Issuu on Google+


DIABIERNA 14 MAART, 2014

15

Minister Alex Schwengle:

Cifranan di malesa di riñon na Aruba ta hopi halto Prevencion ta esencial Dia 13 di maart profesionalnan di Salud ta dedica na pone enfasis riba e importancia di un organo cu ta vital pa bida humano, esta e riñon. Na Aruba tambe mediconan y ministerio di salubridad ta subraya e siman aki e importancia di mantene e riñonnan saludabel y preveni cu ta presenta complicacion cu e organonan importante aki. Minister di Salud, dr. Alex Schwengle ta splica cu lastimamente e noticia tocante e cantidad di pashent cu problema di riñon na Aruba no ta positivo y cu na Aruba tin hopi, hopi problema y e cantidad di pashentnan ta creciendo. “Nos tin hopi pashent y e cantidad di pashentnan cu tin necesidad di hemodialyse ta creciendo enormemente,” Minister Schwengle a bisa. El a splica cu IMSAN tambe ta ofrece servicio di hemodialyse y a amplia e cantidad di stoel cu ta disponibel na 16, pero e pronosticonan ta alarmante y calculacionnan ta mustra cu pa aña 2020 lo tin “un exceso di pashent di tal manera cu ta bay costa nos budget varios miyon pa ubica tur e hendenan.” E cantidad di casonan di malesa di riñon a aumenta drasticamente y na 2008 Hospital a aumenta su capacidad pa hemodialyse; recientemente IMSAN a tuma over locual tabata antes Posada Clinic y tambe a amplia e cantidad di stoel disponibel pa ofrece hemodialyse. Desafortunadamente, ni cu e dos accionnan pro-activo aki, awe Aruba tin mas pashent pa hemodialyse cu e cantidad di stoel disponibel. Na cuminsamento di 2011 tabatin mas of menos 115 pashent y “awe nos

ta papia di 155 pashent, di cual un grupo ta wordo structuralmente dialisa na Colombia,” e mandatario a splica. E necesidad pa manda e pashentnan Colombia ta resultado di un crecemento den e cantidad di pashent – unda cu ta diagnostica TUR luna un of dos pashent MAS cu mester di dialisis y Aruba tin actualmente un capacidad maximo pa dialisa 122 pashent. Minister Schwengle ta añadi cu segun AZV y e specialistanan di riñon, o sea e nefrologonan, e cantidad di pashent lo sigui aumenta den e proximo cinco añanan cu mas of menos 50 pa 60%. Cu esaki, lo tin un aumento den e costo anual di dialisis, unda cu AZV ta premira cu pa aña 2020, lo gasta entre seis pa ocho miyon florin MAS cu a wordo inverti na 2012 den provee dialisis pa pashentnan. Cada pashent di dialisis ta costa 100 mil florin pa aña y si considera cu ta registrando

actualmente tur luna un of dos pashent nobo pa dialisis. Esaki sigur tin un impacto grandi den nos comunidad pa loke ta finansa, pero mester pensa tambe riba e impacto grandi cu esaki tin riba calidad di bida di nos populacion en general tambe.  “E grupo di pashentnan aki ta caracterisa di ta pashentnan di presion halto y/of ta pashent di diabetes cu ta descontrola. Cifranan ta mustra cu 50 pa 60% di pashentnan nobo di dialisis ta diabetico y 15 pa 25% di pashentnan nobo di dialisis ta sufri di presion halto. E 85% di e grupo aki ta yega mucho laat cerca e specialista di riñon y ta resulta cu nan mester cuminsa dialisa inmediatamente,” dr. Schwengle a bisa.   Esaki ta algo cu tin e nefrologonan y e minister hopi preocupa, pasobra e impacto riba e calidad di bida di e pashent ta hopi grandi. E calidad di bida ta

