Page 1


DIAHUEBS 16 JANUARI , 2014

11

Director di TNO Mart van Bracht riba concepto gateway Aruba

“Nos ta prueba cu e concepto di Aruba ta funciona”

I a pone Aruba riba mapa mundial como gateway y awor den EMA II mester traha cu mas exactitud. Sostenibilidad mester bira un tema principal, mescos turismo.

Diahuebs ultimo a tuma lugar e encuentro ‘Genootschap Nederland—Aruba’ den Nieuwspoort, e centro di prensa di Parlamento Hulandes. E sala tabata completamente yen. Embahador di Reino na Chili sra. Marion Kappeyne van de Coppello tabata orador principal na e evento aki. Aña pasa sra.Kappeyne van de Coppello tabata masha envolvi cu organisacion di e conferencia exitoso ‘Europe Meets the Americas’ cu a tuma lugar na luna di mei na Aruba. Hulanda a ‘presta’ Aruba e funcionario halto aki riba peticion di Prome Minister Mike Eman. Esaki mientras Kappeyne van de Coppello tabata en espera di su puesto nobo di embahador na Chili. “E tempo cu nos tabatin pa organisa e magno aki tabata masha cortico. E conferencia mester a tuma lugar na mei y ami a cuminsa traha na januari riba dje”. Tur cos a resulta bon, sigur tambe dor di ayudo di Agentschap Nederland, Nederlands Centrum voor Handels-

bevordering. MKB-Nederland, Kamer van Koophandel di Aruba, ATIA y Arina. Tur a hunga un rol importante den realisacion di e conferencia EMA. Importante sin duda tabata presencia di embahaornan di Reino den Medio y Latino-America cu a haci nan maximo esfuerso pa promove e conferencia di EMA den nan respectivo pais. Kappeyne van de Coppello a bisa e audiencia cu nan a spera 400 participante, pero a bin 734 participante di 24 pais. 500 business-to-business meetings a tuma lugar y a firma 12 MOU. “E exito tabata abrumador. Pero EMA ta solamente un inicio. Awor e follow up ta sigui. Algun proyecto a wordo concretisa, entre nan esun di Marriott pa start un scol pa turismo”. Tin mas proyecto den pipeline pa wordo ehecuta. Mientrastanto ta trahando duro pa cuminsa cu e di dos conferencia di EMA. Tarea di Kappeyne van de Coppello a wordo tuma over dor di un otro ex embahador , sr. Bart von Bartheld. EMA

Kappeyne van de Coppello ta consciente cu tin mas pais den Caribe cu tambe kier fungi como gateway. Pero na mes momento e ta convenci tambe cu Aruba por ofrece mucho mas na empresarionan Europeo cu kier haci negoshi cu Latino-America. Aruba tin un bon sistema hudicial, un gobierno stabil, un clima agradabel pa haci negoshi, un bon infrastructura y presencia di dunadornan di servicio profesional cu ta domina 4 idioma y conoce e cultura di tanto Hulanda/Europa como esun Latino-Americano. Algun hende den e sala tabata sceptico y ta puntra dicon nan no por bay directamente haci negoshi cu paisnan Latino-Americano, enbes di haci’e via Aruba. Kappeyne van de Coppello a splica nan cu companianan grandi manera Shell y Unilever no mester ayudo, pero pa companianan mediano y chikito si esaki ta recomendabel. Pa nan ta mucho mas dificil sa unda pa bay den un pais straño y leu na unda otro reglanan ta conta. “Ta pesey mes cu MKB Nederland a haya e concepto di Aruba asina bon y ta asina entusiasma”. Director di TNO-Energy Mart van Bracht ta completamente

di acuerdo cu Kappeyne van de Coppello. “Mi ta papia di experiencia. Na 2011 nos a habri un oficina na Aruba. Sin ningun subsidio. Awe nos tin diez hende

den servicio y nos ta haciendo negoshi grandi den region. Sin e ayudo y sosten di Aruba nos nunca lo a logra. Nos ta e prueba cu e concepto di Aruba ta funciona”.


