Surselva Tourismus AG Glennerstrasse 22a 7130 Ilanz Schweiz
Tel. 0041 81 920 11 00 Fax 0041 81 920 11 01 info@surselva.info www.surselva.info
Communicaziun allas medias dils 3. da december 2025
STÄDTLI AVIERT: Il marcau vegl da Glion envida ad in suentermiezdi d‘advent aviert. Glion, ils 3. da december 2025 Cul Städtli aviert setransformescha il marcau vegl da Glion la sonda, ils 13 da december 2025, dallas 14.00 entochen las 19.00 en in spazi aviert per s’entupar. L’occurrenza envida da spassegiar tras las gassas historicas, da visitar differentas fatschentas e casas culturalas e da guder la diversitad dill Städtli en in'atmosfera persunala e schluccada. Surselva Turissem SA sustegn quei niev format che renda vesibels il marcau vegl sco liug viv ed animau e plidenta aschia ton hosps sco era indigenas ed indigens. Il marcau vegl sco spazi d’advent viv Pil Städtli aviert arvan numerus acturs lur portas e creeschan atgnas pintgas contribuziuns che lain resentir igl advent a moda fetg differenta. Fatschentas, ateliers, casas da cultura, stizuns da secund maun, bars, la biblioteca e la baselgia evangelica separticipeschan activamein. Entgins loghens envidan ad activitads creativas, auters presentan art e design e puspei auters porschan la pusseivladad da reflectar ni da star ensemen. Mintga porta creescha in’atgna atmosfera e gida da guder quei suentermiezdi il Städtli sco spazi variont, maneivel ed aviert. Alice Bertogg, menadra dil biro d’informaziun da Glion e responsabla per products da cultura tier Surselva Turissem SA, ha iniziau il project e vesa en quel ina contribuziun impurtonta pil spazi da cultura e sentupada regiunal. Ella declara: «Il Städtli aviert duei menar ensemen a moda sempla e nunsfurzada persunas da tut gener. L’atmosfera nescha tras portas aviartas, discuors spontans ed il plascher da scuvrierer communablamein scazis ch’ein magari zuppai. Il marcau vegl semuossa duront quei suentermiezdi aschia sco quei ch’el ei propi: multifars, accessibels e plein caracter. Igl ei bi da veser contas persunas ed instituziuns che s’engaschan per emplenir quei niev format cun veta.» Advent denter creativitad, cultura e sentupadas Las visitadras ed ils visitaders spetga in gir variont tras il Städtli. En sala dalla Casa Cumin envida la coordinatura da sport dalla vischnaunca Ilanz/Glion a moviment ed experiment. Denter auter presenta ella la nova crusch da ballontscha ch’ei vegnida installada uonn a Glion. El coworking7130 san ins empruar lavurs creativas da macramee e concepir aschia pigns regals. Calamandrin presenta in’exposiziun d’advent captivonta ed ella zezzaneera – il spazi per art e cultura - stattan la fotografia ed il design en il center. La Trucca e la stizun 3 1⁄2 Hosenstore envidan da sfugar e scuvrir, ferton che la pleiv evangelica envida da reflectar e guder in mument quiet. La biblioteca da Glion presenta cudischs ed ideas per regals adattai ed ella Jackson sco era ella Strocla Bar datti muments da gudiment cumbinai cun bialas sentupadas. Aschia sefuorma ina purschida multifara che colligia a moda natirala la cultura, la creativitad ed il gudiment. In Städtli che colligia Cul Städtli aviert signalisescha Glion in temps d’advent aviert, culturalmein variont e nua che la cuminonza stat el center. L’occurrenza ei concepida sco purschida sempla che scaffescha plascher da s’entupar ed accentuescha l’atmosfera particulara dil sulet marcau vegl en Surselva. Medemamein muossa ella il potenzial dil Städtli sco spazi attractiv per formats futurs da cultura e da sentupadas che surveschan ton a hosps sco era ad indigenas ed indigens. Invit Il Städtli da Glion daventa ina casa aviarta. In suentermiezdi per scuvrir, s’entupar e guder duront il temps d’advent Sonda, ils 13 da december 2025, dallas 14.00 entochen las 19.00 el marcau vegl a Glion.