ekonomija@ruskeslovo.com
Вєдно з Ґораном на полю робя и його супруга Марияна и брат Борис, а вельо му помага и мац Милосава и дзеци Лука и Сара. Задовольни є же су зложни и же себе помагаю. САДЗИЦ НА ШПАЛИРУ ДРАГШЕ, АЛЄ ШЕ ВИПЛАЦИ Прешли рок нє бул подли за огурки, медзитим, ноци були жимни, та нацинє одруцовало плоди, котрих анї нє було тельо як прешлих рокох. Кашовсково огурки пестую на шпалиру, лоза ше цага по мрежи котра утвердзена за слупи. Гоч тот метод продукциї драгши як класични способ, кед ше нацинє огуркох цага по жеми, заш лєм важне же дава вецей плоди. Пестую их под фолию, а шаце садза ручно, директо на места и до жеми, на розмак од 25 центиметри и на вкупней длужини од три тисячи тристо метери. Яки урожай будзе того року ище нє мож одгаднуц. Затераз поставели фолию на жем, а садзиц их буду док жем будзе цеплєйша, понеже штредком априла ище вше була жимна. – Прешлого року зме огурки посадзели штредком мая. Перши плоди ше обераю о мешац потим як рошлїна зидзе, углавним у юнию. Прешлого року зме мали два тисячи килограми огурки на тристо метери. То досц добре. Огурка ше муши кажди дзень допатрац по програми котру зме достали, прикармйовац по системи капка по капку. Поряднє ше дава калиюм, калиюмнитрат и друге, цо добре же би плод бул квалитетни – гварел Ґоран. Продукция огуркох на шпалиру драгша и вимага поряднє одламованє фатюгох, треба дзвигац и привязовац лозу. Предносц вертикалного пестованя огуркох же ше длужей отрима здраве нацинє, та длужей дава плоди у одношеню на огурки хтори ше продукує на жеми, бо ше там часто, док ше их обера и прекрачує, поґажи по нациню, очкодує ше го и воно скорей препада, нє квитнє и нє дава плоди. – Кед ше садзи менши поверхносци, шицки роботи постарча поробиц члени фамелиї, вец мож и заробиц, бо ше нє муши плациц наднїчарох. Под час сезони обераня супруга става вчас рано, на пейц годзин, и обера огурки по седем або осем рано, а вец пополадню, док я придзем з роботи, идземе и обераме вєдно. Кед добра хвиля и кед шицко у шоре, огурки ше обера сто днї – гварел Ґоран, котри припознава же би без таких условийох як цо тераз ма, а то сиґурни одкуп, помоц фаховцох и доставанє шицкого потребного репроматериялу, нє пестовал огурки. Барз добре же єст заґарантована и напредок позната цена за кажду класу, по велькосци огуркох, а и же ше одкупи шицко цо ше випродукує. Кед ше сце заробиц, треба порядно оберац 30. АПРИЛ 2021.
и водзиц рахунка и же би огурки нє преросли, алє же би ше мало цо вецей тоти дробни, цо иду до першей и другей класи. Кашовсково пошвидко буду класц слупи и мрежу на полю на хторим по сад за огурки, потим буду розсадзовац парадичи, паприґу, та вец и бостан. Вец тото шицко поряднє допатрац, оберац, предавац. Роботи будзе по жиму. „ГРАЩКОВ ВАЛАЛ” Дюрдьов дакеди бул познати по продукциї гращку, а аж познєйше по ґереґох, мал єден час и у народзе познату назву „Гращков валал”, гоч ше тоту заградкову рошлїну уж давно нє садзи у дюрдьовским хотаре. Но, Кашовсково у тим винїмок, и ище вше нє одуставаю од гращку, гоч им прешлей єшенї у жеми, на полю, змарзнул. Гращок подноши жимни температури до минус седем, а прешлей єшенї були и минус петнац и нїзки температури без шнїгу. Понеже шаце гращку за єден ланц кошта коло 50 тисячи динари, як гваря, уж на початку су у минусу. Алє нє одуставаю, та го и того фебруара ознова посадзели. Того року буду мац и бостану, ґереґи и динї, парадичи и паприґу. – Наздаваме ше же будзе добри рок. Будземе мац вецей файти желєняви, бо думам же так лєпше, бо кед ше пестує лєм єдну файту желєняви, вец векши ризик, и кед урожай препаднє, препаднул ши цалком. А так, дацо препаднє, дацо ше уда, важне буц у плусу. Шицки свойо продукти предаваме у Новим Садзе, директно купцом або накупцом, на Кванташу або на Лиманским пияцу, дзе их предава мой власни брат Борис. Маме стаємних купцох. Квалитет найважнєйши и то купци препознаваю и почитую. У варошу лєпши цени як на валалє – гварел Ґоран. Кашовсково на полю маю и житарки и бетелїну, а у дворе и овци з котрима ше завера круг продукциї. – За шицко треба часу. Нїч нє мож на швидко и прейґ ноци. Потребне укладац, калкуловац и буц точни у роботи, же би ше ишло напредок – гварел Ґоран. ■
БУДЗЕ И БОСТАНУ Одлука же буду пестовац и бостан, була барз швидка, а на Ґоранову инициятиву. – Було мразу, та ми ше видзи же того року будзе мало овоци. Посадзел сом ґереґи и динї до пластенїку, а будзем их пестовац под фолию. Шицки тоти котри их плановали пестовац под тунелами почали их виношиц, алє ище вше рана жимни, єст мрази, та питанє як ше рошлїни отримаю. Старши гваря же кед нєт овоци, ґереґа ше будзе добре предавац и будзе мац добру цену – гварел Ґоран. Купци любя кед продукователь предава свойо, понеже на новосадских пияцох углавним предаваю накупци, та нє чудне же Кашовсково маю стаємних купцох.
РУСКЕ СЛОВО 11