Siðareglur íslandspósts hf

SIÐAREGLUR ÍSLANDSPÓSTS 1.

TILGANGUR

Með siðareglum [1] Íslandspósts er verið að setja siðferðilegar [2] reglur innan fyrirtækisins. Þær eru leiðbeinandi fyrir starfsmenn m.a. varðandi hegðun, framkomu og umgengni. Siðareglurnar ná til allra þátta í starfsemi Íslandspósts og allra starfsmanna fyrirtækisins. Hjá fyrirtækinu viðurkennum við fjölbreytileika hvers annars og nýtum hann til góðs. Öll samskipti við samstarfsmenn og aðila utan fyrirtækisins, skulu vera opin og heiðarleg. Með því að virða hvort annað, verkefnin, viðskiptavininn og umhverfið tekst okkur að gera Íslandspóst að enn betra fyrirtæki. Með því að haga vinnulagi okkar í samhengi við gildi fyrirtækisins og með því að hegða okkur í samræmi við siðareglurnar, getum við stuðlað að háum siðferðilegum viðmiðunum í öllum þáttum starfseminnar.

[1]Siðareglur: Regla um framkomu manna og hegðun.

[2]Siðferði: Tilhneigingar einstaklings eða hóps til að gera það sem er rangt eða rétt. Skoðun um það hvað er rangt og rétt, gott og slæmt.

2.

MARKMIÐ

2.1. Markmiðið með siðareglum Íslandspósts er að setja siðferðilegan ramma innan fyrirtækisins sem byggir m.a. á gildunum Traust, Vilji og Framsækni. Með reglunum er leitast við að viðhalda heiðarleika starfsmanna og að tryggja að siðferðileg sjónarmið séu virt. Við viljum að Íslandspóstur sé þekktur fyrir hátt siðferði og jákvæða fyrirtækjamenningu.

2.2. Traust: Við höfum það orðspor að vera ábyrg og það eru grunngildi okkar að vera traustsins verð.

Við sýnum heilindi í samskiptum og vinnubrögðum, bæði inn á við og út á við. Við leggjum áherslu á skilvirkni og gæði þjónustu okkar og viðhöldum þannig trausti viðskiptavinarins.

2.3. Vilji: Við erum jákvæð og veitum framúrskarandi þjónustu. Við komum fram við aðra eins og við viljum að aðrir komi fram við okkur. Við erum kröftug og göngum rösklega til verka.

2.4. Framsækni: Við leitum að tækifærum og bætum stöðugt frammistöðu okkar. Við sýnum frumkvæði og metnað í starfi og sækjum þannig fram á við. Við erum óhrædd við að fylgja hugmyndum okkar eftir.

3.

HVERN SNERTA SIÐAREGLURNAR?

3.1. Siðareglurnar ná til allra þátta í starfsemi Íslandspósts og allra starfsmanna fyrirtækisins.

3.2. Starfsmenn fyrirtækisins bera ábyrgð á því að þekkja siðareglurnar og fylgja þeim í daglegum störfum.

4.

SIÐANEFND

4.1. Siðanefnd er skipuð af forstjóra.

4.2. Hlutverk siðanefndar er að hafa eftirlit með því að siðferðilegum viðmiðunum Íslandspósts sé framfylgt.

5. ÍSLANDSPÓSTUR ER ÁBYRGUR VINNUVEITANDI 5.1. Íslandspóstur er faglegur vinnuveitandi sem virðir grundvallarmannréttindi.

5.2. Hjá fyrirtækinu viðurkennum við fjölbreytileika hvers annars og nýtum hann til góðs. Við samþykkjum ekki óréttlæti eða mismunun vegna kynferðis, skoðana, aldurs, efnahags, trúarbragða, litarháttar og þjóðernis, fötlunar, kynhneigðar eða stöðu að öðru leyti.

5.3. Óhlutdræg viðmið skulu lögð til grundvallar við ráðningar, starfsþróun og ákvörðun launa. Rétt starfsmanna sem grundvallast á lögum, kjarasamningum, landslögum og alþjóðlegum venjum ber að virða.

6.

ALLIR STARFSMENN SKULU SÝNA RÉTTSÝNI OG ÁBYRGÐ

6.1. Starfsmenn Íslandspósts eru skuldbundnir til að fara að lögum, reglum og innri verklagsreglum, sýna ábyrgð í starfi og sinna því af öryggi og samviskusemi. Starfsmaður skal sýna réttsýni, umgangast aðra með virðingu og sýna af sér góða hegðun í viðskiptum og samskiptum við samstarfsmenn, viðskiptamenn og aðra samstarfsaðila.

6.2. Samskipti við birgja skulu byggjast á réttsýni og heiðarleika. Við ætlumst til þess sama af samstarfsaðilum okkar sem og að þeir starfi í anda siðareglna Íslandspósts.