DIAHUEBS 16 JANUARI 2014

PAGINA 15

DIARIO

Prome Minister Mike Eman a entrega certificado y felicita nan y nan famia

Formacion Social ta presenta cinco hoben mas cu ta cla pa bira ciudadanonan ehemplar

Live

entertainment

by:

TBS Brassband & Super Dancers DJ Edson jr. Tsunami Youth Extreme DURO

ORANJESTAD (AAN): Un ceremonia memorabel a tuma luga den patio di Fort Zoutman na Playa na ocasion di e entrega di certificicado hobennan cu a completa e programa di Formacion Social. Prome Minister Mike Eman a compaña e hobennan aki firmando y entregando su mes e certificado na cada un.  E ta un logro cu ta yena Gabinete Mike Eman cu hopi satisfaccion di por a brinda un di dos oportunidad pa tin un futuro mas fructifero na hobennan den nos comunidad. Principalmente e tambe un logro personal pa cada hoben confirmando di kico nan ta capaz di haci pa nan mes y con contento nan ta haci nan famia na mesun momento. E hobennan cu a completa e trayecto di programa cu ta inclui entrenamento militar y educacion pa ofishi ta: Derik Burleson, Josue Dirksz, Rhakeem Samuel, Brian Orman y Sherman Zijlstra. Nan a cuminsa na januari 2013 como parti di e grupo number 3 di e Sociale Vormingstraject, iniciativa particular di Prome Minister Mike Eman. Na e momentonan aki grupo number 4 den su ultimo fase mientras cu grupo number 5 a caba di cuminsa. Registracion pa grupo number 6 cu ta inicia na

augustus proximo, ta habri. Entre e graduadonan a resalta e hoben Josue Dirksz di Mabon, pa cual motibo el a ricibi un plakkaat special cu ta duna e honor di ta e ‘Miho Graduado’ di su grupo. Lidernan di programa Formacion Social, mamanan y tur esnan presente a comparti un atardi di alegria y satisfaccion den un ambiente ameno. Famianan di e graduadonan a comenta cu e hobennan aki awo tin tur e hermentnan necesario pa hiba un bida beneficioso den nos comunidad. Presente na e ceremonia tambe tabata e participantenan di grupo number 5 cu a experiencia pa nan mes e momento special di graduacion cu un dia nan tambe por ta parti di dje.


DIAHUEBS 16 JANUARI 2014

PAGINA 17

DIARIO

Aki dos siman lo bolbe na mesa cu sindicatonan pa sigui dialoga

ORANJESTAD (AAN): Prome mandatario Mike Eman a duna su declaracion relaciona cu un reunion cu

sindicatonan riba edad di pensioen y a splica cu tin biaha tin un prehuicio ora cu un hende ta bai yega

cierto edad di pensioen. Tin hopi idea con por yega na empleadonan cu tin cierto edad. Mester tin cierto incentivo of ideanan pa crea certificacion di experiencia den trabou y esaki ta valioso. Prome minister Mike Eman a splica tambe cu ta duro pa cana cu cierto punto. Mester consolida tur cos cu un solo meta. Mester trece un fundacion di experto di e area laboral pa usa e experiencia di un hende a base di evaluacion. Mester por cana cu e documento pa e persona por haya su trabou. E idea di life long learning tambe ta importante. Bo ta drecha cu un evaluacion y ta sigui cana. E mundo di globalizacion ta sigui exigi cambionan di skills den cierto area di trabou. A base di esey mester bin cu e cursonan pa ofrece mas posibilidad pa un hende keda capacita su mes den e ramo di trabou. E raport di vitalidad tin hopi punto mas

segun prome minister Mike Eman. E vacatura cu ta bay habri pa e hobennan por keda habri un tiki mas largo pa esnan cu edad halto. Mester stimula e hoben pa keda mas aña pa prepara nan mes prome cu drenta e area laboral. Mester evita cu e hobennan ta drenta e sector laboral mucho trempan causando un problema pa esnan cu tin edad mas halto. A keda palabra cu e raport lo keda studia pa e partnernan y aki dos siman lo bolbe na mesa cu sindicatonan pa sigui dialoga. Tambe lo atende cu e parti di doñonan di trabou cu ta sinti cu tin problema pa hendenan di mas edad pa drenta e sector laboral. Prome minister Mike Eman a splica cu mester crea e espacio pa hende traha mas largo. Tin mas aspecto importante unda mester duna hende mas alternativa. E mesun donjo di trabou tambe por duna e empleado

