Dr‘ Mohrekopf
Uusgoob 1 - 2021
Miir luege zrugg. …uff d "Fasnacht 21" Am Donnschtig nach de "schöönschte Dääg" isch me das Joor gsund und fit; Me fiehlt sich uusgrueht aa und zwääg und niemer hett e Deefizyt. S isch alles anderscht in däm Joor: Kai Ruggeweh hesch und kai Stai, hesch nit no Räppli in de Hoor und nit wie sunscht als: Miedi Bai. Friener bisch am Donnschtig morge weemietig ummeghange, bisch s Costume gange go versorge und duesch uff s näggscht Joor blange. Das Joor aber dringgsch dehai ainsaam e glaine Schlugg. Denn luegsch versungge ganz ellai uff s Fasnachts-Dryybe zrugg.
Kai Vorfasnacht, kai Fasnachtsfieber, kai Monschter… und so wyter… Dyy Stimmig, die wird trieb und trieber, kurz zämmegfasst: S isch schytter ! Schlimmer wird s vo Daag ze Daag und au mit jeeder Stund; Kai "Liecht-abgoo", kai Vierischlag. das macht aim grangg, statt gsund. Fascht zynisch höörsch vo "Meteo": S gääb prächtig Fasnachtswätter, drbyy – das miechti aim doch froh – wenn s schiffe wurd, wäär s nätter ! Me isch denn ainewääg uff d Strooss (fascht) alli hänn e Larve drait, hett "Fasnacht" gmacht, erbarmigslos und still sich "Salu" gsait. - 18 -
