/////////////////////////////////////////////////////////////////////////////
PITIK
/////////////////////////////////////////////////////////////////////////////
mga balak
ERIK E. TUBAN
BOMBA! PRESS HTTP://WWW.BOMBAPRESS.COM
BOMBA! BALAY PUBLIKARAN Walay Kopyakatungod (2014) ni Erik E. Tuban Tanan bahin niining maong librobalak mamahimong kopyahon, padaghanon bisan walay pagtugot sa tigsulat o sa nagpublikar. Arte sa hapin, han-ay ug desinyo: Erik E. Tuban
TALAAN SA UNOD SA DIHANG GIBALIK OG SAKA... BUNGA HALAP GABII SA LIBOAN KA DAMGO DULCE ET DECORUM EST ANG NAHANAW SAAD HIMAMAT LANGGAM GAGMAYNG BUTANG KAHARUHAY ALA UNGGA AYALA ANG BALAY ANAA SA KASINGKASING LIGIDLIGID
SA DIHANG GIBALIK OG SAKA ANG NAHABILIN NGA PILIPINO 2 NOTBOK DIDTO SA KLASROM Iyang gipupo ang mga bituon sa hardin ug gihipos sa silopin aron buhata’g tabanog inig uli niya sa balay aron ipalupad balik sa langit sa mga kagabhion nga ang mga aninipot takboyan sa panuhot. Dayon iyang lola moingon, "Uy, unsa god intawon ka, dong. Nagtabyog man ka sa nahanaw nga duyan, nag-uyog sa nangatagak nang mga lubi." Dayon siya mobalos, "Sagdii lang ko, la. Unsaon man nako ning akong kasingkasing kon pistahan lang kini sa mga ulod nga way laing tinguha kon dili ang makaangkon og gamayng bahin sa mga nangatagak nga salin sa paraiso." Ug ang tigulang mosanong, "Na hala, dong. Ampingi kanang imong kasingkasing sama sa hagtik sa tayaong kwerdas -mariposa #2."
BUNGA pagkahuman sa atong panagdulog nakadungog kitag kasikas gikan sa bintana sa kusina nga milusot sa dakong hawanan kilid sa hardin sa nanaglinyang mga rosas nga hapit na namuwak (ug ang kahumot) sa atong gugma nangumpayot sa mga sanga sa kaimito diin di pa lang dugay nag-uyog-uyog ug nibatog ang usa ka anino alisto ug mat-an nga nagkapakapa giisip natong wa damhang bisita
HALAP ang kangitngit sa gugma usa ka libaong nga dalan mapintas ug way kalainan sa kangitngit sa buta nga nagpangita ug pangalan
GABII SA LIBOAN KA DAMGO luyo sa itom nga pultahan, luyo sa inutawng kahilom, ang kalmadong kamot sa panahon misangka sa abandonadong katugnaw nga mibiya sa punoan. sama sa pinasagdang sakayan sa baybayon nasaksihan ko ang gatosan ka latos sa unos ug kamingaw, uga ang hangin nga mitamparos sa dughan, ug ang libudsuroy sa alindasay nga paghandom natagak, nikagay liboan ka kasingkasing
DULCE ET DECORUM EST inday luzviminda kining akong gugma kanimo liboan ka isla ugaling salsagon man ang akong tinguha inday luzviminda kining akong gugma ayaw ilubong sa yuta di ko pa buot madugta
ANG NAHANAW Ang mga pangandoy nga nakalimtan ta sa wala tuyoa, unsa na kaha ang nahitabo kanila? Asa nato makit-an ang kagahapong wa na mipauli sa atong panumduman? Niining hapona, sa imong paghay-ad ug pamilok paingon sa nahanawng kalibotan, nisantop ang berde sa imong pagpamalandong taliwala sa labong nga kasagbotan dihang milabang ang usa ka Oktobre. Imong gisulayan pagpangita balik ang nawagtang nga agianan sa imong pagpanalingsing. Sa kalibonan, gigiyahan ka sa magtiayon nimong hunahuna, gialirongan ka sa salop sa imong pag-inosara, ug giagak ka sa mihangop nga mga punoan. Ug inay bation ka sa kahadlok, andam ka nga niabaga sa kabag-ohan. Niadtong tungora, imong nakit-an ang imong pangalan ug ang kaamgohang hingpit nga sa kada tikang, timon mo ang kangitngit.
