Asili ya
ya madhehebu katika Uislamu final Lubumba.qxd
Asili ya Madhehebu
7/1/2011
12:26 PM
Page 429
katika Uislamu
(26) Je! Tunaweza kubadili hukumu za Dini au Sunna eti kwa kwenda na wakati?: Siku hizi utawasikia baadhi ya mashekhe wetu katika hotuba zao, wakiwaeleza wafuasi wao kuwa baadhi ya sheria (fiqh) za dini zaweza kutenguliwa ili kukidhi mahitaji halisi ya wakati huu. Ukichukulia suala hili juu juu bila kuzama katika mafunzo sahihi ya dini, unaweza ukakubaliana na hoja hii potofu. Kwanza kabisa Qur’ani inasema: “Leo hii nimekukamilishieni Dini yenu, na kukutimizieni neema Yangu, na kukuridhieni Uislamu uwe dini yenu.....” (Qur’ani 5:3). Aya hii inaonyesha kuwa Mwenyezi Mungu alikwishakamilisha Dini, kwa maana kuwa, hapana la kuongeza au kupunguza. Aya hiyo ilishuka miezi mitatu tu kabla ya Mtume (s.a.w.w.) kufariki. Msimamo wa Shia Ithna’asheri ni kwamba baada ya Mtume (s.a.w.w.) kufariki, likitokea tatizo ambalo halina ufumbuzi wa wazi wazi katika Qur’ani au Sunna, kwa wakati huu baada ya Maimamu 12 (a.s.) ni lazima tatizo hilo apelekewe Mujitahid kulitatua (Rejea Sura ya 14 chini ya: ‘Kughibu kwa Imam Mahdi’ pia Sura ya 14 yote. Kwa hakika hakuna Imam au Mujitahid aliyewahi kutengua sehemu ya Qur’ani au Sunnah sahihi ya Mtume (s.a.w.w.). Sababu yake ni kwamba kitu kilichokamilika hakina haja ya kurekebishwa. Mtazamo huu wa baadhi ya Waislamu kuona kuwa Uislamu hauendi na wakati na hivyo urekebishwe, ni jambo la hatari kwa sababu siku zote binadamu hataki kutii sheria na ndiyo maana kuna mahakama na magereza. Siku zote binadamu hujitahidi kukwepa sheria ili kutimiza matakwa ya nafsi yake. Mfano wa mwelekeo huu potofu ni kwamba, nilimsikia Sheikh mmoja maarufu wa Sunni akiwaeleza wafuasi wake kuwa, ‘Kwa wakati huu hapa kwetu, hakuna haja ya ‘Udhu wa Tayammum, kwa sababu maji yapo tele na huwezi kutembea kilomita tano bila kupata maji, kama jangwani, na kwa hiyo ukitumia udhu huo utabatilisha Swala zako.’ Aliongeza kuwa Tayammum ilikusudiwa kwa wakazi wa jangwani wenye shida ya maji! 429