Issuu on Google+

DIASABRA 28 DECEMBER , 2013

7

Hopi proyecto grandi realisa na 2013 pa hiba Aruba como pais y su hendenan dilanti E aña cu ta cerando tabata uno hopi interesante for di e punto di bista gubernamental. Ademas di tabatin eleccionnan Parlamentario, Aruba a conoce otro aña di desaroyo den hopi tereno, como tambe retonan cu a keda surpasa. Pueblo a deposita su confianza atrobe den e ekipo cu durante ultimo cuater aña ta trahando duro pa cambia e direccion di e pais, expande su horizontenan, pero tambe modernisa su infrastructura y vision pa consumo di nos recursonan. Den e ultimo dianan di e aña, Gabinete Mike Eman I y II por mira atras atrobe riba un lista largo di logro tanto palpable den proyectonan di renobacion, mehoracion y construccion di via y facilidadnan publico, como tambe di e tipo cu bo no por wak bo dilanti, pero si bo ta sinti su efecto manera extra reparatietoeslag y mas reciente e rescate di e fondo di AOV. Pa loke ta trata e infrastructura di e isla por menciona e avancenan grandi haci den e proyecto di renobacion di henter Caya Principal, como tambe e ponemento den funcion di e tram y tambe e construccion di e remise, caminda e tramnan, entre otro, ta haya nan mantencion y tin nan luga di parkeo ora nan ta for di servicio. Faltando solamente dos plaza pa caba cu e detayenan mas chikito y tecnico, ya caba por aprecia y disfruta di un centro di ciudad completamente nobo, moderno y bunita. Hunto cune tin e Spiraal Rotonde cu a cambia henter e dinamica di trafico na loke tabata e luz di trafico dilanti di aeropuerto. E diseño bunita ta duna un tremendo prome impresion di nos isla na e turistanan y den proximo aña lo bay conecta cu e Green Corridor haciendo asina un coneccion directo y eficiente cu distritonan pariba di brug. Mas chikito, pero mesun util ta otro rotondenan chikito manera esun na cruzada di Piet (De La Sallestraat), Marathon y crusada di Wilhelminastraat/Avenida Milio Croes. Cu esakinan a logra alivia hopi e stancamento di trafico cu tabata sosode na e oranan piek di mainta, merdia y atardi. E edificio anexo na Bestuurskantoor a keda finalisa y ya caba ta den uzo como oficina di Ministerionan cu no mester huur otro edificio mas. Plaza Padu, e parti patras di Bestuurskantoor ta bay bira un centro di gobernacion cu varios instituto di gobernacion hunto den

un area. E edificio, cu antes tabata museo archeologico y despues tambe a fungi como oficina di BUVO ta den renobacion completo y ta premira cu esaki lo keda termina cuminsamento di 2014. Di e manera aki ta rescata nos monumentonan, ta mehora e funcionamento di e diferente entidadnan y ta crea un atraccion turistico mas pa e ‘Producto Aruba’. No por lubida cu e vision di un Aruba di cinco strea ta pa e pueblo en general. Pesey renobacionnan di bario tambe a continua durante 2013. Proyectonan di Madiki, Seroe Biento y sin laga afo Village ta bon ehempelnan pa menciona caminda barionan lubida, a haya atencion di Gobierno. Asina a percura pa haya un bon caminda asfalta, bon acera pa cana riba dje y tambe iluminacion publico. Tur esaki hunto ta creando barionan caminda hendenan ta mas atrae pa sali di nan cas y comparti cu biciña paso nan no mester guli mas stof, autonan no ta pasa duro y no mester ta den scur pafo. Hendenan di edad avansa, famianan di menos recurso y tambe esnan cu necesidad special tambe tabata parti di e progreso di nos pais y ta pesey diferente proyecto cu Gabinete Mike Eman I y II a completa den 2013 ta beneficia nan. Algun ehempel di esaki ta e viviendanan pa 55 Plus cu FCCA y Gobierno a construi na Sividi y Jaburibari. Tambe e compleho di vivienda n Diamatbergweg y Pos Chikito Complex. Y similar tin mas na caminda. Manera ta bon conoci caba, e rescate di edificionan publico y monumentonan historico ta un punto importante den e agenda di e gobierno aki. Den 2013 a conoce e restauracion y di edificionan emblematico manera ta Watertoren di Oranjestad, San Nicolas y tambe Corte di Husticia. Otro edificionan importante pa e desaroyo di nos comunidad, incluyendo un cantidad grandi di scolnan tambe a haya atencion. Aki por pensa riba renobacion di Dominicus College, La Salle College y sede di De Trupialen y esey ta djis den un bario so. Rond di Aruba tambe por menciona diferente tereno deportivo cu a haya e asistencia di Gobierno den renobacion di facilidadnan, como tambe compra y instalacion di ekiponan nobo. E desaroyo personal, como tambe esun di nos tur como un comunidad, a keda un prioridad pa nos gobierno. Proyecto di Formacion

