КЛУЧНА ИДЕЈА Демократијата започнува кога народот ќе избере власт. За да работи власта во интерес на народот, Уставот на државата мора да ги содржи човековите права и да ги применува. Избирачкото право е обврска на секој граѓанин. Граѓанинот мора исто така да им се потчинува на законите дури и тогаш кога тој не се согласува со нив и да ги почитува институциите на државата.
ПРОВЕРИ ГО И УПОТРЕБИ ГО СВОЕТО ЗНАЕЊЕ Анализирај ги примерите и обиди се да заклучиш кои човекови права се повредени. Дали државата ги исполнила своите обврски кон граѓаните? 1. Трошоците за медицинска нега во државата се зголемиле толку многу што граѓаните не можат да ги платат. Владата одбива да воведе државно лекување (здравствена заштита) за сите зашто мисли дека е скапо. 2. Во една сиромашна земја владата донесува одлука да изгради термоелектрана во која треба да се вработат стотина работници. Таа ќе работи на јаглен без филтри. Граѓаните кои живеат во близина на термоелектраната која ќе се гради, не се сложуваат со владината одлука и организираат протест. Протестот е прекинат со интервенција на полицијата. 3. Родители - земјоделци велат дека не му дозволуваат на својот 10 - годишен син да оди во училиште. Велат дека тој треба да ги чува кравите. Одговорните во училиштето велат дека тоа е проблем на семејството. 4. Владата тврди дека штрајковите на работниците и предизвикуваат големи штети на економијата. Таа ги забранува штрајковите и формира индустриски совети, составени од бизнисмени, претставници од Владата и синдикални водачи кои треба да ги решат проблемите.
53