un espacio pa keda traha pero den otro area di trabou cu e empleado por sigui crece y na mes momento traha espacio pa esun hoben cu tambe mester drenta. Prome minister Mike Eman a splica mas.  Tabata un dialogo social completo. E gremionan commercial y otronan cu a bay di acuerdo caba cu e cambio tabata presente. Prome minister Mike Eman a splica cu pa reuni bek asina trempan na comienzo di aña ta duna e espacio cu e partnernan social tin mester. Tabata tin peticion cu tabata existi caba pa un tempo y tabata pa un secretario constant. Gobierno ta contento cu a haya un hende adecua pa haci e trabou. Lo papia cu esnan cu ta encarga pa facilita e persona cu nan kier pone na disposicion na e dialogo social. E persona aki tabata envolvi caba di dialogo for di e area syndical algun tempo pasa.

Prome Minister Mike Eman:

Dr Jaime Falconi ta un candidato fuerte pa bolbe como director y e disponibilidad tey ORANJESTAD (AAN): E escogencia cu mester bin despues pa un director nobo di Hospital, hunta di supervision ta esun cu lo bay haci e escogencia segun prome minister a splica. Mester bay mira cu mente habri pa asina mira cual ta e mihor structura. Cada ken cu registra mester wordo evalua cual ta esun mihor. Jaime Falconi sigur ta un candidato fuerte pa bin bek den futuro pasobra su conocimento ta grandi. Tin disponibilidad grandi pa sigui traha riba cualkier problema cu tin den e proximo cuater lunanan. A puntra prome minister si e di tres director cu a wordo nombra tabata un done deal? Esaki no ta e caso segun e prome mandatario. Haya un hende cu conoce cuido medico y vloer di hospital ta algo importante. E

structura di un solo persona como director kizas e ta bira hopi pisa. Pesey escogencia di hunta di supervision y minister mester bay evalua e dianan cu ta bin. A mira disponibilidad di tur entre otro sindicato. Tin minister cu a haci hopi sacrificio personal pa bira sirbidor publico cu tur devocion pa drecha cuido

medico na Aruba segun e prome mandatario. Gobierno ta orguyoso cu nos tin un minister cu ta capacita. E minister anterior a pone tambe un base y fundeshi. Awor tin un minister cu lo sigui traha y construi riba e fundeshi pa cu e calidad di cuido cu nos ta desea pa nos pais.


PAGINA 2

DIAHUEBS 16 JANUARI 2014

DIARIO

Mike Eman riba dialogo:

E fondo di AOV a wordo scapa pa 16 mil pensionado mescos cu esun di APFA ORANJESTAD (AAN): Den un entrevista cu prome minister Mike Eman el a splica un tiki riba e reunion cu tabata tin despues cu nan a topa cu sindicatonan relaciona cu aumento di edad di pensioen. E prome mandatario a splica cu ta 16 mil hende cu a cobra pensioen tin siguranza cu e placa tey pa nan. Esaki ta pa motibo di e pasonan concreto tuma fin di aña. E gobierno aki a asumi responsabilidad di biaha pa scapa e fondo di AOV mescos cu a haci cu esun di APFA. Tabata tin raportnan cu a wordo traha unda a tuma diferente paso prome cu a yega asina leu. Tabata tin recomendacion den pasado caminda prome cu mishi cu pensioen mester a zorg pa e politico tambe duna ehempel y gobierno di AVP a tuma e paso pa trece e cambio y individualiza e prima y tambe e grondslag. A base di calculacion pa futuro e cambionan a yuda pero tog no suficiente. Prome minister Mike Eman a splica cu a sinta na mesa cu partnernan social. E direccion cu tabata mirando tabata tin hopi sosten y simpatia. Mester a bai hiba informacion na e miembronan y den e

