Page 7

RM

Pled sin via

En sia broschura «Politicamain, chapis Vus?», publitgada l’onn 2003 per il giubileum da 200 onns da la Chanzlia federala, As ha la Secziun da terminologia preschentà 60 terms da basa dal sistem politic svizzer. Dapi quella giada s’ha la legislaziun concernent ils dretgs politics sviluppada. L’onn electoral 2011 è l’occasiun inditgada per actualisar e cumplettar la terminologia da quest champ tematic che reguarda ed interessa tut las burgaisas e tut ils burgais da la Svizra. Quest glossari tracta 135 terms essenzials dal sistem politic svizzer. Igl è caracteristic per nossa «democrazia directa» ch’il pievel – numnà er «suveran» – participescha directamain a las decisiuns politicas dal pajais tras votaziuns ed elecziuns. Il sistem politic svizzer è damai magari cumplex, tranter auter er pervi dal federalissem cun la participaziun activa dals 26 chantuns e pervi dal plurilinguissem. Las quatter linguas naziunalas èn ina vaira sfida per las instituziuns statalas svizras che ston garantir a mintga burgaisa ed a mintga burgais en sia lingua tut las infurmaziuns ed enconuschientschas necessarias per ina participaziun activa a la vita politica. Il fatg ch’er l’englais vegn resguardà en tscherts contexts è lià al basegn creschent da la Svizra da s’avrir vers il mund ed a l’interess internaziunal per il «model» politic svizzer. Quest glossari instructiv è il resultat da la collavuraziun fritgaivla da la Secziun da terminologia e da la Secziun dals dretgs politics da la Chanzlia federala. Ils terms na vegnan betg preschentads qua en urden alfabetic, mabain tenor in urden tematic ch’è structurà en nov grondas tematicas da las instituziuns fin als sistems politics, da las proceduras als divers geners da votaziuns. Questa broschura na furnescha damai betg unicamain infurmaziuns linguisticas, offrind er definiziuns ed en tscherts cas explicaziuns cumplementaras, permetta ella d’encleger e d’emprender meglier quests terms per part magari cumplexs. In index en mintga lingua permetta da chattar tut ils terms tractads e lur terms equivalents en las autras linguas, grazia ad in numer che renviescha al numer dal lemma. Tut ils terms ch’ins chatta en questa broschura sa chattan er en TERMDAT, la banca da datas terminologica da l’administraziun federala. En TERMDAT na chattais Vus betg mo ulteriuras infurmaziuns davart ils terms, sco contexts, explicaziuns u recumandaziuns davart lur diever, mabain er tut las funtaunas utilisadas per questa lavur e blers auters terms en connex cun ils dretgs politics.

7

ABC der politischen Rechte  

Das EBOOK der Schweizerischen Bundeskanzlei zur politischen Terminologie in fünf Sprachen.