Ráðgjafar á vegum slitastjórnar Glitnis hafa frá því snemma á þessu ári unnið að því að kanna áhuga hjá nokkrum af stærstu bönkum Skandinavíu gagnvart því að skrá Íslandsbanka á markað á Norðurlöndunum. Samkvæmt heimildum Kjarnans var sá áhugi fyrir hendi. Hugmyndin er þá sú að Íslandsbanki yrði tvískráður á markað: stærsti hluti bréfa hans í Kauphöllina í Osló en tíu til tuttugu prósent á Íslandi. Hvort af þessu getur orðið veltur þó alfarið á afstöðu íslenskra stjórnvalda. Íslandsbanki, sem er í 95 prósenta eigu þrotabús Glitnis, verður ekki seldur nema sem hluti af nauðasamningsuppgjöri. Ekki liggur fyrir hvort föllnu bönkunum sem óskað hafa eftir undanþágum frá fjármagnshöftum verður leyft að klára nauðasamninga eða hvort þeim verður gert að fara í gjaldþrot. Pólitísk ákvörðun um slíkt liggur ekki fyrir og beiðnum þrotabúanna um undanþágur hefur enn ekki verið svarað. Erlendir fjárfestar hafa einnig lýst yfir áhuga á að kaupa hlut þrotabús Kaupþings í Arion banka, en hann er 87 prósent. Formlegar viðræður eru ekki hafnar en samkvæmt heimildum Kjarnans er meðal annars um að ræða fjármálafyrirtæki í Skandinavíu. Sama gildir þó um niðurstöðu þess máls og hjá Íslandsbanka. Sala Arion banka verður alltaf hluti af nauðasamningsuppgjöri og verður ekki að veruleika nema fyrir liggi pólitísk ákvörðum um að heimila hana.
05/05 eFnaHagsmáL