Bizkaiko herritarrak gida-baimena ateratzeko ikastaroa eta idatzizko azterketa euskaraz egin ondoren, azterketa praktikoa ezin izango zuela euskaraz egin jakinarazi zioten azterketa eguna baino hiruzpalau egun lehenago. Herritarrak azterketa euskaraz egiteko eskubideari eutsi eta Behatokiaren eta Getxoko euskara teknikariaren laguntza eta babesarekin gida-baimenaren azterketa praktikoa euskaraz egitea lortu zuen. Arakilgo herritarrak kontribuzioaren kobrantza-jakinarazpena euskaraz bidaltzeko eskaera egin zion udalari. Honek, kontribuzioaren jakinarazpena Nafarroako Gobernutik jasotzen dela eta erdaraz bidaltzen dutela erantzun zion. Herritarrak ez zuen amore eman eta hirugarrenean lortu egin zuen. Adibide hauek erakusten dute hizkuntzaeskubideak exijitu eta euskaraz bizitzeko nahiari erabakitasun irmoz heltzen dioten herritarren ahalegina. Traba guztien gainetik euskaraz bizitzeko eginahala egiten duten euskaldunen emaitza dira. Nahiz eta administrazio eta entitateena den herritarren hizkuntza-eskubideen bermea eta hori praktikara eramateko ahalegina. Administrazioek ezin dute herritarrek egiten duten indarraren zain egon. Urraketak eragin ditzaketen egoerei aurre hartu eta prebentzio neurriak hartzea da euskaldunen eskubideak ziurtatzeko biderik eraginkorrena.
15