temporada cortico entre eleccion, formacion di gobierno, dialogo social y fin di aña no a duna suficiente di tempo pa dialogo y tin tur hende hunto. Algun a sostene e cambio y otronan no. Asina a palabra cu esnan no di acuerdo cu ta sindicatonan pa atende e asunto. Awor a pone un

tempo mas largo pa mira si e alternativa cu a pone y pasa den parlamento tabata mihor. Aki dos siman ta haya nombernan di esnan cu lo drenta den e werkgroep pa mira e retonan di vergrijzing con lo paga pe etc. Tambe cu mas tempo y trankilidad e ta sigui pero pasonan importante a wordo tuma pero por cambia si ideanan mihor bini riba mesa. Tur hende lo drenta cu mentenan habri. Tin sindicatonan manera STT cu a presenta un raport. Tambe tin punto di agenda cu a wordo acorda caminda hunto cu e cambionan trece un vision y mihor maneho relaciona cu e vitalidad di empleadonan. Tin casonan caminda empleadonan cu yega cierto edad ta duro pa nan haya trabou. Tin cierto trahador cu ta wordo acerca pa duna nan pakete. Prome minister Mike Eman a splica cu e forma di mantene hende na trabou mas largo ta duna e espacio pa e hobennan tambe por prepara nan mes mihor. E retonan aki tabata existi caba prome cu a papia di edad di pensioen.

Un crecemento record di 18.23% den 2013!

ATA: Aruba a yama bon bini na 688.472 turista crucero

ORANJESTAD (AAN): Aruba Tourism Authority (ATA) a ricibi e cifranan final pa loke ta trata turismo crucero y ta satisfecho di anuncia cu Aruba a experencia un biaha mas un crecemento sumamente satisfactorio di 18.23% den e segmento aki. E crecemento aki a wordo registra pa e periodo di januari 1 pa december 31, 2013, unda cu na nos waf a yega un total di 688.472 turista. Den e mesun periodo na aña 2012, Aruba a ricibi 582.313 turista crucero. Pues, Aruba a ricibi 106.159 turista mas na 2013, compara cu 2012. Pa loke ta e cantidad di barco cu a bishita Aruba,

cifranan ta mustra un crecemento cu 63 yamada adicional (cruise calls). Ora compara 2012 (294) cu 2013 (357), esaki ta sali un diferencia positivo di 21.42%. E lunanan durante cua mas turista a yega Aruba riba barco na 2013 tabata januari (64 yamada y 118.542 pasahero); december (49 yamada y 96.136 pasahero), maart (44 yamada y 84.229 pasahero) y februari (43 yamada y 88.888 pasahero). Den un luna mas keto, esta augustus, cual ta cay den ‘low season’ pa crucero den Caribe, Aruba a ricibi 9 barco cu 21.470 pasahero. E balor di e turista cu ta bishita Aruba riba barco

ta considerabel. Y, no solamente pa e placa cu e ta gasta aki durante su estadia cortico. Cada un di e turistanan aki ta wordo considera como turista cu potencial pa bolbe Aruba pa un estadia mas largo y e mercadeo di ATA, hunto Ministerio di Turismo, Aruba Ports Authority & “partners” ta dirigi den e direccion aki tambe. Ademas, cada persona cu bishita Aruba y ta papia bon di nos isla cu nan amigo, famia y coleganan ta yuda promove nos industria. Analisando e cifranan final, por mira cu aunke cu Aruba su industria di turismo a proyecta, o sea tabatin reservacion pa barco crucero pa 370 yamada, na final di dia e cancelacion di 13 yamada no a causa un impacto mucho grandi riba e crecemento stabiel y fuerte den cantidad di bishitante. Entre e cancelacionnan tabatin seis yamada di e barco Freewinds, dos di Caribbean Princess y un yamada den caso di e barconan Coral Princess, Delphin, Grandeur of the Seas, Brilliance of the Seas y Disney Wonder.

