Issuu on Google+


DIARANSON 26 MAART

, 2014

2

SEÑOR TA BISA“PA AMOR DI MI RUMANNAN Y AMIGONAN MI TA BISA: PAZ PA BO!. CORDANDO CAS DI SEÑOR, NOS DIOS: DIOS BENDICIONA BO”, SALMO 122:8,9

OCAN ta enfatisa

Prome Minister Hulandes ta continua cu stereotypificacion di colonialismo E tabata un video cu a plama rond di FB particularmente den e comunidad Hulandes Caribense. Un video di un contesta di Prome Minister Hulandes Mark Rutte riba pregunta riba su sosten na Zwarte Piet y posibel margenalisacion di un grupo cu ta sinti su mes discrimina cu e figure aki y un eventual peliger pa coumunidad. Un periodista puntra Premier Rutte con e por garantisa siguridad nuclear si e no por atende cu problemanan social den su propio pais. Como ehempel a uza e expresionnan di Geert Wilders y e inquietud cu a lanta debi na e fenomeno di Zwarte Piet. Rutte a mustra con berdad el a para contra expresionnan di Wilders cu a grita pa ‘Menos Marokano,’ pero a bisa cu ‘Zwarte Piet ta preto, mi no por haci nada cu esey. Esey ta su nomber.’ Despues el a laga informa cu e tradicion di Sinterklaas a cambia hopi biaah cu tempo y cu cambio no ta para ni a tradicion of e fiesta. Segun OCAN, Overlegorgaan Caribische Nederlanders, pa medio di su presidente Glenn Helberg, Rutte a ignora totalmente e sentimento y opinion di un grupo di populacion Hulandes y institucionnan di derechonan humano. Esnan pues cu netamente ta indica cu Zwarte Piet ta discriminante, basa riba un combinacion di karakteristicanan negativo cu no por los di e colo di e persona cu riba dje ta carga den su mesun nomber. Un Prome Minister pinta den otro realidad E Prome Minister a sugeri cu Zwarte Piet no ta un problema den sociedad Hulandes, pasobra e ta un tradicion di mucha hopi bieu y tampoco e ta un problema den Reino. “Mi amigonan den Antias Hulandes ta hopi contento cu ora cu nan por celebra Sinterklaas, pasobra nan no mester pinta nan cara y ora mi mes pinta su mes na Zwarte Piet, e asistenten contento, e ta keda dianan tras di otro pa kita e makiyahe.” Segun Helberg, Rutte a indica cu door di kita e makiyahe e ta biba den un otro realidad , algo cu su amigonan na Antias Hulandes no por haci. “E ta drenta e ora den

e mundo previlegia di e homber blanco. Su amigonan ta sigui biba como hende preto, no den e tradicion di e fiesta di mucha, pero den e tradicion di e pensamento antiguo di stereotypificacion di e hende di colo. Un hende colo scur cu no ta evalua riba locual e por, sino riba colo di su cuero. Y esaki no ta un previlegio.” Tur Antiano ta preto Mas ainda, e palabranan di Prome Minister Rutte ta mustra cu e no conoce e constelacion di e populacion di Caribe Hulandes. E ex paisnan Antiano desde e pasado di sclavitud Hulandes y colonialismo conoce un constelacion di populacion multicultural, di colonan diverso. “Nos por conclui cu e amigonan di e Prome Minister di Hulanda na ex Antias Hulandes ta unicamente hendenan preto. Nos lo kier mira ken ta e amigonan aki. E lo ilustra sigur cu e Prome Minister, apesar di e variacion grandi den colo di hende, ta califica tur como preto y cu e ta considera cu tur su amigonan lo tuma nan colo natural preto pa sirbi como un sirbiente di un homber blanco.” Discriminacion ta castigabel Segun OCAN Rutte a hinca su mes den un skina, awor cu su mesun Vice Prome Minister Lodewijk Asscher den e programa Pauw & Witteman y den Parlamento Hulandes ta subraya cu discriminacion den tur forma ta castigabel. Cu introduccion di Zwarte Piet den

