Jafnréttisáætlun 2014

ÍSLANDSPÓSTUR

JAFNRÉTTISÁÆTLUN 1. MARKMIÐ 1.1. Samkvæmt lögum um jafnan rétt og jafna stöðu kvenna og karla, (18.gr.laga nr.10/2008), er öllum fyrirtækjum og stofnunum með fleiri en 25 starfsmenn skylt að setja sér jafnréttisáætlun.

Markmiðið með gerð jafnréttisáætlunar fyrir Íslandspóst er að tryggja jafna stöðu kynjanna eins og getið er í lögum. Leitast er við að allir starfsmenn fyrirtækisins njóti sömu virðingar og hafi jöfn tækifæri til starfsframa. Allir starfsmenn sitja við sama borð óháð kynferði, skoðunum, aldri, efnahag, trúarbrögðum, litarhætti og þjóðerni, kynhneigð eða stöðu þeirra að öðru leyti. Markmið og gildissvið laganna er að koma á og viðhalda jafnrétti og jöfnum tækifærum kvenna og karla og jafna þannig stöðu kynjanna á öllum sviðum samfélagsins. Allir einstaklingar skulu eiga jafna möguleika á að njóta eigin atorku og þroska hæfileika sína óháð kynferði.

1.2. Íslandspóstur vill tryggja að fyrirtækið sé eftirsóttur og framsækinn vinnustaður þar sem leitast er við að gera starfsmönnum kleift að þróast í starfi og nýta hæfileika sína til fullnustu. Fyrirtækið setur sér það markmið að samskipti starfsmanna einkennist af virðingu og trausti og að kjör starfsmanna séu ávallt samkeppnishæf. Áhersla er lögð á fjölskylduvæn gildi og að starfsfólki gefist kostur á sveigjanleika í starfi eftir því sem við verður komið. Jafnréttisáætlun miðar að því að tryggja jafna stöðu starfsmanna og vinna gegn kynbundnum launamun og hvers konar mismunun með markvissu forvarnar- og fræðslustarfi. Íslandspóstur leggur jafnframt áherslu á að tryggja góðan aðbúnað og öryggi starfsmanna og leitast við að leggja starfsmönnum jafnan til þann búnað sem best er til þess fallinn að þeir geti sinnt starfi sínu af kostgæfni.

2. FRAMKVÆMD OG UMFANG 2.1. Áætlun þessi tekur til stjórnkerfis Íslandspósts og starfsmanna fyrirtækisins.

2.2. Jafnréttisnefnd er skipuð af forstjóra. Hlutverk jafnréttisnefndar er að fylgjast með lögum og reglum stjórnvalda varðandi jafna stöðu kynjanna, fylgja eftir framkvæmd jafnréttisáætlunar Íslandspósts og kanna ábendingar starfsmanna og viðskiptavina með tilliti til jafnréttis. Ennfremur er nefndinni ætlað að gera jafnlaunakönnun og endurskoða jafnréttisáætlun Íslandspósts með tveggja ára millibili.

3. STARFSMANNASTEFNA 3.1. Starfsfólk fyrirtækisins er valið af kostgæfni og lögð er áhersla á að starfsmaður finni að honum sé treyst í starfi sínu. Stjórnendum ber að sýna hæfni í samskiptum, sveigjanleika, frumkvæði og jákvætt hugarfar ásamt því að ná fram samheldni og góðum liðsanda á vinnustöðum fyrirtækisins.

4. AUGLÝSINGAR OG RÁÐNINGAR 4.1. Íslandspóstur leitar hæfustu starfsmanna hverju sinni og vill því geta valið starfsmenn úr öllu starfhæfu fólki á vinnumarkaðnum. Þess vegna þarf launastefna, aðbúnaður og umhverfi að vera jafn aðlaðandi fyrir bæði kynin. Jafnréttissjónarmið skulu metin til jafns við önnur mikilvæg sjónarmið við stöðuveitingar.

4.2. Í starfsauglýsingum skal þess gætt að höfða til beggja kynja. Heimilt er að auglýsa sérstaklega eftir öðru kyninu í störf þar sem hitt kynið er í miklum meirihluta. Heimilt er að beina konum í þær starfsgreinar þar sem karlar eru í meirihluta og körlum í þær starfsgreinar þar sem konur eru í meirihluta.

5. STARFSAÐSTÆÐUR OG KJÖR 5.1. Við úthlutun verkefna, tilfærslur í störfum og uppsagnir skal þess gætt að kynjum sé ekki mismunað.

5.2. Við ákvörðun launa og fríðinda skal þess gætt að kynjunum sé ekki mismunað. Körlum og konum skulu greidd jöfn laun og skulu þau njóta sömu kjara fyrir sambærileg störf í samræmi við 19.gr.laga nr. 10/2008. Það telst þó ekki mismunun að taka sérstakt tillit til kvenna vegna þungunar og barnsburðar.

5.3. Starfsfólk Íslandspósts skal eiga kost á sveigjanlegum vinnutíma, hlutastörfum eða annarri hagræðingu vinnutíma, þar sem því verður við komið. Þannig skal starfsfólki auðveldað að samræma fjölskylduábyrgð og ábyrgð í starfi. Konum og körlum verði einnig gert kleift að minnka við sig vinnu tímabundið til að sinna fjölskylduábyrgð, s.s. umönnun sjúkra barna, maka og foreldra.

5.4. Gott aðgengi og aðbúnaður fatlaðra starfsmanna skal tryggður á starfsstöðvum Íslandspósts.

6. MENNTUN 6.1. Við símenntun og þróun í starfi skal þess gætt að konur og karlar njóti jafns aðgangs að fræðslu.

Jafnframt skal leitast við að gefa starfsmönnum kost á því að takast á við sem fjölbreyttust verkefni í störfum sínum.

7. FRÆÐSLA OG RÁÐGJÖF 7.1. Starfsmönnum og stjórnendum skal standa til boða ráðgjöf í jafnréttismálum. Þetta á bæði við um störf þeirra og starfsaðstæður, s.s. kjör og samskipti á vinnustað, kynferðislega áreitni, valdbeitingu og önnur þau mál sem snúa að jafnrétti og samskiptum kynjanna á vinnustað.

8. ÍSLANDSPÓSTUR ER FYRIRMYNDAR VINNUVEITANDI 8.1. Áhersla er lögð á að Íslandspóstur sé eftirsóttur og framsækinn vinnustaður þar sem leitast er við að gera starfsmönnum kleift að þróast í starfi og nýta hæfileika sína til fullnustu. Að því er stefnt, að á grundvelli gildanna Traust, Vilji og Framsækni- sem og sanngjarnra tækifæra starfsmanna til

starfsþróunar og möguleika á samræmingu vinnu og fjölskyldulífs megi Íslandspóstur vaxa og dafna um ókomna tíð.

Jafnréttisáætlun þessi var samþykkt af stjórn Íslandspósts þann 26. júní 2014.