E proyeccion - cual ta basa riba e reservacionnan cu companianan ta haci na e waf di Aruba- pa december 2013 tambe tabata un poco mas halto di loke el a resulta en realidad pa loke ta trata cantidad di turista, unda cu a conta riba un total di 100 mil turista y a resulta cu tabatin casi 4000 bishitante menos. Por conclui cu den caso cu e yamadanan aki si a tuma luga y e total di bishitante na december lo tabata 100 mil, Aruba lo a conoce un crecemento un poco mas halto, pues di 20% di e negoshi crucero, cual tabata originalmente e pronostico di ATA pa 2013. Pa loke ta e cantidad di yamada, esaki

si a resulta mas cu 20%, o sea 21.4%. E bon bini caluroso y bon servicio cu e turistanan crucero ta ricibi na Aruba y e entusiasmo y profesionalismo di e partnernan den turismo y comercio, ta entre e puntonan mas fuerte di nos isla. E capital humano, combina cu e desaroyonan positivo y grandi den e industria pa loke ta trata e diferente servicionan di tour y actividad y sigur nos beachnan limpi, trankilo y bunita, Aruba ta wordo considera pa companianan di barco crucero como un di e destinacionnan mas atractivo pa ofrece na nan clientenan.


DIAHUEBS 16 JANUARI 2014

PAGINA 3

DIARIO

Situacion tenso cerca polisnan!

Alto comisario a duna di conoce cu e promocion tabata robes Awe mainta tin reunion pa miembronan di SPA na POVA

ORANJESTAD (AAN): Un biaha mas tin inkietud den cuerpo policial unda cu promocionnan ta wordo haci dilanti di otro y riba otro. Presidente di sindicato SPA sr Angelo Davelaar ta duna di conoce solamente un persona a wordo promovi como Hoofdagent y a haya su landsbesluit. Sinembargo full e klas cu tabata Brigadier eerste klas hunto cu e polis cu a wordo promovi tambe tabata den e mes un klas unda cu tur mester a wordo promovi como hoofdagent pa hunto haya nan landsbesluit manera ley ta stipula. Actualmente e klas completo ta haci e funcion di Hoofdagent pero nan no ta promovi y tampoco no tin nan landsbesluit pa asina por cobra di e posicion cu nan a studia pe

y ta trahando pe. Sinembargo presidente di SPA a tuma contacto cu Alto comisario Dolfi Richerson y a duna di conoce cu e promocion tabata robes cu a wordo haci. Actualmente tin un klas completo cu ta sinti cu nan ta wordo laga un banda siendo cu nan tambe tin e mes un derecho pa e promocion aki ya cu tur a gradua pa ta un hoofdagent. E situacion aki no ta prome biaha ta pasa den cuerpo policial tin biaha ta purba

Homber haya drumi den plas di sanger na San Miguel

ORANJESTAD (AAN): Diaranzon anochi polis a wordo manda poco pura den direccion di San Miguel. Na un cas cu apartamento desde mainta e habitantenan no a mira un habitante. E doño di e apartamento a dicidi di drenta e apartamento net prome cu polis a yega. El a bin topa cu e habitante benta riba vloer den plas di sanger. Mesora e

polisnan cu a yega a pidi presencia di ambulance. E persona tabata hala rosea pero no tabata reacciona. E tabata tin corta na curpa y tambe wowo. Kico a pasa cune no ta conoci. Ambulance a bay cune hospital. E tabata keto bay for di conocimento. Polis a mas bien tuma algun dato pero lo busca drechi despues di e situacion. E persona ta un adulto.

di evita pa e situacion no pasa pero actualmente keto bay tin situacionnan cu ta pasando y na unda cu ta trece un inkietud pa e otro polisnan cu tambe ta traha duro y tin nan derecho. Segun presidente di SPA un par di luna atras tin un situacion similar a pasa unda cu tin algun hoofdagent cu ta wardando nan landsbesluit, pero e otro grupo cu ta sigui nan si a haya nan promocion y ta hayando mas placa cu esnan cu tin mas aña den servicio di cuerpo policial cu e otro. Esaki ta situacionnan cu ta trece frustracion den cuerpo policial. Antes PNO tabata e departamento cu tabata tin tur papel na ordo y ta regla e posicionnan di e polisnan pero actualmente Departamento di