e fiesta di Sinterklaas na 1850 no tabatin ningun otro asocicacion cu hendenan scur cu no ta e populacion esclavo den e islanan den region di Caribe. Awor, mas cu 150 aña despues, ainda ta existi un conotacion entre Zwarte Piet y e karakteristicanan di un esclavo, y esaki ta prueba cu no tabatin emancipacion di e pensamento colonial y poco conocemento di Codigo Penal. “Nos por conclui cu e Prome Minister di Hulanda, ta apoya e fenomeno di Black Face na Hulanda y den Reino. Apesar cu e fenomeno aki ta considera den exterior como racista. Apesar cu Colegio di Derechonan Humano na Hulanda cu ta mara na Nacionnan Uni, ta considera e fenomeno di Zwarte Piet como racista. Aunke cu esey lo no ta e intencion. Pero e ta ignora tur esaki.”  Prome Minister Rutte cu ta representante di Reino Hulandes den exterior ta ilustra cu e no sa nada di historia con Zwarte Piet a nace, Helberg a sigui bisa. “Den nos opinion,e no ta asumi responsabilidad pa e slavitud comparti den Reino y e forma con a trata hendenan di colo.” Reaccion di Rutte ta un prueba cla di e hecho cu e division di e comunidad colonial y e liñanan di division colonial ta sigui den e forma di mira post colonial. “Prome Minister Rutte ta sigui cu e politica colonial cu ta di dividi y dirigi entre e comunidad preto di Reino. Rutte por kita su pintura preto, pero no su forma di pensa colonial, e Presidente di OCAN a bisa. “E pregunta cu ta lanta ta si esaki ta e Prome Minister di tur Hulandes y representante di henter Reino den exterior.” OCAN lo acerca Rutte pa papia riba e Afrophobia cu ta biba na Hulanda y den Reino. E lo tin e posibilidad pa elimina e impresion cu tin di dje, como racista y colonialist. “Laga e comberacion ta un contribucion na un cambio di pensamento riba Hulandesnan preto, un contribucion na un fin definitivo na e forma di mira colonial y e comienso di un maneho real riba derechonan humano den Reino,” Glenn Helberg a conclui.

Tarifa di Arubus lo subi pa 2.50 florin Ta recomendabel pa clientenan haci uzo di “Advantage card” E tarifa di Arubus lo subi pa 2.50 florin, asina sr. Teo Croes di Arubus a confirma durante un conferencia di prensa ayera. El a bisa cu di otro banda e uzo di e carchi cora of “Advantage card” ta yuda pa reduci e prijs ya cu e idea tras di dje ta di haya mas usuario cu ta uza bus. Sr. Teo Croes a declara cu Arubus ta hayando mas usuario pa motibo cu auto ta mas caro, seguro y tire a bira mas caro, etc... Di e forma aki Arubus ta percura di facilita e servicio na un miho tarifa, y si di otro banda e acceso ta mas viabel e ta kere cu e compania di transporte urbano lo por aumenta e cantidad di usuarionan.

Sr. Croes a bisa cu Arubus ta implementando full un plan caminda e usuarionan ta mas comprometi cu e compania. Tambe otro hende cu no tabata custumbra cu e servicio di Arubus lo bay opta p’e. E ta conseha cu e clientenan cu ta haci uzo frecuente di e servicio di Arubus pa cumpra e carchi cora of “Advantage card”, ya cu esaki lo resulta mas faborabel y bentahoso pa nan. E ta resulta faborabel specialmente pa e hendenan di San Nicolas ya cu nan mester move di San Nicolas-Oranjestad-hotel area, pa nan ta uzo di “Advantage card” ta nifica un descuento, ya cu pa nan ta bira 2 florin uzando e carchi cora.



Hol 26314