133 4.1.1
MELLORAR O PRESENTE, SEMENTAR O FUTURO Os problemas ambientais xerados polo modelo de crecemento insostible que nos abocou á crise actual, (quecemento global, extinción de especies, deforestación, contaminación das augas, xeración de residuos, esgotamento de recursos, etcétera) teñen unha extensión planetaria. E Galicia non é allea a esta circunstancia. Curiosamente, a Xunta de Feijoo si. Reduciron en 312 millóns de euros, dende 2009, as partidas destinadas a políticas ambientais. Nesta mesma etapa, aumentaron a desprotección do medio ambiente, cunha lexislación ambigua e discrecional, no momento de eliminar a obrigatoriedade da avaliación ambiental estratéxica ou permitir que proxectos industriais con forte impacto saísen adiante sen condicionamentos ambientais. En Galicia tócanos aos socialistas perseverar na loita contra a contaminación nos medios urbanos e rurais, así como deseñar unha política rigorosa na xestión de residuos. Por non falar da prevención dos incendios forestais ou a mellora da calidade das augas continentais e marítimas. Na tarefa de acadar unha Galicia máis sostible, a educación dos cidadáns e a súa implicación resulta crucial. Os socialistas consideramos que Galicia é quen de afrontar os retos ambientais e darlle as solucións axeitadas. Debemos promover estratexias de adaptación ao cambio climático nas que dar solucións as manifestacións do problema (períodos de seca prolongados, choivas máis intensas, etcétera) e tamén de loita contra ese cambio. Retomaremos, actualizándoo, o Plan Galego de Acción fronte ao Cambio Climático posto en marcha polo goberno progresista. Nada o anterior será posible sen modificar o modelo de crecemento especulativo que xa fracasou e transitar cara a unha visión da sostibilidade a longo prazo na que o desenvolvemento económico, a protección social e a protección do medio ambiente vaian da man.