MẼBÊNGÔKRE
anẽ kubẽ mẽ ikôt àpêj tũm anẽ spi kam mẽ ̉o anẽ mẽmã kũm mẽ aprõn kêt anẽ o nĩja Mẽrere ngô mỳrỳri dja anẽ kute mẽ amã kabẽn mã anẽ. Nhỹm kam mẽ krĩbê ỹrỹ jã puru mã mẽnire kôt mrã kute mẽmã arẽj mẽ kôt mrãn bôj nẽ mẽmã kũm o nĩja arỳm Gorotire bôj anẽ. Nhỹm kam ari mẽmã kũm o nĩja Mẽrere mẽ ỳrỳ amõro mẽ akamama. Nhỹm kam mẽ krĩbê ỹrỹ jã kũm Mẽrere ỳrỳ mõro prãm kêt. Nhỹm ajte Mẽrere Gorotire jano kute mẽmã arẽj krĩ mã mẽ ỳrỳ mẽ ano. Nhỹm kam kàjbê mẽ ̉ã kati kràmti nhỹm Gorotire akubyt o krĩ mãmõ nhỹm kam Rõntujarô mẽ, Mãtino mẽ kra mẽ prõ ari Mẽrere kôt Altamira mãmõ Kamau kurũm ngô kôt kà kam mõn Kruwaràtobadjà mã kato nẽ amũ Kororoti kôt mõ. Nhỹm kam anfíbio ari pa amỳt kam Altamira mã aro mõ. Kute rinari ari kũm kabẽn mã aro mõ nẽ arõ mõn arõ pyka ̉ã ajarẽ nẽ kute ari ari krõ ̉ã ajarẽ nẽ kam ari kũm mỳjja kwỳ ngã ngôj, kubẽjaê, kàj, katok kubẽta angà, mỳjja jã nẽ mẽ ari kũm kungã nhỹm ari akubyt o pyka mã o mõn o bôj. Nhỹm ari Kamau kam bôj nhỹm mẽ ajte abẽmã kabẽn ajarẽ gumẽ ajte akubyt ba nhõ krĩ tũm bê Kukõkêtkrô mã anẽ, nhỹm kam mẽmy kwỳ Mẽrere kôt kute Mẽkrãgnõtire krõrõ mã kôt mõ, Mẽkrãgnõtire krõn kam ajte akubyt Iobal mẽ, Bekwyjti mẽ, Krwyjdjê mẽ, Atxyre mẽ Kẽtmy mẽ, Kẽnhõngô mẽ aro mõn aro bôj. Nhỹm kam mẽ ari kũm wãj nẽ garimpeiro mẽ seringueiro kute mẽnire parimã anẽ nhỹm kam mẽ tinprãm nẽ kam abẽn mã kũm gumẽ ajte akubyt anẽ, nẽ kam arỳm ngô kôt kà kam wabi Kamau mãmõ kam bôj nẽ kam ari ba. Nhỹm mẽ kwy Kamau mãmõ nhỹm mẽ kwỳ arek Kukõkêtkrô. Kam, kam Mãntino mẽ Kadjyre mẽ, Bepkàmati mẽ, Ykakôrô mẽ, Beprêrê ari kamama Mẽrere kute ĩaro mõrõ kam ari kamama nhỹm ari bôj nhỹm mẽ ajte pry ̉à Altamira mãmõ nẽ amu Belém mãmõ. Nhỹm Belém kam ari abẽn mã kabẽ spi nhõ bẽndjwỳrỳ mã kabẽn nhỹm kam Mẽrere ari kũm kubẽ mẽ ỳrỳ bôj jarẽ. Nhỹm spi kam mẽ ari kũm mẽ anhõ pyka tũm wã kam dja ga mẽ arek dja anẽ nhỹm kam mẽ kũm kĩkêt nẽ kati anẽ. Nhỹm kam Belém kam mẽ ari kũm kubẽ nhõ mỳjja kwỳ ngà nhỹm ari akubyt o pyka tũm bê Kukõkêtkrô mã o mõ kam nẽ mẽ ari kamama. Nà Kukõkêtkô kam nẽ mỳjja kumej kam purun kam tep kam mryn kumej nhỹm mẽ kam ajte kam arỳm akubyt ajte Kamau mãmõ. Nhỹm ajte mẽ kam kàjbê kam am iryn kam ajte ta abẽn wỳrỳ prõn nhỹm kam mẽ kwy ̉ajte akubyt ajte Kamau mãmõn kam ̉ã akati amajkrut nẽ amajkrut nẽ ikjê kêt, nhỹm kwỳ kũm Kukõkêtkrô kam am prãm nhỹm Kukõkêtkrô kam mẽ am jã ajte Kamau kam mẽ jã o wakprõ. Amrẽbê nẽ pyka jã kam fazendeiro pyka jã kam ari ba nhỹm inhõ mẽ ajte abẽn mã kabẽn ajarẽ gumẽ ajte Kamau mã anẽ ba djãm djà tũm mã anẽ. Be pyka ajã kam mẽ tũm ̉ã ujarẽj nẽjá djam ã anẽ. Amrẽbê nẽ mẽ ari ba nhỹm kubẽ bôj ba arỳm pyka bê Kamau kam ari ba, be djãm ã amrebê anẽ tam nẽjã.
107