Social ta sigui brinda hobennan un di dos oportunidad pa haci nan bida uno mas digno pa nan mes y nan famia. Nan ta wordo entrena den disciplina, pero tambe den un habilidad pa asina nan por integra den e mercado laboral y un bista nobo pa nan futuro. Di otro banda, e enfoke riba sostenibilidad ta continua y Aruba ta sigui marca pauta den e region y na nivel mundial cu e conscientizacion y cambionan cu kier crea. Green Conference, Green Education Symposium y Green ‘S’ Cool ta algun di e actividadnan cu ta pone luz riba e oportunidadnan cu ta presenta pa industria y compa-

nianan local por probecha den e sector aki, pero tambe kico cada persona como ciudadano por haci nan den propio cas y bida, pa contribui na un medio ambiente mas saludabel y mas duradero pa nos tur. Un di e iniciativanan cu mas a produci resultadonan den 2013 tabata e ‘Europe Meets the Americas’ (EMA). Un conferencia cu anualmente ta tuma luga den luna di mei y ta trece hunto ehecutivo di compania y corporacionnan di ambos continente riba nos isla pa explora e posibilidadnan di traha hunto, pero mas importante ainda, pa haci uso di e recursonan hu-

mano, institutonan y facilidadnan di nos isla. Nos isla por bira e mediador perfecto entre e continentenan Europeo y Americano. Di e manera aki Gabinete Mike Eman I y II ta determina pa crea e di tres pilar economico cu ta e exportacion di e conocemento di nos profesionalnan. Cu tur esaki, y loke tin pendiente ainda, tin tur motibo pa spera cu 2014 lo ta otro aña di proyectonan importante cu ta keda cla. Aruba por sigui ta un ehempel den e region pa loke ta un pais maneha cu innovacion, transparencia y eficiencia.


PAGINA 14

DIARIO

DIASABRA 28 DECEMBER 2013

Na e prome fieldtest cu sistema di siguridad bao awa na waf

Minister Drs. Alfonso Boekhoudt ta expresa entusiasmo cu e proposito di SOBEK

ORANJESTAD (AAN): Bao maneho di e ex-director di Aruba Ports Authority (APA), Drs. Alfonso Boekhoudt, kende ta e actual Minister Plenipotenciario di Aruba na Den Haag, a inicia un partnership entre TNO y APA pa cu pruebanan di un sistema di siguridad bao awa. E “waterside safety solution” aki cu ta hiba e nomber SOBEK, a worde getest na Aruba despues di un siman di grabacion, identificacion y registracion di zonidonan submarino. E ta un sistema den desaroyo cu a worde getest prome na Hulanda y awo den awanan tropical na Aruba. E meta principal di e aplicacion aki ta pa identifica acercamento di sambuyado, botonan chikito of otro obheto cu lo por drenta nos waf ilegalmente cu intencionnan menos bon. Aruba no tin un problema, ni preocupacion cu siguridad for di banda di lama na nos waf y no tin indicacion di retonan tampoco, Minister Boekhoudt a bisa. Den e caso aki, APA a sali di e punto di bista cu semper ta miho pa participa na testnan asina, pa ta un pionero y tin tur informacion necesario pa si den futuro tin reglanan internacional vigente riba tereno di “waterside security”, ya Aruba a sondea oportunidadnan y posibilidadnan. Minister Boekhoudt a expresa su entusiasmo specialmente concerniendo e di dos proposito pa cu e testmento di e sistema, cual ta concerni e bida den nos lama, esta e rifnan y e fauna dilanti waf di Oranjestad.