recursonan humano (DRH) ta trahando riba tur cos, pero na final ta Alto comisario Dolfi Richardson ta esun responsabel na momento cu e pone su firma bao di papel pa otorga e landsbesluit segun presidente di SPA. Awe mainta sindicato SPA tin reunion cu tur su miembronan y ta pidi pa ta presente na POVA 10or di mainta pa asina papia riba e situacion y sa kico ta loke ta reina bao di e otro polisnan pa nan promo-

cion como Hoofdagent. SPA a trata di haya contacto cu minister di husticia riba e situacion aki pero no por a haya contacto cu ne pero si a laga responde cu su coordinador pa por papia riba e situacion aki, pero tampoco minister no a tuma contacto bek cu sindicato. Sinembargo mando policial si ta na altura y a duna di conoce tambe cu e ta un situacion cu a pasa robes y no lo por hala atras mas. Sinembargo e resto di klas a keda perhudica, awor ta keda na altomando pa bin dilanti y trata di drecha e situacion pa promove tur e resto di klas manera nan merece y tin derecho riba dje. Tur hende ta haci fout, pero na caminda mester por drecha loke a wordo daña y duna cesar loke ta di cesar.

Prome Minister Mike Eman:

A firma un acuerdo cu hunta di supervision y Dr Falconi lo keda cuater luna mas ORANJESTAD (AAN): Durante entrevista cu prome minister Mike Eman a puntre con ta bayendo cu e intervencion di gobierno pa e asunto di nombracion di director di hospital. Tabata wordo papia cu kier logra un di tres director pa hospital. E director actual Jaime Falconi tin algun tempo caba haciendo e trabou. Tin e hunta di supervision di siete miembro cu ta controla e hunta di maneho. Gobierno mes tin poco poder den e hunta di supervision pasobra no tin e cantidad di miembro necesario pa por tuma un decision riba nan mes. Den e caso specifico di nombracion di director nobo tabata tin un situacion caminda e hunta di supervision no kier a sigui cu e directiva actual di hospital. Kier e termina e contrato. Tin un minister nobo cu tabata merece un trankilidad na hospital pa asina tur stakelholder por a yega na un entedimento mihor posibel. Na Hospital tin hopi cos cu mester bay sosode. Pa maneha e cambionan cu tin ta retonan importante cu hopi

deseo pa Aruba por duna te hasta servicio mas den region. Aruba ta conkistando un nomber como un pais cu lo bay crea un pilar  den cuido medico pa local y esnan di afo. Pa minister Schwengle ta importante pa e tin e trankilidad pa haya e mihor personanan pa carga e responsabilidad cu tin. Un despedida di dokter Falconi lo no duna e trankilidad mirando e aprecio grandi di hospital mes y gobierno mes mirando e forma cu a atende cune desde cu el a asumi e responsabilidad. Sin duna ken tin razon of no a pidi pa tog wanta un rato e discussion  dunando minister Schwengle e espacio pa tuma

e mihor escogencia. Prome minister Mike Eman ta contento cu despues di algun dia di deliberacion caminda a firma un acuerdo cu hunta di supervision y Dr Falconi lo keda cuater luna mas. Awor e minister tin e tempo pa sigui traha riba su escogencianan. E director Falconi tin e gana grandi pa yuda drecha e cuido medico. Mescos gobierno a pone e persona di Dr Schwengle pa yuda drecha e calidad di cuido medico. Awor e postura di cada uno a logra pa yega hunto pa e espacio cu mester. Asina por duna contenido na cuido medico manera mester y structura di hospital.


