ELÍSABET FELGUEROSO LÓPEZ
cargalo nos vagononos grandes de la Renfe...! ¡Pa llevalo pa Xixón, pa los barcos, o pa les fábriques, o pa onde fuera...! ¡Qué sé yo les muyeres que taríamos allí! Munchísimes. Allí onde taba yo, que yera na Compañía Asturiana de Carbones, en Ciañu, pues, nun sé, seríamos cuarenta, polo menos... Y lluego, les de los llavaderos, tamién, que tamién había a esgaya... Pero non, les muyeres tábamos toes pa lo de fuera, y pa dientro yá teníen que facelo los paisanos. Les muyeres pa dientro la mina nun podíamos trabayar. ¡Home sí, trabayaben fai munchos años, pero eso yera antiguamente, qu’había munches muyeres nel arrastre, tirando colos gües, y nos pozos, hasta que lo prohibieron, pero quién s’acuerda d’eso...! Y yo tuvi una temporada per dientro tamién, cuando la guerra... ¿Qué...? ¡Pues facíamos eso que te cuento...! ¡Lo que te toi diciendo...! ¡A tirar de pala tol día, diez o doce hores, vagononos de diez o de quince o hasta de venti tonelaes, qu’había delles veces que tardaba en cargar un vagón trés díes... Y a escoyelo na cadena... ¡Pues a quita-y la pizarra y apartalo pa un llau y a seleccionar el carbón, el cribao, la galleta, la granza, la grancilla, lo menudo, los finos...! ¡Y a palpu munches veces, que te baxaba aquel agua negrono como qué sé yo y metíes les manes nello y teníes que conocer lo que yera pizarra nada más que tocándolo, ensin velo siquiera...! Yéramos seis hermanos, y morrió mio pá, a ver qué queríes que ficiera, más que poneme a trabayar nel únicu sitiu que se podía...! Non, mio ma yá morriera enantes, facía tres o cuatro años, de diabetes. Yera yo pequeña, yá casi nun m’acuerdo d’ella […] Y trabayé dientro tamién, una temporadina, cuando la guerra... ¿Qué ye, ho? ¡Recoño, por qué diba ser, pues porque nun había paisanos, porque llevaron toda la xuventú pal frente y el carbón había que sacalo igual, y l’amu de la mina mandónos a nosotres...! […] Y había un paisanu que sabía picar y él yera’l que picaba, y nosotres facíamos tolo otro, ramplar, entibar, arrastralo pa fuera, coyelo, llavalo, cargar los vagones... Non, pero tuvimos poco, porque aquí n’Asturies tola parte esa de les Cuenques cayó ensiguida y yá volvieron los hombres y a nosotres yá nos mandaron otra vez pa fuera... Y yo agora fui pa los llavaderos […] Y a callar, qu’allí, si ellos
71
8