baha; y e parti mas lamentabel y desafortuna ta cu den 75% di e casonan cu ta hopi complica y mester di dialisis, e malesa di riñon por a wordo preveni. Minister Schwengle a subraya cu pues, “placa no ta bay ta e solucion. E solucion ta bay keda, manera a wordo bisa den pasado caba, prevencion!” E titular di salubridad a pone enfasis riba conscientisacion y accion pa prevencion di obesidad y e malesanan relata na esaki, cual ta diabetes y presion halto, cual ta dos di e causantenan principal di deterioro y malesa incurabel di riñon. Minister Schwengle ta resumi, cu mester cu pa nos mes, pa nos yiunan y pa e futuro generacionnan, Aruba mester crea un situacion cu ta sostenibel, un comunidad mas saludabel. Come mas saludabel, come mas fruta y berdura, move tur dia y pa por lo menos 30 minuut pa dia y purba di normalisa e peso y mantene un peso nor-

mal. Entre otro na momento cu un pashent di diabetes regula su cuminda y normalisa su peso casi e no mester di tuma remedi mas y esaki ta aplicabel pa e pashent di presion halto tambe. Pero tanten cu esaki no ta regula, e pashent no por neglisha of lubida, pero mester tuma su remedinan manera nan ta prescribi. E mandatario ta añadi e conseho pa evita alcohol, no  huma y evita uzo di salo, pa contribui na un miho salud. Finalisando, Minister dr. Alex Schwengle bisa cu si e comunidad ta biba mas saludabel, salubridad ta bira mas sostenibel y por wordo manteni mas sostenibel den futuro tambe. Minister Schwengle ta aplaudi e esfuerso conhunto e siman aki di Departamento di Salud Publico, SVb, IbiSA, IMSan, AZV y Hospital pa conscientisa nos comunidad.


DIABIERNA 14 MAART

, 2014

16

Centro di Nefrologia di Hospital a conmemora “Dia Mundial di Riñon”

E di dos diahuebs di maart ta e dia cu mundo medico ta conmemora Dia di Riñon, unda cu ta para keto riba e importancia di cuido di e organo vital aki. Ta haci uzo di e ocacion pa promove consciencia pa cu cuido y tratamento apropia. E aña aki e Centro di Nefrologia di Dr. Horacio Oduber Hospitaal ta enfoca riba e pashent mes tin diferente regalo y un treat special prepara pa e pashentnan. Ademas, e Centro a organisa un conferencia di prensa pa corda miembronan di nos comunidad di Aruba riba e importancia di cuido apropia di e riñonnan y Nefrologo dr. Romeo Kock a anuncia cu otro aña e departamento aki lo organisa un congreso un biaha mas pa comparti informacion relevante tocante diagnostico, cuido, y mas cu trahadonan den salubridad y otro interesadonan. Julien Garcia, di e dialyse

kliniek di Hospital a splica cu e pashentnan lo wordo malcria un poco cu un dushi treat, lo hunga un wega di bingo cu nan y lo tin diferente regalo, incluyendo T-shirt pa tur pashent y algun premio bunita. Garcia a gradici e sponsornan pa e dia aki, cual ta Lite Life (compania di transport pa pashent), La Linda, Marietje Printing, RBC Bank y Superfood. El a subraya cu ta importante pa pone enfasis riba e importancia di dialisis y mensahe principal pa e pashentnan, cual ta cu bida ta sigui y mester sigui apreci’e! Dr. Romeo Kock a splica cu actualmente na Aruba e situacion ta bao control pa loke ta e capacidad di servicio di dialisis, unda cu tin 85 pashent ta acudi na Hospital y 40 pashent na IMSAN pa hemodialyse y tin 20 pashent cu ta haci nan mesun dialisis na cas, cual ta e dialisis peritoneal. E cantidad di caso-

