que construyimos una ciudá mas xusta. Xixón ye güei Xixón porque quisimos que lo fuera y ficímoslo posible.
Sicasí, el sostenimientu d’estes polítiques, que definen el nuesu modelu de convivencia, ta en riesgu. Lo pensao, peleao y conquistao mientres les décades pasaes tien qu’adaptase reorientándose hacia los retos actuales que tenemos como colectividá. Xixón cambió, y nos tenemos que ser capaces de reinventala. Esto quier decir que la década qu’entra Xixón tien qu’algamar hacia un modelu productivu que combine les industries tradicionales, que van siguir siendo necesaries, cola industria del sieglu XXI, basada na anovación y les tecnoloxíes llimpies. El modelu de la Milla del conocimientu va tener que reproducise y adaptase a sectores productivos nuevos venceyaos a la mar, al mediu ambiente, la salú y la cultura. Quier dicir tamién que nos próximos diez años van tener que tar operatives les grandes infraestructures loxístiques y de comunicación que nos permitan conectar toles nuestres potencialidaes económiques, comerciales y culturales con Europa al traviés del corredor Atlánticu. La superación definitiva de la barrera ferroviaria y la puesta en marcha del Metrotrén tien que ser la exa dende la que s’articule un modelu nuevu de movilidá sostenible non solo la ciudá, sinón nel conxuntu del Área Central d’Asturies. Esto quier dicir qu’en 2030 Xixón tien que cuntar con unes polítiques de nueva xeneración qu’integren tolos programes d’atención a les persones y funcionen como verdaderes ferramientes de redistribución de los recursos, contribuyendo a equilibrar les desigualdaes que s’acrecentaron nos últimos años. Quier dicir que nesta década Xixón va tener qu’avanzar hacia un modelu nuevu de consumu nel que la sostenibilidá de los nuestros recursos y la preservación del nuestru entornu natural faigan xirar la rueda con eficiencia. Quier dicir tamién que nos próximos diez años Xixón va tener que ser quien a algamar un pactu cola mocedá: xenerar oportunidaes que permitan a les xeneraciones moces desenvolver na nuestra ciudá el so proyectu de vida tien que ser una prioridá ensin sida na axenda política y social. A la fin, Xixón va tener que reinventase nesta década, y pa que lo faiga manteniendo los valores del progresu, igualdá y xusticia social que caracterizaron el nuesu modelu de convivencia, güei damos un pasu alantre: porque queremos ser la izquiera que suma, la que recueye’l trabayu políticu de Izquierda Xunida y lu proyecta con puxu decidíu hacia’l futuru. Esti ye’l sentíu de Xixón pola Izquierda: una coalición que ye más qu’una candidatura; un proyectu, un compromisu, que suma a Izquierda Unida y a Izquierda Asturiana y que suma persones independientes que son referentes en delles estayes sociales y profesionales de la ciudá. Y que lo fai pa siguir sumando y buscar consensos más allá d’ella mesma. Pa construir mayoríes sociales y polítiques d’izquierdes que nos dexen pensar, bregar y conquistar el Xixón de la década qu’entra: un Xixón dinámicu y sostenible, inclusivu, participativu; un Xixón de los y les ciudadanes, sanu, creativu, con memoria; un Xixón abiertu, tolerante, ensin duda nenguna, feminista. Un Xixón que camude la política y la forma de na que les y los xixoneses nos rellacionemos con ella. Un Xixón, a la fin, que mire pal futuru y lo faiga con allegría.
¿Y tu, súmeste a un