AWEMainta.com
Local
Diaranson 26 di September 2012
3
Reunionnan exitoso ta continua entre Minister Otmar Oduber y trahadornan di hotelnan
E mandatario ta aprecia e trabou cu cada un di nan ta haci na bienestar di nos turismo
DIAMARS Minister Otmar Oduber a continua cu su bishita n’e trahadornan di hotelnan y por bisa cu e reunionnan tabata un exito total. Empleadonan di e diferente hotelnan ta aprecia cu e mandatario ta tuma tempo pa papia cu nan, conta nan con e situacion di turismo di nos isla ta bayendo, kico t’e plannan, con ta mercadea nos isla den exterior y mas cu tur, ta pone tempo disponibel pa scucha nan comentario, pregunta, critica y sugerencianan. Diamars Minister Oduber a
reuni parti mainta cu trahadornan di Holiday Inn y Playa Linda y den oranan di atardi cu trahadornan di Westin, Casa del Mar, Aruba Beach Club y Costa Linda. El a mustra riba e hecho cu e reunionnan aki ta hopi importante pa desaroyo di nos turismo y un ehempel di esaki t’e plan strategico cu a wordo traha pa loke ta futuro di nos turismo p’e proximo 15 pa 20 aña ‘Winning the Future’. Hopi di e trahadornan cu cual e mandatario ta reuniendo n’e momentonan aki a contribui cu
e estudio aki pa medio di un encuesta cu nan a yena aña pasa. Probechando e ocasion, Minister Oduber a haci entrega di e plan strategico n’e gerentenan general di diferente hotel, p’asina cada propiedad por conta cu un ehemplar y comparti e informacion aki cu e trahadornan. Algo cu sigur Minister Otmar Oduber ta pone hopi enfasis riba dje t’e hecho cu tur esnan trahando directa of indirectamente cu nos bishitantenan t’esnan cu ta haci di Aruba su
turismo un exito completo. Por bin cu maneho, reuni cu diferente partner y crea e diferente posibilidadnan pa bin cu turistanan, pero ta nos hendenan t’esnan cu ta haci e diferencia y e influencia p’e bishitantenan sinti nan mes na cas y tuma e decision di regresa nos isla pa nan vacacion, tabata palabranan di e mandatario di turismo n’e trahadornan presente n’e diferente reunionnan. E reunionnan aki cu trahadornan den sector turistico ta algo cu e Minister a bin ta haciendo
pa casi 2 aña caba y el a probecha cu nos ta celebrando e Siman di Turismo pa realiza e bishitanan aki, gradici cada un di nan pa nan aporte y scucha nan. Diarazon y diahuebs e bishitanan lo continua na diferente otro propiedad y ta culmina diahuebs anochi na San Nicolas cu apertura di Oficina di Turismo pariba di brug como tambe e celebracion di Dia Internacional di Turismo na Carubbian Festival cu diferente atraccion pa turista como local.