AWEMainta.com
Local 11
Diaranson 8 di Mei 2013
Drs. Ing. Edsel Lopez RA di PriceWaterhouseCoopers:
E conferencia “Europe Meets the Americas” ta un exito rotundo
DURANTE e prome dia di e conferencia “Europe Meets The Americas”, PriceWaterHouseCoopers a duna un presentacion na e cantidad grandi di representantenan di varios pais Latinoamericano y Europeo cu ta na Aruba pa e evento aki. Drs. Ing. Edsel Lopez RA, director di PWC Dutch Caribbean a duna di conoce cu durante e presentacion nan a papia riba diferente posibilidad pa companianan stranhero cu kier bin haci negoshi na Aruba. A elabora riba con nan por haci’e y con por asisti nan den esey. PWC tambe a splica riba e servicio cu nan por duna e empre-
sarionan pa establece nan mes akinan di un forma structura di forma cu ta cumbini nan y teniendo cuenta cu nan negoshi den exterior, Drs. Ing. Edsel Lopez RA a duna di conoce. Tin diferente scenario fiscal cu Aruba ta brinda ultimamente. Ta depende di e tipo di negoshi, sea financiero of di produccion caminda mester wak ki tipo di regimen fiscal ta mas apropia pa e negoshi ey, a indica. Aruba a bin cu algun iniciativa nobo pa stimula e binimento di negoshinan di afo y haci e sistema di belasting cu ta cumbini nan pa nan bin haci negoshi na Aruba, el a splica.
“Tin cosnan hopi interesante pa companianan bin establece nan mes na Aruba”, asina e director di PWC Dutch Caribbean a sigura. E feedback tabata hopi bon y un cantidad di e participantenan, tanto for di Latino America como for di Europa a acerca PWC den e sala mes caba, pidiendo pa por ricibi mas informacion. Te hasta tin cu a keda di pasa na e oficina di PWC pa por presenta nan mes y establece contacto mesora. “Pa nos como PWC, e conferencia aki ta un exito rotundo”, asina Drs. Ing. Edsel Lopez RA a expresa.