16
Local
Diaranson 26 di September 2012
AWEMainta.com
Minister Arthur Dowers:
Proyecto di entrepreneurship ta duna balor n’e conocemento y talento di nos hobennan E prome scol pa ricibi e mandatarionan tabata Filomena College MAVO na San Nicolas, unda cu sra. Hooyboer-Winklaar a presenta e concepto. Minister Dowers a splica cu entre nan dos, e mandatarionan lo tuma turno pa haci e presentacionnan n’e 15 scolnan secundario na Aruba.
DIALUNA mainta tempran, Minister di Enseñansa, mr. drs. Arthur Dowers y Minister di
Asunto Economico, Michelle Hooyboer-Winklaar a “kick off” e proyecto di introduccion di
e tema di “entrepreneurship” pa alumnonan di scolnan secundario.
E programa ta un introduccion di e proceso con pa establece y haci negoshi na Aruba. E concepto no ta pa directamente encurasha nos hobennan pa cuminsa un negoshi aworaki, pero pa nan sera conoci cu e concepto di “entrepreneurship” y wordo introduci na kico t’e responsabilidadnan di un comerciante. Minister Dowers a bisa cu el a duna su apoyo di biaha n’e proyecto ora su colega a presente na dje, como cu e ta motiva nos hobennan pa traha hunto na un forma positivo y ta fomenta interaccion positivo di hobennan den nos comunidad. El a subraya cu e ta spera cu mescos cu ora hobennan haci algo negativo den nos comunidad nan ta haya hopi atencion, cu algo positivo y motivante manera e proyecto aki tambe ta haya su debido atencion, principalmente serca nos medionan
di comunicacion. E titular di enseñansa a expresa cu aunke tabata dialuna tempran, despues di un weekend, e hobennan cu el a topa na Filomena College a ricibi e proyecto cu hopi atencion. “Nos ta kere cu esaki no ta unicamente bon pa nan desaroyo escolar, pero tambe ta bon p’e interaccion den grupo caminda cu hobennan ta haya e chens pa forma un grupo y traha hunto cu otro y tambe traha cu tempo, pues un timeframe,” Minister Dowers a splica. El a añadi cu e hobennan ta wordo invita pa participa na un ehercicio pa siña lanta un negoshi y nan mester provee un cierto producto na un cierto momento. “Tambe, bo ta duna nan e chens pa participa y haci algo constructivo y asina e programa ta duna balor na e conocemento y e talento di nos hobennan,” el a enfatisa. Na final di e presentacion, Minister Dowers a comenta cu e ta sumamente contento di tabata presente cu e hobennan y su colega Minister na Santa Filomena College pa experencia e animo y entusiasmo cu ta existi serca e hobennan p’e proyecto aki.