Kolga 2018 issue

„ქოლგა თბილისი ფოტოს“ დაჯილდოვება სხვა საერთაშორისო კონკურსების მსგავსია: სხვადასხვა კატეგორიაში გამარჯვებულების გარდა, ყოველწლიურად დაახლოებით 100 სერია და ერთი ფოტოს კატეგორიაში მონაწილე ნამუშევარი შორთლისტში ხვდება და ფესტივალის კატალოგსა და ვებ გვერდზე ქვეყნდება. თავის მობილურ სერიაში ხავიერ არსენილიასი (მადრიდი) ახლებურად აწყობს ყოფილი ზესახელმწიფოს, საბჭოთა კავშირის პოლიტიკურ, ესთეტიკურ და კოსმოსური საქმის საკულტო გამოსახულებებს და იუმორით უკავშირებს ერთმანეთს ისტორიულ ჩანაწერებს, მონუმენტებს, არქიტექტურას და მუზეუმებს. ის კოლაჟის სახით წარმოადგენს თავის ნამუშევრებს. სპუტნიკი ბრუნდება! ქრისტიან ვერნერი (ჰანოვერი, გერმანია) თავის რეპორტაჟში „ქვაღორღი და იმედგაცრუება. ასადის სირიაში მოგზაურობა“ გვიამბობს ალეპოს, ლატაკიას და ჰომსის ნგრევის შესახებ, სრულიად გაუკაცრიელებული და დანაღმული ქალაქების პანორამების თუ ყველასგან დავიწყებულ ადგილას შიშით აღსავსე სამოქალაქო ცხოვრების მომაჯადოებელი წამების მოხელთების საშუალებით. ჯულიო დი სტურკო (ლონდონი-ბანგკოკი), თავის კონცეპტუალურ სერიაში „ქალაქი-აეროპორტი. როგორ ვიცხოვრებთ მომავალში“ წარმოგვიდგენს კონტექსტისგან გამოცლილი ქალაქის მოდელს, თავბრუდამხვევ ხედებს და მგზავრების, მომხმარებლების, მიმწოდებლების და უზარმაზარ აეროპორტებში მოსიარულე საერთაშორისო მოთამაშეების შორეული, ფუტურისტული, დროებითი გარემოს ხელოვნურ სამოთხეს, თავაშვებული ტექნოლოგიური კულტის ნათელ ტრანზიტულ ზონაში. თავის მეტისმეტად ამაღელვებელ დოკუმენტურ სერიაში „ძაღლური სიყვარული“ კარლ მანჩინი (რომი) უსახლკარო ახალგაზრდების ჯოჯოხეთში გვამოგზაურებს ბუენოს აირესის ღარიბულ რაიონებსა და სამრეწველო ობიექტებში. სიყვარული და ტკივილი, სისასტიკე და ნარკოტიკები ამ გზაზე გადარჩენის საშუალებად იქცევა; რისხვა და უუფლებობა, კრიმინალიზაცია და კორუფცია, მარტოობა და სოლიდარობა. სებასტიენ ლებანი (საფრანგეთი) ერთი კადრის ნომინაციაში წარმოგვიდგენს ქუჩის სცენას ძირითადად ახალგაზრდა ორთოდოქსი ებრაელების მონაწილეობით იერუსალიმში. ისინი პურიმს — „ესთერის წიგნის“ მიხედვით ებრაელი ხალხის ხსნას — დიდი ზარ-ზეიმით აღნიშნავენ, რაც რელიგიური სიხარულის, კარნავალური პაროდიის და ალკოჰოლური ანესთეზიის სინთეზში გამოიხატება. დათო ქორიძე (საქართველო), თავისი მობილური ერთი კადრით, „პროტესტს“ გამოხატავს სასიგნალო შუქის წითელი ნისლით. რისხვის ობიექტი უხილავი რჩება, შეტყობინება კი ასეთია: რაღაც უნდა შეიცვალოს.

Newcomer-ის ნომინაციის გამარჯვებული ოლე ვიტი (ჰანოვერი, გერმანია) თავის ნამუშევარში „საინფორმაციო ბიურო — ადმინისტრაციის ავტომატური ქმედებები“ იკვლევს ინდური ბიუროკრატიის პარადოქსებს მთის მწვერვალების, კომპიუტერიზაციის გაუბედავი მცდელობებისა და ბიუროკრატიის მიმართ ადამიანების გასაოცარი სიმშვიდის ფონზე.

ჟიური: ლარს ლინდემანი, რიჩარდ ბრემი, ნიკოლაი ლაოტლიევი, თინა შელჰორნი