Aki a graba y midi e resonancia di e piscanan y otro formanan di bida marino, a identifica nan y durante e test por a wak cu tin dolfijn, snapping shrimp, parrotfish, y mas presente. Esaki ta un indicacion cu e rif ta saludabel, cual pa Minister Boekhoudt ta un hopi bon noticia. E intencion ta hustamente pa proteha e rif pa e keda saludabel y tambe pa provee un solucion pa unda cu kisas trafico di boto y barco por a afecta e rif pa trece back riba un bon nivel, segun e dignatario. El a splica cu ora e rif ta saludabel e ta keda riba awa y ta forma un barera y proteccion natural pa e waf. Si e rif no ta saludabel, esaki ta bay bao di awa y olanan mas grandi por

drenta e waf y suta e botonan y e waf mes, causando daño indesea. Cu e prome fieldtest no por a determina con saludabel e rif ta, pero ta un prome paso pa mehora y sigura e calidad di e rif, Minister Boekhoudt a expresa. Aruba Ports Authority awo pues ta trahando riba dos nivel den e preservacion di naturaleza y flora y fauna. E prome proyecto cu e instancia a inicia tabata riba tera, cu e repoblacion di mangrove (mangelnan) y e di dos lo ta pa monitor e bida bao di lama na e rif dilanti waf y brinda esaki miho proteccion, segun Minister Boekhoudt. APA y TNO a traha durante e desaroyo y ehecucion di e proyecto SOBEK tambe cu Aruba Reef Care Foundation y Aruba Marine Park Foundation. A conta cu presencia di e profesor cu a desaroya SOBEK, como tambe cientificonan di TNO trahando riba e proyecto.


Diasabra December 28 2013

Pagina 15

Discurso di Pasco di Nacemento di Gobernador Fredis Refunjol

E mensahe clave di Pasco di Nacemento cu nos ta recorda y celebra ta: Paz, Amor y Husticia cu mundo henter ta anhela y ta sclama p’e. Den un ambiente festivo di entre otro comemento, bebemento, partimento di regalo, famianan ta reuni pa celebra e fiesta spiritual y religioso aki. Nos tambe ta yama un otro Pasco bon bini. Laga nos para keto un rato y tuma tempo pa reflexiona: Ken nos ta? Ki nos ta haciendo cu nos bida cu nos a haya como un regalo? Kico nos ta haciendo cu nos talentonan? Con ta para cu e hende spiritual cu nos ta? Ban descubri di nobo nos balor como hende. Laga e luz den nos briya den nos moda di trata otro, pasobra e otro ta un hende mescos cu bo! Acept’e, respet’e y apreci’e, dun’e su balor. Nos ta crea den libertad. Nos tin un voluntad propio pa pensa, scoge, dicidi y actua na un manera responsabel. Nos tin e capacidad di por crea, di por tribi soña. Aruba, one happy island! Laga nos realiza esaki, trahando y cooperando pa hiba nos pais dilanti. Aruba ta nos, hendenan cu a nace of bin biba aki. Ta tempo pa haci nos Aruba un comunidad yen di speranza y positivismo. Un comunidad caminda por tin critica, pero critica constructivo pa eleva otro den su ser hende. Hendenan grandi y famoso, maestronan cu tabata tin un vision a sa di cumpli cu nan mision cu pasion. Nan ideal a costa nan hopi sacrificio. Nan meta pa logra nan soño tabata e caminda di paz y no violencia. Te awendia riba mundo henter nan ehempel a drenta historia, p’asina mundo por siña e caminda pa logra alcanza e vision cu nan tabata tin. Ohala nos pueblo di Aruba crea oportunidadnan, bira creativo y haci bon uso di nan talentonan na bienestar di nos pueblo y pais. No ta tur ora cos ta sali manera nos ta desea. Perseverancia lo yuda nos surpasa tur obstaculo, pesey ora bida duna nos lamunchi laga nos haci un dushi stropi di dje. Nos bida ta un regalo cu nos mester cuida y aprecia. Biba y laga biba. Union ta haci forza!