nan, esta mas of menos 140, pa Aruba ta hopi, dr. Kock a bisa, añadiendo cu algun tempo pasa tabata asina cu Aruba mester a recori na e opcion pa manda pashentnan afo pa haci dialisis pasobra no por a acomoda tur pashent manera mester ta na Aruba. E decision aki tabata a consecuencia cu Aruba conoce un crecemento significante di pashent nobo aña pasa cu mester a wordo acomoda pa dialisis cronico y acuut. Ta keda bin pashent nobo, dr. Kock a bisa. El a splica cu mayoria di e personanan cu ta sufri di malesa di riñon ta diabetico y/of ta sufri di presion halto y den algun caso ta trata di personanan cu tin malesa di riñon den famia. El a elabora: e prome causa di malesa di riñon na Aruba ta diabetes y e di dos ta presion halto y ta esencial pa pashentnan cu ta sufri di e dos malesanan aki controla nan malesa bon pa esaki no

resulta den daño na e riñon, cual cu tempo ta bira pio y por causa cu e organo aki ta stop di traha. Dr. Kock a pone enfasis riba e importancia di cuido propio; “E ta simpel, si bo cuido bo salud, bo ta cuida bo riñonnan tambe.” E specialista a pidi pa specialmente pashentnan cu ta wordo manda pa e departamento di nefrologia no spanta ora cu e tratamento cu rekeri, esta dialisis ta wordo menciona. No keda sin bay e cita y no keda sin sigui instruccionnan pa bolbe y sigui e tratamento necesario, pasobra ora cu acudi despues cu kehonan ya e riñon(nan) por ta hopi mas pio. “Dialisis NO ta mata bo”, Dr. Kock a subraya, añadiendo cu e malesa di riñon no ta curabel, pero si por trat’e cu dialisis, unda cu e pashent por sigui biba cu e malesa. Ta lamentabel ora e pashent ta spanta y no ta acudi na e specialista of no ta bolbe pa su tratamento.

E specialista a indica tambe cu ta sumamente importante pa pashentnan di diabetes y presion halto y personanan cu tin malesa di riñon den famia controla e funcionamento di nan riñonnan regularmente. E chekeo aki ta consisti di simpel testnan di sanger y orina cu por wordo pidi pa e dokter di cas tambe. Mayoria di pashent di malesa di riñon cu ta cuminsa tuma dialisis na Aruba ta entre 55 pa 60 aña, pero tin algun pashent mas jong tambe, kende principalmente ta diabetico. Cuida bo salud, control a riesgo pa bira un pashent di dialisis. Esaki por pa medio di miho custumber diario manera come saludabel, stop cu salo, practica mas movecion y bebe mas awa. Daño na e riñon no ta manifesta su mes di biaha, pero despues di algun aña y prevencion ta e miho forma pa evita esaki.


DIABIERNA 14 MAART

, 2014

SEÑOR TA BISA“AMI Y AMI SO TA SEÑOR, FUERA DI MI NO TIN NIUN SALBADOR. T’AMI A TRECE SALBACION, T’AMI TAMBE A ANUNCI’E Y PROCLAME…”, ISAIAS 43:11,12