7.

SAMSKIPTI

7.1. Öll samskipti við samstarfsmenn og aðila utan fyrirtækisins skulu vera opin og heiðarleg.

Samskipti við fjölmiðla skulu vera í samræmi við reglur fyrirtækisins og skal í öllum tilfellum beina fyrirspurnum til forstöðumanns Markaðsdeildar eða framkvæmdastjóra Markaðs-oog sölusviðs ef ekki næst í forstöðumann.

8.

GJAFIR OG ÖNNUR BOÐ

8.1. Starfsmaður má almennt ekki taka á móti gjöfum, þóknun eða þiggja þjónustu sem er til þess ætluð að hafa áhrif á störf hans innan Íslandspósts. Þar er meðal annars átt við boð á atburði, í ferðir og annað sem greitt er af öðrum en Íslandspósti. Þátttaka í slíkum atburðum skal samþykkt af stjórnanda.

8.2. Til eðlilegra viðskiptahátta telst gestrisni veitt innan skynsamlegra marka og þátttaka í félagslegum uppákomum. Ódýrar gjafir í tengslum við jól, hátíðisdaga eða önnur tækifæri er eðlilegt að gefa og þiggja.

8.3. Starfsmaður má ekki þiggja afslætti við kaup á vörum og þjónustu til einkanota frá aðilum sem Íslandspóstur á í samskiptum við, nema það bjóðist starfsmönnum fyrirtækisins almennt.

9.

VÍMUEFNI

9.1. Starfsstöðvar fyrirtækisins skulu vera vímuefnalausar. Ekki er liðið að starfsmaður sé undir áhrifum áfengis eða annarra vímuefna í vinnu og er þess vænst að það sé tilkynnt til næsta yfirmanns ef starfsmaður er eða hefur verið undir áhrifum vímuefna í vinnu.

10.

UMHVERFISMÁL

10.1. Íslandspóstur leitast við að vera til fyrirmyndar hvað varðar heilsusamlegt starfsumhverfi. Sem ábyrgur samfélagsaðili virðir fyrirtækið lög og reglur varðandi frákast, orkunýtingu og vistvænar lausnir. Sjá nánar í umhverfisstefnu fyrirtækisins.

11.

ÖRYGGISMÁL

11.1. Fylgja skal öryggisreglum í hvívetna. Starfsmanni er skylt að gera það sem í hans valdi stendur til að koma í veg fyrir saknæmar aðgerðir innan fyrirtækisins, sem og utanaðkomandi aðgerðir sem beinast gegn því.

11.2. Starfsmaður skal vera varkár og heiðarlegur í umgengni varðandi eigur fyrirtækisins, póstsendingar, vörur, upplýsingar og önnur verðmæti sem hann meðhöndlar fyrir viðskiptavini.

12.

SPILLING OG REFSIVERT ATHÆFI

12.1. Íslandspóstur sýnir ekki umburðarlyndi gagnvart spillingu, stuldi og eða annarri refsiverðri háttsemi í tengslum við vinnu fyrir fyrirtækið. Starfsmönnum er óheimilt að misnota aðstöðu sína gagnvart viðskiptavinum með refsiverðum hætti.

12.2. Spillingu eða annarri refsiverðri háttsemi er jafnan mætt með uppsögn eða brottvísun.

Meginreglan er sú að saknæm háttsemi er kærð til lögreglu.

13.

ÞAGNARSKYLDA

13.1. Starfsmenn skulu virða þagnarskyldu þá sem þeir gangast undir hjá fyrirtækinu.

13.2. Þagnarskylda er til að koma í veg fyrir að óviðkomandi fái upplýsingar sem geta skaðað fyrirtækið, starfsmenn eða viðskiptavini fyrirtækisins. Þagnarskylda gildir áfram þó ráðningarsamningur sé ekki lengur í gildi.

14.

BROT Á SIÐAREGLUM

14.1. Brot á siðareglum þessum geta haft þær afleiðingar í för með sér að viðkomandi fær tiltal, áminningu eða uppsögn.

14.2. Fylgja skal gildandi lögum og kjarasamningum. Taka skal tillit til réttlætissjónarmiða og sýna almenna varkárni. Samstarfsmaður skal meðhöndlaður af virðingu óháð því hvaða brot er um að ræða.

14.3. Siðareglur fyrirtækisins skapa engin sérstök réttindi til handa starfsmönnum, viðskiptavinum, birgjum, samkeppnisaðilum eða öðrum aðilum.

15.

EFTIRLIT

15.1. Innra eftirlit ofangreindra siðareglna liggur hjá siðanefnd, stjórnendum, eftirlitsaðilum og öryggisnefnd.

Siðareglur þessar voru samþykktar af stjórn Íslandspósts þann 6. nóvember 2017.