NADAL
di
Mauro Marchesan
LA NOTE DE SAN NICOLỎ
Sté tinti 'sta note màmuli de no fave becâ in strada, preché xe San Nicolò che’l gira duta la contrada. 'L vescovo de Mira e gran santo de Bari, ‘l va senpre in conpanía de quatro diavuli tamanari. ‘L va a castigâ i matissi e le cossiense vagole, de quî che in 'sto ano i à tirao massa le sagole. Ma se sé stai de sesto comò che Dio comanda, meté un piato spanso de sora la crensa granda. ‘Ndé púo a drumî cuntinti, a sognâ San Nicolò in pase, che doman col novo zorno varé de zugatuli piene le case.
Doman varé de ciuciâ bunbuni e de rosegâ pignoi, pupuloti e stinche grosse e persin pistole de cao-boi. De tanta bona grassia ve licaré i mostaci, cuntinti de 'vê le scarsele sdiònfe de busi e de pestaci.
I DÌ DE LA FESTA
'L inverno 'l porteva la zogia cô passeva in asilo a catane San Nicolò de rosso vistio, co' la mitria in suca e 'na gran barba bianca. 'L vigniva a regalane ore carghe de letissia e caramele incartae de oro. Púo riveva dalongo Nadal coi sovi prufumi de spieransa de mandarini e candeline e coi culuri lustri de le bale 'npicae. La gno casa la gera luminagia e paragia de festa e canti de pasturi del presepio adoranti e de bicierini de vin marsalao. Gera zurni de auguri santi che i vavare durao pre senpre, se la Befana no la se 'vessa portao via le fregole dei dì de la festa, in sganbio de polenta e renghe.
LE STELE DE NADAL
Anche 'sto ano hè fato 'l alboro coi ànzuli e le balete colorae, duto adobao de luse e stele, de fiochi e de picole candele. 'L abeto luminao me ciapa ‘l cuor, fa tanta zogia le steline colorae e le nenie che vien su del vial ne le sere cô se speta Nadal. Le stele xe duti i gno Nadai passai, oniduna xe un ricordo vivo: xe gno pare quela che splende in fianco e xe gno nievo quela piú in là in bianco. Gno suore xe quela vistia de biavo, e gno mare de polvere de oro e duti i nuni e ‘i zii che hè cognossuo i xe là a fâme recordâ che i à vissuo.
NADAL
Cô vigniva la visilia de Nadal gno pare ‘l porteva a casa un abeto, odoroso de pineta, de mustio e brosa, e me e gno suore lo prepareveno pre le feste. ‘I meteveno le candeline, le caramele, la neve finta e le balusse e oni dia pareva eterna comò le scusse. Gno mare la feva un pan dolse, e duti 'nsieme, 'ntorno al spàgher, se speteva ‘l banbin Gesú coi cuori carghi de speransia e amor. Incúo ‘l alboro no lo fasso piú, lo fa le gno criature, preché vol manine picole e un cuor che bate forte forte, pre sintî la musica del Nadal a le porte. Gno pare nol xe piú a 'sto mondo, ‘l alboro xe finto e sensa ‘l savor del bosco, ma volaravo che anche gno fige le recordessa un odor, una zogia, o gargossa che me consúli cô volarè via a Nadal fra la neve e i nuòli.
LA STELA COMETA
A Flaviano `i piaseva mundi `l Nadal. Cô riveva le feste 'l prepareva `l presepio e `l alboro, metendo lusi colorae pre duto `l sogiorno e la mantina de Nadal 'l feva la tola pre vinti de ili. 'L tireva fora piati coi ghirigori de oro, piruni de arzento, bicieri de cristalo e tovagie de pisso. 'Ntonieta la speteva Nadal pe riveghe de novo so marì, che'l rivessa zó de la sufìta coi parangai de lanpadine e i scatuluni de pasturi, de nastri e bale dorae. Ma Flaviano nol podeva tornâ, preché ‘l gera 'ndao via pre senpre da 'sto mondo. Intanto i zurni i passeva, bruti e piuvusi, finché 'na note 'l xe rivao sensa fâ rumor, `l à dismissiao la so femena e `i à dito: 'Sto ano 'Ntonieta, t'hè fato 'na sorpresa, 'l presepio l'hè messo solo pre tu, la su in paradiso. Vien via co' me ! Che 'ndemo in pase.
Xe stao in quela note che se à visto lampezâ in tel sielo de Gravo, fra i nuòli scuri, 'na stela cometa.
I PISSI DE ORO
'Sta note xe 'na note santa fata de gelo e stele luseganti de re e Magi coi turbanti de mularía che canta. Una note de gran festa che porta speranse e disideri fra i populi bianchi e niri. Un augurio a la zente onesta. 'L sielo xe un mar de pissi de oro e duti i pol pescâli: i màmuli co' le fantasie e i corcali. Basta solo 'vê le ale pre rivâ al tesoro. 'L Nadal xe pre dute le criature, de duto 'l mondo e de dute le culture e duti i ha derito a la pase e a un pesse de oro in te le sove case.
MARE, XE DE NOVO NADAL !
Te rivego sentagia in quela tola co' dute le àmie de la Casa Serena, che tu me mustrivi co' orgogio 'l albero pavesao da le inservienti, comò se tu lo 'vissi fato tu a casa tova. E la mantina de Nadal, cô tu descartivi i regali co' maravegia, e tu scantinivi la suca. Comò a dî che no serviva, ché i regali i se fa solo ai fantulini! Te piaseva 'vê 'l alboro e 'l presepio anche se tu stivi sola, senpre co' la speransia che vignissa a catate i to nevudi. Tu cusinivi pignate de 'rusti a la vecia maniera pre un regimento che no varave magnao. E tu te vardivi le luséte che se inpisseva e destueva. Sola. Nel tovo mar de solitae.
Mare, xe de novo Nadal ! E tu no tu son piú de qua. 'Desso che volaravo magnâ 'l tovo 'rosto e vardâ co' tu le luséte che se 'npissa e se destua, posso solo portate in simisterio un segno o una stela. Perdoneme mare, del tenpo che podevo date e no t'hè dao, de le storie che tu 'vivi prontae pe me e no' t'à poduo contame. Perdoneme mare, pre êsse 'negagia in un mar de solitae.