AZV a bira un pos sin bom Ultimo tempo por lesa di hopi caso na Merca, caminda tera ta habri guliendo tur loke tin riba dje. E buraconan a bira conoci como “sinkhole”, caminda hasta parti di casnan grandi ta bay abou, auto of mashinnan grandi y e fenomeno aki a tuma luga na otro partinan di mundo tambe. Aki na Aruba tin un situacion igual caminda un buraco grandi ta guliendo tur loke tin riba dje pero no riba tera, pero den cuido medico y cu yama AZV. Minister encarga cu Salubridad Publico, drs Alex Schwengle a confirma siman pasa cu mester hisa e prima di AZV ya cu di otro forma e fondo lo core peliger loke ta bolbe mustra e instabilidad di henter e proceso aki, relaciona cu e seguro medico general aki. Loke ta curioso di e declaracion aki ta e hecho cu na luna di November di 2013, den un entrevista cu ArubAwe, ex Minister encarga, Richard Visser a declara lo siguiente riba esaki: “A logra di wanta e gastonan di AZV di un forma mas stabiel. Tambe nan a logra baha e costo di medicinanan.” Pues den cuestion di algun luna henter e sistema a cay den otro te cu ta rekeri medidanan pa cu henter e seguro aki? Hecho ta cu aumento di prima di AZV no ta garantia cu e fondo lo supera su problemanan y cu den futuro e fondo no ta rekeri mas aumento di prima ya cu tin desaroyonan den henter e sistema di cuido medico, cu ta come cualkier inversion extra cu drenta y pone e cliente paga mas ta mescos cu carga awa hiba lama. Tin varios situacion cu no ta bon den henter e sistema di cuido medico na e momentonan aki, cu tur hende por mira cu e ta costando placa sin cu e cuido ta bira miho di dje Pa menciona solamente algun, tin hende ta bay nan dokter di cas mainta ya cu nan ta malo, ta wordo atendi y ta ricibi recept pa bay busca remedi pero den oranan di atardi laat e persona aki ta bira mas malo y e ta bay Poli pa tratamento, caminda e ta bolbe wordo trata y ta bolbe haya remedi pa e bay su cas. Pues un pashent, dos tratamento y dos tipo di remedi y manera e caso aki tin cantidad cu no na luga di yuda rebaha e gasto di cuido medico, ta aumenta esaki sin mas cu tur consecuencia cu esaki lo por tin. Tin un persona cu a sufri un lesion na wowo, den su wowo pa ser exactamente pero ora cu el a busca un cita cu specialista di wowo, el a haya un luga aki dos luna y mei, loke ta nifica cu e persona aki lo tin cu sigui uza remedi pa e wowo, loke ta mas gasto pa AZV, kizas e ta rekeri mas tratamento di su dokter di cas loke tambe ta mas placa di AZV y pa colmo e ta core riesgo cu ora cu e bay aki dos luna y mey pa e specialista, su tratamento ta rekeri un intervencion mucho mas serio y costoso, loke por a wordo evita si el a haya ayudo y atencion mesora. Asina por sigui mustra riba cantidad di caso mas, entre otro caminda hende muhe ta bay cu keho di dolor di pecho na dokter y nan ta bin haya un turno pa haci un eco aki tres luna y aki tambe e persona aki ta rekeri tratamento

mientras tanto. Etin cu sigui bishita su dokter, sigui haya remedi, sigui haya cualkier tipo di ayudo “tanten” y cu e probabilidad grandi cu ora cu e haya e turno pa bay haci e test aki, su dolor di pecho a bira algo mucho mas serio y mucho mas complica cu lo ta mucho mas costoso. Minister Alexc Schwengle recientemente a mustra cu varios ocasion, cu prevencion ta e miho forma pa atende cu reduccion di gasto medico y ta un argumento cu ex Minister Richard Visser tambe a uza y cu tin cierto berdad den dje. Pa añanan caba a bin ta haciendo cantidad di ehercicio, tuma medida pa reduci e costo di AZV y ex Minister Visser a inicia henter un serie di programa pa reduci obesidad, pone hende move pa asina traha preventivamente riba salud di comunidad. Sinembargo mas y mas ta keda confirma cu ni maske cuanto traha den e direccionnan aki, ta rekeri participacion di esunnan cu ta brinda cuido medico, pa busca un forma pa yuda baha e gastonan aki, pero loke ta dificil pa kere cu esaki lo sosode ya cu pa dokter- y specialistanan coopera pa baha gastonan di AZV, esey lo nifica baha nan propio entrada y eynan e problema mayor ta sinta. Cua di nan kier cobra menos, kier gana menos pa coopera pa reduci gastonan di AZV y aki ta caminda tin cu spera un aporte diferente for di e actual Minister di Salubridad, Alex Schwengle, ya cu e ta un medico di profesion y su experencia mester faborece clientenan di AZV. Tur consultorio di dokter ta yen, caminda hasta pa haya un luga cerca dokter di cas, tin cu pidi cita of bay di marduga ya cu di otro forma pa e dia ey, bo ta keda sin wordo trata. Hisa prima di AZV ta mescos cu lapi un tire plat c’un pleister, ya cu lo no dura mucho cu e problema tey atrobe. Pa colmo tin trabounan di reconstruccion y remodelacion di hospital ta bay inicia cu ta bay complica e situacion ainda mas y cu lo bay haci cuido medico ainda mas costoso den futuro. Tin situacionnan den cuido medico cu no ta cambia y eynan ta sinta un problema serio y grandi, ya cu den hopi caso, ta hunga cu bida di hende, kendenan ta confia den e tratamento cu nan ta ricibi, sin cu nan tin nocion si esaki ta esun corecto of no. Cosnan cu simplemente no ta cuadra y cu nos no por compronde, manera entre otro c’un personal di siguridad ta atende pashentnan riba cierto dia na hospital, pa traha cita of cualkier otro asunto, cu simplemente no ta corecto. Pa loke ta remedi den hopi caso a bay over na uza remedi “generico” of alternativo pero den hopi caso e pashent lo tin cu uza mas di e remedi aki pa realmente e tin un efecto riba e tratamento cu e ta uza, pues ta algo completamente contradictorio. Algun ta logra acumula placa pa bay den exterior y busca solucion pa nan salud pero no ta tur hende tin e capacidad aki y tin cu keda confia riba un sistema cu no ta dunando tur momento e cuido adecuado cu e tin derecho ariba.

