babestutako jokabideak ez direla zapaltzen ziurtatuko da; era berean, delituak pertsegitu arren, gizabanakoaren oinarrizko eskubideak, bereziki giza duintasunari datxezkionak, errespetatzen direla ziurtatuko da. Esaterako, Espainiak ez du estradizio-eskaririk onartzen estraditatzen den pertsonari heriotza-zigorra ezarri ahal bazaio; horrez gain, Konstituzio Auzitegiak, Giza Eskubideen Europako Auzitegiaren doktrinari jarraituz (1985eko otsailaren 12ko epaia —Colozza kasua— eta 1992ko urriaren 12koa —T.C. Italia kasua—), jatorriko estatuan delitu larriak egiteagatik auzi-iheslaritzat kondenatutako pertsonen estradizioa ukatu du, erabilitako prozedurak egotziaren eskubideak bermatzen ez zituela ulertu duenean (martxoaren 30eko 91/2000 KAE). Espainiako naziokoen estradizioari dagokionez, tradiziozko printzipioa naziokoak atzerriko estatuetara ez estraditatzea eta horiek Espainian epaitzea zen. Zernahi gisaz, nazioarteko tratatu batzuk direla bide, Espainiako herritarrak hirugarren estatuetara estraditatzea posible da, betiere, estatu horiek Espainiako bermeekin homologatu daitezkeen bermeak dituztenean, eta kasuan kasuko estradizio-tratatuan hala ezarrita dagoenean (martxoaren 23ko 87/2000 KAE). Bestalde, Europar Batasunaren esparruan, normalean oso luze eta konplexuak diren estradizio-prozesuak asko sinplifikatu dira hurrengo hauek direla bide: Europar Batasuneko estatu kideen artean estradizioari buruz dagoen hitzarmena, Dublinen irailaren 27an sinatu zena; Europar Batasuneko Tratatuaren K.3 artikuluaren inguruan ezarritako hitzarmena, Europar Batasuneko estatu kideen arteko estradizioprozedura sinplifikatuari buruzkoa, Bruselan 1995eko martxoaren 10ean egindakoa; eta, batez ere, euro-agindu izenekoa, martxoaren 14ko 3/2003 Legeak, atxilotzeari eta emateari buruzko Europako aginduari buruzkoak, arautua. Lege hori dela bide, pertsonak ia berehala ematen dira, Europar Batasuneko estatuetako epaileek delitu jakin batzuei dagokienez emandako aginduak aitortuta. 1.5.3. Asilo-eskubidea Amaitzeko, EKren 13.4 artikuluan asilo-eskubidea aipatu da. Artikulu horren arabera, «Legeak ezarriko du beste herrialdeetako herritarrek eta aberrigabeek nola erabili ahal izango duten asilo-eskubidea Espainian». Gaur egun, Lege hori martxoaren 26ko 5/1984 Legea da, asilo-eskubidea eta errefuxiatu-izaera arautzen dituena. Espainiako legeen arabera, asilo-eskubidea da Espainiak Errefuxiatuen Estatutuaren arabera errefuxiatu-izaera aitortuta duen atzerritarrari ematen dion babesa. Errefuxiatuen Estatutua 1951ko uztailaren 28ko Genevako Konbentzioan eta gai berari buruzko 1967ko urtarrilaren 31ko New Yorkeko Protokoloan araututa dago (Espainia 1978an atxiki zitzaien horiei). Hau da, asilo-eskubidea du arra303
Konstituzio zuzenbidearen.indd 303
12/11/07 11:49:50