Desolassiòn Road 2012
Aldo Tognon
“ Desolassiòn Road 2012 “
Xe zà ‘na longa fila co’ le machine a spetà e la carossa de la regina in ritardo la rivarà. Le guardie, vistîe in bianco, soto i semafuri le stâ, le ôfre un rinfresco a i turisti ma la bira finìa xe zà.
E ‘l paron de’l mondo ‘l rîe co’ la claque che i’ bàte le man, m’ anche ‘l vin ‘l xe zà finîo e no rèsta solo che ‘l pan.
Serae drento ‘l labirinto le formigole le gira e và, la giostra gira in tondo e i bigliti xe de conprà. Ognun s’à ciapao ‘l so’ posto ma in prima fila nissun no xe, ‘chè pe’ ‘sto panorama sarà posto solo pe’l re.
E duti i spetaturi aplaude, duti i’ bàte le man: no xe ninte de più belo de ‘sta “Desolation Town”.
Duti in fila comò le bricole e zà prunti co’l so’ gamelìn i’ spèta ‘l son de la canpana ‘chè ‘l pranso ‘l xe vissìn. Pan e aqua ciapai co’ le arte, panadela, consumè e risoto… su le tabele de’l museo segnai xe i numeri de’l Loto.
Le casse de’l tesoro piene a i pirati i’ fâ piassèr: se pòl catà anche diamanti su la “Desolation Square”.
A le Terme e in Sabiature xe la neve che vièn zò e i turisti i’ xe che i’ ssîa su i ski-lift de Doberdò. Vistî duti comò Babo Natale i bagnini co’l rastelo, i’ partecipa a un concorso de cù che xe ‘l più belo.
‘Stanote stâo xe un sirocal e ‘l sabion s’à ‘ngelao comò un stick: la foto gèra su’l giornal de ‘sta “Desolation Beach”.
Le ‘nfermiere ciàpa ‘l sol in bikini su la terassa de’l Ospedal e i duturi i’ sòna i mandulini pe’ i veci che i’ stâ mal. Duto in oferta tu câti de sabo su le bancarele, là, in mercao: visite, analisi o un leto in corsia pe’ gargun de nostalgia malao.
Xe i turisti in visita guidata trà i reparti de’l Ospedal, i scâta foto a leti svodi drento ‘l “Desolation Hotel”.
Su’i scalini de la Cesa frito misto, polenta e vin… gargun ‘npìssa ‘na candela pe’l povero fantulin. Anche ‘l albero de Nadal, ‘sto ano, i’ lo fâ pe’ feragosto, ma in parte de ’l altar pe’ i zaghìti no xe più posto.
E ‘ntanto ‘l stereo ‘l sona un disco co’ la “Radetski March” pe’ le vecie co’l sial nero ‘ntè la “Desolation Church”.
La nave ‘l à ancorao in piscina e se ‘npignisse alberghi e hotel, un gran ricevimento ‘i à dâo per el Principe de Quel. E i passegeri, in gita, i’ li portarà a tô sù fiuri tra ‘l fango e le molere su la Trata d’ i Pescauri.
E la “Dolce Signora” scônta sora ‘l albero no i’ la vêghe più nissun e no xe nissun che prega più “ …in this Desolation Lagoon”.
Xe zà ‘na longa fila co’ le machine che và, ma la carossa de la regina mai più la ritornarà. Su la spiagia, ‘bandonai, casteli de sabion che i fantulini i’ à lassao: i’ deve tornà a scuola pe’ capî quel che no i’ à ‘nparao.
E ‘l paron de’l mondo ‘l continua a rîe co’ la claque che ‘ncora bàte le man e ‘l scolta tanghi e valser d’ un iPod su la “Desolation Road”.
Copyright@2014