2


DIABIERNA 14 MAART

, 2014

24

Daniel’s Steak and Chop ta introduci Early Bird Menu special pa maart y menu special pa local

Diamars Gianni’s Group a tene un rueda di prensa Daniel’s Steak and Chop restaurant pa introduci nan Early Bird menu di AWG.50,- cu ta solamente valido entre 4:30PM pa 6:30PM na Daniel’s Steak and Chop. E Early Bird Menu aki ta pa e luna di maart caminda ta celebra nos himno y bandera 18 di maart. Esey ta e motibo cu Daniel’s Steak & Chop a bin cu un special pa e comunidad di Aruba. Daniel’s Steak and Chop ta un all American steak house cu ta grill carni riba un “Charcoal” Grill cu ta duna e carni un sabor suculento. Su seasoning ta consisti di salo y peper y

naturalmente un toke special cual nos lo mantene un secreto. Daniel’s Steak and Chop ta purba di haci uso di productonan hopi natural y saludabel. Pero naturalmente kedando den e norma di no perhudica e sabor y calidad di nos carni. E Early Bird Menu ta un 3-course menu cu diferente choices di plato pa disfruta di un cena completo. E early bird menu ta encera un appetizer; sea ta Escargot, Ceasar Salad, Homemade cream of potato soup of Pumpkin Soup. Ta sigui cu e plato principal cu ta opción entre Mixed Grill cu ta consisti di Filet Mignon, Spanish Sausage, Shrimp y Chick-

en Filet, Stroganoff of Black Angus Beef Tenderloin, Grilled free range Organic Cornish Hen of New York Strip Steak, 8oz. E seleccion di dessert ta: Profiterole (soesjes) Key West Key Lime, Strawberry Sorbet, Ice Cream of e famoso Mango Guava Cheesecake. Na banda di e Early Bird Menu di AWG.50,- tin un otro menu special pa localnan cu ta AWG.65,- y e menu aki ta pa cualkier momento cu pueblo di Aruba ta desea di come un dushi steak den un ambiente ameno. E menu di AWG.65,tambe ta un 3-course menu cu choices di un appetizer; Ceasar Salad Cream of Pumpkin, Cajun Crab Cakes cu ta traha cu Daniel’s home made tartar sauce. E plato principal ta entre otro; T-Bone Steak, Mixed Grill, Fresh Caught Salmon y 1/2 Grilled Chicken. Finalmente e dessert; Profiteroles, Iced Cream (Vanilla, Nutella of Strawberry Sorbet), e delicioso creamy Key West Key Lime. Daniel’s Steak and Chop ta par-

ti di Gianni’s Goup cu ta consisti di 7 compania cu ta; Daniel’s Steak and Chop, Gianni’s Ristorante Italiano, Amore Mio, Gelatissimo, Confession Club, Azzurro y The Beach bar cual e dos ultimonan menciona ta keda na Playa Linda (Happy Hours di 12:00PM to 4:00PM y di 7:00PM pa 9:00PM) Ademas di esaki nos kier a informa pueblo di Aruba cu Amore Mio ta ofrece delivery pa e area di Ritz Carlton pa Bushiri Hotel y e area di Noord. Pa cualkier evento Gianni’s Group ta ofrece catering pa cualkier evento y nos ta bay e “extra mile” pa complace nos guestnan.