Bida ta digno pa celebra ora bo sa ken bo ta y sa usa bo talentonan optimalmente na bienestar di bo comunidad y pais. E Aruba di antes cu nos ta corda y ta anhela p’e bolbe, a pasa. Pesey awor nos tin e oportunidad pa haci di nos pais un lugar unda lo reina di nobo e trankilidad, amor y respet propio y pa otro su bida y su propiedad. Esaki ta exigi di cada un di nos un cambio di curazon cu ta trece un cambio di mentalidad. Pa hende por yega mas cerca otro lo mester di cooperacion, comprension, respet mutuo pa logra union. Pa logra e paz, amor y husticia hende lo mester acepta otro manera e ta y dun’e espacio pa e por crece. Pa logra husticia lo mester tin un bon comparticion di biennan pa asina tur hende por sinti con pa hiba un bida dignamente. E hende mester siña coopera y traha hunto riba tur tereno pa logra e meta fiha. Recientemente nos a haya e bishita di nos Rey y Reina. E bishita aki tabata tin efecto riba nos paisnan den Reino Hulandes. E lazo di union, di amistad y e simplesa tabata refleha cooperacion. Na Aruba tabata reina un entusiasmo, un alegria cerca grandi y chikito y por a sinti cu nos ta forma parti di e Reino

Hulandes. E bishita aki a move tur pueblo di e paisnan den Reino y asina nos por a sinti e cooperacion bao di nos pueblonan pa laga Rey y Reina sinti nan mes na cas. Hobennan di Aruba a resalta den nan contacto cu e pareha Real. Nan a sa di representa A r u b a dignamente mustrando nan talentonan. Hobennan boso ta Aruba y su futuro. Eherce boso talentonan riba tur tereno, tanto cultural y spiritual. Haci bon uso di boso enseñanza, educacion y formacion. Pone semper boso dilanti un meta y bay p’e cu determinacion y perseverancia. Nos muchanan cu ta creciendo tin derecho riba proteccion, cuido y respet pa nan tambe por haya bon ehempel y crece den un ambiente cu ta yuda nan lanta cu balor. Nos pensamento ta bay tambe na nos grandinan cu a yuda edifica Aruba cu nan trabao y ehempel. Nan tambe merece nos atencion, aprecio y amor. Laga nos tuma tempo pa nan, scucha y siña cua ta e balornan cu nan ta carga den nan curazon. Corda tambe esnan den necesidad pa un of otro motibo. Mar’e dia di Pasco aki habri nos bista spiritual pa nos por cuminsa biba di berdad y duna otro un man p’e tambe sinti cu e tin derecho di existi. Ohala e Pasco aki yuda nos pa bira e hende, ta e hende, cu nos mester ta, dispuesto pa ta un hende cu balor propio, un shon di hende. Un hende cu su derechonan pero tambe su debernan. Cu e Pasco aki paz, amor y husticia por reina den cada curazon, hogar y riba mundo henter, specialmente riba nos dushi isla di Aruba. Mi ta desea henter nos poblacion, tambe na nomber di mi esposa, un feliz Pasco y un Aña Nobo 2014 yen di prosperidad.


281213