PAGINA 6

DIAHUEBS 16 JANUARI 2014

DIARIO

MEP:

Gobierno kier limita responsabilidad di Banco Central, pero ken mester paga e cuenta? Pueblo! ORANJESTAD (AAN): Segun Partido MEP, Minister Juan David Yrausquin a pidi Parlamento pa limita e responsabilidad di Banco Central pasobra e Banco y su funcionarionan ta coriendo riesgo di wordo responsabiliza di erornan di e banco. E exoneracion aki ta contra tambe pa otro hende cu ta hasi trabou pa e Banco. Den e ponencia aki tin algun eror di pensamento fundamental. Pa cuminsa a base di Codigo Civil ningun empleado, ni director, ni presidente di Banco Central por wordo teni responsabel pa erornan cometi, cu excepcion di erornan deliberado. Ya caba esey ta bon regla den ley, pues no ta mira e necesidad pa bolbe regle.  Tercera partinan cu ta hasi un trabou pa e Banco usualmente ta cubri pa un seguro priva, pa nan responsabilidad, pues pa nan tampoco mester regla e asunto separa. Un abogado of accountant cu hasi un trabou pa e Banco, mester tin su beroepsaansprakelijkheid. Y si e no tin’e, Banco mester exigi’e, prome cu e hasi un trabou.   E exoneracion cu Yrausquin kier bin cune awor ta conta de facto solamente pa miembronan di Raad van Commissarissen, y pa otro hendenan cu no tin seguro priva pa esaki. Y akiden e peliger ta sinta. Si un hende asina comete un eror, y e causa daño cu su eror, ken mester paga pa e daño? Cu e ley aki sr. Yrausquin no

kier pa e persona mes carga cu e daño, ni e Banco. Pues, ta gobierno mes lo carga cun’e, y ken ta esun cu ta paga e cuenta di e eror? Pueblo di Aruba. EHEMPEL Un compania mericano a haya di un banco internacional, UBS Bank, recomendacion pa inverti na Aruba. E ta confia riba e informacion y ta inverti biyones na Aruba. Ta resulta despues cu situacion ta dificil, y e informacion cu UBS Bank a dune no ta corecto. E ta bati bancarota. E ta bai di biaha pa e UBS bank pa reclama nan y cuminsa un caso contra nan. UBS ta bisa, cu nan a basa

nan informacion riba cifra di nan representante cu ta traha pa Banco Central, pues no ta nan tin e culpa, sino Banco Central. Cu e ley aki den man Banco Central ta bisa, ami por ta responsabel pero gobierno a limita mi responsabilidad. Ken mester paga e biyones bek na final? Gobierno di Aruba, pueblo di Aruba.   E ley aki ta schuif tur cos riba lomba di pueblo di Aruba. E gran pregunta ta, kiko pueblo mes ta pensa al respecto? Kiko gremionan ta pensa? Kiko Dialogo Social ta pensa?   TRANSPARENCIA: E SOLUCION E ley aki tin consecuen-

cianan mucho mas grave cu tur hende ta pensa. Un

forma pa soluciona e problema aki ta di legalmente impone e obligacion riba Gobierno y Banco Central pa presenta cuentanan un of dos biaha pa aña durante un reunion publico den Parlamento, pa asina tur hende haya e mesun informacion y ta na altura di tur detaye financiero. Si ta asina, por duna exoneracion, pasobra e ora por lo menos bo sa kiko bo ta dunando. MEP lo entrega un amienda pa cambia e proposicion di ley aki. Pasobra si no tin e obligacion aki, gobierno lo sigui prohibi Banco Central di duna informacion.


Diahuebs Januari 16 2014

Pagina 12

LIDER DI MEP, MR. EVELYN WEVER-CROES NA GOBIERNO:

BO NO POR TIN PODER SIN MESTER DUNA CUENTA Den tur organizacion, te hasta den un team di football, ora bo kier duna decharge, mester duna cuenta. Bo no por duna exoneracion sin sa kiko bo ta duna, sino ta un check blanco bo ta duna. Den e caso aki nos mester pa gobierno ta habri cu parlamento y duna cuenta prome cu duna exoneración na Banco Central. Dicon gobierno no ta permiti Banco central publica su anual report mas? E ultimo anual report di Banco Central publica ta esun di 2011! Riba e website di Banco Central bao di anual reports, e ultimo reporte anual tabata di 2011, cu statements of the President. Despues di esaki no tin mas anual report anual!E report 2011, economic and financial developments a wordo publica dia 27 di Juli 2012, hunto cu e operational and

