Meh pungtinai pag-addatan si Islam! Peggeh kaniya-an tenbi Muslim, tartantu subey kaniya-an tenbi magpatatap si katunggal Allahu Taala. Duk tartantu subey ne taykutan tebi ye meh kemon kakahinang, sessah, duk kananapsuhan gey genari si kitebi pinakey. Tartantu kawajiban si kitebi mamasulig ka-anakan tenbi si kasabennalanin duk matala siye amban kemon pakaradja-an putika-an atawa kasirikan. Subey pa-esseban tebi meh ka-anakan tenbi dinaak ngandel si Allahu Taala sampurnah pangandel sabab Iye magpapanjari si siye hin. Si labeyan inin paniyah si siye mangandel si katunggal Allahu Taala hin si ine-ine hinal weh de, duk si Allahu Taala siye ma-aku si waktu siye dam kalagi duk si kasigpitan. Duk makapatala siye amban pagputing (dustah) duk pagpayam-payam. Apabila ammalan te ye labeyan mahap inin, makapa-lappas kite amban kemon kananapsuhan duk sessah meh Saytan, sampay umala inin amban dampaglahat, apabela parihalah tibe ginhawa baran tenbi amban ye meh toh-makalepas duk magputika-an (magpayam-payam). Sabennal teed, Qur’anin maksud nen hangkan pinaboo weh supaya hininangan buyetan si kellung hinang habay, mala-ingkan, pinaboo iye hininang tambal si meh pangateyan saki. Ye Qur’anin tapaturun supay ye meh kakahinang putika-anin atawa magpayam-payamin kapandeman weh Ne. Meh pungtinai kalasahan si Islam! Magtayakkup kitebi maaku si Allahu Taala, ye Salangkewlangkew, Sangat ma-aseh, para si Hidayat Ne. gah niyah paruntungan tadawhat, duk ganah maksud ta-eddoh malaingkan ye siye katow-an weh Allahu Taala. Maku kite si Iye Hikmah (Kapandiyan Ne) supaya tahinang weh te hinang mahap maka-urung kamumpa-atan si ginhawa barante, dam kawman te, labi bang si pag-Agama te. Duk maku si Mahatinggi Allah kalappasan amban meh Saytan duk urungan ne kitebi ke-elluman hap tuu si dunyah labi bang si ke-elluman akhirat. Oh Allah tabanganun kami ma-aku kaampunan si Kau duk magmalillah su Kau, tayma-un duwa-a kami hin. Palessahun si kami kahaggutan kama-apan Nun duk kamamisan kaampunan Nun. Lappasun pangtiyan kami hin amban magpasakutu seddi amban Kau. Sekupun kami si meh siye kanalasahan weh Nu duk malasa si Kau. Paniya-un kami amban meh baribadat duk palamurun kami si meh siye dam kabentelan. O Allah! Ka-ase-anun kemun Muslimin. O Allah! Tayma-un duwa-a kamihin.
Barak Allahu li wa lakum fil qur’anil hakim; wa nafah ni wa iyyakum bima fihi min ayati wa zikril hakim; akulu kawli haza wa astagfirullahi li walakum wa lisa-iril muslimin; min kulli janbin fastagfiruhu innahu huwa’tawwa burrahim. Mura-murahan pinagbarkar weh Allahu Taala toh si kitebi in maha mulliya Qur’an supaya maka urung paruntungan si kitebi ye meh Ayat duk Pag-isseban (Zikr). Bissara ku inin duk pa-aku ku si Allah ye sa Langkew-langkew duk tamanan patut Minulliya, ye ngampunan si meh duse tebi, maku kitebi si Allah ka-ampunan, Iye sangat mangangampun duk sangat ma-aseh.
Khutba Tapeneh: Toh Pamasambu si Pagsawmadja Para si Kawman Muslim Dem Pilipinas | 233