“ NOVENA “
poesie di
Mauro Marchesan
VOGI DE GUBIA
Me varda un trabacolo derelito piturao de fango cragnoso co' la so forma antiga de canonègo veciao 'l fronteva sto batelo duti i tinpi e i stràtinpi coi alburi driti al vento e la prova rosso gardenal 'l me recorda 'i ani beli cô vevo anche mè la pitura fresca su duto 'l fassame e i vogi verti verso 'l sol cô gero un corcal novelo col piumàgio novo e co' la premura de sbolâ in tel sielo de la vita
desso se vardemo dissestai in tei vogi svodi de la gubia sensa ni lagreme e ni passion mastrussai fra 'sti ani in gionegiòn.
MÀGIO SPIASAO
Me sento oni tanto scassao via del gno vîve comò se fosso un sbàlio o un màgio spiasao o 'l povero Bufulin desmentegao de so mare in te la bugada tebida de un miserando fugher ma son anche un mariner de un batelo sgrelao che 'l à perso oni speransa de vêghe 'l grando mar.
SCHILE
I rimi i s'à sugao a cason e i reùni i xe marsii duti dopo un'ultema intenta lontana za na sentenera de ani sbola fra i groi na cornàcia che la fa de parona su st'isola stràmagiagia indòla che 'l òmo s'à reso vemo dào via duto pe na promessa de ressuression anche la nostra ánema in sganbio de un pugno de schile.
I FANTULINI DE AQUA
De sinisa xe fato 'l universo e de dute le áneme terne tera sùta geremo e senere grisa tornaremo i fantulini mai nati invesse i deventa aqua quela istessa che li varave fati nâsse quela istessa che li à fati negâ i nûa la soto 'l mar comò pissiti felissi e noltri li vegaremo un zorno cô ne sarà perdonagia oni colpa.
L' OSESTA
Xe una povera osesta cagiua in t'un un vaso de vêro che la tenta de vignî fora da quela stràlusente presòn ma la se rebalta e la sbrissa co' le picole sate a 'l infinio e la ricage zo de novo in un zogo crudel comò pol sintîsse na criatura cô 'l distin 'i sùfia contro vento de sventura e 'l mùa le ore sove in t'un dolor xe cussí balole le nostre vite che le canta solo pre un'istae copièn xe 'l cuor de felissitae le se rebalta sensa remission.
LA LIONESSA
Solo sinisa sparsa in te la leca e mussi e lagreme a consimâ la tera ma la lionessa co' la criniera de fogo l'à rugìo sensa paura pre oni ora che 'i a cavao a la vita.
UN PRAO IN MESO 'L PALÚ
In tel raso le molere le par un prao co' la rosada distirao in t'una barena spressiagia de oni false ma co belo che xe 'l palú coi so fiuri in solitae incrosao solo dai vinti e de la nàina che fa 'l mar noltri vemo reditao un suspiro de puisia che sensa capî ninte se femo portâ via una messa de sufragio fistiarà 'l ciosso intra le grule comò n'anema spasemagia che la speta 'l dividerio.
MAN SANCA La bontae la xe trasparente comò un cristal de Slovàcia e lustra de luse d'amor che par del sol na fonte ma la malagrassia in tel mondo la còvola in tanti cuori e i carantani i se mete per tresso comò la lipera in te l'erba se femo benedî co' la man drita cô passa la Madona in prusession ma xe la sanchigna magari cussinò che la fa marameo a duti i santi.
ÁLEGANTE Ingrumo intrighi e stràfanici pre inpinî la casa de zogieli pre cassâ la tristessa che me à dào la povertae ma ciapo su solo álega che dopo un poco la marsirâ e che la cresserà a dismesura comò la gno vogia de amor me par de êsse un sotàgero che'l serca fiuri udurusi e alburi che fa fruti in fondo del mar.
A.Tognon