Rina à spo dit sö na picia rima al primiziant. Dedô à inće l’ombolt de Mareo Fortunato Ferdigg portè dant sües parores de salüt. Sö dan dlijia aspetâ inće siur Iaco Ploner, por zelebrè deboriada na liturgia dla parora. Tratan la prozesciun cun ćiandëres, s’à slarié na coda zonza fin fora por les strades da Rina. Na striara de lumins, jënt che periâ, che ćiantâ. Momënć sintis de gran emoziun. La jënt à iluminé les ćiases cun ligrëza y savëi. De vigni sort de motifs iluminà ti fajô da „spalier” ala prozesciun. Crusc, caresc y cörs sö por les ćiases, finestres y mürs abelis da dessëgns y scrites de fede.
La ćiasa dl primiziant.
Na iluminaziun che mirita n gran lalt. Daidé à inće i vijins da Longega, y la jënt da Pliscia y dles viles da La Pli de Mareo che vëiga ca Rina. Sön che costa da Val lominâ n gran caresc cun la scrita „Klaus” y sön Piz da Peres na crusc. Imprescionant da odëi sciöche la jënt à sintì y partezipé cun gran ligrëza a chësta festa.
La domënia da doman rovâl bele adora adalerch peregrins a tó pert al avenimënt. Tröc é rovà a Rina cun les prozesciuns, tröc a pé, do rata püć cun i auti. Na cossa che à dër daidé i stödafüch che à fat sorvisc a n’Antermëia, Rina y Longega por daidé smendrì le trafich. Püch do les 8 da doman cucâ inće le primiziant da ćiasa fora, acompagné da familiars y parënć. Le pröm salüt ti à portè le fioc Lois Pedevilla, che à dit sö na rima. Sön strada êl n gröm de jënt che apludî y la gücia trata dai bi norics che aspetâ bele da tó sö sü ghesć. Deboriada cun la musiga da Rina é la prozesciun piada ia por rové ia Runch olach’al é gnü zelebrè la Mëssa Noela. Tröc ê i proi che à tut pert ala funziun. Le degan da Por471