financial report 2011. Tin statistical report, pero esey no ta mesun cos cu e annual report! Pa 2012 tin solamente e raport publica dia 14 nov 2013, e Operational and Financial Report 2012, cu pa cuminsa NO ta un annual report, sino solamente un parti di dje. Den un anual report Banco ta duna un descripcion, un interpretacion y analisis di cifras. Además, mi tin dos dia ta purba habri e link, pero e no ta bai! Y mi ta sigur cu e anual report 2012 ta traha, pasobra conociendo e profesionalismo di ehecutivonan di e Banco, mi ta sigur cu e ta traha. Pero mi ta sigur tambe cu gobierno ta stroba e banco di publik’e, mescos cu minister presidente a prohibi hendenan di papia den e banco. RELATIO ANUAL 2011 CRITICO

MADURO HEAVY

EQUIPMENT N.V.

Santo pa Basha, Santo pa Pleister, Crushed Sand, Piedra, Tera pa Mata, Graniet. Tambe nos ta

Rosa Tereno, Coba Pos y Fundeshi.

ROOI BOSAL 49 TEL.: 585-1708 FAX.:585-6299

Den e ultimo anual report di 2011 den Statement of the President, pagina 4 Banco ta raporta cu e deficit di 2011 a yega 6.9% di e GDP, for the first time ever! Kiermeen pa prome biaha den historia e deficit a subi asina tanto, y pa colmo, despues según nos información el’a subi te na 9.7%. Talves ta pesey Banco Central no a wordo permiti pa publica e anual report? Den e ultimo anual report di 2011 den Statement of the President, pagina 4 Banco ta raporta tambe riba e debe nacional, den 2011 e debe a crece cu 391 miyon florin, the largest increase ever recorded, hciendo e debe total 2.8 biyon florin of 57.8% di GDP. Kier meen pa prome biaha den historia e debe a subi asina lihe den un aña te na 57.8%, cu porcierto según nos información despues a subi te na 67.2%! Talvez ta pesey Banco Central no a wordo permiti pa publica e anual report? TIMING PA EXONERACION TRESE DUDA

PIDI TA

Cu tin e deseo pa limita

e responsabilidad di Banco Central, ta comprendible. Pero e 'timing' ta trece hopi duda cune. Pasobra na e momentonan aki e minister di finanzas nobo a caba di admiti cu e situacion financiero di Aruba ta mas malo cu nunca. Acaso ta pasobra Banco Central tin hopi informacion riba e situacion financiero pesimo di nos pais, awor no kier of no por carga e responsabilidad mas? Hustamente awor cu nos no ta mirando e transparencia mas riba tereno financiero. Y hustamente awor cu Banco Central mes pa pusha mas responsabilidad riba otro institutonan, b a n c o n a n , companianan di seguro, etc., gobierno kier limita e responsabilidad di Banco Central. CONCLUSION “No comprende nos malo, nos ta comprende e deseo pa limita e responsabilidad pa Banco Central. Nos tampoco no kier mira ningun funcionario di Banco Central wordo responsabiliza ora cosnan bay malo. Pero compronde nos posicion: nos ta biba

den un tempo cu nos situación financiero ta hopi malo. Y den un situación cu poco información financiero. Y mes momento nos ta aumenta e responsabilidad riba otro instancianan, den sector priva. Hustamente na e momento aki, limitación di responsabilidad di Banco Central ta mustra hopi peculiar. Nos no por duna exoneración, sin duna cuenta. Den bida bo no por tin poder sin mester duna cuenta pa bo actonan. Nos por considera e exoneración aki si encaso nos no por haya ‘full disclosure’, cu Banco Central den reunión publico den parlamento. Nos lo presenta un amienda pa por logra esaki” líder di MEP a bisa den Parlamento. Finalmente el’a bisa tambe cu e impresión t’ey cu Banco Central ta cla pa tira serbete den ring y bisa Gobierno: bo asunto cu situación financiero di Aruba, y el’a urgi gobierno pa kita e impresion ey. Reunion ta continua awe, diahuebs atardi 3.30 p.m.

Press 16114  
Read more
Read more
Similar to
Popular now
Just for you