An Stevel Spar gans Sam Brown
P
an esen ni fleghes, y hwrussa ow broder ha vy gwari “kudha ha hwilas” y'gan chi; ni a vynnsa kudha yn pub le possybyl. Mes pub bledhen, yn mis Kevardhu, nyns esen ni gesys dhe wari y'n stevel spar. Yn-medh agan mamm, “Na wrewgh gwari ena, yma tarosvan y'n dhilasva a wra gorra own dhewgh hwi, yma den pur yn-dann an gweli a wra'gas kachya mars entrewgh hwi a-ji, hag yma kevnisen war an fos a wra'gas dybri, mar kerdhewgh hwi a-ji dhe's gwias.” Ena y hwovynnas ow broder, “Mes, a ble teuthons i?” “Wel,” yn-medh mamm, “An tarosvan
eth a-ji dhe'n dhilasva awos hy bos gwynsek a-ves hag y fydh ev hwythys dhe-ves, mar kortsa ena; an den pur eth yn-dann an gweli drefenn hi dhe vos yeyn a-ves hag y rewsa va y'n poll; ha'n kevnisen eth a-ji rag gwitha y honan tomm dres an gwav.” “Ytho, fatel yllyn ni ryddya'n chi a'gan godrigoryon anwelwys?” govynnis vy. “Y fydh res dhyn gortos rag an den a yll aga movya,” yn-medh mamm. “Ha piw yw henna!” govynnas ow broder ha vyvy. “Neb le es Yowan Chymbla a yll ryddya godrigoryon avel agan re ni!” minhwarthas mamm.
Dhe'n pols na y teuth tas gans seghyer liwus meur hag eth a-ji dhe'n stevel spar. “Na tas, NA!” skryjsyn ni. “Yth yw da lowr,” leveris mamm yn tison, “yma dhodho boos ra'gan gwestoryon.” Yth esa peub lowenna wosa henna. Ytho, tas eth a-ji dhe'n stevel spar gans boos rag an gwestoryon pub dydh erna dheuth 24 mis Kevardhu. Yth esa'm broder ha vyvy pur yntanys ha ni ow kortos rag Yowan Chymbla dhe dhones ha'gan sawya. Ha, dhe hanter nos, ni a glowas kammow medhal war an to ha HOUSH dhyworth
an oles y'n stevel spar. Ni a wortas aves dhe'n stevel ha goslowes dre'n daras rag tybyans a bandr'esa ow tarvos y'gan stevel spar. Sekondys diwettha, yth esa skryj “Dheves lemmyn! Bestes an stevel ma, GESEWGH!” An daras a ygeris a-dhesempis, ha'n tarosvan, an den pur ha'n kevnisen a bonyas yn-mes a'n stevel ha dre'n daras a-rag. Wosa'n westoryon dhe asa, den tew a wrug apperya dhyworth an tewlder. “Dydh da mebyon, my re ryddyas agas stevel spar a'n bestes esa ynni hi,” ynmedh Yowan Chymbla. “Meur ras, Syrra,” gorthebsyn ni, “A
vynnowgh agan junya rag kinnyow Nadelik avorow?” “Mynnav, avorow!”
heb
dout.
Agas
gweles
An nessa dydh y teuth Yowan Chymbla rag kinnyow genen ni. Mes, kyns ni dhe allos dalleth dybri, ni a viras dre'n fenester y'n lowarth. Y hyllsyn ni gweles an tarosvan ow pos hwythys y'n gwyns, an den pur ow rewi y'n poll, ha'n kevnisen ow krena y'n krowji. Ow broder ha vyvy a viras orth mamm, tas ha Yowan Chymbla ha ni a wovynnas, “Mar pleg peub, a yllyn ni govyn mar mynnons agan junya? Martesen i a yll gortos y'gan stevel spar keffrys?”
“Wel,” mamm ha tas a viras orth an eyl y gila, “Ogh, da lowr! Ni a wra govynn dhedha lemmyn.” Ytho, an tarosvan, an den pur ha'n kevnisen a dhybris genen ni ha gans Yowan Chymbla hag i a wortas y'gan stevel spar erna veu passyes an gwav.
Diwedh