Pa mas informacion por bishita nos website www.giannisgroup.com of bishita y like nos paginan di Facebook. Y di awor nos di Giannis Group kier a desea e pueblo di Aruba in general un feliz dia di Himno y bandera.

Na bispo di Dia Mundial di Riñon

Fundacion Kidneys 297 ta reuni cu Minister dr. Alex Schwengle World Kidney Day a wordo conmemora diahuebs, dia 13 di maart, unda cu internacionalmente, pero na Aruba dokternan y personal medico, como tambe organisacionnan trahando na beneficio di pashentnan y riba e tereno di conscientisacion y prevencion di malesa di riñon ta subraya e importancia di e organo aki pa e ser humano. Na Aruba, e organisacion Kidneys 297 a produci un publicacion “Transplante di Riñon”, cual ta relata e experiencia di un acompañante di un pashent cu a bay haci transplante na Hulanda. E buki, cu ta obtenibel na Superfood y Van Dorp ta contene conseho, splicacion y contesta pa hopi pregunta cu e pashent y/of compañante di e pashent por tin pa cu e tratamento, cuido, etc. di e pashent. Pa introduci e fundacion cerca Minister di Salud, dr. Alex Schwengle y papia cune tocante nan trabao y plannan pa e siguiente dos añanan y mas den futuro e presidente, secretario y tesorero di e Fundacion Kidneys 297 tabata di bishita riba diaranson cerca e mandatario. Presidente di Fundacion Kidneys 297, Monet

Jones a bisa cu e reunion cu Minister Schwengle a bay den bon ambiente. Hunto cu Deborah Alexander, tesorero y Jennifer Margareta, secretario, el a introduci nan publicacion na e mandatario. Nan a splica tambe cu primordialmente nan trabao ta den area di prevencion, pero cu den futuro e intencion ta pa Fundacion Kidneys 297 tambe brinda sosten na pashentnan di malesa di riñon, pero nan no ta cla ainda pa ta activo riba e tereno di sosten. Monet Jones a splica cu e fundacion ta den contacto cu Nefrologo na hospital, dr. Kock y tambe cu nan lo bishita e centro di dialisis nobo na IMSAN proximamente. Tambe e fundacion tin relacion cu Departamento di Salubridad, IBISA y SVb pa crea mas oportunidad, mas sosten y mas cooperacion pa nan trabao di conscientisacion y prevencion. E mensahe di Fundacion Kidneys 297 ta cu tur hende tin dos riñon y mester percura pa cuida nan riñonnan y asina evita malesa cu por resulta den dialisis, transplante of complicacionnan pio; “Bo Riñonnan, cuida nan, mientras bo edad ta avansando, e funcion di bo riñon ta disminui.”


DIABIERNA 14 MAART 2014

PAGINA 39

DIARIO

“A yena dos auto completamente yen cu productonan cu a vence”

Departamento di Salubridad Publico y Polis a ruim of de boel den algun Supermercado ORANJESTAD (AAN): E ta hopi fastioso pa menciona, pero algun comerciante na Aruba ta pensa cu Aruba ta un Free for all y no tin control. Algun di nan ta kere cu nan por haci kico nan kier y no tin ningun instancia pa controla of bisa nan algo. Well, nan number a hunga na momento cu Departamento di Salubridad Publico compaña pa Polis a haci un bishita di sorpresa na Sunny Supermarket cu ta situa na Saliña Cerca. DIARIO mester menciona cu na e Supermercado aki, Departamento di Salubridad Publico a yena dos auto completamente yen cu productonan cu a vence. Varios producto cu hende ta come of bebe, mester a

worde tira afo. E doño di e Supermercado a ricibi un scual enorme y alaves un Multa basta pisa. Esaki no ta e prome biaha cu esnan responsabel pa controla mester a atende cu e Doño di e Supermercado. Ta parce cu e no ta siña su les y ta kere cu Aruba ta un free for all.


