zisnearen kantua Zenbat balio du gutxi jakin nahi eta ezer eskatzen ez duen emakume batek? Esku-ahurrak gora begira ditu, eta zeruak adurra askatzen du, errukior. Hileko odolari, iraganaren akronimo horri, seme nerabearen tristura elkartu zaio. Kantuan ari da zisnea, mezurik sentituena hormonen ilunabarrean. Teilapeetan, amodioak gogaitu eta elikaturiko bizitzak, bodegoi sepia eta berdeak, bakea eta gerra lore artean. Hain da hauskorra dena, hain erraza laburbiltzen. Edukia eta edukiontzia, naufragio bakoitzaren markak.
locus amoenus Bakardadea bera ere bada ekintza. Zergatik ekin? Vladimir Holan
Maskor-kixkirriak oldean heldu dira hondartzara, urtero lez. Posible dirudi bizitza sintesian ikustea lubakia hazi bitartean. Txakur bat olatuei zaunkaka. Saski batetik laranja bat pirritan. Posible dirudi oihalak goratzea publikoari itxaron barik. Urriaren hogeita bosta, zapatua. Semea bere kabuz hirian. Posible dirudi gauzen ordena esku bakarrarekin atontzea. Hustasun hau ez da besterik bakoa, ez da kasuala.
57