SAAD ilawom sa kaimito gakson tika didto katam-is sa mga segundo ilansis ta ug isekreto ilawom sa akasya ako nag-inosara gipatay ko ang gugma sa walay pagduhaduha
HIMAMAT ang wa masulti sa hilawng katawa wala mahisgoti sa mga taphawng pangumosta ug wala maagii sa sinurambawng istorya sa duha ka kanhi kapikas (ug karon higala) nga mibiaybiay samtang ang mga nagpasopasong dagway diha sa may dalan maxilom miputos sa panagbag-id sa segundang tsansa. kay sa pagkatinood lang, unsa pa man nga mga butang ang mahisgotan niining tungora? imo ba siyang suginlan kon giunsa nimo paghawa sa bapor nga imong gitrabahoan pipila ka tuig sa wa pa nimo minyoi ang iyang higala? imo ba siyang sultian nga ang atubangan sa ayala (diin naghuwat ka sa iyang gugma) karon huwatanan na? may na lang gani may gilawmon ang kunot nga kandiis sa imong mga mata nga igo ra, sakto rang makapugong sa nagpig-ot og katagakong pag-inosara.
LANGGAM ngabil sa ngabil silang gikadena buot molingkawas sa hawla dila sa dila nagdilaab nga kama human sa sulirap iyang nahapuhap bugnawng de bomba sa nangayam niyang bana
GAGMAYNG BUTANG sa kinatibuk-ang kamas sa kinabuhi anaa sila aron kanunayng mopahinumdom kanimo nga tadlas sa mga katuigan imo lang giusikan ang mga higayon nga di unta angayan gahinan og panahon ug kusog sila ang mga gagmayng butang nga manguhit magpahibalo kanimo sama sa sigarilyong wa maupos ug kapeng nabugnaw nga sa pagdalidali imong gibiyaan kaganihang butang
KAHARUHAY A LA UNGA AYALA Sayod siya nga ang gidak-on sa kalibotan usa lamang ka salamangka sa heyograpiya ug ang iyang kalisod matang lang sa pagsukod.
ANG BALAY ANAA SA KASINGKASING Sa pipila niya katuig nga paglatagaw ning dakbayan, gibati niya, taliwala sa kagubot, ang dakong kahaw-ang ug kabug-at sa susamang higayon. Hupas ang huni nga gidasig sa mekanikong laylay nga nagpaandar sa bag-ong kalibotan. Ang mga nagsudlot nga kahayag nga gidalit sa dagitab daw mohubo sa kalag apan aduna kini panan-aw nga taphaw ug igo lang nga mihadla sa iyang mga kasinatian. Mga lumalabayng panagway nga, sa makausa, mihatag kaniyag mentras tantong lugway. Kilid sa iyang hunahuna, iyang gisulayan paghinumdom ang kanaas sa naginukdanayng taob, ang hunghong sa hoyohoy sa lawom nga kagabhion ug ang alimyon sa lab-as nga mga dahon sa talisay sa sayong kabuntagon. Siya nasayod nga bisan lang sa pipila ka gutlo, ang iyang kasingkasing nahiuli pagbalik.
LIGIDLIGID Gaksa ko karong adlawa kay gihidlaw kos imong singot. Kay iya man ang tibuok semana, gaksa lang ko karong adlawa. Pasagdi siya nga matingala-sa inalisbo sa tam-is nga singot. Gaksa lang ko karong adlawa kay gimingaw kos imong kahumot!
KABAHIN Si Erik E. Tuban natawo niadtong Nobyembre 1984 sa Dumaguete ug kasamtangang nagpuyo sa Alang-alang, Mandaue. Ang Pitik (kuyog sa Bakunawa Kingpin) mao ang ikaduha niyang pagawas. Siya usa sa tigpasiugda sa Bomba! Press (http://www.bombapress.com). Kasagaran sa mga balak niining koleksyon unang napatik sa Kabisdak (balaybalakasoy.blogspot.com) nga gidumala ni Mike Obenieta.
BOMBA!