PAGINA 52

DIABIERNA 14 MAART 2014

DIARIO

Solange Tchong vocero di AZV: 

E sistema di budget cu AZV ta uza ta comun na hopi pais  ORANJESTAD (AAN): Recientemente tabatin un caso den Corte cuminsa door di un laboratorio priva contra AZV pa motibo cu nan ta haya cu e compania di seguro contra malesa den forma unilateral a pone un presupuesto pa e servicio cu e laboratorio ta duna na AZV.  Solange Tchong, vocero di AZV, a splica cu for di momento cu AZV a wordo lanta, e intencion tabata yega algun dia na miho palabracion den contrato den e prijs cu ta wordo paga pa servicio. AZV kier prijs y tarifanan transparente pero tambe prijs y tarifa cu ta husto pa loke AZV ta cumpra pa duna na aseguradonan. Esaki, el a bisa mester ta den balansa cu calidad di cuido. Bon prijs, y bon cuido medico cu ta wordo duna. For di 2001 te awor e intento di AZV ta pa yega na negociacionnan unda hunto cu esnan cu ta duna cuido por yega na un tarifa mas husto pa e pueblo di Aruba paga. No mester lubida cu esnan cu ta paga premie ta contribui na AZV cu mester ta un seguro solidario pa pueblo di Aruba. Refiriendo na e tussenvonnis den e caso cu Laboratorio Familiar a cuminsa, sra. Tchong a bisa, ta indica cu e sistema di budget cu AZV a opta pe Corte no tabata di acuerdo cune y ta di opinion cu lo mester bay na tarief verlaging, pero no impone e presupuesto. AZV ainda ta di opinion cu esaki ta e miho manera. E organisacion ta basa su mes riba e argumento cu si wak rond na mundo, manera Canada of Hulanda, bo ta mira cu usando sistemanan di presupuesto, cu ta

palabra adelanta kico tin pa e area of e grupo di cuido cu ta duna cierto servicio. “E ta un instrumento cu ta uza pa maneha bo contractonan, haci compras, y ta un sistema comun na otro paisnan cu tin un sistema di AZV na nan pais. Nos argumento ta keda cu pa nos esaki tabata e unico forma of instrumento pa nos haci uzo di dje. Nos no a actua robez y hasta nos ta evaluando pa bay den Hoger Beroep,” el a duna di conoce. Tambe el a bisa cu AZV a bini cu e sistema di “Budget” pasobra e añanan anterior a pidi (2010 bin ariba) a pidi e laboratorio mas informacion denter di nan datonan, esta habri buki pa mustra AZV kico ta tur nan gastonan – maneho diario y produccion. Pa di e manera aki hunto por yega na un solucion. Pero den mayoria caso no a haya e colaboracion, y nan no tabata habri pa duna mas informacion pa hunto yega na un miho palabracion. E otro laboratorionan si a duna e informacion necesario. Esey a haci cu na dado momento AZV no por haci otro cu bisa cu ta bay over na palabra un “budget”. E ta admiti cu esaki e ora ta bira un reto pa e laboratorionan maneha nan produccion pero trahando cu “budget” ta haciendo uzo di un sistema cu ta comun na otro paisnan. Ta keda na e laboratorio pa wak di ki forma e por haci e trabou mas eficiente posibel. El a duna e ehempel cu e Laboratorio por evalua ora demasiado test ta wordo haci tras di otro y mester manda un señal pa dunado di cuido of AZV kico ta tumando luga. Un parti di nan tarea

ta cu nan tin un miho bista di kico ta testnan realmente

necesario of cu ta wordo haci demasiado biaha tras di otro,

kizas cu ningun resultado diferente.



Vos 14314